ပပ်ႉပိုၼ်းမိူင်းၶႄႇ သၢမ်ၵူၵ်း (3 မိူင်း/ၸုမ်း) ဢၼ်ၶူးမိူင်းလီ (ၶမ်းၸၢမ်ႇႁိူင်း) ၶတ်းၸႂ်ၶိုင်ပွင်ဢိတ်ႇဢွၵ်ႇ ပိုၼ်ၽႄႈ ၽိုၼ်ၼိုင်ႈယဝ်ႉၽိုၼ်ၼိုင်ႈၼၼ်ႉ မိူဝ်ႈလဵဝ်ဢွၵ်ႇမႃးထႅင်ႈ ပပ်ႉၽိုၼ်မၢႆ 4 ယဝ်ႉ။ ယိူင်းဢၢၼ်းပိူင်လူင် ႁႂ်ႈၸၢဝ်းတႆး မီးတၢင်းႁူႉတၢင်းႁၼ် မေႃၽွမ်ႉႁူမ်ႈၵၼ်ႁဵတ်းသၢင်ႈ ၵၢၼ်ငၢၼ်း။

ၶူးမိူင်းလီ လၢတ်ႈဝႃႈ- ၶေႃႈၵႂၢမ်းၶိုၵ်ႉတွၼ်းၼႂ်းပပ်ႉမၢႆ 4 ၼႆႉတွၼ်ႈၼိုင်ႈၼၼ်ႉ ပဵၼ်လွင်ႈလိူၵ်ႈၵူၼ်း၊ ၼႃႈ 50 ။ ပေႃးထွမ်ႇတၢင်း လၢတ်ႈၵူၺ်း တေဢမ်ႇလႆႈၶုၼ်ပွင်သိုၵ်း။ ပေႃးတူၺ်းၼႃႈတႃ တေဢမ်ႇလႆႈၵူၼ်း မီးတၢင်းႁူႉ။ ပေႃးတူၺ်တီႈယူပ်ႈယွမ်းတၢင်းၼွၵ်ႈ ၵူၺ်း ၸၢင်ႈၶၢမ်ႈပူၼ်ႉသႅင်လီ။ ၶေႃႈၵႂၢမ်းၸိူဝ်းၼႆႉ ပဵၼ်ၶုၼ်ၼႆႉ ပေႃးတူၺ်း ၵူၼ်းၾၢႆႇၼွၵ်ႈ ဢမ်ႇလႆႈၵူၼ်းႁဵတ်းၵၢၼ်လီ။ တူၺ်းၵူၼ်းၸမ်ၸႂ်ၵေႃႈ ဢမ်ႇလႆႈၵူၼ်းမီးၼမ်ႉၵတ်ႉ။ တူၺ်းႁၢင်ႈၾၢင် သေဢဝ်မႃးပဵၼ်လုၵ်ႈၼွင်ႉၵေႃႈ လႆႈတၢင်းႁၢင်ႈလီၵူၺ်း၊ ၼႆႉၵေႃႈ ဢမ်ႇလႆႈၵူၼ်းမီးၼမ်ႉၵတ်ႉပၺ်ၺႃ။ ၵူၼ်းပဵၼ် ၽူႈဢွၼ်ႁူဝ် ၽူႈၼမ်းသိုၵ်းၼႆႉ တေလႆႈတူၺ်း ၵူၼ်း ဢၼ်မီးၽီမိုဝ်း၊ ၵူၼ်းမီးၼမ်ႉၵတ်ႉတၢင်းၶႅၼ်ႇ မီးသတိပၺ်ၺႃ၊ တၢင်းႁဵတ်းတၢင်းသၢင်ႈ တေလႆႈမီးပၵ်းပိူင် ၸင်ႇဢဝ်မႃးပဵၼ်ၽူႈၸႂ်ႉၵၢၼ်လူင်။ 

ထႅင်ႈတီႈၼိုင်ႈ  ပဵၼ်တီႈၶူင်ပဵင်ႉလၢတ်ႈ ပင်းထွင်းဝႃႈ ႁဵတ်းၵၢၼ်လူင်ၼႆႉ ယႃႇၼႅတ်ႈ၊ ပေႃးႁိပ်ႈၼႅတ်ႈၵၢၼ် ဢမ်ႇတၼ်းယဝ်ႉ ဢႃယုၸၢင်ႈသဵင်ႈပႅတ်ႈဢွၼ်တၢင်း။ လွင်ႈၼႆႉ လၢတ်ႈလႆႈဝႃႈ ပေႃးၵုမ်ႇဝူၼ်ႉထိုင်လွင်ႈ ၵၢၼ်ၵူၺ်း ဢမ်ႇဝူၼ်ႉထိုင်လွင်ႈလွတ်ႈ ၽေးၼၼ်ႉ ဢမ်ႇလႆႈ- ၶူးမိူင်းလီ လၢတ်ႈၼႄၼင်ႇၼႆ။

ပပ်ႉပိုၼ်းသၢမ်ၵူၵ်း (3 ၸိုင်ႈမိူင်း/ၸုမ်း) ပိုၼ်းၸိူင်းလွင်ႈၽွင်းမိူင်းၶႄႇယုင်ႈယၢင်ႈ၊  မၢႆ 4 ၼႆႉ တင်းမူတ်း ဢိတ်ႇဢွၵ်ႇ ပိုၼ်ၽႄႈ 500 ပပ်ႉ။ မီး 216 ၼႃႈ ဢမ်ႇပႃးတွၼ်ႈၵႂၢမ်းၼမ်းလႄႈၼႃႈသိူဝ်ႈ။ ၼႂ်းပပ်ႉၼႆႉ ပဵၼ်တွၼ်ႈ 66-88 ။ တမ်းဝႆႉၵႃႈၶၼ်ၼိုင်ႈပပ်ႉ 100 ဝၢတ်ႇ (ငိုၼ်းထႆး)။ ၼွၵ်ႈသေမီးၶၢႆၼႂ်းၵဵင်းမႆႇယဝ်ႉ တေသူင်ႇၶၢႆပႃးၼႂ်းမိူင်းၵွၵ်ႇ (ၵုင်းထဵပ်ႈ)၊ ပဵင်းလူင်၊ ႁၢၼ်ႉသိုင်ႇသဵင်ၵွင်တႆး ဝဵင်းတႃႈၶီႈလဵၵ်း၊ ဝဵင်းပၢင်လူင် ၸိုင်ႈတႆးပွတ်းၸၢၼ်း ၸိူဝ်းၼႆႉ။

မိူဝ်ႈပီၵၢႆ (2013)  ၽွင်းၵၢင်လိူၼ်ၵျူႊလၢႆႊၼၼ်ႉ ၶူးမိူင်းလီ လႆႈၶပ်းၶိုင်ဢိတ်ႇဢွၵ်ႇပိုၼ်ၽႄႈ ပပ်ႉၸိူင်းသိုၵ်းသၢမ်ၵူၵ်း (သၢမ်မိူင်း/သၢမ်ၸုမ်း) ပပ်ႉတီႈ 3 ။ မီး 212 ၼႃႈ၊ ဢိတ်ႇဢွၵ်ႇတင်းၼမ် 500 ပပ်ႉ။  ၵႃႈၶၼ်ၼိုင်ႈပပ်ႉ 100 ဝၢတ်ႇၼင်ႇၵဝ်ႇ။ ပပ်ႉမၢႆ 1 ဢိတ်ႇဢွၵ်ႇပိုၼ်ၽႄႈၼႂ်းလိူၼ်ၵျႅၼ်ႊၼိဝ်ႊရီႊ ပီ 2013 တင်းၼမ် 1,000 ပပ်ႉ။ ဝၢႆးၼႆႉ ဢွၵ်ႇပပ်ႉမၢႆ 2 ထႅင်ႈ။

ၶူးမိူင်းလီ ယၢမ်ႈပိုတ်ႇလၢတ်ႈဝႃႈ- ပပ်ႉပိုၼ်းသၢမ်မိူင်း/သၢမ်ၸုမ်းၼႆႉ ၶႂ်ႈႁႂ်ႈပီႈၼွင်ႉႁဝ်းဢၢၼ်ႇၼမ်ၼမ်။ ပေႃးတူၺ်း ၽိုၼ်လိၵ်ႈမိူင်းထႆးတႅမ်ႈဝႆႉ ၵူၼ်းဢၢၼ်ႇလိၵ်ႈၼမ်လိူဝ်ပိူၼ်ႈၼႂ်းလုမ်ႈၾႃႉ ပဵၼ်မိူင်းၵျပၼ်ႊ၊ မိူင်းၵျပၼ်ႊၼႆႉ ပဵၼ်ဝၢၼ်ႈမိူင်း ၶိုၼ်ႈယႂ်ႇ။ ပိုၼ်းသၢမ်ၵူၵ်းၼႆႉ ၼႂ်းမိူင်းၵျပၼ်ႊယင်းဢဝ်ပႄပိၼ်ႇၽႃသႃသေ ၸႂ်ႉႁဵၼ်းသွၼ် ၼႂ်းႁူင်းႁဵၼ်း/ ၼႂ်းၶွမ်ႊပၼီႊ/ ၼႂ်းႁူင်းၵၢၼ်ၸိူဝ်းၼႆႉ။ မိူဝ်ႈလဵဝ် တႆးႁဝ်းပႆႇဢဝ်ႁဵၼ်းသွၼ် ၼႂ်းႁူင်းႁဵၼ်းလႆႈသေတႃႉ ၵေႃႈ ၵူၼ်းပွင်ပဵၼ်လႆႈ ၸိူဝ်းသူၼ်ၸႂ် ၶဝ်လီဢၢၼ်ႇ။ လွင်ႈပိုၼ်းသၢမ်ၵူၵ်းၼႆႉ ၼင်ႇႁိုဝ်မၼ်းတေၶႅမ်ႉလိူဝ်သေဢွၼ်-တွၼ်းသေၵဝ်ႇၼၼ်ႉ ပေႃးမီးပီႈၼွင်ႉၶဝ်ၼႄႉ ၼမ်းမႃးဝႃႈ ထုၵ်ႇလႆႈ မူၼ်ႉမႄးတီႈၼၼ်ႈတီႈၼႆႈၼႆၵေႃႈ ယူႇတီႈၶႃႈႁဝ်း တေပူၵ်းပွင်မူၼ်ႉမႄးသေသိုပ်ႇဢိတ်ႇဢွၵ်ႇထႅင်ႈ။

ၼႂ်းပပ်ႉသၢမ်ၵူၵ်းၼႆႉ မီးလွင်ႈၽွမ်ႉၵၼ်၊ ႁၵ်ႉၵၼ်၊ လွင်ႈဢုပ်ႇဢူဝ်းၵိူဝ်းၵုမ်ၵၼ်၊ လွင်ႈဝၢင်းၽႅၼ်ၵၢၼ်ငၢၼ်း၊ လွင်ႈပိူဝ်ႈတႃႇ ႁဵတ်းသၢင်ႈၵၢၼ်ယႂ်ႇငၢၼ်းလူင် ၸိူဝ်းၼႆႉလႄႈ မီးၽွၼ်းလီတႄႉတႄႉ။ ၵၢၼ်ၵူႈလွင်ႈလွင်ႈၼႆႉ တေလႆႈ ဝၢင်းၽႅၼ်ဢွၼ်တၢင်း ၸင်ႇၵွႆႈလူင်းမိုဝ်းႁဵတ်း။  ပေႃးတေႁဵတ်းသင် တေလႆႈမီးတီႈၵိူဝ်းၵုမ်၊ ပဵၼ်ၵူၼ်းလီ၊ မီးပၺ်ၺႃ။ ၵူၼ်းလူင်ၵေႃႉဢွၼ်ႁူဝ်ၼမ်း ၼႃႈၼၼ်ႉၵေႃႈ ထုၵ်ႇလႆႈမီးၵူၼ်းလီ မီးပၺ်ၺႃ ပဵၼ်တီႈၵိူဝ်းၵုမ်။ ပပ်ႉပိုၼ်းသၢမ်ၵူၵ်းၼႆႉ ပဵၼ်ပပ်ႉဢၼ်ပၼ်တၢင်းႁူႉၵူႈပၢႆးပၢႆး၊ မီးၽွၼ်းလီပိူဝ်ႈတႃႇ ၵူၼ်းၼုမ်ႇတႆးႁဝ်း တင်ႈတႄႇၵၢၼ်ဢွၼ်ႇ တေႃႇထိုင် ၵၢၼ်လူင်။ ႁဵတ်းႁႂ်ႈၵူၼ်းႁဝ်းလၵ်းလႅမ် တင်ႈတႄႇ ပၢႆးၼႃႈႁိူၼ်း၊ ပၢႆးယူႇသၢင်ႈၵိၼ်သဝ်း၊ ပၢႆးလၢတ်ႈၵႂၢမ်း တိတ်းတေႃႇ ၵပ်းသိုပ်ႇၵူၼ်း၊ ပၢႆးၶဝ်ႈၸူးတိတ်းတေႃႇ ၵေႃႉၼိုင်ႈလႄႈ ၵေႃႉၼိုင်ႈ၊ ၸုမ်းၼိုင်ႈလႄႈၸုမ်းၼိုင်ႈ တေႃႇထိုင်ပူၵ်းပွင် ဢဝ်ဝၢၼ်ႈမိူင်းၶိုၼ်း- ၶူးမိူင်းလီ ယၢမ်ႈလၢတ်ႈ ၼင်ႇၼႆ။

ၽူႈသူၼ်ၸႂ်တင်းလၢႆပၼ်ႁႅင်းသိုဝ်ႉလႆႈတီႈ 1.တီႈႁၢၼ်ႉၶမ်းၸၢမ်ႇႁိူင်း (ၶူးမိူင်းလီ) လင်ဝတ်ႉပႃႇပဝ်ႈ ၵဵင်းမႆႇ။ 2.ႁၢၼ်ႉ သိုင်ႇသဵင်ၵွင်တႆး ဝဵင်းတႃႈၶီႈလဵၵ်း။ 3.ႁၢၼ်ႉၶၢႆလိၵ်ႈလၢႆးတႆး ပဵင်းလူင် ၸိူဝ်းၼႆႉ။ တေႃႇပေႃးယဝ်ႉ ပိုၼ်းတင်းမူတ်းမီး 7 ပပ်ႉ၊ ယၢမ်းလဵဝ် လႆႈႁူႉဝႃႈတိုၵ်ႉၶပ်းၶိုင်ထႅင်ႈပပ်ႉတီႈ 5 ယူႇ။

တိတ်းတေႃႇ ၶမ်းၸၢမ်ႇႁိူင်း မိူင်းလီ လႆႈတီႈမၢႆၾူၼ်ႊ 089-5530906