လူတ်ႉၵႃးသိုၵ်းမၢၼ်ႈဢမ်ႇယွမ်းမွၵ်ႈ 60 လမ်း၊ လုၵ်ႉၼႂ်းၸိုင်ႈတႆးပွတ်းႁွင်ႇသေ မုင်ႈၼႃႈၵႂႃႇၸူးတၢင်း လႅၼ်လိၼ် မိူင်းၶၢင်။ ၾၢႆႇၼိုင်ႈၵေႃႈ လူတ်ႉၵႃးသိုၵ်းမၢၼ်ႈ လုၵ်ႉတၢင်းၶူဝ်လမ်ၶိုၼ်ႈၵႂႃႇတၢင်းၵႃလိ-ၵုၼ်ႁဵင် ၼပ်ႉႁူဝ်သိပ်းလမ်း။

လူတ်ႉၵႃးသိုၵ်းမၢၼ်ႈၸိူဝ်းၼႆႉ လုၵ်ႉတၢင်းဝဵင်းၼမ်ႉၶမ်း မုင်ႈၼႃႈၵႂႃႇၸူးတၢင်းလႅၼ်လိၼ်မိူင်းၶၢင် တင်ႈတႄႇမိူဝ်ႈသိုၼ်း (02/04/14) ၵၢင်ၶမ်ႈ တေႃႇထိုင်မိူဝ်ႈဝႃးတၢင်းဝၼ်းၼႆႉ တိုၵ်ႉၵႂႃႇယူႇတိၵ်းတိၵ်း။ ၵႃးၼိုင်ႈလမ်းတၢင်ႇသိုၵ်းမွၵ်ႈ 15 ၵေႃႉ၊ ၵမ်ႈၼမ် လႅပ်ႈတေတၢင်ႇၶိူင်ႈၵွင်ႈၵၢင်ႇမၢၵ်ႇမိုဝ်ႈၸိုၼ်းယၢမ်း။ ၶမ်ႈသိုၼ်းၵၢင်ၶမ်ႈ 10 မူင်းၶိုင်ႈ ၵႂႃႇ 16 လမ်း၊ မိူဝ်ႈဝႃး ယၢမ်း 12 မူင်းၶိုင်ႈ တေႃႇထိုင်ဝၢႆးဝၼ်းၼႆႉၵေႃႈ ၵႂႃႇယူႇတိၵ်းတိၵ်း ဢမ်ႇယွမ်း 41 လမ်း- ၸၢႆးဢၢႆႈ ဝဵင်းၼမ်ႉၶမ်း လၢတ်ႈ။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈ ၸိူဝ်းဢၼ်ႁူႉႁၼ်လၢတ်ႈဝႃႈ- သိုၵ်းမၢၼ်ႈၼႆႉ ပဵၼ်တပ်ႉၸုမ်းလူင် (တပ်ႉမ) 88။ ၵူၺ်းၵႃႈ တၢင်းၸုမ်းၶၢဝ်ႇၽူႈတွႆႇႁွၵ်ႈဢမ်ႇၸၢင်ႈယိုၼ်ယၼ်။

မိူဝ်ႈဝႃး 03/04/14 ယၢမ်း 13:30 မူင်းၼၼ်ႉ လူတ်ႉၵႃးသိုၵ်းမၢၼ်ႈ ဢမ်ႇယွမ်း 30 လမ်း၊ ႁွတ်ႈမႃးၽႅဝ်ထႅင်ႈ တီႈလၢၼ်ႇ/ၵဵတ်ႉ 105 လၵ်း တၢင်းၶဝ်ႈဝဵင်းမူႇၸႄႈ (သဵၼ်ႈတၢင်းလႃႈသဵဝ်ႈ-မူႇၸႄႈ)။ ၵူၼ်းယူႇၼႂ်းပိုၼ်ႉတီႈ ၵမ်ႈၼမ်လၢတ်ႈဝႃႈ- ပဵၼ်ၵွပ်ႈၸုမ်းၶၢင်ၶဝ် ဢမ်ႇပၼ် ၵေႃၵဵပ်းသဵၼ်ႈသၢႆမၢႆႁူဝ်ၵူၼ်း ၵႂႃႇၵဵပ်းသဵၼ်ႈသၢႆမၢႆ ႁူဝ်ၵူၼ်း ၼႂ်းပိုၼ်ႉတီႈႁိုဝ်- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈလဵပ်ႈႁဵၼ်းၵၢၼ်မိူင်းၶဝ်ၼႂ်းပိုၼ်ႉတီႈလၢတ်ႈဝႃႈ- သိုၵ်းမၢၼ်ႈႁၢင်ႈသိုၵ်း ပိူဝ်ႈတႃႇၵမ် ၵိၼ်းၶၢင်၊ ၽွင်းၶၢင်ၶဝ်တေၵႂႃႇဢုပ်ႇဢူဝ်းလွင်ႈငမ်းယဵၼ် တီႈတႃႈၵုင်ႈ၊ ႁႂ်ႈၶၢင်တူၵ်းလူင်း၊ ၸင်ႇသူင်ႇႁႅင်း သိုၵ်းမႃးၽိူမ်ႉထႅမ် တေႃႇၶၢင် KIA ၵေႃႈၸၢင်ႈပဵၼ်လႆႈ- ဝႃႈၼႆ။

ထႅင်ႈၾၢႆႇၼိုင်ႈတၢင်းၼိုင်ႈ လူတ်ႉၵႃးသိုၵ်းမၢၼ်ႈ ပႃႈတႂ်ႈတိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ် ၸိုင်ႈတႆးပွတ်း ၸၢၼ်းၵေႃႈ ဢမ်ႇယွမ်း 30 လမ်း၊ လုၵ်ႉတၢင်းၶူဝ်လမ် ၶိုၼ်ႈၵႂႃႇတၢင်းၵႃလိ-ၵုၼ်ႁဵင်၊ လႅပ်ႈတေမုင်ႈၼႃႈၸူး တပ်ႉသိုၵ်း ၸိုင်ႈတႆး SSPP/SSA တၢင်းဝၢၼ်ႈႁႆး- လႆႈႁူႉၼင်ႇၼႆ။