ၸဝ်ႈၼႃႈတီႈပလိၵ်ႈလွႆလႅမ် ၵႂႃႇသွၵ်ႈႁိူၼ်း ၵူၼ်းဝၢၼ်ႈႁူဝ်ၼႃး ၽွင်းၸဝ်ႈႁိူၼ်းဢမ်ႇယူႇႁိူၼ်း၊ ဢမ်ႇၺႃးၶူဝ်းၽိတ်း ၵေႃႈ သိုပ်ႇသွၵ်ႈထႅင်ႈႁိူၼ်းၼိုင်ႈ၊ ႁဵတ်းႁႂ်ႈၵူၼ်းဝၢၼ်ႈလုသုမ်း ၶူဝ်းၶွင်ၵႃႈၶၼ်ယႂ်ႇ။

ပူၼ်ႉမႃးမိူဝ်ႈဝၼ်းဢင်းၵၢၼ်းတီႈ 11/03/2014 ၵၢင်ၼႂ်ယၢမ်း 10 မူင်းပၢႆ၊ ပလိၵ်ႈမၢၼ်ႈလွႆလႅမ် 6 ၵေႃႉ မႃးၵူတ်ႇ သွၵ်ႈႁိူၼ်း မႄႈပႃႈမႂ်ႇ တီႈဝၢၼ်ႈႁူဝ်ၼႃး ဢိူင်ႇၶွၵ်းၼွႆႉ (ထုင်ႉမိူင်းပွၼ်) ၸႄႈဝဵင်းလွႆလႅမ်။ လွင်ႈတၢင်းမႃးသွၵ်ႈႁိူၼ်းၼႆႉ ၵွပ်ႈမီးၵူၼ်းတၢင်ႇ လၢတ်ႈဝႃႈ- ႁိူၼ်းမႄႈပႃႈမႂ်ႇ ၵႃႉၶၢႆယႃႈမႃႉ။ တီႈႁိူၼ်းၼၼ်ႉ တိၺွပ်းသႂ်ႇသေႃးမိုဝ်း ၸၢႆးထုၼ်းၵျႃႇ ဢႃႇယု 54 ပီ၊ ၸၢႆးထိင်ႇ ဢႃႇယု 35 ပီသေ ၸႂ်ႉၼင်ႈၵိုၵ်းသဝ် ၼႂ်းႁိူၼ်း၊ တေဢမ်ႇလႆႈၵႂႃႇလႂ်။

ပလိၵ်ႈၶဝ်သွၵ်ႈတဝ်ၼွၵ်ႈႁိူၼ်းၼႂ်းႁိူၼ်း၊ ၼႂ်းလုၵ်းၼွၼ်း။ ႁွင်ႉဢဝ်ၼၢင်းလူင် ဢႃႇယု 25 ပီ၊ လုၵ်ႈပႂ်ႉၸဝ်ႈႁိူၼ်း (မႄႈပႃႈမႂ်ႇ)ၸွမ်းတူၺ်းၶဝ် ၽွင်းမိူဝ်ႈၶဝ်သွၵ်ႈတဝ်၊ ယႃႉလႅဝ်သေႃးတိူၵ်ႈ လႄႈ သွၵ်ႈတဝ်ၼႂ်းႁိူၼ်းၸေးၸွတ်ႇ၊ ဢဝ်ၵွင်ႈၸမ်ႈၼၢင်းလူင် သေလွၵ်ႇငိုတ်ႈ ၸိူဝ်းၼႆႉ။ ၵူၺ်းၵႃႈ ၼၢင်းလူင်ၼႆႉ တႃဢမ်ႇပေႃးလီ၊ ႁူၵေႃႈလိုင်ႇ။ တီႈႁိူၼ်း မႄႈပႃႈမႂ်ႇၼႆႉ သွၵ်ႈတဝ်ဢမ်ႇ ႁၼ်ၺႃးၶူဝ်းၽိတ်းသင်။ ၵူၺ်းၵႃႈ ၽွင်းသွၵ်ႈတဝ်ၼၼ်ႉ ဢမ်ႇမီးၵူၼ်းလူင်ဝၢၼ်ႈ ၵူၼ်းလူင်ဢိူင်ႇမႃးႁဵတ်းၽူႈႁူႉႁၼ် (သၢၵ်ႈသေႇ) ၸွမ်း ။

ယွၼ်ႉသွၵ်ႈတဝ်တီႈႁိူၼ်းမႄႈပႃႈမႂ်ႇ ဢမ်ႇႁၼ်ၶူဝ်းၽိတ်းသင်လႄႈ ဝၢႆးၼၼ်ႉသိုပ်ႇၵႂႃႇသွၵ်ႈႁိူၼ်းၸၢႆးပိုင်း- ၼၢင်းလူင် ဢၼ်မီးၾၢႆႇၸၢၼ်းႁိူၼ်းမႄႈပႃႈမႂ်ႇ။ ၸၢႆးပိုင်းၼႆႉ ပဵၼ်လုၵ်ႈၸၢႆးမႄႈပႃႈမႂ်ႇ။ လႆႈယႃႈၾိၼ်ႇလမ် တီႈႁိူၼ်းၸၢႆးပိုင်း ၼမ်ႉၼၵ်းမွၵ်ႈ 50 ၶၼ်၊ ပလိၵ်ႈၶဝ်သမ်ႉဢဝ်မႃးဝႆႉတီႈႁိူၼ်း မႄႈပႃႈမႂ်ႇသေ ၸင်ႇတိတ်းတေႃႇသိုပ်ႇၾူၼ်ႊႁႃ ပူႇႁဵင်ဢိူင်ႇ ဝၢၼ်ႈၶွၵ်းၼွႆႉ၊ လၢတ်ႈလွင်ႈဝႃႈၶဝ်ႁၼ်ၶူဝ်းၽိတ်း။

ဝၢႆးၼၼ်ႉမွၵ်ႈ 10 မိၼိတ်ႉ၊ မႄႈပႃႈမႂ်ႇ၊ ပႃႈယိင်း၊ ၸၢႆးပိုင်း ၶဝ်လုၵ်ႉၵၢတ်ႇပွၵ်ႈမႃး၊ ၸိူဝ်းၶဝ် လႆႈႁၼ် ၼၢင်းလူင်ႁႆႈယူႇ။ မႄႈပႃႈမႂ်ႇထတ်းတူၺ်းထူင်ၶူဝ်းငိုၼ်းၶမ်း လႆႈႁူႉဝႃႈ ႁၢင်ၸွပ်ႇၵႂၢင်းသႅင်ႁၢႆၵႂႃႇ 5 သဵၼ်ႈ။ ပလိၵ်ႈၶဝ်ၵေႃႈလၢတ်ႈဝႃႈ ဢမ်ႇယုမ်ႇႁဝ်းႁႃႉ ၼႆသေၸႂ်ႉသွၵ်ႈၸွမ်းတူဝ်ၶဝ်၊  ၵူၺ်းၵႃႈ ဢမ်ႇမီးၽႂ်ႁဵတ်းသွၵ်ႈ၊ ၸင်ႇၸႂ်ႉၵူၼ်းလူင်ဢိူင်ႇ ဝၢၼ်ႈၶွၵ်းၼွႆႉ (ဢၼ်မႃးၽႅဝ်လိုၼ်းလင်) ၼၼ်ႉသွၵ်ႈ၊ ပူႇႁဵင်ၵေႃႈသွၵ်ႈၼင်ႇ ပူၼ်ႉဝူတ်ႈပူၼ်ႉဝၢတ်ႈ လုပ်ႈလၢပ်ႈၵမ်း တူၺ်း ဢမ်ႇတၼ်းၸွတ်ႇၵေႃႈ လၢတ်ႈဝႃႈဢမ်ႇမီးသင်- ၼႆယဝ်ႉ။

သိုပ်ႇၼၼ်ႉ ပလိၵ်ႈၶဝ်ၵေႃႈၵီႈလိတ်ႈ ပၼ်သေႃးမိုဝ်းဢၼ်မတ်ႉဝႆႉလုင်းထုၼ်းၵျႃႇလႄႈ ၸၢႆးထိင်ႇ၊ ဢဝ်ၵႂႃႇမတ်ႉမိုဝ်း ၸၢႆးပိုင်းယဝ်ႉ တိၺွပ်းဢဝ်မိူဝ်းၸွမ်းၶဝ်။ ဝၢႆးပလိၵ်ႈၶဝ်ပွၵ်ႈမိူဝ်းၵႂႃႇယဝ်ႉ မႄႈပႃႈမႂ်ႇ ၶူၼ်ႉသွၵ်ႈတူၺ်းၶူဝ်းလဵင်းလီလီ၊ လႆႈႁူႉဝႃႈ ၶူဝ်းၶွင်ဢၼ် ႁၢႆၵႂႃႇႁူမ်ႈၵၼ် ၵႂၢင်းသႅင် 7 ဝူင်း၊ သႅင်လီၵေႃႈပႃးၵႂႃႇ၊ လၢမ်းၶၢတ်ႈၵႃႈၶၼ် ဢမ်ႇယွမ်းမွၵ်ႈ 30 သႅၼ်- ၼႆယဝ်ႉ။

ၸၢႆးပိုင်း ၵေႃႉၺႃးတိၺွပ်းၵႂႃႇၼၼ်ႉ ပဵၼ်လုၵ်ႈၸၢႆး မႄႈပႃႈမႂ်ႇ၊ ၼၢင်းလူင်ပဵၼ်မေးၼၢင်းၸၢႆးပိုင်း၊ မီးလုၵ်ႈယိင်းႁူမ်ႈၵၼ် ၼိုင်ႈၵေႃႉ ဢႃႇယု 6 ၶူပ်ႇ- ၸၢႆးၵျေႃႇ ၵူၼ်းမိူင်းပွၼ်ပွင်ႇလၢတ်ႈမႃးၼင်ႇၼႆ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၶဝ်ၶၢင်းပွင်ႉဝႃႈ- ယႃႈၼႆႉ မိူဝ်ႈၽုၵ်ႇၵေႃႈၶဝ်ၵဵပ်းၵိၼ်ၶွၼ်ႇ၊ ဢမ်ႇတိဢမ်ႇၺွပ်း၊ ႁၼ်ယူႇၵေႃႈ ႁဵတ်းၵႅင်ႈဢမ်ႇႁၼ်၊ ႁူႉယူႇၵေႃႈႁဵတ်းၵႅင်ႈဢမ်ႇႁူႉ။ ၵူၼ်းဝၢၼ်ႈၵူၼ်းမိူင်း လႆႈႁိူဝ်ႇလႆၶႆးယွႆႉသေႁဵတ်းမႃး ပိူဝ်ႈတႃႇႁႃလဵင်ႉ ၼႃႈႁိူၼ်း၊ ၵူၺ်းၵႃႈ သိူင်ႇသိမ်းၵဵပ်းဝႆႉၶႅမ်ႉၵႃႈႁိုဝ်ၵေႃႈ ၶဝ်သမ်ႉၸွမ်းႁူႉၸွမ်း သွၵ်ႈႁၼ်ယူႇ- ဝႃႈၼႆ။