ပႃႊတီႊၵၢၼ်မိူင်း/ သင်ၶဢွၼ်ႁူဝ် ၵူၼ်းမိူင်းဝဵင်းတူၼ်ႈတီး ၼပ်ႉႁူဝ်ပၢၵ်ႇ၊ တုၵ်းယွၼ်းၼႄၵၢင်ၸႂ် ႁႂ်ႈမူၼ်ႉမႄးၵႄႈလိတ်ႈ ပိူင်ငဝ်ႈပိုင်းမိူင်း 2008 ။

ဝၼ်းတီႈ 30/03/14  (မိူဝ်ႈဝႃး) ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၸၢတ်ႈ (NLD) လႄႈ ၸုမ်းလုၵ်ႈႁဵၼ်း ပႅတ်ႇသီႇတူဝ် (8888) ဢွၼ်ႁူဝ်သေ လုၵ်ႉႁိုၼ်ႇပႆတၢင်း ၼႄၵၢင်ၸႂ်ၼႂ်းဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ တုၵ်းယွၼ်း ႁႂ်ႈမူၼ်ႉမႄးပိူင်ငဝ်ႈပိုင်းမိူင်း 2008 ။ ၼႂ်းၼၼ်ႉ ပႃးၵူၼ်းမိူင်း တင်း သင်ၶ ႁူမ်ႈတင်းမူတ်းမီးမွၵ်ႈ 200 - ၼႆယဝ်ႉ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈပႃႊတီႊၼူၵ်ႉယုင်း (NLD) ၸႄႈတွၼ်ႈတူၼ်ႈတီး၊ ဢူးတိၼ်ႇမွင်ႇတူဝ်း လၢတ်ႈဝႃႈ- ၵူၼ်းမိူင်းတႆးၵေႃႈ ၶႂ်ႈမူၼ်ႉမႄးပိူင်ငဝ်ႈပိုင်းမိူင်း 2008 ။ လွင်ႈၼႆႉ ႁဝ်းၵေႃႈၶႂ်ႈႁႂ်ႈၽွင်းတႅၼ်းလႄႈလူင်ပွင်ၸိုင်ႈ ႁူႉၸွမ်း။ ပိူဝ်ႈတႃႇမူၼ်ႉမႄးပိူင်ငဝ်ႈပိုင်းမိူင်း 2008 ၼႆႉ ယူႇတီႈၼႂ်းသၽႃးသေၶိုင်ပွင်ၼၼ်ႉ မၼ်းယၢပ်ႇ၊ ယွၼ်ႉပိူဝ်ႈၽွင်းတႅၼ်းၼႂ်းပႃႊတီႊဢၼ်ႁႅင်းယႂ်ႇၶဝ် မီးၵၢင်ၸႂ်ဢမ်ႇၶႂ်ႈ မူၼ်ႉမႄး။ ၵွပ်ႈၼၼ်လႄႈ ဢဵၼ်ႁႅင်း ၵူၼ်းမိူင်းတၢင်းၼွၵ်ႈၼႆႉ မီးၵၢင်ၸႂ်ယိူင်းဢၢၼ်းၶႂ်ႈမူၼ်ႉမႄး ပိူင်ငဝ်ႈပိုင်းမိူင်း ၸင်ႇလႆႈတုၵ်းယွၼ်းၼင်ႇၼႆ- ဝႃႈၼႆ။
ၼႂ်းပၢင်လုၵ်ႉႁိုၼ်ႇပႆတၢင်းၼႄၵၢင်ၸႂ်ၼၼ်ႉ မီးၵၢၼ်ယုၵ်ႉပၢႆႉတူဝ်လိၵ်ႈသေ ႁွင်ႇသႅၼ်ႇတုၵ်းယွၼ်းဝႃႈ- ဢၼ်ဢမ်ႇပႃးၵၢင်ၸႂ်ၵူၼ်း မိူင်းသေ ၶဵၼ်ႇတႅမ်ႈဝႆႉပိူင်ငဝ်ႈပိုင်းမိူင်း 2008 ၼၼ်ႉ ႁႂ်ႈမူၼ်ႉမႄးပၼ်။ ႁႂ်ႈမူၼ်ႉမႄးပၼ်ပႃးမၢႆမီႈမတ်ႉတႃ (ၵ)59 တင်း (ၸ)59 ။ မၢႆမီႈမတ်ႉတႃ 436 ဢၼ်ၶတ်းၶႂၢင် ပိူဝ်ႈတႃႇ မူၼ်ႉမႄးပိူင်ငဝ်ႈပိုင်းမိူင်း 2008 ၼၼ်ႉၵေႃႈ ႁႂ်ႈမူၼ်ႉမႄး၊ ယူႇတီႈႁဝ်းၶႃႈၵူၼ်းမိူင်းသေ ၶႂ်ႈလႆႈပိူင်ငဝ်ႈပိုင်းမိူင်း ဢၼ်မီးလွင်ႈႁပ်ႉႁွင်း ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ၊ ဢၼ်ၵႅတ်ႇၵင်ႈပႂ်ႉပႃးပၼ်သုၼ်ႇလႆႈၵူၼ်းဝၢၼ်ႈ ၵူၼ်းမိူင်း လႄႈ ၻီႊမွၵ်းၶရေႊသီႊ- ၼႆယဝ်ႉ။

ၵူၼ်းဝၢၼ်ႈၵူၼ်းမိူင်းၸိူဝ်းမႃးၶဝ်ႈႁူမ်ႈ ပၢင်လုၵ်ႉႁိုၼ်ႇၼႄၵၢင်ၸႂ်ၼႆႉ လုၵ်ႉမႃးတီႈၼႂ်းၸႄႈတွၼ်ႈတူၼ်ႈတီး မိူၼ်ၼင်ႇဝဵင်းႁူဝ်ပူင်း၊ ပင်းတရႃႉ၊ လွၵ်ႈၸွၵ်ႇ၊ ယႂႃႇငၢၼ်ႇ၊ ယွင်ႁူၺ်ႈ (ၺွင်ႇသူၺ်ႇ)၊ ပၢင်လွင်း၊ ၾၢႆၶုၼ်ႇ၊ သီႇသႅင်ႇ ၸိူဝ်းၼႆႉ။ ဢွၼ်ၼႃႈၼႆႉ ယူႇတီႈၵူၼ်း ဝၢၼ်ႈၵူၼ်းမိူင်းသေ ၵႂႃႇယွၼ်းဢၼုၺၢတ်ႈၼႄၵၢင်ၸႂ် တီႈၽူႈၵွၼ်းၸႄႈဝဵင်း၊ ၵူၺ်းၵႃႈ ဢမ်ႇလႆႈ။ ထိုင်မႃးမိူဝ်ႈဝၼ်းတီႈ 29/03/2014 ပွတ်းၶမ်ႈၸင်ႇလႆႈသေ ၸင်ႇၵွႆႈမႃးၼႄၵၢင်ၸႂ် ၼႂ်းဝၼ်းတီႈ 30/03/2014 - ၼႆယဝ်ႉ။