ၵူၼ်းလုတ်ႇ/ၶုတ်းသၢႆး ဢၼ်ပဵၼ်လုၵ်ႈၼွင်ႉ ၽွင်းတႅၼ်းတႃႈၶီႈလဵၵ်း၊ ၺႃးႁုၼ်ႇႁၢင်ႈပုတ်ႉထ (ၽြႃးပဵၼ်ၸဝ်ႈ) ၼႂ်းမႄႈၼမ်ႉႁူၵ်ႈ တင်းမူတ်း 12 သူႇ။ ထူပ်းၺႃး ၸွမ်းၼင်ႇၶူးဝႃးဝုၼ်းၸုမ်ႉ ၼွၼ်းၾၼ်ဝႆႉ။

ပူၼ်ႉမႃးမိူဝ်ႈဝၼ်းတီႈ 31/03/2014 ၵူၼ်းၶုတ်း/လုတ်ႇဢဝ်သၢႆး ၼႂ်းၵႄးမႄႈၼမ်ႉႁူၵ်ႈ၊ ထူပ်းၺႃးလႆႈ ႁုၼ်ႇႁၢင်ႈပုတ်ႉထၸဝ်ႈ (ၽြႃးပဵၼ်ၸဝ်ႈ) ၼႂ်းမႄႈၼမ်ႉႁူၵ်ႈ တင်းမူတ်း 11 သူႇ။ ထိုင်မႃးဝၼ်းတီႈ 01/04/14 ႁၼ်ထႅင်ႈ သူႇၼိုင်ႈ၊ တင်းမူတ်းႁၼ် ႁုၼ်ႇႁၢင်ႈၸဝ်ႈ 12 သူႇ၊ ၼႂ်း 12 သူႇၼႆႉ သူႇဢၼ်ႁၼ် ဝၼ်းတီႈ 1 ၼႆႉ ယႂ်ႇသုတ်း၊ တၢင်းယၢဝ်းမီးၼိုင်ႈသွၵ်ႇ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 31/03/14 ၼၼ်ႉ ၵူၼ်းဢၼ်ၵႂႃႇၶုတ်းသၢႆးၼႂ်းမႄႈၼမ်ႉႁူၵ်ႈ၊ ဢဝ်ၶိူင်ႈၸၢၵ်ႈ ဢၼ်မီးလွတ်ႇ လူင်လုတ်ႇဢဝ်သၢႆးၶိုၼ်ႈမႃး၊ ၵူၺ်းၵႃႈ မီးသင်ၵေႃႈဢမ်ႇႁူႉ မႃးဢိုတ်းဝႆႉႁူးတေႃႈလွတ်ႇ လုတ်ႇသၢႆးၼၼ်ႉ၊ ဢဝ်ႁူးမၼ်းတၼ် ပႅတ်ႈသေဢမ်ႇၸၢင်ႈလုတ်ႇသၢႆး။ ၵမ်းၼႆႉၸင်ႇလမ်လူင်းၵႂႃႇတူၺ်းတီႈ ၼႂ်းႁူးတေႃႈသေ လႆႈႁၼ်ပဵၼ်ႁုၼ်ႇႁၢင်ႈၽြႃးၶမ်ဝႆႉ။ ပေႃးဢဝ်ဢွၵ်ႇမႃးယဝ်ႉၵေႃႈ သိုပ်ႇလုတ်ႇသၢႆးထႅင်ႈ၊ လႆႈႁၼ်ၽြႃးသူႇဢွၼ်ႇသူႇဢိတ်းလႆလူင်ၶိုၼ်ႈမႃးၸွမ်းတေႃႈလုတ်ႇသၢႆးထႅင်ႈ။

ဢၼ်သူႇယႂ်ႇလိူဝ်ပိူၼ်ႈ ပဵၼ်ဢၼ်ႁၼ်မိူဝ်ႈသိုၼ်း (01/04/2014) မီးမွၵ်ႈၼိုင်ႈသွၵ်ႇ။ ၶမ်းဢၼ်တဵၵ်းဝႆႉ တီႈၽြႃးၼၼ်ႉ ယင်းတိုၵ်ႉမီးယူႇ၊ ၽြႃးၸိူဝ်းၼၼ်ႉ ပဵၼ်ၽြႃးတွင်းၵူၺ်းၵူၺ်း။ တီႈၽြႃးၼၼ်ႉ တႅမ်ႈလိၵ်ႈတႆး ဝႆႉဝႃႈ ၵ လႄႈ ၶ ၊ ပဵၼ်တူဝ်လိၵ်ႈတႆး တူဝ်ထမ်း။ မိူဝ်ႈလဵဝ် ႁုၼ်ႇႁၢင်ႈပုတ်ႉထၸဝ်ႈတင်းမူတ်း ၼႆႉ ယေႃးဢဝ်မႃးဝႆႉတီႈၽရႃႉထၢတ်ႈလွႆမေႃး၊ ဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း- ၵေႃးပၵထၢတ်ႈလွႆမေႃး လၢတ်ႈ။

ၵေႃးပၵ သိုပ်ႇလၢတ်ႈဝႃႈ- ဢၼ်လၢၵ်ႇလၢႆးမၼ်းၸမ်း၊ ၵွၼ်ႇၼႃႈၼၼ်ႉ ၸဝ်ႈပေႃႈသိလ်ထမ်းၶူးဝႃး ဝုၼ်းၸုမ်ႉ ၼွၼ်းၾၼ်ဝႃႈ- တီႈၼၼ်ႈ တေဢွၵ်ႇၽြႃးၼႆ တႃႇသၢမ်ၶိုၼ်းထပ်းၵၼ်။ လွင်ႈၼႆႉ တူၼ်ၸဝ်ႈၶူး ဝႃးၵေႃႈ ယၢမ်ႈလၢတ်ႈတီႈတၵ်ႉၵႃႇသတ်ႉထႃး ၶဝ်ဝႆႉ။ ၵမ်းၼႆႉ သမ်ႉမႃးႁၼ်ၽြႃးၼႆႉ ၸဝ်ႈၶူးဝႃးဝုၼ်းၸုမ်ႉ တေ ၶႂ်ႈႁဵတ်းႁိုဝ်ပႆႇႁူႉ၊ မိူဝ်ႈလဵဝ် မၼ်းၸဝ်ႈၵေႃႈသမ်ႉတိုၵ်ႉၵႂႃႇ တၢင်းတႃႈသၢမ်ၽူးသေ ပွၵ်ႈၶိုၼ်းထိုင်တၢင်း မိူင်းၽူင်း မိူဝ်ႈဝႃးမိူဝ်ႈသိုၼ်း ၼႆႉၵူၺ်း- ဝႃႈၼႆ။

ၵူၼ်းဝၢၼ်ႈၵူၼ်းမိူင်းၶဝ်လၢမ်းဝႃႈ- ဢွင်ႈတီႈၼႆႈၼႆႉ မိူဝ်ႈၵွၼ်ႇလႅပ်ႈပဵၼ်ဝၢၼ်ႈၵူၼ်းလႄႈ မီးၸေႇတီႇၵွင်းမူး။ ၵူၺ်းၵႃႈ ၵွင်းမူးၼႆႉ မၼ်းႁဵတ်းႁိုဝ်လႄႈၸူမ်ၵႂႃႇတႂ်ႈၼမ်ႉ၊ ၸူမ်ၵႂႃႇပီလႂ်ၼၼ်ႉ ဢမ်ႇမီးၽႂ်ႁူႉ။ လွင်ႈဝႃႈ ဢွင်ႈတီႈၼႆႈ ယၢမ်ႈပဵၼ်ဝၢၼ်ႈၵဝ်ႇၼႆၼၼ်ႉၵေႃႈ ဢမ်ႇမီးၽႂ်ႁူႉၼင်ႇၵဝ်ႇ။ ၵူၼ်းဝၢၼ်ႈဢွၼ်ၵၼ်လၢမ်းဝႃႈ လႅပ်ႈပဵၼ်ဝၢၼ်ႈၵဝ်ႇ ဢၼ်ႁၢမ်းၵႂႃႇဢမ်ႇယွမ်းမွၵ်ႈပၢၵ်ႇပီပီပၢႆ။ မိူဝ်ႈလဵဝ် ပေႃးပေႃးလုတ်ႇသၢႆးၶိုၼ်ႈ မၢၵ်ႇဢုတ်ႇမၼ်းတိုၵ်ႉဢွၵ်ႇမႃးယူႇတိၵ်းတိၵ်း။ လွင်ႈၼႆႉၵေႃႈ ၵူၼ်းဝၢၼ်ႈၶဝ်လၢမ်းဝႃႈ တေလႅပ်ႈမီးထႅင်ႈ ၸၢင်ႈႁၼ်ထႅင်ႈယူႇ- ဝႃႈၼႆ။

ဢၼ်လၢၵ်ႇလၢႆးထႅင်ႈပိူင်ၼိုင်ႈၸမ်း၊ ႁုၼ်ႇႁၢင်ႈၽြႃးၼႆႉ ပလၢင်ႇတီႈပိုၼ်ႉမၼ်းမိူၼ်ႁိူဝ်းဝႆႉ- ၼႆယဝ်ႉ။

မႄႈၼမ်ႉႁူၵ်ႈ ဢွင်ႈတီႈဢၼ်ထူပ်းႁၼ်ႁုၼ်ႇႁၢင်ႈပုတ်ႉထၸဝ်ႈ (ၽြႃး)ၼႆႉၼမ်ႉလိုၵ်ႉပဵင်းမွၵ်ႈဢိုၵ်း၊ ပဵၼ်မေႃႇထၢင်သၢႆးၼမ်ႉ ဢၼ်ၸဝ်ႈၶွင်ပဵၼ်ၸၢႆးဢွင်ႇတဵင်း ၽွင်းတႅၼ်းသၽႃးၸႄႈမိူင်း တႃႈၶီႈလဵၵ်း။ မၼ်းၸၢႆးၼႆႉ ပဵၼ်ၵူၼ်းၵျွၵ်ႉမႄး (ၸိုင်ႈတႆးပွတ်းႁွင်ႇ) မႃးယူႇတႃႈၶီႈလဵၵ်း၊ မႃးၶဝ်ႈၶေႉလိူၵ်ႈတင်ႈ တီႈတႃႈၶီႈလဵၵ်းသေ ပေႉၵၢၼ်လိူၵ်ႈတင်ႈ။ မီးၾၢႆႇဝၼ်းဢွၵ်ႇ ၶူင်ႇႁိူဝ်းဝိၼ်ဝဵင်းတႃႈၶီႈလဵၵ်း ၸႄႈဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၾၢႆႇဢွၵ်ႇသဵၼ်ႈတၢင်းလူင် တႃႈၶီႈလဵၵ်း-ၵဵင်းတုင်။ ၵူၼ်းဢၼ်ထူပ်းႁၼ် ၼႆႉၵေႃႈ ပဵၼ်လုၵ်ႈၼွင်ႉၸၢႆးဢွင်ႇတဵင်း- ၼႆယဝ်ႉ။