ဝတ်ႉၸေႇယသုၶ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ ပိုတ်ႇပၢင်သွၼ်လိၵ်ႈဢိင်းၵလဵတ်ႈလႄႈပိုၼ်ႉႁူႉ။ မီးၵူၼ်းၼုမ်ႇ ၼႂ်းပိုၼ်ႉတီႈၶိုၼ်ႈႁဵၼ်းၼပ်ႉပၢၵ်ႇ။

မိူဝ်ႈဝၼ်းတီႈ 02/04/2014 ၵၢင်ၼႂ်ယၢမ်း 8 မူင်း၊ မီးၵၢၼ်ၸတ်းပၢင်ၵႅဝ်ႈပိုတ်ႇႁူင်းႁဵၼ်း ပူင်သွၼ်လိၵ်ႈ ဢိင်းၵလဵတ်ႈ လႄႈပိုၼ်ႉႁူႉ တီႈဝတ်ႉၸေႇယသုၶ ပွၵ်ႉမူဝ်ၶမ်း ဝဵင်းၼမ်ႉၶမ်း။ လွတ်ႈဢၢၼ်ႇၼမေႃးတသ 3 ၵမ်းသေတႄႇ ပိုတ်ႇပၢင်ၵႂႃႇ။ ၸဝ်ႈၵွၼ်းဝတ်ႉ ၸေႇယသုၶ ၸဝ်ႈတူၼ်ၶူးဝိၼႃသႃရ၊ ၸဝ်ႈတူၼ်ၶူးပၼ်တိတ (ၽူႈၵုမ်းပၢင်သွၼ်)၊ ၸၢႆးယီႈၽူး တင်း ၸၢႆးလၢဝ်ၶမ်း (ႁွင်ႉၸၢႆးသႅင်ၶိူဝ်းဝၼ်း) ၸိူဝ်းၼႆႉ မွၵ်ႇလၢတ်ႈၶေႃႈ ၵႂၢမ်းပိုတ်ႇပၢင်သွၼ်၊ ၵူၼ်းမႃးၶဝ်ႈ ႁူမ်ႈမီးပၢၵ်ႇပၢႆ-ၸၢႆးယီႈၸၢႆးလၢတ်ႈ။

ပၢင်သွၼ်ၼိုင်ႈၵမ်းၼႆႉ တေႁိုင်ၶၢဝ်းတၢင်း 3 လိူၼ်၊ ၼိုင်ႈလိူၼ်တေၵဵပ်းတီႈၵူၼ်းမႃးႁဵၼ်းၼိုင်ႈၵေႃႉႁႃႈႁဵင် (5,000) ၵျၢတ်ႈ။ ငိုၼ်းႁႃႈႁဵင်ၼၼ်ႉ ပဵၼ်ၵႃႈပိူဝ်ႈတႃႇတွပ်ႇတႅၼ်းၵႃႈႁိူဝ်ႉၵႃႈယၢပ်ႇတီႈၶူးသွၼ်- ၽူႈၶိုင်ပွင် ပိူဝ်ႈတႃႇပဵၼ် ပၢင်ပူင်သွၼ် ၸၢႆးလၢဝ်ၶမ်းလၢတ်ႈ။

ၸၢႆးလၢဝ်ၶမ်း လၢတ်ႈတီႈၽူႈတွႆႇႁွၵ်ႈဝႃႈ- မိူဝ်ႈဝႃးၼႆႉ ၵူၼ်းမႃးၶဝ်ႈႁူမ်ႈပၢင်သွၼ်ႁဵၼ်း မီးယူႇ 85 ၵေႃႉ၊ ဢၼ်ပၼ် သဵၼ်ႈသၢႆမၢႆဝႆႉၼႆႉ မိူဝ်ႈၽုၵ်ႈမႃးတေထိုင်မႃးထႅင်ႈ 45 ၵေႃႉ။ ၵၢၼ်သွၼ်ႁဵၼ်းၼႆႉ ၵဵဝ်ႇၵပ်းပုတ်ႉထ (Buddhism in English), လၢႆးလၢတ်ႈဢိင်းၵလဵတ်ႈ (Spoken English) လႄႈ Grammar, Vocabulary, Phonetic Community ၸိူဝ်းၼႆႉ- ဝႃႈၼႆ။

ၵဵဝ်ႇၵပ်းလွင်ႈၵၢၼ်ႁဵၼ်းၵၢၼ်သွၼ်လိၵ်ႈဢိင်းၵလဵတ်ႈ လႄႈ တၢင်းႁူႉတၢင်းႁၼ်ၸိူဝ်းၼႆႉ ၸဝ်ႈတူၼ်ၶူး ပၼ်တိတ၊ ၸဝ်ႈတူၼ်ၶူးထမ်မသီရိ၊ ၸၢႆးလႃႉမွင်ႇ၊ ၸၢႆးၵွၼ်းၶိူဝ်းၶဝ်ၸိူဝ်းၼႆႉ ပဵၼ်ၶူးမေႃသွၼ်ပၼ်။ ယိူင်းဢၢၼ်း ႁႂ်ႈၵူၼ်းၼုမ်ႇ ၼႂ်းပိုၼ်ႉတီႈမီးတၢင်းႁူႉတၢင်းႁၼ်  ၶိုပ်ႈၼႃႈၶိုၼ်ႈသင်ႉ ၵႂႃႇ- ၽူႈၶဝ်ႈပႃးၼႂ်း ၶွမ်ႊမတီႊတႃႇပွင်ပဵၼ်ပၢင်သွၼ် ၸၢႆးသႅင် လၢတ်ႈၼင်ႇၼႆ။