ၵူၼ်းဝၢၼ်ႈၵူၼ်းမိူင်း ၼႂ်းၸေႈဝဵင်းၼမ်ႉတူႈ ၸိူဝ်းလုသုမ်း တီႈလိၼ် ယွၼ်ႉတေႃႈလွတ်ႇၵႅတ်ႊသ်/ ၼမ်ႉမၼ်း၊ တုၵ်းယွၼ်းၵႃႈသၢႆႈတႅၼ်း တႃႇၶၢဝ်းတၢင်း 5 ပီ။ ဢမ်ႇၶႂ်ႈလႆႈပိူင် သၢႆႈတႅၼ်း 3 ပီ။

ပူၼ်ႉမႃးမိူဝ်ႈဝၼ်းတီႈ 23/03/2014 ၵူၼ်းဝၢၼ်ႈၵူၼ်းမိူင်း ၸၢဝ်းႁႆႈၸၢဝ်းၼႃး ၸိူဝ်ႈပဵၼ်ၸဝ်ႈၶွင်တီႈလိၼ် ႁူမ်ႈၵၼ်ၵႂႃႇတွင်ႈ ထၢမ်တူၺ်း တီႈၽူႈၵွၼ်းၸေႈဝဵင်း ဢူးတႅတ်ႉလုၼ်ႇ၊ လွင်ႈၵႃႈသၢႆႈတႅၼ်းတီႈလိၼ် ဢၼ်ထုၵ်ႇယိုတ်းဢဝ် ႁဵတ်းၶူင်းၵၢၼ် တေႃႈလွတ်ႇၵႅတ်ႊသ်/ၼမ်ႉမၼ်းလိပ်း ၼႂ်းၸေႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။ လွင်ႈၵူၼ်းဝၢၼ်ႈ ၸဝ်ႈၶွင်တီႈလိၼ်တုၵ်းယွၼ်းၵႃႈ သၢႆႈတႅၼ်းၸွမ်းပိူင် ၶၢဝ်းတၢင်း 5 ပီ၊ လွင်ႈဢမ်ႇၶႂ်ႈလႆႈၵႃႈသၢႆႈတႅၼ်း 3 ပီ။ ၵူၺ်းၵႃႈ ဢူးတႅတ်းလုၼ်ႇ လၢတ်ႈဝႃႈႁႂ်ႈပႂ်ႉ တူၺ်းထႅင်ႈၵွၼ်ႇ။

ထိုင်မႃးဝၼ်းတီႈ 28/03/2014 ၸဝ်ႈၶွင်တီႈလိၼ်ၶဝ်ႁူမ်ႈၵၼ် ၵႂႃႇတွင်ႈထၢမ်တူၺ်းထႅင်ႈ တီႈၽူႈၵွၼ်း ၸေႈဝဵင်း ဢူးတႅတ်ႉလုၼ်ႇ ထႅင်ႈ။ ပွၵ်ႈၼႆႉ ဢူးတႅတ်ႉလုၼ်ႇ တွပ်ႇလၢတ်ႈဝႃႈ-  ပီႈၼွင်ႉၶႄႇၶဝ်ပႆႇလၢတ်ႈမႃး ဝႃႈႁိုဝ်၊ ပေႃးသူ ၸႂ်ဢမ်ႇယၢဝ်း၊ ၵူဝ်ဢမ်ႇလႆႈၵေႃႈ ႁႂ်ႈႁဵတ်းလိၵ်ႈတၢင်ႇလိၵ်ႈတီႈၸွမ်ၽွင်းလူင်မိူင်းတႆးထႅင်ႈ။ လွင်ႈၼႆႉ ႁဵတ်းႁႂ်ႈၵူၼ်း ဝၢၼ်ႈ ၵူၼ်းမိူင်းဢမ်ႇႁၢၼ်ႉၸႂ်၊ ၵွပ်ႈဝႃႈၵႃႈ ၵွၼ်ႇပူၼ်ႉမႃးၵေႃႈ ၵႂႃႇတၢင်ႇလၢတ်ႈ ဢမ်ႇယွမ်းယဝ်ႉ 4-5 ပွၵ်ႈ၊ ဢူးတႅတ်ႉလုၼ်ႇ လၢတ်ႈၵႂၢမ်းဢမ်ႇပဵၼ်ၵႂၢမ်းသေပွၵ်ႈ- ၼႆယဝ်ႉ။

ဢိင်ၼိူဝ် ၽူႈၵွၼ်းၸေႈဝဵင်းၼမ်ႉတူႈ ၼႄႉၼမ်းၼင်ႇၼၼ်သေ ၼႂ်းဝၼ်းတီႈ 28/03/14 ၼၼ်ႉ ၵူၼ်းဝၢၼ်ႈပဵင်းလွင်း တင်းဝၢၼ်ႈမျၢၼ်ႇမႃႇ (မၢၼ်ႈ) ၼႂ်းဢိူင်ႇသၢႆးၶၢဝ် ၸိူဝ်းပဵၼ်ၸဝ်ႈၶွင်တီႈလိၼ်တင်း မူတ်းႁူမ်ႈ 14 ၵေႃႉ ၵေႃႈ ႁဵတ်းလိၵ်ႈတၢင်ႇထိုင် ၸွမ်ၽွင်းလူင်မိူင်းတႆးထႅင်ႈ။

ၵဵဝ်ႇၵပ်းလွင်ႈၼႆႉ ပိူဝ်ႈတႃႇတေႃႈလွတ်ႇၵႅတ်ႊသ်/ၼမ်ႉမၼ်းမဵၼ် လတ်းၽၢၼ်ႇၼႆသေ ၵႃႈပူၼ်ႉမႃး ၸဝ်ႈၼႃႈတီႈလူင်ပွင်ၸိုင်ႈမၢၼ်ႈ လႆႈယိုတ်းဢဝ်တီႈလိၼ်/သူၼ်ၵူၼ်းဝၢၼ်ႈ ပွတ်းဝၢၼ်ႈသၢႆးၶၢဝ် ဢိူင်ႇသၢႆးၶၢဝ် ၸေႈဝဵင်းၼမ်ႉတူႈ တၢင်းၵႂၢင်ႈ 30 မဵတ်ႉ (မီႊတိူဝ်ႊ)။ ၼႂ်းတီႈလိၼ် 30 မဵတ်ႉၼၼ်ႉ သၢႆႈတႅၼ်းလွင်ႈလႆႈသုမ်းတီႈလိၼ်သေ လႆႈၵႃႈ သၢႆႈတႅၼ်းၵိုင်ႇၼမ်ႉၵိုင်ႇတူဝ်ၵႂႃႇ၊ လူၺ်ႈသၢႆႈတႅၼ်း ပၼ်ၶိုၼ်းၵႃႈ တူၼ်ႈမႆႉတူၼ်ႈတွၵ်ႇ မွၵ်ႇမၢၵ်ႇႁၢၵ်ႈႁူဝ် ၸိူဝ်းၽုၵ်ႇဝႆႉ ၼႂ်းသူၼ် တႃႇၶၢဝ်းတၢင်း 5 ပီ။

ၵၢၼ်သၢႆႈတႅၼ်းၼၼ်ႉ တူၼ်ႈမႆႉ 1 တူၼ်ႈ တမ်းဝၢင်းၵႃႈၶၼ် 1,500 ၊ သၢႆႈတႅၼ်းၶၢဝ်းတၢင်း 5 ပီ (1,500x5= 7,500) တင်းမူတ်းသၢႆႈ တႅၼ်းပၼ်ငိုၼ်း 7,500 ၵျၢတ်ႈ။ (တူဝ်ယၢင်ႇ မီးမႆႉပူၵ်ႇၵေႃၼိုင်ႈ၊ ၼိုင်ႈၵေႃမီး 50 လႅမ်ႈ၊ သၢႆႈတႅၼ်းပၼ်ၶၢဝ်းတၢင်း 5 ပီ (50x7,500=375,000)၊ သွၼ်ႇပႃးတႃႇၼေႃႇမၼ်း၊ ၵူၼ်းမိူင်းၸဝ်ႈတီႈလိၼ် လႆႈၵႃႈ သၢႆႈတႅၼ်း တူၵ်းငိုၼ်း 375,000 ၵျၢတ်ႈ။

ၵဵဝ်ႇၵပ်းလွင်ႈယိုတ်းတီႈလိၼ်ၼႆႉ မိူဝ်ႈတႄႇမၼ်း ၸဝ်ႈၼႃႈတီႈလူင်ပွင်ၸိုင်ႈ ၶဝ်ဝႃႈဢၢၼ်းယိုတ်းၼႂ်းဝူင်း တၢင်းၵႂၢင်ႈ 30 မဵတ်ႉၵူၺ်း။ ၵူၺ်းၵႃႈ သမ်ႉယိုတ်းၼမ်လိူဝ် 30 မဵတ်ႉ၊ ဢၼ်ယိုတ်းလိူဝ်ၼၼ်ႉ သမ်ႉပၼ်ၵႃႈ သၢႆႈတႅၼ်း ဢေႇပူၼ်ႉတီႈ။ ၸွမ်းၼင်ႇ ႁွင်ႈၵၢၼ် ၾၢႆႇႁႅင်းထၢတ်ႈ/ႁႅင်းၾႆးလူင်ပွင်ၸိုင်ႈ တႅတ်းတတ်းသေ တေသၢႆႈတႅၼ်းပၼ်မႃး ၼၼ်ႉ ၵူၼ်းဝၢၼ်ႈၵူၼ်းမိူင်းၼပ်ႉသွၼ်ႇတူၺ်း ဢမ်ႇတဵမ်တႃႇ 3 ပီ။ ၵွပ်ႈၼၼ် ႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်း ၸိူဝ်းသုမ်းတီႈလိၼ်/ သုမ်းတူၼ်ႈမႆႉတူၼ်ႈတွၵ်ႇမွၵ်ႇမၢၵ်ႇႁၢၵ်ႈ ႁူဝ်ဢၼ်ၽုၵ်ႇဝႆႉ ၼႂ်းသူၼ်ၼႂ်းႁိူၵ်ႈ ဢမ်ႇႁၢၼ်ႉၸႂ်။

ၵဵဝ်ႇၵပ်းလွင်ႈၵႃႈသၢႆႈတႅၼ်းၼႆႉ ၵႃႈပူၼ်ႉမႃး ၸဝ်ႈၶွင်တီႈလိၼ်ၶဝ် ယၢမ်ႈတၢင်ႇလိၵ်ႈယဝ်ႉလၢႆပွၵ်ႈ။ မိူဝ်ႈဝၼ်းတီႈ 27/06/2013 ပွၵ်ႈၼိုင်ႈ။ ဝၢႆးၼၼ်ႉ လူင်ပွင်ၸိုင်ႈမိူင်းတႆး လၢတ်ႈၼႄတီႈၶွမ်ႊပၼီႊၶႄႇသေ ႁႂ်ႈၵူၼ်းႁဵတ်းၵၢၼ် ၼႂ်းၶွမ်ႊပၼီႊၶူင်းၵၢၼ်တေႃႇတေႃႈ လွတ်ႇၵႅတ်ႊသ်/ၼမ်ႉမၼ်း မႃးဢုပ်ႇၵၼ်တင်း ၵူၼ်းဝၢၼ်ႈ၊ တၢင်းၶွမ်ႊပၼီႊ လၢတ်ႈဝႃႈ တေပၼ်ငိုၼ်းသၢႆႈတႅၼ်း တႃႇၵူၼ်းဝၢၼ်ႈ ၸွမ်းပိူင် 0.8 - ၼႆယဝ်ႉ။

ဝၢႆးၼပ်ႉသွၼ်ႇပၼ်ၵႂႃႇယဝ်ႉ၊ ၵူၼ်းဝၢၼ်ႈၶဝ်ဝႃႈ ပိူင်ဢၼ်ၼႆႉ ႁဝ်းဢမ်ႇၶႂ်ႈလႆႈ၊ ႁဝ်းၶႂ်ႈလႆႈပိူင်ဢၼ် သၢႆႈတႅၼ်းပၼ်တႃႇၶၢဝ်းတၢင်း 5 ပီ၊ မၼ်းတေလႆႈငိုၼ်းပဵၼ်ၵွၼ်ႈပဵၼ်ၶၼ်။ ၵူၺ်းၵႃႈ ၽိူဝ်ႇၵူၼ်းဝၢၼ်ႈ တုၵ်းယွၼ်းပိူင်သၢႆႈတႅၼ်း ၼႆႉယဝ်ႉ ၶွမ်ႊပၼီႊၶဝ်ၵေႃႈ ဢမ်ႇမႃးထႅင်ႈ။

ထိုင်မႃးဝၼ်းတီႈ 31/10/2013 ၵူၼ်းဝၢၼ်ႈၵူၼ်းမိူင်း ၵႂႃႇတၢင်ႇထိုင်တီႈၽူႈၵွၼ်းၸႄႈဝဵင်း ၼမ်ႉတူႈ ဢူးတႅတ်ႉလုၼ်ႇ၊ ၽူႈၵွၼ်းၸႄႈဝဵင်းၵေႃႈလၢတ်ႈဝႃႈ တေၶိုင်ပွင်ပၼ်ၵူၺ်း။ ၵူၺ်းၵႃႈ ဝၢႆးၼၼ်ႉၵေႃႈဢမ်ႇ တၵ်းသဵင်သင်။ ထိုင်မႃး ဝၼ်းတီႈ 20/02/2014 ၵူၼ်းဝၢၼ်ႈၸဝ်ႈၶွင်တီႈလိၼ်ၶဝ် ၵႂႃႇတၢင်ႇထႅင်ႈ၊ ဢူးတႅတ်ႉလုၼ်ႇၵေႃႈလၢတ်ႈဝႃႈ- ႁဝ်းတေ လၢတ်ႈပၼ်ၵူၺ်း၊ မိူဝ်ႈလဵဝ် တၢင်းၶွမ်ႊပၼီႊၶႄႇၶဝ်ပႆႇတွပ်ႇလိၵ်ႈ မႃးဝႃႈႁိုဝ်။ ပေႃးၶဝ်ႁဵတ်းလိၵ်ႈမႃး ဢမ်ႇၼၼ် တူဝ်ၶဝ်မႃး ႁဝ်းတေပွင်ႇၶၢဝ်ႇပၼ် သူၵမ်းလဵဝ်။ ၵူၺ်းၵႃႈ ဝၢႆးၼၼ်ႉမႃးၵေႃႈ သမ်ႉယဵၼ်သီႇသီႇၵႂႃႇထႅင်ႈလႄႈ ၵူၼ်းဝၢၼ်ႈၸင်ႇဢွၼ်ၵၼ် တၢင်ႇထႅင်ႈၼႂ်းလိူၼ်မၢတ်ႊၶျ် ပူၼ်ႉမႃးၼႆႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈၵွၼ်းၸေႈဝဵင်း ၶွင်ပႃႊတီႊမႂ်ႇသုင်ၸိုင်ႈတႆး (SSPP/SSA) ပွတ်းတွၼ်ႈၼၼ်ႉၵေႃႈ လၢတ်ႈဝႃႈ- လွင်ႈၼႆႉ ႁဝ်းဢမ်ႇၶႂ်ႈသုၵ်ႉသၵ်ႉ၊ ဢမ်ႇၶႂ်ႈလၢတ်ႈၸွမ်းၼင်ႇၵဝ်ႇ။ ၵူၺ်းၵႃႈ လွင်ႈၸဝ်ႈႁႆႈၸဝ်ႈ ၼႃးၶဝ် တေလႆႈငိုၼ်း သၢႆႈတႅၼ်းၵႃႈႁိုဝ်၊ ၸွင်ႇတေလႆႈငိုၼ်းသၢႆႈတႅၼ်းတဵမ်ထူၼ်ႈၸိူဝ်းၼႆႉ ႁဝ်းၵေႃႈပႂ်ႉ တူၺ်းယူႇ။ သင်ၸိူဝ်ႉဝႃႈ ၶႂ်ႈႁႂ်ႈႁဝ်း ၶဝ်ႈၸွႆႈထႅမ်ၸိုင် ႁဝ်းၶႃႈၶဝ်ႈၸွႆႈ လႆႈတီႈလႂ်ၵေႃႈ ႁဝ်းၶႃႈတိုၼ်းတေဢမ်ႇ ၼၵ်းတူဝ်ၼၵ်းၸႂ်၊ တိုၼ်းတေၶဝ်ႈၸွႆႈ- ဝႃႈၼႆ။