ပိူဝ်ႈတႃႇၵဵပ်းသဵၼ်ႈသၢႆမၢႆႁူဝ်ၵူၼ်းၼၼ်ႉ မီးၵၢၼ်ၸတ်း ပၢင်သွၼ် ပၼ်ၶူးသွၼ်တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ယဝ်ႉတူဝ်ႈၵႂႃႇ။

ပူၼ်ႉမႃးမိူဝ်ႈဝၼ်းသဝ်တီႈ 22/03/2014 မီးၵၢၼ်ၸတ်းပၢင်လူင်းပၢင်သွၼ် ၵဵပ်းသဵၼ်ႈသၢႆမၢႆႁူဝ်ၵူၼ်း တီႈႁူင်းႁဵၼ်း ၸၼ်ႉငဝ်ႈ (ဢမၵ) မၢႆ 11 တီႈပွၵ်ႉၵျွင်းၵျီးၸု၊ ဝဵင်းတူၼ်ႈတီး။ မီးၵၢၼ်မွပ်ႈဝႂ်ယဝ်ႉပၢင်သွၼ် ပၼ်ၶူးသွၼ် ၸိူဝ်းမႃးၶိုၼ်ႈပၢင်သွၼ်ၶဝ်ၵႂႃႇ။ ပၢင်သွၼ်ၼႆႉ တႄႇၸတ်းမႃးၸဵမ်မိူဝ်ႈဝၼ်းတီႈ 03/03/24 (ၶၢဝ်းတၢင်း 20 ဝၼ်း)၊ တင်းမူတ်းၸတ်းယဝ်ႉတူဝ်ႈၵႂႃႇ 3 ၸုပ်ႈ/ပွၵ်ႈ- ၼႆယဝ်ႉ။

ပၢင်သွၼ် ပိူဝ်ႈတႃႇၵဵပ်းသဵၼ်ႈသၢႆမၢႆႁူဝ်ၵူၼ်းၼႆႉပွၵ်ႈတီႈ 1 ၸတ်းပူၼ်ႉမႃးမိူဝ်ႈပီၵၢႆ (24-28/02/2013) ၊ ပၢင်သွၼ်ပွၵ်ႈၼႆႉ  ပဵၼ်ၸၼ်ႉငဝ်ႈငုၼ်း မႃးပူင်သွၼ်ပၼ်တူဝ်တႅၼ်းၸၼ်ႉၸႄႈမိူင်း။ ပွၵ်ႈတီႈ 2 ၸတ်းမိူဝ်ႈ ဝၼ်းတီႈ 6-11/02/2014 ၊ တူဝ်တႅၼ်းၸႄႈမိူင်း ၶိုၼ်းပူင်သွၼ်ပၼ်တီႈတူဝ်တႅၼ်းၸႄႈဝဵင်း။ ပွၵ်ႈတီႈ 3 ဝၼ်းတီႈ 03-22/03/2014 ၼႆႉ ၸၼ်ႉၸေႈဝဵင်း ၶိုၼ်းပူင်သွၼ်ပၼ်တီႈၶူးသွၼ်၊ ဢၼ်ပဵၼ်ၵူၼ်း တေလူင်းၵဵပ်းထိုင်ၼႂ်းပိုၼ်ႉတီႈ ၸိူဝ်းၼႆႉ။

ၶူးသွၼ်ၸိူဝ်းၼႆႉ လိူၵ်ႈၵဵပ်းဢဝ်ၼႂ်းၸေႈဝဵင်းလႂ်ၸေႈဝဵင်းၼၼ်ႉ၊ ယိူင်းဢၢၼ်း ပိူဝ်ႈတႃႇပၢင်ၵဵပ်း သဵၼ်ႈမၢႆႁူဝ်ၵူၼ်း ဝၼ်းတီႈ 30/03/2014 တေႃႇထိုင် ဝၼ်းတီႈ 10/04/2014 ။ ပေႃးဝႃႈၶူးသွၼ်ၶဝ် ပွၵ်ႈၶိုၼ်းၸေႈဝဵင်းၽႂ်မၼ်းယဝ်ႉ၊ တေမီးၵၢၼ် ႁွင်ႉဢဝ်ၵူၼ်းလူင်ဝၢၼ်ႈသေ ၶိုၼ်းသပ်းလႅင်းပၼ် ထႅင်ႈၵမ်းၼိုင်ႈ။ မိူၼ်ၼင်ႇၼႂ်းၼိုင်ႈပွၵ်ႉ မီးလၢႆ ၼႃႈႁိူၼ်းၸိူဝ်းၼႆႉ ၵူၼ်းလူင်ၼႂ်းဝၢၼ်ႈ/ဢိူင်ႇ/ပွၵ်ႉယွမ်ႇ တေလႆႈတိတ်းတေႃႇၵပ်းသိုပ်ႇဝႆႉပၼ် ၶူးသွၼ်ၶဝ် ဢၼ်တေ လူင်းၵဵပ်းသဵၼ်ႈ သၢႆမၢႆႁူဝ်ၵူၼ်း ၼႂ်းပိုၼ်ႉတီႈ ၼၼ်ႉထႅင်ႈ။

ပေႃးဝႃႈထိုင်မႃး ဝၼ်းတီႈ 29/03/2014 ၵၢင်ၶိုၼ်း ယၢမ်းတဵင်ႈၶိုၼ်းၼၼ်ႉ တေမီးၵၢၼ်တႄႇၵဵပ်းသဵၼ်ႈ သၢႆမၢႆႁူဝ်ၵူၼ်းၵႂႃႇ။ တႄႇဢဝ်ၵူၼ်းမီးတီႈႁူင်းယႃ ၊ တီႈႁွင်ႈယႃ၊ တီႈႁူင်းႁဵၼ်း၊ ၵူၼ်းၸိူဝ်းယူႇတီႈႁွင်ႈထႅဝ် ၵူၼ်းႁဵတ်းၵၢၼ်၊ ၵူၼ်းယူႇၸွမ်းၶၢင်ႈ တၢင်းၸိူဝ်းၼႆႉၵေႃႈ ၵဵပ်းဢဝ်ၵူႈၵေႃႉ။ တႄႇဝၼ်းတီႈ 30/03/2014 ယၢမ်းၵၢင်ၼႂ်ၵႂႃႇ သမ်ႉတေ တႄႇၵဵပ်းတီႈႁိူၼ်းၵူၼ်း ဢၼ်မီးၼႂ်းပွၵ်ႉၼႂ်းယွမ်ႇ၊ ၼႂ်းဝၢၼ်ႈၼႂ်းၶူင်ႇ ၸိူဝ်းၼႆႉၵႂႃႇ- ၼႆယဝ်ႉ။

ၽူႈၵွၼ်းၾၢႆႇပၢႆးပၺ်ၺႃ ၵေႃႉၼိုင်ႈ ဢၼ်ယူႇၼႂ်းၸေႈဝဵင်းတူၼ်ႈတီး လၢတ်ႈဝႃႈ- မၼ်းပဵၼ်ပိူဝ်ႈတႃႇ ႁူႉသဵၼ်ႈသၢႆမၢႆႁူဝ်ၵူၼ်း ၼႂ်းၸိုင်ႈမိူင်းႁဝ်း ယႃႇႁႂ်ႈတူၵ်းႁူင်ႈတူၵ်းႁၢႆ။ မၼ်းပဵၼ်ဢၼ်ၵမ်ႉယၼ် ပိူဝ်ႈတႃႇလွင်ႈ ၶိုၼ်ႈယႂ်ႇမႂ်ႇသုင်၊ ၾၢႆႇၵၢၼ်မၢၵ်ႈမီး၊ ၵၢၼ်ပၢႆးပိူင်ၵူၼ်းတင်းမူတ်းလႄႈ လီဢွၼ်ၵၼ်ပၼ်ႁႅင်း သေ ႁူမ်ႈမိုဝ်းႁဵတ်းၵၢၼ်ၵႂႃႇ- ဝႃႈၼႆ။

ဢၼ်တေလူင်းၵဵပ်းသဵၼ်ႈသၢႆမၢႆႁူဝ်ၵူၼ်းၼႆ တေပႃးၸဝ်ႈၼႃႈတီႈလၢႆၾၢႆႇ၊ မိူၼ်ၼင်ႇၶွမ်ႊမတီႊၾၢႆႇၵဵပ်း သဵၼ်ႈသၢႆမၢႆႁူဝ်ၵူၼ်း၊ ၽူႈၵွၼ်းဝၢၼ်ႈဢိူင်ႇ/ပွၵ်ႉယွမ်ႇ ၸိူဝ်းၼႆႉ။ ၵူၺ်းၵႃႈ ဢၼ်တေၶဝ်ႈၵႂႃႇၸူးၸဝ်ႈႁိူၼ်း သေတွင်ႈထၢမ်ၵမ်းသိုဝ်ႈ၊ ၸွမ်းၼင်ႇ ၶေႃႈထၢမ် 41 ၶေႃႈ ဢၼ်လူင်ပွင်ၸိုင်ႈ တမ်းဝၢင်းဝႆႉၼၼ်ႉ တေပဵၼ်ၶူးသွၼ် ၸိူဝ်းလႆႈၵႂႃႇၶိုၼ်ႈပၢင်သွၼ်မႃးယဝ်ႉၼၼ်ႉၵူၺ်း- ၼႆယဝ်ႉ။

လွင်ႈတေလူင်းၵဵပ်းသဵၼ်ႈသၢႆမၢႆႁူဝ်ၵူၼ်းၼႆႉ တၢင်းၸဝ်ႈၼႃႈတီႈတေမီးလိၵ်ႈမွၵ်ႇထိုင်/ မွၵ်ႇၸိူၼ်းဝႆႉလူင်ႈ ၼႃႈသူင်ႇထိုင် ၵူႈႁိူၼ်း။ မိူၼ်ၼင်ႇ ႁဝ်းတေမႃးတီႈႁိူၼ်းသူၸဝ်ႈဝၼ်းလႂ်၊ ၶၢဝ်းယၢမ်းလႂ်ၸိူဝ်းၼႆႉ။ တီႈႁိူၼ်းသူၸဝ်ႈၼႆႉ ၽူႈၵွၼ်းၼႃႈႁိူၼ်း၊ ဢမ်ႇၼၼ် ႁႂ်ႈၵူၼ်းၼႂ်းၼႃႈႁိူၼ်းသူၸဝ်ႈသေၵေႃႉၵေႃႉ၊ ၵူၼ်းၵေႃႉဢၼ်မေႃလၢတ်ႈမေႃတွပ်ႇ၊ ဢၼ်တေၸၢင်ႈတွပ်ႇပၼ်ႁဝ်း လႆႈပႂ်ႉႁိူၼ်းဝႆႉသေ ပႂ်ႉတွပ်ႇပၼ် ႁဝ်းၶႃႈ။ သင်ဝႃႈဢမ်ႇယူႇႁိူၼ်းသေၵေႃႉၸိုင် တေလႆႈ ၸႅင်ႈဝႆႉတီႈလုမ်းၵွၼ်းၸေႈဝဵင်း ဢမ်ႇၼၼ် တီႈပူႇၵၢင်ႉပူႇၵႄႇဝႃႈ ႁဝ်းၶႃႈတေမႃးတွပ်ႇပၼ်တီႈလုမ်း ဝၼ်းလႂ်၊ ၶၢဝ်းလႂ် ၸိူဝ်းၼႆႉ- ၼႆယဝ်ႉ။