ၵူၼ်းဝၢၼ်ႈပၢင်ၵႅင်းၸေႈဝဵင်းမိူင်းတူၼ်၊ ထုၵ်ႇသိုၵ်းမၢၼ်ႈ ၸူၼ်ႁိမ်ဢဝ်ၶူဝ်းၶွင် ဝၢႆးယိုဝ်းၵၼ်တင်းသိုၵ်းတႆး။ ၵိုတ်းယိုဝ်းၵၼ်ယဝ်ႉ သိုၵ်းမၢၼ်ႈတိုၵ်ႉလိုပ်ႈလမ်းယိုဝ်း သိုၵ်းတႆး။

ဢိင်ၼိူဝ်သိုၵ်းမၢၼ်ႈတပ်ႉ 519 ဢၼ်ပၵ်းၾၢႆႇတူၵ်းဝဵင်းမိူင်းတူၼ်၊ (ၸပ်းမိူင်းတူၼ်) ဢဵၼ်ႁႅင်းၵူၼ်း 33 ၵေႃႉ၊ ဢွၵ်ႇငႃးသိုၵ်း ၵႂႃႇတူင်ႉၼိုင်ပွတ်းဝၢၼ်ႈပၢင်ၵႅင်း၊ ၸဵင်ႇၸၢၼ်းဝၼ်းဢွၵ်ႇမိူင်းတူၼ်၊ မွၵ်ႈ 10 ၵီႊလူဝ်ႊပၢႆၼၼ်ႉ ထၢမ်ၶၢဝ်ႇသိုၵ်းတႆးသေ ၸွမ်းၶူၼ်ႉႁႃ သွၵ်ႈတဝ်လမ်းလိုပ်ႈယိုဝ်းႄလႈ မိူဝ်ႈဝၼ်းတီႈ 23/03/2014 ၵၢင်ၼႂ်ယၢမ်း 8 မူင်းၼၼ်ႉ လႆႈယိုဝ်းၵၼ်တင်း တပ်ႉသိုၵ်းၸိုင်ႈတႆး (RCSS/SSA) - ၼႆယဝ်ႉ။

ၵူၼ်းၼႂ်းပိုၼ်ႉတီႈ ၸေႈဝဵင်းမိူင်းတူၼ်ၵေႃႉၼိုင်ႈလၢတ်ႈဝႃႈ- ယိုဝ်းၵၼ်တႄႉဢမ်ႇပေႃးႁိုင်၊ လမ်းယိုဝ်းၵၼ် ထွင်ႉထွင်ႉထႅင်ႉထႅင်ႉ မွၵ်ႈ 20 မိၼိတ်ႉၵူၺ်း၊ တင်းသွင်ၾၢႆႇၵေႃႈဢမ်ႇပဵၼ်သင်။ ၵူၺ်းၵႃႈ ဝၢႆးယိုဝ်းၵၼ်ယဝ်ႉ သိုၵ်းမၢၼ်ႈၶဝ်ႈၵႂႃႇ ၼႂ်းဝၢၼ်ႈပၢင်ၵႅင်း သေ ႁွင်ႉဢဝ်ၵူၼ်းဝၢၼ်ႈလူင်းႁိူၼ်းမႃးၶုပ်ႉၶဝ်ႇ ၶွၼ်ႈယူႇတီႈလဵဝ်ၵၼ် တင်းသဵင်ႈတင်းမူတ်း။  ဝၢႆးၼၼ်ႉ ဢဝ်ၵွင်ႈငႃ/ၸမ်ႈၼႃႈ ၽၢၵ်ႇၵူၼ်းဝၢၼ်ႈ၊ ၶိုၼ်ႈသွၵ်ႈတဝ်ၼိူဝ်ႁိူၼ်း၊ ဢဝ်ၶူဝ်းၶွင်ၵူၼ်းဝၢၼ်ႈ ၼႂ်းႁိူၼ်း မိူၼ်ၼင်ႇၽိူၼ်ဝၢၼ်ႇၸိူဝ်းၼႆႉ ပိၼ်ႈငူပ်ႉဢီးလူမ်ႉ။ ၶူၼ်ႉသွၵ်ႈၵုၺ်ႉငၢၵ်ႈ ပိုတ်ႇတိူၵ်ႈပိုတ်ႇၵၢင်သေ ဢဝ်ၶူဝ်းၶွင်ၶိူင်ႈၸႂ်ႉ ၶိူင်ႈသွႆ မိတ်ႈ၊ ၾႆးသၢႆ (ၾႆးထၢတ်ႈ)၊  ၶိူင်ႈၾူၼ်ႊမိုဝ်းထိုဝ် ဢမ်ႇယွမ်း 8 ၶိူင်ႈ၊ တူဝ်ငိုၼ်းလၢႆလၢႆဢမ်ႇယွမ်း 5 သႅၼ်။ ၶွင်ၵိၼ်ယႅမ်ႉ လႅၼ်းယႃႈ၊ လဝ်ႈ ၸိူဝ်းၼႆႉ ။

ၵဵဝ်ႇၵပ်းလွင်ႈတိုၵ်းယိုဝ်းၵၼ်ၵမ်းၼႆႉ ၽူႈၵွၼ်းတပ်ႉၸုမ်း 727 တပ်ႉသိုၵ်းၸိုင်ႈတႆး (RCSS/SSA) ၵေႃႈလၢတ်ႈဝႃႈ- လႆႈပဵၼ်ပၢင်တိုၵ်းၵၼ် တင်း သိုၵ်းမၢၼ်ႈတပ်ႉ 519 - ဝႃႈၼႆ။

ဝၢၼ်ႈပၢင်ၵႅင်းၼႆႉ မီးၾၢႆႇဢွၵ်ႇသဵၼ်ႈတၢင်းလူင် မိူင်းတူၼ်- ၼႃးၵွင်းမူး- ပုင်ႇပႃႇၶႅမ် မွၵ်ႈ 6 ၵီႊလူဝ်ႊ၊ မီးၾၢႆႇၸဵင်ႇၸၢၼ်း ဝၼ်းဢွၵ်ႇ မိူင်းတူၼ်၊ မွၵ်ႈ 10 ၵီႊလူဝ်ႊပၢႆ။

လွင်ႈသွင်ၾၢႆႇယိုဝ်းၵၼ်ၼႆႉ ၵူၼ်းဝၢၼ်ႈၵေႃႈဢွၼ်ၵၼ်ၵႂင်၊ ၵမ်ႈၽွင်ႈဝႃႈ ၸိုင်ဝႃႈပေႃးၵိုတ်းယိုဝ်းၵၼ်ယဝ်ႉ ၵွပ်ႈသင်တိုၵ်ႉလမ်း ယိုဝ်းၵၼ်ယူႇ တိၵ်းတိၵ်း၊ လိူဝ်ၼၼ်ႉ ယင်းတိုၵ်ႉႁဵတ်းႁၢႆႉတေႃႇ ၵူၼ်းဝၢၼ်ႈလႄႈ ဢဝ်ၶူဝ်းၶွင်ၵူၼ်းဝၢၼ်ႈ ၵူၼ်းမိူင်းယူႇ- ဝႃႈၼႆ။

ဝၢႆးပဵၼ်ပၢင်တိုၵ်းၵၼ်ယဝ်ႉ လူတ်ႉၵႃးသိုၵ်းမၢၼ်ႈလၢႆလမ်း လုၵ်ႉတၢင်းမိူင်းတူၼ် လူင်းမႃးတၢင်းၼႃးၵွင်းမူး။ လူတ်ႉၵႃးၸိူဝ်းၼႆႉ ၵမ်ႈၽွင်ႈၵေႃႈပွၵ်ႈၶိုၼ်းယူႇ။ ၵူၺ်းၵႃႈ ယင်းတိုၵ်ႉမီးသိုၵ်းမၢၼ်ႈ ႁွၼ်ႈထဝ်ႇသွၵ်ႈတဝ် ၸွမ်းၼႂ်းထိူၼ်ႇ ပွတ်းၼႃးပႃႇၵၢဝ် တူင်ႇတၢင်ႇ ပၢင်ႇၵႅင်းၸိူဝ်းၼႆႉ။ ၸွမ်းသဵၼ်ႈတၢင်းၵေႃႈ မီးသိုၵ်းမၢၼ်ႈ ပႂ်ႉဢဝ်ႁူမ်ႇလူမ်ႈပဵၼ်တီႈပဵၼ်တီႈ၊ ၵူတ်ႇထတ်းၵူၼ်း ၵႂႃႇတႃႈၵႂႃႇတၢင်း၊ ၽႂ်ၵႂႃႇမႃးၵေႃႈတွင်ႈထၢမ်ထတ်း ၸွမ်းယူႇတိၵ်းတိၵ်း- ၼႆယဝ်ႉ။