ပၢင်တိုၵ်းဝႃႉတင်းတႆး ပွတ်းႁူဝ်ပၼ်ႇႁူဝ်ၶဵၼ်းယဝ်ႉတူဝ်ႈၵႂႃႇ၊ ၵူၺ်းၵႃႈ တင်းသွင်ၾၢႆႇယင်းပႆႇထွၼ်သိုၵ်း။ ၾၢႆႇဝႃႉၸႅင်ႈ တီႈတႆးဝႃႈ ပၢင်တိုၵ်းဢၼ်ပဵၼ်ၵႂႃႇၼၼ်ႉ ဢမ်ႇလႆႈတင်ႈၸႂ်။

ၵဵဝ်ႇၵပ်းလွင်ႈၼႆႉ ဢွၼ်ၼႃႈၼႆႉ သိုၵ်းဝႃႉ [တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA)] တင်းၸုမ်းၶုတ်းၶမ်း၊ ၸုမ်းတႅပ်းမႆႉတႅပ်းတွၵ်ႇ လုၵ်ႉတၢင်းဢွၵ်ႇၶူင်း ၶၢမ်ႈၵႂႃႇတၢင်းတူၵ်းၶူင်း၊ ၵႂႃႇၶုတ်းၶမ်း ပွတ်းထုင်ႉႁူဝ်ပၼ်ႇ ႁူဝ်ၶဵၼ်း၊  (ၸႄႈဝဵင်း မိူင်းပၼ်ႇ) ၸိုင်ႈတႆးပွတ်းၸၢၼ်း။ ထိုင်မႃးဝၼ်းတီႈ 02/04/2014 တပ်ႉသိုၵ်းၸိုင်ႈတႆး (RCSS/SSA) တင်း တူင်ႉၼိုင်ၵၢၼ်သိုၵ်း မႃးႁူပ်ႉႁိုၵ်ႉ သႂ်ႇသေ သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း ပွတ်းႁူဝ်ပၼ်ႇႁူဝ်ၶဵၼ်း။ ဝၢႆးၼၼ်ႉ သိုပ်ႇဝႅတ်ႉၵၼ်ဝႆႉသေယိုဝ်းၵၼ်မႃး၊ ၵူၺ်းၵႃႈ ဢမ်ႇႁၢဝ်ႈႁႅင်း။ ထိုင်မႃးဝၼ်းတီႈ 05/04/14 ယိုဝ်းၵၼ်ထႅင်ႈႁၢဝ်ႈႁႅင်း။ သိုပ်ႇမႃးထႅင်ႈဝၼ်းတီႈ 07/04/14 သိုၵ်းဝႃႉႁႅင်းသိုၵ်း လူတ်ႉၵႃး 10 လမ်း လုၵ်ႉတၢင်းဢွၵ်ႇၶူင်း ၶၢမ်ႈၵႂႃႇတၢင်း တူၵ်းၶူင်းထႅင်ႈသေ ပဵၼ်ပၢင်တိုၵ်းၵၼ်ထႅင်ႈ။

ဝၼ်းတီႈ 08/04/14 (မိူဝ်ႈဝႃး) ၽူႈၵွၼ်းတပ်ႉၸုမ်း 772 ယၢင်ၵေႃႇၵျူင်း ငဝ်ႈငုၼ်းႁူၺ်ႈဢေႃႈ တိတ်းတေႃႇ လၢတ်ႈမႃး တီႈသိုၵ်းတႆး (RCSS/SSA) ဝႃႈ- ဢၼ်ပဵၼ်ၵႂႃႇၼႆႉ ဢမ်ႇၸႂ်ႈဝႃႈတင်ႈၸႂ်သေပဵၼ်ၵႂႃႇ၊ ၾၢႆႇၸုမ်းဝႃႉၵေႃႈဢမ်ႇမီးၽႅၼ်ၵၢၼ် ပိူဝ်ႈတႃႇတိုၵ်း ယိုဝ်းတႆး၊ မၼ်းယူႇတီႈၸုမ်းဢဝ်ႁူမ်ႇလူမ်ႈ ၸုမ်းၶုတ်းၶမ်း ၶဝ်ႁဵတ်းပဵၼ်ၵႂႃႇၵူၺ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႇသီႇဢဝ်ၶိုၼ်းၸိုင်ႈတႆး (RCSS) ၵေႃႈလၢတ်ႈဝႃႈ- ႁဝ်းၵေႃႈတိုၼ်းဝႃႈ ဢမ်ႇမီးၽႅၼ်ၵၢၼ်ပိူဝ်ႈတႃႇတိုၵ်းယိုဝ်း။ ၵူၺ်းၵႃႈ သင်ဝႃႈၸုမ်းဝႃႉတေၶၢမ်ႈမႃးတၢင်း ၾၢႆႇတူၵ်းၶူင်းၸိုင် ထုၵ်ႇလီလႆႈပွင်ႇလၢတ်ႈႁဝ်း၊ ပေႃးပွင်ႇလၢတ်ႈမႃး တေဢမ်ႇမီးပၼ်ႁႃသင်။ တီႈတႄႉမၼ်း ဝႃႉတင်းတႆးၼႆႉ ဢမ်ႇဝႃႈလွင်ႈငမ်းယဵၼ်၊ ဢမ်ႇဝႃႈလွင်ႈၵၢၼ်တိုၵ်း ႁဝ်းထုၵ်ႇလီလႆႈႁူမ်ႈမိုဝ်းၵၼ်။ ၸုမ်းဝႃႉဢမ်ႇလီၶၢမ်ႈမႃးၾင်ႇဝၼ်းတူၵ်းၶူင်းၼႆၵေႃႈ ႁဝ်းဢမ်ႇဝႃႈ၊ သင်ၸိူဝ်ႉဝႃႈလွင်ႈငမ်းယဵၼ် ပဵၼ်ၵၢၼ်ၼႆၵေႃႈ ႁဝ်းႁူမ်ႈမိုဝ်းၵၼ်ႁဵတ်းသၢင်ႈၵႂႃႇ၊ ပေႃးဝႃႈလွင်ႈငမ်းယဵၼ် ဢမ်ႇပဵၼ်ၼႆၵေႃႈ ႁဝ်းထုၵ်ႇလႆႈႁူမ်ႈမိုဝ်း ၵၼ်တိုၵ်းၵႂႃႇ- ဝႃႈၼႆ။

လွင်ႈသွင်ၾၢႆႇပဵၼ်ပၢင်တိုၵ်းၵၼ်ၼႆႉ ၾၢႆႇတပ်ႉသိုၵ်းၸိုင်ႈတႆး (RCSS/SSA) ပွင်ႇလႅင်းဝႆႉတီႈတပ်ႉသိုၵ်းမၢၼ်ႈ ႁႂ်ႈၶဝ်ႈမႃးယူႇၵႄႈ ၵၢၼ်သေၸွႆႈၵႄႈလိတ်ႈပၼ်။ ၵူၺ်းၵႃႈ ႁၢၼ်ႉတေႃႇယၢမ်းလဵဝ် ၾၢႆႇတပ်ႉသိုၵ်းမၢၼ်ႈ ဢမ်ႇတၵ်းသဵင်သင်။ လွင်ႈၼႆႉ တူင်ႇဝူင်းပီႇတုၸိတ်ႉၼႂ်းၸႄႈဝဵင်းမိူင်းပၼ်ႇ ၵမ်ႈၽွင်ႈဝႃႈ- ၶဝ်ၶႂ်ႈႁႂ်ႈဝႃႉ တင်းတႆးယိုဝ်းၵၼ်ၵူၺ်း- ဝႃႈၼႆ။