ပိူဝ်ႈတႃႇမီးပၢင်သွၼ်ထမ်းမ တီႈဝဵင်းၼမ်ႉၶမ်းၼၼ်ႉ ယၢမ်းလဵဝ်တိုၵ်ႉပိုတ်ႇပၢင်သွၼ်ပူၵ်းပွင်/ ၾိုၵ်းၾွၼ်ႉ ၼမ်ႉၵတ်ႉ ၶူးသွၼ် ထမ်းမ ဝႆႉယူႇ။ ဝၢႆးပၢင်သွၼ်ယဝ်ႉ ဢၢၼ်းပိုတ်ႇၵႂႃႇ။

ဢိင်ၼိူဝ်ၾၢႆႇသင်ၶ တင်းတၵ်ႉၵႃႇသတ်ႉထႃး ဝဵင်းၼမ်ႉၶမ်း၊ ၸိုင်ႈတႆးပွတ်းႁွင်ႇ၊ ပၢင်ၵုမ်လႆႈၸႂ်ၵၼ် ယိူင်းဢၢၼ်းပိုတ်ႇ ပၢင်သွၼ်ထမ်းမ (တြႃး) ၵူႈဝူင်ႈၵႂႃႇ၊  ၼင်ႇႁိုဝ်ၵူၼ်းၼုမ်ႇ/လုၵ်ႈဢွၼ်ႇ တေမီးတၢင်း ႁဵတ်းသၢင်ႈ ၸႃရိတ်တလီ၊ ဝႃႈငၢႆႈ လၵ်းလႅမ်ၼႆသေ တင်ႈတႄႇဝၼ်းတီႈ 16/03/2014 မႃး မီးပၢင်သွၼ် ပူၵ်းပွင်/ ၾိုၵ်းလိုမ်ႉၼမ်ႉၵတ်ႉ ၶူးသွၼ်ထမ်းမ တီႈဝတ်ႉၸေႇယသုၶ တီႈဝဵင်းၼမ်ႉၶမ်း။ ပၢင်သွၼ်ၼႆႉ တေမီးၵႂႃႇတေႃႇထိုင်ဝၼ်းတီႈ 22/03/2014 ။ မီးၵူၼ်းၼုမ်ႇ ၼႂ်းပိုၼ်ႉတီႈ တင်းသင်ၶၸဝ်ႈ ၶဝ်ႈႁူမ်ႈပူၵ်းပွင်ၼမ်ႉၵတ်ႉ ၶူးသွၼ် တင်းမူတ်း 135 ၵေႃႉ/တူၼ်- ၼႆယဝ်ႉ။

ၵူၼ်းဝဵင်းၼမ်ႉၶမ်း ၸၢႆးၸၢႆးလၢတ်ႈဝႃႈ- ပၢင်ၾိုၵ်းၾွၼ်ႉၶူးသွၼ်ၼႆႉ တႄႇမႃးဝၼ်းတီႈ 16/03/2014 ၊ တေၸတ်းၵႂႃႇ တေႃႇထိုင်ဝၼ်းတီႈ 22/03/2014 ။ ၽူႈၶဝ်ႈႁူမ်ႈလဵပ်ႈႁဵၼ်း ပူၵ်းပွင်ၼမ်ႉၵတ်ႉတီႈပၢင်သွၼ် ၼႆႉ မီးသင်ၶၸဝ်ႈ လႄႈၵူၼ်းၼုမ်ႇ ၼႂ်းပိုၼ်ႉတီႈ တင်းမူတ်း 135 ၵေႃႉ။ ဝၢႆးပၢင်သွၼ်ၼႆႉယဝ်ႉ တေပိုတ်ႇပၢင်သွၼ်ၾိင်ႈငႄႈပုတ်ႉထ ပၼ် လုၵ်ႈဢွၼ်ႇၶဝ်ၵႂႃႇ- ဝႃႈၼႆ။

ပိူဝ်ႈတႃႇပဵၼ်မႃးပၢင်ၾိုၵ်းၾွၼ်ႉၶူးသွၼ်ၼႆႉ မီးၸဝ်ႈတူၼ်ထမ်းမသီရိ(MA သီလင်းၵႃ)၊ တူၼ်ၸဝ်ႈ ၼၼ်ႇတႃႇဝမ်ႇသ (MA သီလင်းၵႃ)၊ ၸၢႆးလႃႉဢွင်ႇ (ၸဝ်ႈၶွင်ႁူင်းသဝ်း ၽဵၵ်ႉၸႃႇ ပေႃႇတႃႇသွင်ႇ) ႁူမ်ႈၵၼ်ပဵၼ်ၵဝ်ႉၵၼ်းငဝ်ႈငႃႇသေ ၶပ်းၶိုင်ၸတ်း ၵၢၼ်ပၼ်- ၼႆယဝ်ႉ။

ပၢင်သွၼ်ထမ်းမ ႁိုဝ် ႁူင်းႁဵၼ်းထမ်းမ (ၸၼ်ႉငဝ်ႈ) ဢၼ်တေပိုတ်ႇၵႂႃႇၼႆႉ ၶပ်းၶိုင်ဝႆႉပိူဝ်ႈတႃႇပိုတ်ႇလႆႈ ၵူႈဝၢၼ်ႈ၊ ပေႃးပဵၼ်ၼႂ်းဝဵင်း တေၵႂႃႇႁႃဝတ်ႉ/ၵျွင်း ဢၼ်လုၵ်ႈဢွၼ်ႇႁူင်းႁဵၼ်းၶဝ်မႃးၶဝ်ႈႁဵၼ်းလႆႈငၢႆႈငၢႆႈ၊ တေလိူၵ်ႈႁႃဝတ်ႉဢၼ် ၸမ်ႁိူၼ်းလုၵ်ႈဢွၼ်ႇၶဝ် ႁႃယွၼ်းတၢင်းၸွႆႈထႅမ်သေပိုတ်ႇၵႂႃႇ။ ဢွၼ်တၢင်းသုတ်း တေပိုတ်ႇတီႈဝတ်ႉ/ၵျွင်းၽြႃးၵၢင် ဝဵင်းၼမ်ႉၶမ်းလႄႈ တင်းဝတ်ႉၸေႇ ယသုၶ - ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

ပိူဝ်ႈတႃႇပိုတ်ႇပၢင်သွၼ်ထမ်းမ တီႈဝဵင်းၼမ်ႉၶမ်း ၵူႈဝူင်ႈ (ၵူႈဝၼ်းဢႃးတိတ်ႉ) ၼၼ်ႉ ၾၢႆႇသင်ၶ တင်းတၵ်ႉၵႃႇသတ်ႉထႃး ဝဵင်းၼမ်ႉၶမ်း လႆႈဢုပ်ႇၵုမ်ၵၼ် ပူၼ်ႉမႃးမိူဝ်ႈဝၼ်းတီႈ 01/03/2014 တီႈဝတ်ႉ ၸေႇယသုၶ ဝဵင်းၼမ်ႉၶမ်း။ တီႈပၢင်ၵုမ်ပွၵ်ႈၼၼ်ႉ မီးသင်ၶတင်းမူတ်း 8 ဝတ်ႉ ယေႃးတူဝ်မႃးၶဝ်ႈႁူမ်ႈ။ ပပ်ႉလိၵ်ႈၽိုၼ်လၢႆးထမ်းမ ပိူဝ်ႈတႃႇပူင်သွၼ်ပၼ် တီႈႁူင်းႁဵၼ်းၾိင်ႈငႄႈ ပုတ်ႉထၼၼ်ႉ တင်းမူတ်းမီး 11 ပပ်ႉ၊ ယၢမ်းလဵဝ်တိုၵ်ႉပိၼ်ႇၽႃသႃယဝ်ႉ 3 ပပ်ႉ။ ၼွၵ်ႈသေၼၼ်ႉ တေသိုပ်ႇၵဵပ်းႁွမ်ငိုၼ်းႁွမ်းလူႇ ႁွမ်းတၢၼ်း တီႈၽူႈၼမ်ႉၸႂ်ၸေႇတၼႃႇ သတ်ႉထႃႇၶဝ်သေ ႁဵတ်းသၢင်ႈၵႂႃႇထႅင်ႈ- ၵူၼ်းၼမ်ႉၶမ်းၵေႃႉၼိုင်ႈလၢတ်ႈၼင်ႇၼႆ။