ဝၼ်းတီႈ 09/04/2014 (မိူဝ်ႈဝႃး) တင်ႈတႄႇၵၢင်ၼႂ်ယၢမ်း 09:00-10:30 မူင်း၊ ၸုမ်းဢူၺ်းလီၸၢဝ်းၶိူဝ်း ၽွမ်ႉႁူမ်ႈ (UNA) တင်းၸုမ်းတူဝ်တႅၼ်းၸၢဝ်းၶိူဝ်း / ၶွမ်ႊမတီႊၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉတင်းၸိုင်ႈမိူင်း (NCCT) ႁူပ်ႉထူပ်းဢုပ်ႇဢူဝ်းၵၼ် တီႈႁၢၼ်ႉၵႃးၽႄး (ၶွပ်းၾီႇ) Cafe’47 ဢၼ်မီးၸဵင်ႇတၢင်း ၵၢၼ်ႉၵေႃႇတင်းပျီႇလၢၼ်း ၸႄႈဝဵင်းမယၢၼ်းၵူင်း ၵဵဝ်ႇၵပ်းၵၢၼ်မိူင်း။

ၸုမ်း UNA ဢူးဢေးတႃႇဢွင်ႇ ပိုတ်ႇလၢတ်ႈဝႃႈ ယၢမ်းၽွင်းမိူဝ်ႈလဵဝ် ၵၢၼ်ၵေႃႇသၢင်ႈလွင်ႈငမ်းယဵၼ်ဝၢၼ်ႈမိူင်းၼႆႉ ပဵၼ်ၵၢၼ်ၶိုၵ်ႉယႂ်ႇလူင်ဢၼ်ၼိုင်ႈ။ ယွၼ်ႉပဵၼ်ပၢင်တိုၵ်းသိုၵ်းသိူဝ်ၼႂ်းဝၢၼ်ႈၼႂ်းမိူင်းမႃးမီး 60 ပီပၢႆလႄႈ ႁဵတ်းႁႂ်ႈ ဝၢၼ်ႈမိူင်းတူၵ်းၵႂႃႇထိုင်ၸၼ်ႉၽၢၼ်ၵႅၼ်း၊ ၵူၼ်းမိူင်းတင်းလၢႆၵေႃႈ မုင်ႈမွင်းၶႂ်ႈလႆႈလွင်ႈငမ်းယဵၼ်။ ၼင်ႇဢၼ်ၵူၼ်း မိူင်းမုင်ႈမွင်းလွင်ႈငမ်းယဵၼ်ၼၼ်ႉ ၽူႈဢွၼ်ႁူဝ် ၸၢဝ်းၶိူဝ်းတင်းလၢႆ လႆႈဢဝ်သႂ်ႇၸႂ်သႂ်ႇၶေႃးသေ ႁဵတ်းသၢင်ႈလွင်ႈငမ်း ယဵၼ်ၸိူဝ်းၼႆႉ လီယွင်ႈၵုၼ်းမုၼ်ယႂ်ႇၼမ်။

ဢိင်ၼိူဝ်ပိုၼ်ႉထၢၼ်ပၢင်လူင်သေ ၼင်ႇႁိုဝ်ပေႃးတေမီးလွင်ႈပဵၼ်ထမ်းတြႃးၼၼ်ႉ ၸၢဝ်းၶိူဝ်းၵေႃႈ လႆႈတုၵ်းယွၼ်း သုၼ်ႇလႆႈၽဵင်ႇပဵင်း၊ ၵၢၼ်ၽွင်းငမ်းတူဝ်ၵဝ်ႇမႃး။ ၽွင်းႁဝ်းၶႃႈတုၵ်းယွၼ်းသုၼ်ႇလႆႈသုၼ်ႇပဵၼ် ပိူဝ်ႈတႃႇမီးလွင်ႈ ၽဵင်ႇပဵင်းၵၼ်ယူႇၼႆႉ ထုၵ်ႇလီလႆႈၸႂ်ႉပၢႆးပၺ်ၺႃ ၊ သတိၵႅမ်ၸွမ်းသေ ယႃႇပေလူင်တူဝ်လိုမ်းၶိင်း- ဢူးဢေးတႃႇဢွင်ႇ လၢတ်ႈၵႂႃႇၼင်ႇၼႆ။

ၽူႈၶဝ်ႈၸုမ်း NCCT ၶုၼ်ဢူၵ်ႉၵႃႇ လၢတ်ႈဝႃႈ- မိူဝ်ႈႁူပ်ႉဢုပ်ႇဢူဝ်းၵၼ်တင်း ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် (UPWC) ၊ သုၼ်ၵၢင်လွင်ႈငမ်းယဵၼ်မၢၼ်ႈ (MPC) ပူၼ်ႉမႃးမိူဝ်ႈဝၼ်းတီႈ 05-08/04/14  ၼၼ်ႉ သွင်ၾၢႆႇလႆႈၸႂ်ၵၼ် ၶဵၼ်ႇတႅမ်ႈယူင်ႉၶၢပ်ႈယုၵ်းယၢင်ႇၵၢၼ်ဢုပ်ႇဢူဝ်း ပိူဝ်ႈတႃႇၵိုတ်းယိုဝ်းပတ်းပိုၼ်ႉတင်းၸိုင်ႈမိူင်း (Singer Text)  ၽိုၼ်ၼိုင်ႈ။ ၼွၵ်ႈသေၼၼ်ႉ ၶုၼ်ဢူၵ်ႉၵႃႇ ၸႅင်ႈဝွၵ်ႇၼႄပႃး ယိူင်းဢၢၼ်း NCCT ။ ဢၼ် NCCT ႁဵတ်းသၢင်ႈၵၢၼ်ငၢၼ်းမႃးၸိူဝ်းၼၼ်ႉၵေႃႈ ၶႂ်ႈႁႂ်ႈမီးၵၢၼ်ထတ်းသၢင်။ ထႅင်ႈပိူင်ၼိုင်ႈ  ဢၼ်လူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း မီးၶေႃႈလႆႈၸႂ်ၵၼ်၊ ပၼ်ၵႂၢမ်းမၼ်ႈၵႅၼ်ႇၵၼ်မႃးၸိူဝ်းၼၼ်ႉ ၾၢႆႇလႂ်ႁဵတ်းၸွမ်း ဢမ်ႇၸွမ်းၼၼ်ႉ ထုၵ်ႇလႆႈမီးၸုမ်းဢၼ်ၸွႆႈပၵ်းတႃပႂ်ႉတူၺ်းၽွင်ႈယူႇ- ဝႃႈၼႆ။

ဝၢႆးၼၼ်ႉ ၽူႈၶဝ်ႈၸုမ်း NCCT သလၢႆးလႅင်ႇမူင်း ပုိတ်ႇလၢတ်ႈႄၼလွင်ႈၵၢၼ်ငၢၼ်း၊ လွင်ႈငမ်းယဵၼ်၊ လွင်ႈႁူပ်ႉထူပ်း တၢင်းယၢပ်ႇၽိုတ်ႇ၊ လွင်ႈၶတ်းတႃႉ ၸိူဝ်းၼႆႉ။ တပ်ႉသိုၵ်းမၢၼ်ႈ ဢမ်ႇၶႂ်ႈၸႂ်ႉၶေႃႈၵႂၢမ်းဝႃႈ သိုၵ်းၵၢင်မိူင်း၊ ၶႂ်ႈႁႂ်ႈၸႂ်ႉ ၶေႃႈၵႂၢမ်းဝႃႈ ပၼ်ႁႃလွင်ႈၶတ်းယႅင်ႈၵၢၼ်ယိပ်းၵွင်ႈၵၢင်ႇ။ ထႅင်ႈပိူင်ၼိုင်ႈ တပ်ႉသိုၵ်းမၢၼ်ႈ ဢမ်ႇလႆႈၸႂ်ဢၼ်ၸႂ်ႉ ၶေႃႈၵႂၢမ်းဝႃႈ လၢႆးလုၵ်ႉၽိုၼ်ႉ၊ ပေႃးၸႂ်ႉၵႂၢမ်းၶေႃႈၼႆႉ မိူၼ်ၼင်ႇသၢၼ်ၶတ်းလွင်ႈဢမ်ႇလီ။ ပၼ်ႁႃ ၼႂ်းဝၢၼ်ႈၼႂ်းမိူင်း ၼႆႉ ဢၼ် NCCT ဢမ်ႇႁူႉၸွမ်းၵေႃႈတေမီးတင်းၼမ်တင်းလၢႆ-ဝႃႈၼႆ။

ဝၢႆးၼၼ်ႉ ၽူႈဢွၼ်ႁူဝ်ၸၢဝ်းၶိူဝ်း မိူၼ်ၼင်ႇၸဝ်ႈၶုၼ်ထုၼ်းဢူး၊ ၼၢႆႇငူၺ်ႇတဵင်း၊ တႅဝ်းႁူမ်ႈ တီႇမူဝ်ႇရႅတ်ႉတိၵ်ႉ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၸိူဝ်းၼႆႉၵေႃႈ ဢုပ်ႇဢူဝ်းလွင်ႈ ပိူင်ငဝ်ႈပိုင်းမိူင်း 2008 ၸိူဝ်းၼႆႉ- ၼႆယဝ်ႉ။