ၸဝ်ႈၼႃႈတီႈပလိၵ်ႈမၢၼ်ႈႁူမ်ႈလၢဝ်းပၢၼ်း ၵႃႉဝူဝ်းၵႃႉမႆႉ၊ ၼိုင်ႈဝၼ်းတၢင်ႇသူင်ႇၶဝ်ႈၶၢႆတေႃႇမိူင်းၶႄႇ ၼပ်ႉႁူဝ်သိပ်းလမ်း။ ၵူၼ်းမိူင်းမႆႈၸႂ်ဝူဝ်း/မႆႉမိူင်းတႆးမူၺ်ႉ၊ တုၵ်းယွၼ်းပႃႈၼိူဝ်ၵႄႈလိတ်ႈ။

ၵဵဝ်ႇၵပ်းလွင်ႈၼႆႉ မီးၵၢၼ်ၵႃႉၶၢႆဝူဝ်း လုၵ်ႉၼႂ်းၸိုင်ႈတႆးပွတ်းႁွင်ႇ၊ တၢင်းၼွင်ၶဵဝ် ၶိုၼ်ႈၵႂႃႇတၢင်းမူႇၸႄႈ လိၼ်လိၼ်မိူင်းၶႄႇ။ ၵူၼ်းၵႃႉဝူဝ်း ပဵၼ်လၢဝ်းပၢၼ်းၶႄႇ/ၸဝ်ႈငိုၼ်းသႃးၶဝ် ႁူမ်ႈၵၼ်တင်းၸဝ်ႈၼႃႈတီႈ ပလိၵ်ႈမၢၼ်ႈသေ ဢဝ်ဝူဝ်းတၢင်ႇလူတ်ႉၵႃးလူင် ၶိုၼ်ႈၵႂႃႇတၢင်းမိူင်းၶႄႇၵူႈဝၼ်း။

ပေႃးပဵၼ်လူတ်ႉၵႃးတၢင်ႇဝူဝ်း ဢၼ်ၸဝ်ႈၼႃႈတီႈပလိၵ်ႈၶဝ်ၶဝ်ႈႁူမ်ႈႁုၼ်ႈ (Share) ၸွမ်းၼၼ်ႉ လုၵ်ႉတၢင်းမိူင်းတႆးပွတ်းႁွင်ႇၶဝ်ႈမိူင်းၶႄႇၼႆႉ ပိူၼ်ႈဢမ်ႇၵူတ်ႇထတ်းသင်။ ၼိုင်ႈဝၼ်းၼႆႉ လူတ်ႉၵႃးတၢင်ႇဝူဝ်း တင်းတၢင်ႇမႆႉ လုၵ်ႉမိူင်းတႆးၶဝ်ႈမိူင်းၶႄႇ မီးဢမ်ႇယွမ်း 30 လမ်း။

ပေႃးပဵၼ်လူတ်ႉၵႃးလၢဝ်းပၢၼ်းၶဝ် ဢၼ်ၸဝ်ႈၼႃႈတီႈပလိၵ်ႈ ၶဝ်ႈႁူမ်ႈႁုၼ်ႈၸွမ်းၼၼ်ႉ ဢမ်ႇၺႃးၵူတ်ႇ ထတ်းသင်၊ ဢၼ်ပႂ်ႉၸွမ်းလၢၼ်ႇ/ၵဵတ်ႉၵေႃႈ ပဵၼ်ပလိၵ်ႈၸႄႈဝဵင်း၊ ပလိၵ်ႈၾၢႆႇၵုမ်းၵမ်ၼႂ်းၸႄႈတွၼ်ႈ တင်းပလိၵ်ႈၾၢႆႇၽဵဝ်ႈမူၺ်ႉၵၢၼ်ရႃၸဝတ်ႈလွင်ႈႁုၵ်းႁၢႆႉ။ ၼင်ႇႁိုဝ်လူတ်ႉၵႃးတၢင်ႇဝူဝ်း တေဢမ်ႇၺႃး ၵူတ်ႇထတ်းၼၼ်ႉ လၢဝ်းပၢၼ်းၶဝ်တင်းပလိၵ်ႈၸိူဝ်းမႃးပႂ်ႉလၢၼ်ႇ ဢုပ်ႇၵၼ်သေ ႁူမ်ႈၵၼ်ဢဝ်ၵႂႃႇ- ၼႆယဝ်ႉ။

ဢၼ်ၸွႆႈထႅမ် ၶဝ်ႈႁူမ်ႈႁုၼ်ႈၸွမ်း လၢဝ်းပၢၼ်းၵႃႉဝူဝ်းၶဝ်ၼႆႉ ပဵၼ်ၸဝ်ႈၼႃႈတီႈပလိၵ်ႈတၢင်းလႃႈသဵဝ်ႈ၊ ၸိုဝ်ႈႁွင်ႉဝႃႈ ၽူႈၵွၼ်းပလိၵ်ႈမူဝ်းဢေး၊ ၽူႈၵွၼ်းပလိၵ်ႈဝိၼ်းထုၼ်း၊ ၵႅမ်ၽူႈၵွၼ်းပလိၵ်ႈမဵဝ်းထုၼ်းလုၼ်ႇ၊ ၵႅမ်ၽူႈၵွၼ်းပလိၵ်ႈငဵင်းသူၺ်ႇ ၸိူဝ်းၼႆႉ။ ၶဝ်ၸိူဝ်းၼႆႉ ဢိင်ၼိူဝ်ႁူမ်ႈႁုၼ်ႈၵၢၼ်ၵႃႉဝူဝ်း ၵၼ်တင်းလၢဝ်းပၢၼ်း ၶဝ်သေ ၶဝ်မီးငိုၼ်းၼမ်ၼႅၼ်ႇ၊ ၵွပ်ႈၶဝ်လႆႈၵိၼ်ငိုၼ်းသူးငိုၼ်းလၢပ်ႈလႄႈ မီးလူတ်ႉမီးၵႃး မီးႁိူၼ်းမီးယေး၊ ၵူၼ်းဝၢၼ်ႈၵူၼ်းမိူင်းယင်းဢမ်ႇဝူၼ်ႉထၢင်ႇဝႃႈ ၶဝ်ပဵၼ်ၸဝ်ႈၼႃႈတီႈပလိၵ်ႈ၊ ယင်းဝူၼ်ႉဝႃႈၶဝ်ပဵၼ် လၢဝ်းပၢၼ်းၶႄႇလူးၵွၼ်ႇ- ၵူၼ်းပွတ်းလႃႈသဵဝ်ႈၵေႃႉၼိုင်ႈလၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈ ၸိူဝ်းယူႇၸွမ်းသဵၼ်ႈတႃႈသၢႆတၢင်း ၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ လႃႈသဵဝ်ႈ ၸိူဝ်းႁူႉလွင်ႈၸိူဝ်းၼႆႉ တုၵ်းယွၼ်းတီႈၽူႈၵွၼ်းတပ်ႉပလိၵ်ႈၸႄႈမိူင်းတႆး ဝိၼ်းထုၼ်း၊ ႁႂ်ႈၽူႈၵွၼ်းတပ်ႉ ပလိၵ်ႈလူင်းၵူတ်ႇထတ်းတူၺ်းသေ ၶိုၼ်းမႄးၶွတ်ႇၽွတ်ႈတပ်ႉပလိၵ်ႈ။ ပေႃးဢမ်ႇၼၼ် ၼႂ်းမိူင်းတႆးၼႆႉ ဝူဝ်းၵေႃႈတေမူၺ်ႉ၊ မႆႉၵေႃႈတေမူၺ်ႉ။ ထႅင်ႈဢိတ်းၼိုင်ႈ တႃႇႁဵတ်းႁႆႈႁဵတ်းၼႃးတေယၢပ်ႇၽိုတ်ႇ- ၼႆယဝ်ႉ။