ဢိင်လူၺ်ႈဢႃယု ၵၢၼ်လုၵ်ႉၾိုၼ်ႉၵႅတ်ႇၶႄဝၢၼ်ႈမိူင်း လႄႈပိူဝ်ႈသုၼ်ႇလႆႈၵၢၼ်ထၢင်ႇႁၢင်ႈလွတ်ႈလႅဝ်းၶူပ်းၶွပ်ႈ 50 ပီ ၼႂ်းတိုဝ်ႉတၢင်း ၵၢၼ်လုၵ်ႉၾိုၼ်ႉယိုၼ်းယၢဝ်းမႃးထိုင်ပီၵွၼ်းၶမ်း ၶွင်တပ်ႉသိုၵ်းၸိုင်ႈတႆး/ပႃႇတီႇမႂ်ႇသုင်ၸိုင်ႈတႆး တီႈငဝ်ႈၸိုင်ႈဝၢၼ်ႈႁႆး ၸႄႈဝဵင်းၵေးသီး ၸိုင်ႈတႆးပွတ်းႁွင်ႇၼႆႉ ၼႂ်းဝၼ်းတီႈ 25/04/2014 ဝၼ်းလိုၼ်းသုတ်း ပၢင်ပွႆးၼၼ်ႉ ၽွင်းၶၢဝ်းယၢမ်း 09.00 မူင်း ထိုင် 12.00 မူင်း ၵေႃၵမ်ၵၢၼ် ၵေႃႁူမ်ႈသၢင်ႈၸိုင်ႈတႆး SSJAC လႆႈပိုၼ်ၽၢဝ်ႇဢွၵ်ႇမႃးၽိုၼ်ၼိုင်ႈ ၵဵဝ်ႇၵပ်းၵၢင်ၸႂ်ၵေႃၵမ်ၵၢၼ် ပိူဝ်ႈပိုတ်ႇၶေႃႈထၢမ်တွပ်ႇ လွင်ႈဢမ်ဢွင်းၼႂ်းၸႂ် ၵူၼ်းမိူင်းတႆး ဢၼ်တေၸၢင်ႈလႅၵ်ႈလၢႆႈ ပိၼ်ႇပႆႇၵၼ်။

 “မိူဝ်ႈသွင်ပႃႇတီႇတႆး တေႁူမ်ႈႁွမ်းၵၼ် ၸွမ်းၼင်ႇၵၢင်ၸႂ်ၵူၼ်းမိူင်း ႁဵၵ်ႈႁွင်ႉတုၵ်းယွၼ်းၼၼ်ႉ တၵ်းတေလႆႈပဵၼ်။ လူၺ်ႈဢၼ်ပေႃႈမႄႈၵူၼ်းမိူင်းၶႂ်ႈလႆႈၶႂ်ႈပဵၼ် ႁႂ်ႈၽူႈၼမ်းၸၼ်ႉသုင်ၽူႈမီးဢမ်းၼၢၸ်ႈသုင်သုတ်းတႆးႁဝ်း 5 ၸဝ်ႈ ႁူပ်ႉထူပ်းဢုပ်ႇဢူဝ်းၵိူဝ်းၵုမ်ၵၼ်၊ ၵဵဝ်ႇလွင်ႈၼႆႉ ႁဝ်းၶႃႈႁၼ်လီ ၵမ်ႉထႅမ်တဵမ်တီႈ။ ပေႃးတေထူပ်းၵၼ် ႁႂ်ႈလႆႈထူပ်းၵၼ် ၼႂ်းၸိုင်ႈတႆးႁဝ်းၼႆႉၼၼ်ႉၵေႃႈ တိုၼ်းၽွမ်ႉတူဝ်ႈတၼ်းၵူႈမိူဝ်ႈၵူႈၶၢဝ်းယၢမ်း” - ၶုၼ်းထုၼ်းဢူး ႁူဝ်ပဝ်ႈပႃႇတီႇ ၻီႇမူဝ်ႇၶရေႇသီႇ ၸိူဝ်ႉၶိူဝ်းတႆး SNLD လၢတ်ႈၼင်ႇၼႆ။

တၢင်းလုၵ်ႈၸုမ်းပႃႇတီႇ ၻီႇမူဝ်ႇၶရႅတ်ႉတိၵ်ႉၸၢဝ်းၶိူဝ်းတႆး (SNDP) ၵေႃႉၼိုင်ႈၵေႃႈလၢတ်ႈဝႃႈ - “ပိူဝ်ႈတႃႇပႃႇတီႇတႆး သွင်ပႃႇတီႇ တေႁူမ်ႈႁွမ်းၵၼ်လႆႈၼၼ်ႉ ယူႇတီႈၽူႈၼမ်းသုင်သုတ်းၶဝ် 5 ၸဝ်ႈၼၼ်ႉၵူၺ်း။ လိူဝ်ၸိူဝ်းၼၼ်ႉ ဢမ်ႇမီး ဢမ်းၼၢၸ်ႈတႅပ်းတတ်း” - ဝႃႈၼႆ။

ၸိူင်ႉႁိုဝ်ၵေႃႈလီ ပူၼ်ႉမႃးမိူဝ်ႈဝၼ်းတီႈ 24 လိူၼ်ဢေႇပရိူဝ်လ်ၼႆႉ ၵေႃႁူမ်ႈသၢင်ႈၸိုင်ႈတႆး ဢွၵ်ႇၶေႃႈပိုၼ်ၽၢဝ်ႇ ယိၼ်းလီၸူမ်းသိူဝ်းပီၵွၼ်းငိုၼ်းတပ်ႉသိုၵ်းၸိုင်ႈတႆးလႄႈပႃႇတီႇမႂ်ႇသုင်ၸိုင်ႈတႆးသေ - 1. ပိူဝ်ႈတႃႇၶွတ်ႇၽွတ်ႈလွၵ်း ပိူင်ၽွင်းငမ်းၵၢၼ်လွတ်ႈလႅဝ်းထၢင်ႇႁၢင်ႈ (ၻီႇမူဝ်ႇၶရေႇသီႇ) ၊ ပိူင်ငဝ်ႈပိုင်းမိူင်း ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ ပုတ်ႈတႅၼ်းပိူင်ငဝ်ႈပိုင်းမိူင်း 2008 ။ 2. လွင်ႈၽွမ်ႉသဵင်ပဵင်းပၢၵ်ႇၵူၼ်းမိူင်းၸိုင်ႈတႆး ။ 3. ၸိုင်ႈမိူင်းႁူမ်ႈတုမ် ၵတ်းယဵၼ်ႁိၼ်ႉၼွၼ်းယိုၼ်းယၢဝ်းထႃဝွရ်း (ထႃႇဝရ) ႄလႈ 4. ပူတ်းပွႆႇဝၢင်းၽႃႈတူတ်ႈၶင်ၶွၵ်ႈ ၵူၼ်းၵၢၼ်မိူင်း တင်းမူတ်းတင်းသဵင်ႈ -ၸိူဝ်းၼႆႉ။

ၵေႃႁူမ်ႈသၢင်ႈၸိုင်ႈတႆး Shan State Joint Action Committee ၶွတ်ႇၽွတ်ႈၵေႃႇတင်ႈမႃး မိူဝ်ႈဝၼ်းတီႈ 6  လိူၼ်ၵျုၼ်ႇ ပီ 1996 သေ မီးပႃႇတီႇ ၻီႇမူဝ်ႇၶရေႇသီႇၸိူဝ်ႉၶိူဝ်းတႆး SNLD ၊ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး SSNA ၊ ပႃႇတီႇမႂ်ႇသုင်ၸိုင်ႈတႆး SSPP  ။