ၽွင်းတႅၼ်းပႃႊတီႊသိူဝ်ၽိူၵ်ႇ (SNDP) 3 ၵေႃႉ ထွၼ်တူဝ်ဢွၵ်ႇ၊ ယိူင်းဢၢၼ်းပိူဝ်ႈတႃႇမိပ်ႇဢီးႁႂ်ႈပႃႊတီႊ ၵၢၼ်မိူင်းတႆးႁူမ်ႈႁွမ်းၵၼ် ပဵၼ်ၼိုင်ႈလဵဝ်။

ဝၼ်းတီႈ 27/03/14 ယၢမ်းၵၢင်ၼႂ် ၽွင်းတႅၼ်းၸႄႈမိူင်း ၶွင်ၻီႊမွၵ်းၶရႅတ်ႊတိၵ်ႊပႃႊတီႊၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) 3 ၵေႃႉ- 1.ၽွင်းတႅၼ်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းမိူင်းယႆ၊ လုင်းၸၢႆးၸၢမ်ႇ ၽေႇ (ႁွင်ႉလုင်းၸိုၼ်ႈပၢင်ႇၾႃႉ)။ 2.ၽွင်းတႅၼ်းၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းတူၼ် ၸၢႆးဝိၼ်းမျၢတ်ႉဢူး။ 3.ၽွင်းတႅၼ်းၶဵတ်ႇလိူၵ်ႈတင်ႈမၢႆ 2 ၵျွၵ်ႉမႄး ၸၢႆးတၢၼ်းမွင်ႇ ၸိူဝ်းၼႆႉထွၼ်တူဝ်ဢွၵ်ႇ ပႃႊတီႊ။ ႁွင်ႉၸုမ်းသိုဝ်ႇၶၢဝ်ႇ ၼႂ်းတူၼ်ႈတီးသေႁဵတ်းပၢင်လႅင်းၸႅင်ႈၶၢဝ်ႇတီႈႁွင်ႈႁၢၼ်ႉ တၢင်းၵိၼ် ၶလၢတ်ႊသိၵ်ႊ ဢၼ်မီးတီႈပွၵ်ႉၵၢၼ်ႇသျေႉ ဝဵင်းတူၼ်ႈတီး။ မီးၽူႈသိုဝ်ႇၶၢဝ်ႇ 27 ၸုမ်း ၶဝ်ႈႁူမ်ႈထွမ်ႇငိၼ်း တွင်ႈထၢမ် ၵၢင်ၸႂ် တင်း 3 ၵေႃႉ - ၼႆယဝ်ႉ။

ၽွင်းတႅၼ်းပႃႊတီႊသိူဝ်ၽိူၵ်ႇ 3 ၵေႃႉၼႆႉ လၢတ်ႈဝႃႈ ဢိင်ၼိူဝ်ငဝ်းလၢႆးၽႂ်မၼ်းသေ ထွၼ်တူဝ်ဢွၵ်ႇ။ ၵူၺ်းၵႃႈ ဢၼ်တင်းသၢမ်ၵေႃႉ မိူၼ်ၵၼ်၊ လွင်ႈတၢင်းလႆႈထွၼ်တူဝ်ဢွၵ်ႇၼၼ်ႉ ပိူဝ်ႈတႃႇသူၼ်းဢီးပႃႊတီႊ တႆး 2 ဢၼ် ႁူမ်ႈၵၼ်ပဵၼ်ဢၼ်ၼိုင်ႈဢၼ်လဵဝ်။

ၵဵဝ်ႇၵပ်းလွင်ႈၼႆႉ ၸၢႆးဝိၼ်းမျၢတ်ႉဢူး ၽွင်းတႅၼ်းပႃႊတီႊသိူဝ်ၽိူၵ်ႇ မိူင်းတူၼ် လၢတ်ႈဝႃႈ- ႁဝ်းၶႃႈၵႂႃႇ ယိုၼ်ႈ လိၵ်ႈၸႅင်ႈပၼ်တီႈ ၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းတႆးဝႃႈ ႁဝ်းၶႃႈထွၼ်တူဝ်ဢွၵ်ႇၼႂ်းပႃႊတီႊ သိူဝ်ၽိူၵ်ႇ ယဝ်ႉ၊ ၵႂႃႇၸႅင်ႈယဝ်ႉမိူဝ်ႈဝၼ်းတီႈ 26/03/14 ။ တူဝ်ၶႃႈႁဝ်းတႄႉ မိူဝ်ႈလဵဝ်ဢိင်ၼိူဝ်ပႃႊတီႊ ႁူဝ်သိူဝ်သမ်ႉမီး ပၢင်ၵုမ်သေ ပႆႇလႆႈၵႂႃႇၶဝ်ႈႁူမ်ႈ၊ ပိူဝ်ႈတႃႇႁဵတ်းၵၢၼ်ၸိူဝ်ႉၸၢတ်ႈ ဝၢၼ်ႈမိူင်း ၵႂႃႇထႅင်ႈတၢင်း ၼႃႈၼႆႉ တေၶဝ်ႈႁူမ်ႈပႃႊတီႊႁူဝ်သိူဝ်ၵမ်းလဵဝ်၊ တႃႇသွင်ၵေႃႉၼၼ်ႉတႄႉ တေမႃးၶဝ်ႈမိူဝ်ႈလႂ်ၵေႃႈပႆႇႁူႉ- ဝႃႈၼႆ။

သိုပ်ႇလၢတ်ႈဝႃႈ- ဢၼ်ႁဝ်းၶႃႈထွၼ်တူဝ်ဢွၵ်ႇၼႆႉ ပိူဝ်ႈတႃႇသူၼ်းဢီးႁႂ်ႈပႃႊတီႊတႆးႁဝ်း ပဵၼ်ဢၼ်ၼိုင်ႈ ဢၼ်လဵဝ်ၵၼ်။ တင်း 3 ၵေႃႉၼႆႉ တေမႃးႁူမ်ႈႁွမ်းႁူဝ်သိူဝ်သေႁဵတ်းသၢင်ႈၵၢၼ်ငၢၼ်းၵႂႃႇ။ ၵူၺ်းၵႃႈ ၸိူဝ်းထွၼ်တူဝ်ဢွၵ်ႇၼႆႉ ၵမ်ႈၽွင်ႈမီးၼႃႈၵၢၼ်ၵႂႃႇ ၵဵပ်းသဵၼ်ႈသၢႆမၢႆႁူဝ်ၵူၼ်းလႄႈ ၵိုင်ႉၵၢင်ႉပႆႇၸၢင်ႈမႃး ယိုၼ်ႈလိၵ်ႈၶဝ်ႈပဵၼ်လုၵ်ႈၸုမ်းပႃႊတီႊႁူဝ်သိူဝ်၊ ပေႃးဝႃႈဝၢႆးၵဵပ်းသဵၼ်ႈသၢႆမၢႆ ႁူဝ်ၵူၼ်းယဝ်ႉ ၸင်ႇတေမႃး- ဝႃႈၼႆ။ (ၸၢႆးတၢၼ်းမွင်ႇ ၽွင်းတႅၼ်းၵျွၵ်ႉမႄး၊ ပဵၼ်ႁူဝ်ပဝ်ႈၶွမ်ႊမတီႊၵဵပ်းသဵၼ်ႈသၢႆမၢႆႁူဝ်ၵူၼ်း။)

ၸၢႆးလူင် ၽူႈၶဝ်ႈလုၵ်ႈၸုမ်းပႃႊတီႊသိူဝ်ၽိူၵ်ႇ ဝဵင်းမိူင်းတူၼ် ၵေႃႈလၢတ်ႈဝႃႈ-  ဢၼ်ႁဵတ်းႁႂ်ႈႁူဝ်ပဝ်ႈႁဝ်းၶႃႈ ၸႄႈဝဵင်းမိူင်းတူၼ် ထွၼ်တူဝ်ဢွၵ်ႇၼႆႉ မီးလၢႆလွင်ႈလၢႆတၢင်း။ မိူၼ်ၼင်ႇ ႁူဝ်ၼႃႈပႃႊတီႊသိူဝ်ၽိူၵ်ႇ ပွတ်းဢွၵ်ႇၶူင်း ဢဝ်ၶေႃႈၸိသင်ႇငဝ်ႈငုၼ်းပႃႊတီႊ သိူဝ်ၽိူၵ်ႇသေ မႃးပိုတ်ႇလုမ်းတီႈၼႃးၵွင်းမူး- မိူင်းတူၼ် မိူဝ်ႈဝၼ်းတီႈ 21/03/2014 ၼၼ်ႉ ဢမ်ႇမွၵ်ႇဢမ်ႇလၢတ်ႈသင်၊ ႁူဝ်ပဝ်ႈ EC ၸႄႈဝဵင်းမိူင်းတူၼ်- ပုင်ႇပႃႇၶႅမ်ၵေႃႈ ဢမ်ႇလႆႈႁူႉၸွမ်းသေဢိတ်း။ ၼႆႉမၼ်းပဵၼ်လွင်ႈၶၢမ်ႈၼႃႈၶၢမ်ႈတႃၵၼ်။ ၵွပ်ႈၼၼ် ဢမ်ႇၵွမ်ႉၵႃႈ ၸၢႆးဝိၼ်းမျၢတ်ႉဢူးၵေႃႉလဵဝ်၊ လုၵ်ႈၸုမ်းၼႂ်းပႃႊတီႊသိူဝ်ၽိူၵ်ႇ ၸႄႈဝဵင်းမိူင်းတူၼ်၊ ပိူင်လူင်မၼ်း ၶွမ်ႊမတီႊၸႄႈဝဵင်း မိူင်းတူၼ် လႄႈ လုၵ်ႈၸုမ်းၵေႃႈတေထွၼ်တူဝ်ဢွၵ်ႇတင်းမူတ်း- ဝႃႈၼႆ။

ၻီႊမွၵ်းၶရႅတ်ႊတိၵ်ႊပႃႊတီႊၸၢဝ်းၶိူဝ်းတႆး (SNDP) ၶွတ်ႇၽွတ်ႈမႃးၼႂ်းပီ 2010 သေ ၶဝ်ႈလိူၵ်ႈတင်ႈ ၼႂ်းၵၢၼ်လိူၵ်ႈတင်ႈ ပီ 2010 ။ ဢိင်ၼိူဝ်ႁူဝ်ပဝ်ႈ ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး (SNLD) ၸဝ်ႈၶုၼ်ထုၼ်းဢူး တင်း ၸၢႆးၼုတ်း ဢိၵ်ႇပႃးၽူႈၼမ်းတႆး 9 ၵေႃႉ တူၵ်းၶွၵ်ႈသေ ပိူဝ်ႈတႃႇတၢင်တူဝ် ပႃႊတီႊမိူင်းတႆး/ၶိူဝ်းတႆးၼႆသေ ၵူၼ်းၵဝ်ႇၼႂ်းပႃႊတီႊႁူဝ်သိူဝ် မႃးႁူမ်ႈၵၼ်ၶွတ်ႇၽွတ်ႈဝႆႉ ပႃႊတီႊသိူဝ်ၽိူၵ်ႇ (SNDP) ။ ၵူၺ်းၵႃႈ ၽူႈယႂ်ႇၵူၼ်းလူင်ပႃႊတီႊႁူဝ်သိူဝ် ပူၼ်ႉဢွၵ်ႇၶွၵ်ႈမႃးသေ မႃးတင်ႈၶိုၼ်းပႃႊတီႊ ႁူဝ်သိူဝ်ပဵၼ်တၢင်းၵၢၼ်ယဝ်ႉၵေႃႈ ဢိင်ၼိူဝ်ပေႃႊလသီႊ/ လွၵ်းၸုၵ်းၵၢၼ်မိူင်း ဢမ်ႇမိူၼ်ၵၼ်သေ ပႃႊတီႊႁူဝ်သိူဝ် တင်းပႃႊတီႊသိူဝ်ၽိူၵ်ႇ ဢမ်ႇႁူမ်ႈႁွမ်းၵၼ်လႆႈ။ ၶိုင်ႁူပ်ႉၵၼ်ပိူဝ်ႈတႃႇဢုပ်ႇဢူဝ်းလွင်ႈ ႁူမ်ႈၵၼ်လၢႆပွၵ်ႈၵေႃႈ ၵုမ်ႇၶၢႆႉလိူၼ်ႈဝၼ်း ၶၢဝ်းယၢမ်းယူႇတိၵ်းတိၵ်း တင်းသွင်ၾၢႆႇ။

ပႃႊတီႊသိူဝ်ၽိူၵ်ႇ မီးၽွင်းတႅၼ်းပေႉၵၢၼ်လိူၵ်ႈတင်ႈၼႂ်းပီ 2010 လႄႈတင်း ၽူႈပေႉပၢင်လိူၵ်ႈတင်ႈသွမ်ႈ ၼႂ်းပီ 2012 တင်းမူတ်း 58 ၵေႃႉ၊ ၼႂ်း 58 ၵေႃႉၼၼ်ႉ သဵင်ႈမုၼ်လုၵႂႃႇ 2 ၵေႃႉ၊ ထွၼ်တူဝ်ဢွၵ်ႇထႅင်ႈ 3 ၵေႃႉ၊ မိူဝ်ႈလဵဝ် ၽွင်းတႅၼ်းသိူဝ်ၽိူၵ်ႇ ယွမ်းၵႂႃႇၽွင်ႈ။