သိုၵ်းမၢၼ်ႈၼုင်ႈသႂ်ႇၶူဝ်းၵူၼ်းဝၢၼ်ႈ ပႂ်ႉၸွမ်းတၢင်း၊ ဢဝ်မိတ်ႈတႅင်းၵူၼ်းဝၢၼ်ႈယဝ်ႉ ၸူၼ်ႁိမ်ဢဝ်ၶူဝ်းၶွင်။ ၵူၼ်းဝၢၼ်ႈၵေႃႉၺႃးၸဵပ်း လႆႈၵႂႃႇယူတ်းယႃတူဝ်ထိုင်လႃႈသဵဝ်ႈ-ဝဵင်းလိူဝ်ႇ။

ပူၼ်ႉမႃးမိူဝ်ႈဝၼ်းတီႈ 23/03/2014 ၵၢင်ၼႂ်ယၢမ်း 09:00 မူင်း၊ ၸၢႆးသၢင်ႇ….. ၵူၼ်းမိူင်းၵၢဝ် ၸႄႈဝဵင်းတၢင်ႉယၢၼ်း၊  ၵႂႃႇတူၵ်းလိၵ်ႈၽိတ်ႈမွၵ်ႇပွႆးသၢင်ႇလွင်း (မိူင်းၵၢဝ်) တၢင်းမိူင်းဢွတ်ႇ ၸႄႈဝဵင်းမိူင်းသူႈ။ မိူဝ်ႈၵႂႃႇၽႅဝ်တီႈႁိမ်းတပ်ႉမၢၼ်ႈ တီႈၵွင်းၾၢႆႇတူၵ်းဝၢၼ်ႈႁူၺ်ႈလူင်၊ ၸဝ်ႈသိုၵ်းတိၼ်ႇၵျေႃႇတူႇဢွၼ်ႁူဝ်ၼၼ်ႉ သိုၵ်းမၢၼ်ႈဢၼ်ပႂ်ႉတီႈတပ်ႉ သင်ႇၸၢႆးသၢင်ႇ….. ႁႂ်ႈသိုဝ်ႉပုမႃးပၼ်ၶဝ်။

ၵမ်းပွၵ်ႈၶိုၼ်းၼၼ်ႉ ပေႃးဝႃႈၸၢႆးသၢင်ႇ….. မႃးပၼ်ပုတီႈတပ်ႉမၢၼ်ႈယဝ်ႉၵေႃႈ ပူၼ်ႉတပ်ႉၵႂႃႇဢမ်ႇ ပေႃးၵႆၼၼ်ႉ ၺႃးသိုၵ်းမၢၼ်ႈ 2 ၵေႃႉ ပႂ်ႉဝႆႉၸွမ်းတၢင်း။ သိုၵ်းမၢၼ်ႈသွင်ၵေႃႉၼၼ်ႉ ၼုင်ႈၶူဝ်းၵူၼ်းႁိူၼ်း ပႃးမိတ်ႈသေ ဢဝ်မိတ်ႈထိူဝ်တႅင်းၸွမ်းၵႅမ်ႈ ၸၢႆးသၢင်ႇ…..တင်းသွင်ၽၢၵ်ႇ၊ ဢဝ်မိတ်ႈတႅင်းၸွမ်းႁူဝ် ၸွမ်းၵွင်ႇၵေႃႈၸိူဝ်းၼႆႉ။ မၼ်းၸၢႆးၵေႃႈ လိုမ်းတူဝ်ၵႂႃႇသေ သိုၵ်းမၢၼ်ႈၵေႃႈဢဝ်တူဝ်မၼ်းပႅတ်ႈဝႆႉၼႂ်းယုမ်း ၾၢႆႇဢွၵ်ႇတၢင်း။ သိုၵ်းမၢၼ်ႈၸူၼ်ၽဵဝ်ႈဢဝ်ၵႂႃႇၶူဝ်းၶွင်မၼ်းၸၢႆး လူတ်ႉၶိူင်ႈလမ်းၼိုင်ႈ၊ ဢွမ်ယၢမ်းမူင်း လႄႈ ငိုၼ်းႁႃႈမိုၼ်ႇၵျၢတ်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ပေႃးဝႃႈၸၢႆးသၢင်ႇ….. ႁူႇတူဝ်ၶိုၼ်းမႃးယဝ်ႉ ၵၢၼ်းမိူဝ်းၸူးၵူၼ်းဝၢၼ်ႈႁူၺ်ႈလူင်။ ၵူၼ်းဝၢၼ်ႈႁူၺ်ႈလူင် ၸိုဝ်ႈလုင်းဝၼ်ႇၼ ၸင်ႇတိတ်းတေႃႇသိုပ်ႇၾူၼ်ႊ မိူဝ်းၸူးတီႈပေႃႈမႄႈပီႈၼွင်ႉ ၸၢႆးသၢင်ႇ….. ဢဝ်လူတ်ႉၵႃးမႃးႁပ်ႉမိူဝ်းယူတ်းယႃတူဝ်၊ သိုပ်ႇဢဝ်ၵႂႃႇတီႈႁူင်းယႃလႃႈသဵဝ်ႈ၊ လိုၼ်းသုတ်း လႆႈဢဝ်လူင်းၵႂႃႇယူတ်းယႃ တီႈဝဵင်းတႃႈလိူဝ်ႇ (မၼ်းတလေး)- ပီႈၼွင်ႉၸမ်ၸႂ်ၸၢႆးသၢင်ႇ….. လၢတ်ႈၼင်ႇၼႆ။