ၶၢဝ်းမႆႈ ၽွင်းလိုဝ်ႈႁူင်းႁဵၼ်းလူင်ပွင်ၸိုင်ႈမၢၼ်ႈ ၶၢဝ်းတၢင်း 3 လိူၼ်ၼႆႉ တီႈဝဵင်းၵျွၵ်ႉမႄး တင်းဝဵင်းၵဵင်းတုင်၊ ဢဝ်တိုဝ်ႉတၢင်း ပိုတ်ႇႁူင်းႁဵၼ်းၸိူဝ်ႉၸၢတ်ႈတႆး။

ႁူင်းႁဵၼ်းၵူၼ်းၸၢဝ်းၶိူဝ်းတႆး တီႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ ပိုတ်ႇတီႈ ဝတ်ႉလူင်ဝၢႆ၊ ဢိူင်ႇၸၶၢၼ်းသႃႇ။ ပိုတ်ႇပူင်သွၼ်ပၼ် ၸၼ်ႉဢွၼ်ႇလႄႈ ၸၼ်ႉၼိုင်ႈ။ ၸၼ်ႉသွင်၊ ၸၼ်ႉသၢမ် လႄႈၸၼ်ႉသီႇ။

ပိူဝ်ႈတႃႇၵၢၼ်ပူင်သွၼ် ၸၼ်ႉဢွၼ်ႇလႄႈၸၼ်ႉၼိုင်ႈၼၼ်ႉ လိၵ်ႈဢိင်းၵလဵတ်ႈ  ၵၢင်ၼႂ်ယၢမ်း 08:30-09:30 8 မူင်း၊ ဝၼ်းၸၼ်ထိုင်ဝၼ်းသုၵ်း။ လိၵ်ႈတႆး ၵၢင်ၼႂ်ယၢမ်း 09:30-10:30 မူင်း၊ ဝၼ်းၸၼ်တေႃႇထိုင် ဝၼ်းသုၵ်း။ ပၢႆးၼပ်ႉ ၵၢင်ၼႂ်ယၢမ်း 08:30-09:30 8 မူင်း၊ ဝၼ်းသဝ်လႄႈဝၼ်းဢႃးတိတ်ႉ။

ၵၢၼ်ပူင်သွၼ် ၸၼ်ႉသွင်/သၢမ်/သီႇ သမ်ႉ လိၵ်ႈဢိင်းၵလဵတ်ႈ  ၵၢင်ၼႂ်ယၢမ်း 09:30-10:30 8 မူင်း ၵူႈဝၼ်း။ လိၵ်ႈတႆး ၵၢင်ၼႂ်ယၢမ်း 08:30-09:30 မူင်း၊ ဝၼ်းၸၼ်ထိုင် ဝၼ်းသုၵ်း။ ပိုၼ်း ပွတ်းၼႂ်ယၢမ်း 11:00-12:00 မူင်း ဝၼ်းၸၼ်ထိုင်ဝၼ်းသုၵ်း။ ၾိင်ႈငႄႈပုတ်ႉထ ၵၢင်ဝၼ်းယၢမ်း 13:00-14:00 မူင်း ၵူႈဝၼ်း။ ပၢႆးမွၼ်း ဝၢႆးဝၼ်း 14:00-14:00 မူင်း ၵူႈဝၼ်း။

ႁူင်းႁဵၼ်းၵူၼ်းၸၢဝ်းၶိူဝ်းတႆးၼႆႉ ၵေႃႇတင်ႈမႃးမိူဝ်ႈဝၼ်းလိူၼ်သၢမ်မူၼ်း (14/02/2014) ပီတႆး 2108 ၼီႈ။ မီးၵၢၼ် တိုၵ်းသူၼ်းဝႃႈ ႁႂ်ႈႁဵတ်းၵၢၼ်ၵိုၵ်းပိုၼ်း၊ မိူၼ်ၼင်ႇ  1.ယႃႇပေပၼ်လိၵ်ႈလၢႆး ၾိင်ႈငႄႈႁဝ်းႁၢႆ။ 2.ႁဝ်းတင်းသဵင်ႈ မီးပုၼ်ႈၽွၼ်းယႂ်ႇလူင် ပိူဝ်ႈတႃႇႁၵ်ႉသႃပႂ်ႉပႃးၾိင်ႈငႄႈႁဝ်းသိုပ်ႇၵႂႃႇ။ 3.ပေႃးလိၵ်ႈလၢႆးၾိင်ႈငႄႈႁဝ်းႁၢႆ မိူၼ်သၢႆၸႂ် ၼိူဝ်ႉလိူတ်ႈႁဝ်းတၢႆ။ 4.ၵၢၼ်ႁဵၼ်းၼႆႉ ပဵၼ်တႃႇတူဝ်ၵဝ်ႇလႄႈ တၢင်ႇၵေႃႉ ၶိုၼ်ႈယႂ်ႇမႂ်ႇသုင် ၸိူဝ်းၼႆႉ။

တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၵေႃႈ ပိုတ်ႇႁူင်းႁဵၼ်းၸိူဝ်ႉၸၢတ်ႈတႆး။ တီႈၵဵင်းတုင်ၼႆႉ ၸၢႆးသၢမ်တိပ်ႉသိူဝ် ပဵၼ်ၽူႈၵွၼ်း ႁူင်းႁဵၼ်း။