သင်ၶၸဝ်ႈ တုၵ်းယွၼ်း ႁွမ်းပၼ်ႈပဵၼ်တပ်ႉသိုၵ်းလဵဝ် ပႃႇတီႇလဵဝ်
ဢမ်ဢွင်းၶမ်ၸႂ်မႃးႁိုင် ၵူၼ်းမိူင်းတုၵ်ႉယၢၵ်ႈၵိၼ်းၸႂ်
ႁူမ်ႈဝႃႈၵိုတ်းယိုဝ်းယဝ်ႉၵေႃႈ ပေႃႈမႄႈၵူၼ်းမိူင်း တိုၵ်ႉထုၵ်ႇ
ၵဵပ်းလုၵ်ႈၵဵပ်းလၢၼ်ႁဵတ်းသိုၵ်းႁဵတ်းသိူဝ်၊ သင်ၶၸဝ်ႈ ၼွၵ်ႈမိူင်းၼႂ်းမိူင်း
လူင်းလၢႆးမိုဝ်း တုၵ်းယွၼ်း ႁဵၵ်ႈႁွင်ႉ ႁႂ်ႈႁွမ်းပဵၼ်ပႃႇတီႇလဵဝ်
တပ်ႉသိုၵ်းလဵဝ်။
သင်ၶၸဝ်ႈၼွၵ်ႈမိူင်းၼႂ်းမိူင်း
3600 တူၼ်ပၢႆ တင်းၽူႈတၢင်တူဝ်ၼႂ်းမိူင်းတႆး 52 ၸႄႈဝဵင်းလႄႈၵူၼ်းမိူင်း
တႅမ်ႈလိၵ်ႈလူင်းလၢႆးမိုဝ်း တုၵ်းယွၼ်း 4 ၶေႃႈ မိူဝ်ႈဝၼ်းတီႈ 9 /4/14
ပူၼ်ႉမႃးၼႆႉသေ သူင်ႇထိုင်ၽူႈ ၵဵဝ်ႇၶွင်ႈ ၼႂ်းတပ်ႉသိုၵ်းတႆး ႄလႈပႃႇတီႇတႆး။
1.
ႁႂ်ႈတပ်ႉသိုၵ်းၸိုင်ႈတႆးလႄႈၶွင်ႇၸီႇဢဝ်ၶိုၼ်းၸိုင်ႈတႆး RCSS/SSA တင်း
တပ်ႉသိုၵ်းၸိုင်ႈတႆးလႄႈ ပႃႇတီႇမႂ်ႇသုင် ၸိုင်ႈတႆး SSPP/SSA
ႁူမ်ႈႁွမ်းပဵၼ်တပ်ႉသိုၵ်းဢၼ်လဵဝ်။
2. ႁႂ်ႈပႃႇတီႇၻီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD တင်း
ၻီႇမူဝ်ႇၶရႅတ်ႉတဵၵ်ႉၶ်ၸၢဝ်းၶိူဝ်းတႆး SNDP ပႃႇတီႇၵၢၼ်မိူင်း တႆး
ႁူမ်ႈႁွမ်းၵၼ်သေ မီးပႃႇတီႇဢၼ်လဵဝ်။
3. ဢဵၼ်းဢၢၼ်း ဢၼ်လဵဝ်။
4. တၵ်းတေလႆႈမၢႆမီႈၸိုင်ႈတႆးႁင်းၶေႃ
လိူဝ်သေၼၼ်ႉၼႂ်းလိၵ်ႈတုၵ်းယွၼ်း
ယင်းဝႃႈ - ႁႂ်ႈၵူၼ်းမိူင်းတႆးပေႃးပူၼ်ႉယၢၼ်ဢွၵ်ႇ
တႂ်ႈတၢင်းတုၵ်ႉယၢၵ်ႈ ၵိၼ်းၶၢၼ်ၸႂ်ႄလႈ လႆႈၵတ်းယဵၼ်ႁိၼ်ႉၼွၼ်း ယူႇၸိုၼ်ႈ
သိူဝ်းလူၼ်း ထၢင်ႇႁၢင်ႈ ႁဵတ်းသၢင်ႈႁႃၵိၼ် ငၢႆႈလူမ်၊ မိူဝ်ႈႁၵ်ႉၸိူဝ်ႉ
ၸၢတ်ႈဝၢၼ်ႈမိူင်းၸိုၼ်ႈ ၸၢင်ႇသိုဝ်ႈသႂ်ယူႇတႄႉၵေႃႈ
ထုၵ်ႇလီဢဝ်ပိုၼ်းလင်ပဵၼ် တွၼ်ႈသွၼ်၊ ပိူဝ်ႈတႃႇၵူၼ်းၶိူဝ်း ၼႂ်းမိူင်းတႆးၼၼ်ႉ
တၵ်းထုၵ်ႇလႆႈႁတ်းႁတ်း ႁၢၼ်ႁၢၼ် ဢမ်ႇၵူဝ်ဢမ်ႇႁႄႇ သေႁူမ်ႈႁွမ်းၵၼ် - ဝႃႈၼႆ။
ၽွင်းယၢမ်းၼႆႉ
တပ်းသိုၵ်းတႆး မီး 2 တပ်ႉသိုၵ်း၊ ပႃႇတီႇတႆး မီး 2 ပႃႇတီႇလႄႈ
တေၵမ်ႉထႅမ်ပၼ်ႁႅင်း တပ်ႉလႂ်ပႃႇတီႈလႂ်။ တေလႆႈၸွမ်းသဵၼ်ႈတၢင်းတပ်ႉလႂ်
ပႃႇတီႇလႂ်။ ၵူၼ်းဝၢၼ်ႈၵူၼ်းမိူင်းယိၼ်းၵႂင်ၸႂ်ၵႂင်ၶေႃႈ တႄႉတႄႉ။ ယွၼ်ႉၼၼ်
ၵၢၼ်သူၼ်း တုမ်ၵေႃႈ သင်ၶၸဝ်ႈလႄႈၵူၼ်းမိူင်း တၵ်းတေဢမ်ႇၵမ်ႉထႅမ်
ဢမ်ႇပၼ်ႁႅင်း - ၼႆယဝ်ႉ။
RCSS/SSA
တႄႉတေလႅပ်ႈထွမ်ႇသဵင်သင်ၶၸဝ်ႈသေတူင်ႉၼိုင်ယူႇ၊ မိူဝ်ႈၼႂ်းပီ 2013 ၼၼ်ႉ
လႆႈၵေႃႇတင်ႈ ၵေႃပွင်ၵၢၼ်ၸိူဝ်ႉၸၢတ်ႈ ၸိုင်ႈတႆး CSSU သေ
ပိုတ်ႇတၢင်းသိူဝ်ႇတၢင်းမႃးဝႆႉ - ၸွမ်သိုၵ်းယွတ်ႈသိုၵ်း
ႁူဝ်ပဝ်ႈၶွင်ႇၸီႇဢဝ်ၶိုၼ်းၸိုင်ႈတႆးလႄႈ တပ်ႉသိုၵ်းၸိုင်ႈတႆး
လႆႈၸႅင်ႈပွင်ႇၶိုၼ်းပၼ်မိူဝ်ႈဝၼ်းတီႈ 20 လိူၼ်ဢေးပရိူဝ်ႇလ်။
ႁဵတ်းၵၢၼ်လုၵ်ႉၾိုၼ်ႉမႃးၶၢဝ်းတၢင်းပီယၢဝ်းၶၢဝ်းႁိုင်ယဝ်ႉၵေႃႈ
ဢမ်ႇၸွႆႈလႆႈတၢင်းတုၵ်ႉယၢၵ်ႈၵွတ်းၽၢၼ် ၵူၼ်းဝၢၼ်ႈ ၵူၼ်းမိူင်း
ဢမ်ႇဢဝ်ၵူၼ်းမိူင်းဢွၵ်ႇပူၼ်ႉလႆႈၼႂ်းလုၵ်းၶုမ်ၽၢၼ်ႁၢႆႉၸႃႉလႆႈၵေႃႈႁင်းမၼ်း၊
ႁဵတ်းၵၢၼ်သူၼ်းတုမ်မႃး ၼပ်ႉဢမ်ႇထူၼ်ႈၵေႃႈ
ဢမ်ႇၽၢၼ်ႇပူၼ်ႉလႆႈထိုင်တီႈၸွမ်းၼင်ႇတၢင်းဢၢင်ႈဢၢၼ်း - ဝႃႈၼႆ။
ၼႂ်းၵေႃပွင်ၵၢၼ်ၸိူဝ်ႉၸၢတ်ႈၸိုင်ႈတႆး
CSSU ၼၼ်ႉ RCSS/SSA ၊ SSPP/SSA ၊ SNLD ၊ SNDP ၊ Shan CBOs ၊
ၸုမ်းၵူၼ်းၼုမ်ႇတႆးလႄႈၸုမ်းတႆးၸိူဝ်းႁဵတ်းၵၢၼ်သုၼ်ႇလႆႈၵူၼ်းၵေႃႈၶဝ်ႈပႃး။
ၵွပ်ႈၼႆ CSSU ၼႆႉ ပဵၼ်တီႈၵၢၼ် သူၼ်းတုမ် - ယုမ်ႇယမ်ၼင်ႇၼႆ။ သင်ၸိူင်ႉဝႃႈ
သင်ၶၸဝ်ႈၶဝ်၊ ၵူၼ်းူမိူင်းတႆးႁဝ်းၶဝ် ၶဝ်ႈႁူမ်ႈပႃးၸွမ်းတူင်ႉၼိုင်ၸိုင်
ၵူၼ်းၶိူဝ်းတႆး တၵ်းမီးသုၼ်ႇလႆႈၽွင်းငမ်းႁင်းၶေႃသေ
တၵ်းတိုၼ်းတေ ၸၢင်ႈၵေႃႇတင်ႈၸိုင်ႈမိူင်းၵတ်းယဵၼ် - ယုမ်ႇယမ်ၼင်ႇၼႆ - ၼႆယဝ်ႉ။
ၽူႈၸိူဝ်းႁဵတ်းၵၢၼ်လုၵ်ႉၾိုၼ်ႉၼႆႉ
ဢမ်ႇႁဵတ်းတႃႇၸိူဝ်ႉၸၢတ်ႈသေ ၵုမ်ႇမိုင်ႉႁႃၽွၼ်းလီတူဝ်ၵဝ်ႇၼၼ်ႉ
လႆႈႁၼ်ၵူၼ်းမိူင်း မႆႈၸႂ်ၸွမ်းယူႇ။ ၸိူင်ႉႁိုဝ်ၵေႃႈလီ မိူဝ်ႈလႆႈႁၼ်
ၵူၼ်းမိူင်းတႆးႁဝ်းသူၼ်ၸႂ် ၶဝ်ႈၸႂ် တူင်ႉတိုၼ်ႇ ၼိူဝ်ၵၢၼ်
မိူင်းတႆးႁဝ်းမႃးၼႆႉ လီယိၼ်းၸူမ်းတႄႉတႄႉ - ၸဝ်ႈယွတ်ႈသိုၵ်းလၢတ်ႈၼင်ႇၼႆ။
Tags: News, Politic