ႁုၼ်ႇႁၢင်ႈတွင်းလေႃႇ ၸဝ်ႈသုၶမ်းၼႆႉ ဝၼ်းတီႈ 28/04/2014 လုၵ်ႉဢဝ်ဝဵင်းတႃႈလိူဝ်ႇ (မၼ်းတလေး) ၶိုၼ်ႈမႃးမိူင်းတႆးသေ  မႃးယင်ႉလိုဝ်ႈတီႈဝဵင်းၵျွၵ်ႉမႄး။ ဝၼ်းတီႈ 29 ဢၢၼ်းမႃးၽႅဝ်တီႈၼမ်ႉပွင်ႈ၊ ဝၼ်းတီႈ 30 ၽႅဝ်တီႈႁူဝ်ယႃႉ။ ဝၼ်းတီႈ 01/05/2014 (လိူၼ် 6 မႂ်ႇ 3 ၶမ်ႈ) ဢၢၼ်းႁႂ်ႈၽႅဝ်တီႈ ဝဵင်းတၢင်ႉယၢၼ်း။ တေဢၢၼ်းလူႇတၢၼ်းဝႆႉတီႈ ဝတ်ႉ/ၵျွင်းၽြႃးလူင် မႁႃမုၼိ ဝဵင်းတၢင်ႉယၢၼ်း ၼႂ်းဝၼ်းတီႈ 03/05/2014 (လိူၼ် 6 မႂ်ႇ 5 ၶမ်ႈ) ၸွမ်းၵၼ်တင်း ပၢင်ပွႆးတၢင်ႇထီးဝတ်ႉ/ၵျွင်း တင်း လူႇတၢၼ်း ယၢတ်ႇၼမ်ႉၶႂမ်ႈတဝ်ႈ ပွႆးသၢင်ႇလွင်း- ၼႆယဝ်ႉ။

ႁၢင်ႈတွင်းလေႃႇၸဝ်ႈသုၶမ်း (တၢင်ႉယၢၼ်း)ၼႆႉ ၵႃႈၶၼ် 100 သႅၼ် (10 လၢၼ်ႉၵျၢတ်ႈ)။ ၸဝ်ႈတႃႇၼ ပဵၼ်ပေႃႈမႄႈပီႈၼွင်ႉတၢင်းႁိူၼ်း လႄႈမိတ်းသႁၢႆဢူၺ်းၵေႃႉ ႁူမ်ႈႁွမ်းၵၼ်ၶိုင်ပွင်လူႇတၢၼ်း။ ၼႂ်းပီႈၼွင်ႉ တၢင်းႁိူၼ်းၼၼ်ႉ မိူၼ်ၼင်ႇၵေႃႉပဵၼ်မႄႈလႃၽႄးၸဝ်ႈ တၵ်ႉၵႃႇမႄႈပႃႈၺုၼ်ႉ၊ ပီႈၼၢင်းၸဝ်ႈ ၼၢင်းသႂ်သႂ်သႅၼ်၊ ၵေႃႉပဵၼ်လုၵ်ႈလၢင်း ၼၢင်းသႂ်သႂ်သႅၼ် ၶုၼ်မဵတ်ႉတႃႇဢူး၊ ၼၢင်းမျႃႉၸိင်ႇ၊ ၸၢႆးဢွၼ်ႇမွၼ်းလၢဝ် ၸိူဝ်းၼႆႉ။

ႁုၼ်ႇႁၢင်ႈတွင်းလေႃႇၸဝ်ႈသုၶမ်းၼႆႉ တေဝႆႉတီႈဝတ်ႉဝႃးသေ ယိူင်းဢၢၼ်းပိူဝ်ႈတႃႇ ႁႂ်ႈၵူၼ်းမိူင်းလႆႈဝႆႈသႃ။ မိူဝ်ႈၽိတ်ႈပၢင်း/ယေႃးဢဝ် လုၵ်ႉဝဵင်းတႃႈလိူဝ်ႇ ၶိုၼ်ႈမႃးမိူင်းတႆးၼႆႉ မီးပီႈၼွင်ႉၵူၼ်းဝၢၼ်ႈၵူၼ်းမိူင်း ပႂ်ႉႁပ်ႉတွၼ်ႈ ပေႃးတဵမ်သဵၼ်ႈတၢင်း တင်ႈတႄႇပွတ်းၼွင်ၶဵဝ်ၶိုၼ်ႈမႃး၊ ၵူၼ်းမိူင်းႁူမ်ၸူမ်းႁပ်ႉတွၼ်ႈတႄႉတႄႉ။ မိူၼ်ၼင်ႇၶၢဝ်းယၢမ်း 5 မူင်း ယိူင်းဢၢၼ်းထိုင်ဝဵင်းလႃႈသဵဝ်ႈၸိူဝ်းၼႆႉ ဢမ်ႇထိုင်လႆႈၸွမ်းၼင်ႇတတ်းမၵ်း ၶၢဝ်းယၢမ်းဝႆႉ၊ ၵွပ်ႈၵူၼ်းမႃးႁပ်ႉတွၼ်ႈၼမ်၊ ၵေႃႉလႂ်ၵေႃႈၶႂ်ႈလူႇတၢၼ်း ၶႂ်ႈဝႆႈ- ၼႆယဝ်ႉ။

ၸဝ်ႈသုၶမ်း (ႁိုဝ်) ၸဝ်ႈသုၶမိၼ်တၼႆႉ ၵိူတ်ႇမိူဝ်ႈဝၼ်းတီႈ 26/05/1961 ၊ ယၢမ်းလဵဝ် ဢႃႇယုၸဝ်ႈလႆႈ 53 ပီ၊ ပဵၼ်သင်ၶၸိုဝ်ႈယႂ်ႇလိုဝ်းလင် ၾၢႆႇပၼ်တၢင်းႁူႉထမ်းမ (ၼႄတြႃး) ၼႂ်းမိူင်းတႆးပတ်းပိုၼ်ႉ။ ၼႂ်းမူဝ်သၢမ်လူင် (ၸဝ်ႈသုၶမ်း၊ ၸဝ်ႈထမ်မသႃႇမိ၊ ၸဝ်ႈတူၼ်ၶူးဝႃးဝုၼ်းၸုမ်ႉ)ၼၼ်ႉ ပႃးတူၼ်ၸဝ်ႈတူၼ်ၼိုင်ႈ။ ယၢမ်းလဵဝ် ပဵၼ်ၸဝ်ႈၵွၼ်းဝတ်ႉလွႆတိုင်ၶမ်း ဝဵင်းမူႇၸႄႈ ၸိုင်ႈတႆးပွတ်းႁွင်ႇ။