ၸဝ်ႈယွတ်ႈသိုၵ်း ႁူဝ်ပဝ်ႈ RCSS တွပ်ႇၵႄႈသိုဝ်ႇၶၢဝ်ႇဝႃႈ- ဢမ်ႇမီးယိူင်းဢၢၼ်း ပိူဝ်ႈတႃႇလူင်းလၢႆးမိုဝ်း ၵိုတ်းယိုဝ်း ပတ်းပိုၼ်ႉႁင်းၵူၺ်း ၸွမ်းလူင်ပွင်ၸိုင်ႈၼေႇပျီႇတေႃႇ၊ ၸွမ်းၼင်ႇ ဢၼ်ဢွၵ်ႇၵႂႃႇၼႂ်းသိုဝ်ႇ မိူဝ်ႈဝူင်ႈပူၼ်ႉ။

ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး (RCSS)  လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ၶၢဝ်ႇၼႆႉ ဢွၵ်ႇမႃး လႆႈၸိူင်ႉႁိုဝ်။

ဢိင်ၼိူဝ်သိုဝ်ႇၶၢဝ်ႇႁၢႆးငၢၼ်းဝႃႈ ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး(RCSS/SSA) တေဢမ်ႇၶဝ်ႈႁူမ်ႈၸွမ်း ၵၢၼ်လူင်းလၢႆးမိုဝ်းၵိုတ်းယိုဝ်းပတ်းပိုၼ်ႉ ဢၼ်ၸုမ်းတူဝ်တႅၼ်းၸၢဝ်းၶိူဝ်း / ၶွမ်ႊမတီႊၵပ်းသၢၼ် ၵၢၼ်ၵိုတ်းယိုဝ်း ပတ်းပိုၼ်ႉၸိုင်ႈမိူင်း (NCCT) 16 ၸုမ်းႁူမ်ႈႁွမ်းၵၼ်ဝႆႉ၊ ၸွမ်းၼင်ႇ ယူင်ႉၶၢပ်ႈ ဢၼ်ၸုမ်းၸၢဝ်းၶိူဝ်း (NCCT) တင်းၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) လႆႈၸႂ်ၵၼ်ဝႆႉ။ လွင်ႈၼႆႉ ႁဵတ်းႁႂ်ႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼႄၵၢင်ၸႂ် ဢမ်ႇႁၢၼ်ႉၸႂ်ၼိူဝ် RCSS/SSA ဝၢႆးသေဢမ်ႇလူင်းလၢႆးမိုဝ်းၸွမ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈလၢႆႇၸႃႇ မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ မိူဝ်ႈပီၵၢႆ (2013)လႄႈ တီႈလေႃႇၶီးလႃႇ ပူၼ်ႉမႃးမိူဝ်ႈဝၼ်းတီႈ 25/01/2014 ။

ၸဝ်ႈယွတ်ႈသိုၵ်း လၢတ်ႈဝႃႈ- ႁဝ်းမီးၶေႃႈၸုၵ်းမၼ်ႈ ၸႅင်ႈလႅင်းလီယဝ်ႉ။ ပေႃးဝႃႈတင်းသွင်ၾၢႆႇမီးၶေႃႈတူၵ်း လူင်းလႆႈၸႂ်ယူင်ႉ ၶၢပ်ႈယဝ်ႉ ႁဝ်းၵေႃႈၽွမ်ႉတူဝ်ႈတၼ်းလူင်းလၢႆးမိုဝ်း။ လွင်ႈဢၼ်ႁဝ်းဢမ်ႇလူင်းလၢႆးမိုဝ်း ၸွမ်း တီႈလၢႆႇၸႃႇ လႄႈလေႃႇၶီးလႃႇၼၼ်ႉ ဢမ်ႇၸႂ်ႈဝႃႈႁဝ်းသၢၼ်ၶတ်း။ ၵူၺ်းၵႃႈ ႁဝ်းယုမ်ႇယမ်ဝႃႈ မၼ်းပဵၼ်ၶၵ်ႉတွၼ်ႈၵၢၼ် ဢုပ်ႇၵၢၼ်ၵိုတ်းယိုဝ်း/ ၵိုတ်းသိုၵ်းၵူၺ်း၊ ဢမ်ႇၸႂ်ႈၶၵ်ႉတွၼ်ႈၵၢၼ်မိူင်း။ လွင်ႈၵၢၼ်မိူင်းၼၼ်ႉ တေပဵၼ်ၶၵ်ႉတွၼ်ႈတီႈ 2 ။

ထႅင်ႈလွင်ႈၼိုင်ႈၵေႃႈ ဢၼ်ႁဝ်းဢမ်ႇလႆႈၸႂ်ၸွမ်းၼၼ်ႉ ပေႃးဢုပ်ႇၵၢၼ်မိူင်းမႃး မၼ်းထုၵ်ႇလီဢိင်ၼိူဝ် ၸေႈမိူင်းသေဢုပ်ႇ၊ ဢမ်ႇၸႂ်ႈဢိင်ၼိူဝ်ၸုမ်းႁူမ်ႈႁွမ်းၵၼ် ဢမ်ႇၼၼ် ဢိင်ၼိူဝ်ၸုမ်းသေဢုပ်ႇ။ ယွၼ်ႉၼၼ် လႄႈ ၾၢႆႇႁဝ်းလႆႈၵေႃႇ တင်ႈၵေႃပွင် ၵၢၼ်ၽွမ်ႉႁူမ်ႈၸိုင်ႈတႆး (CSSU) မိူဝ်ႈပီၵၢႆ၊ ပိူဝ်ႈတႃႇ မီးလွင်ႈၽွမ်ႉႁူမ်ႈ ၼႂ်းတႆးႁဝ်းဢွၼ်တၢင်း၊ ယဝ်ႉၵေႃႈ ၼႂ်းၸၢဝ်းၶိူဝ်းၼႂ်းမိူင်းတႆး။ ဝၢႆးသေၼၼ်ႉၸင်ႇ ပိူဝ်ႈတႃႇႁႂ်ႈမီးလွင်ႈၽွမ်ႉ ႁူမ်ႈၸွမ်းတၢင်ႇၸႄႈမိူင်း။ ယွၼ်ႉၼၼ်လႄႈ ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်းၼၼ်ႉ ထုၵ်ႇလီလူင်း လၢႆးမိုဝ်းဢိင်ၼိူဝ်ၸေႈမိူင်း- ၸဝ်ႈယွတ်ႈသိုၵ်း လၢတ်ႈၼင်ႇၼႆ။

ၶေႃႈတူၵ်းလူင်းၸုမ်း NCCT လႄႈ UPWC မိူဝ်ႈဝၼ်းတီႈ 10/03/2014 ၼၼ်ႉ 1.တႃႇၵေႃႇတင်ႈ ၶွမ်ႊမတီႊ ၶဵၼ်ႇတႅမ်ႈယူင်ႉၶၢပ်ႈ ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း။ 2. UPWC လႄႈ NCCT တေလိူၵ်ႈၽူႈတႅၼ်း ၾၢႆႇလႂ် 9 ၵေႃႉ။ 3.တင်းသွင်ၾၢႆႇတေႁူမ်ႈ ၵၼ်ၶဵၼ်ႇတႅမ်ႈယူင်ႉၶၢပ်ႈၸွမ်းၵၼ်၊ တေတူၺ်းပိူင်ယူင်ႉၶၢပ်ႈ တီႈလေႃႇၶီးလႃႇလႄႈ ပိူင်ၶွင် UPWC ဢၼ်တၢင်ႇၼႄတီႈမျိတ်ႉၵျီးၼႃး၊ ပိူဝ်ႈတႃႇၶဵၼ်ႇတႅမ်ႈၵၢၼ်ၵိုတ်း ယိုဝ်းပတ်းပိုၼ်ႉၸိုင်ႈမိူင်း။ 4.သွင်ၾၢႆႇ တေႁူပ်ႉထူပ်းၵၼ်ထႅင်ႈ ၵွၼ်ႇၼႃႈသင်ၶၢၼ်(သၢင်းၵျၢၼ်ႇ) လိူၼ်ႁႃႈသွၼ်းၼမ်ႉ။ 5.ၾၢႆႇလူင်ပွင်ၸိုင်ႈၼေႇပျီႇတေႃႇ ဢူးဢွင်ႇမိၼ်း တေႁပ်ႉပုၼ်ႈၽွၼ်းႁွင်ႉဝွၵ်ႇၸိူၼ်း ၸုမ်းၸၢဝ်းၶိူဝ်း ၸိူဝ်းဢမ်ႇၶဝ်ႈပႃးၼႂ်းၸုမ်း NCCT မိူၼ်ၼင်ႇ တႅဝ်းႁူမ်ႈၻီႊမွၵ်းၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၊ တပ်ႉသိုၵ်းဢူၺ်းလီ ၻီႊမွၵ်းၶရႅတ်ႊ တိၵ်ႊ ၸိူဝ်ႉၸၢတ်ႈ (NDAA) ၸုမ်းမိူင်းလႃး၊ ၶွင်ႊသီႊသူဝ်ႊသျႄႊလိတ်ႊၸိူဝ်ႉ ၸၢတ်ႈၼႃႇၵ (NSCN) ၊ ၶွင်ႊသီႊ ဢဝ်ၶိုၼ်းၸိုင်ႈတႆး RCSS ၊ တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၸိူဝ်းၼႆႉ။

မီးႁၢႆးငၢၼ်းၶၢဝ်ႇဝႃႈ ၸုမ်း NCCT တေႁဵတ်းပၢင်ၵုမ် ဝၼ်းတီႈ 19-20/03/14 ပိူဝ်ႈတႃႇလိူၵ်ႈတူဝ်တႅၼ်း 9 ၵေႃႉ၊ တႃႇ တေၶဝ်ႈပႃးၼႂ်းဢၼ်တင်းသွင်ၾၢႆႇတေႁူမ်ႈၵၼ်သေ ၶဵၼ်ႇတႅမ်ႈယူင်ႉၶၢပ်ႈၵၢၼ်ၵိုတ်းယိုဝ်းပတ်းပိုၼ်ႉတင်းၸိုင်ႈမိူင်း။

ၾၢႆႇလူင်ပွင်ၸိုင်ႈၼေႇပျီႇတေႃႇ၊ ဢၼ်မီးပုၼ်ႈသုၼ်ႇ(ၶူဝ်ႊတႃႊ) Quoto လႆႈ 9 ၵေႃႉၼၼ်ႉ 3 ၵေႃႉ တေလုၵ်ႉမႃး တီႈၾၢႆႇၽွင်းငမ်း၊ ဢၼ်ဢူးဢွင်ႇမိၼ်း ၵႅမ်ၼႂ်း UPWC ဢွၼ်ႁူဝ်။ ထႅင်ႈ 3 ၵေႃႉ ၾၢႆႇၶဵၼ်ႇတႅမ်ႈမၢႆမီႈ ၼႂ်းသၽႃး ဢၼ်ဢူးတဵင်းၸေႃႇ (ၵႅမ်တီႈ 2) ၼႂ်း UPWC ဢွၼ်ႁူဝ်။ ထႅင်ႈ 3 ၵေႃႉ  လုၵ်ႉမႃးတီႈၾၢႆႇတပ်ႉသိုၵ်း၊  လႅပ်ႈတေပဵၼ် ၸွမ်သိုၵ်းလူင် ဢူးၸူဝ်းဝိၼ်း ဢၼ်ပဵၼ်ၵႅမ်တီႈ 3 ၼႂ်း UPWC ။

ၶၢဝ်ႇဢၼ်ဢမ်ႇယိုၼ်ယၼ်လႆႈဝႃႈ - ၾၢႆႇတပ်ႉသိုၵ်းၼၼ်ႉ လႅပ်ႈတေပဵၼ်ၸွမ်သိုၵ်းလူင်မိၼ်းဢွင်ႇလၢႆႇ၊ ထႅတ်ႉၼၢႆႇ ဝိၼ်း လႄႈမျိၼ်ႉၸူဝ်း- ဝႃႈၼႆ။