လူတ်ႉၵႃးတေႃႉတၢင်ႇႁိၼ်ႁႄႈ ဢၼ်လုၵ်ႉမိူင်းၶႄႇမႃး တေႃႇတၢင်ႇႁိၼ်ႁႄႈ ၼႂ်းၸႄႈဝဵင်းၼမ်ႉၶမ်း၊ တၢင်ႇၼၵ်း ပိၼ်ႈၶႂမ်ႈ ၼိူဝ်သဵၼ်ႈတၢင်းၵၢင်ဝဵင်း၊ ၵူၼ်းမိူင်းၵႂႃႇတူၺ်း ပဵၼ်ၵႃးလၵ်ႉတၢင်ႇမႆႉ။

ပူၼ်ႉမႃးမိူဝ်ႈဝၼ်းတီႈ 25/03/14 မီးလူတ်ႉၵႃးတၢင်ႇႁိၼ်ႁႄႈ ဢၼ်လုၵ်ႉတၢင်းမိူင်းၶႄႇ၊ ၶဝ်ႈမႃးတေႃႉတၢင်ႇ ႁိၼ်ႁႄႈ ၼႂ်းၸႄႈဝဵင်းမူႇၸႄႈ ပိၼ်ႈၶႂမ်ႈတီႈၼိူဝ်သဵၼ်ႈတၢင်း ပွၵ်ႉဢွင်ႇမဵတ်ႉတႃႇ ၼႂ်းၵၢင်ဝဵင်းၼမ်ႉၶမ်း၊ ၸိုင်ႈတႆးပွတ်းႁွင်ႇ။ ၽိူဝ်ႇၵူၼ်းဝၢၼ်ႈၵူၼ်းမိူင်းၶဝ်ၵႂႃႇတူၺ်း ၼႂ်းလူတ်ႉၵႃးဢၼ်ပိၼ်ႈၼၼ်ႉ ပဵၼ်မႆႉလၢႆလၢႆ- ၼႆယဝ်ႉ။

လူတ်ႉၵႃးလမ်းဢၼ်ပိၼ်ႈၼႆႉ လၵ်ႉတေႃႉတၢင်ႇမႆႉဢၼ်ပိူၼ်ႈလိူဝ်ႈဝႆႉပဵၼ်ၽၢၵ်ႇ/ၶႅပ်း ပုတ်းယႂ်ႇပုတ်းလူင် လုၵ်ႉတၢင်းမိူင်းဝီး မႃးၸွမ်းၵၼ်တင်းမူတ်း 5 လမ်း၊ ယိူင်းဢၢၼ်း ဢၢင်ႈတေၶၢမ်ႈၼမ်ႉမၢဝ်းသေ သူင်ႇၶဝ်ႈ မိူင်းၶႄႇ၊ ၵူၺ်းၵႃႈ သမ်ႉတၢင်ႇမႃးၼမ် တၢင်ႇၼၵ်းလူၼ်ႉလိူဝ်သေ မႃးပိၼ်ႈတီႈတၢင်းၵူတ်ႉငွၵ်း ပွၵ်ႉဢွင်ႇမဵတ်ႉတႃႇ ၼႂ်းၵၢင်ဝဵင်း။ ၵႃးတႃႇ 4 လမ်းၼၼ်ႉတႄႉ ၼႅတ်ႈႁေႃႈပၢႆႈပႅတ်ႈ၊ လမ်းဢၼ်ပိၼ်ႈ ၼၼ်ႉၵေႃႈ ပွႆႇဝႆႉသေပၢႆႈပႅတ်ႈၼင်ႇၵဝ်ႇ။  ၽိူဝ်ႇၵူၼ်းဝၢၼ်ႈၵူၼ်းမိူင်းၵႂႃႇပိုတ်ႇတူၺ်း ပဵၼ်မႆႉလၢႆလၢႆ၊ ပဵၼ်မႆႉဢၼ်လိူဝ်ႈယဝ်ႉ ပုတ်းယႂ်ႇပုတ်းလူင်- ၵူၼ်းၼမ်ႉၶမ်း ၵေႃႉၼိုင်ႈလၢတ်ႈၼင်ႇၼႆ။

လူတ်ႉၵႃးတၢင်ႇႁိၼ်ႁႄႈၸိူဝ်းၼႆႉ ပဵၼ်ၶွင်ၵူၼ်းမိူင်းၶႄႇတင်းသဵင်ႈ၊ လွင်ႈၶဝ်ဢမ်ႇဢဝ်လူတ်ႉၵႃးၵူၼ်းမိူင်း ၼႂ်းပိုၼ်ႉတီႈၸႂ်ႉတေႃႉ တၢင်ႇႁိၼ်ႁႄႈၼၼ်ႉ ၵႃႈပူၼ်ႉမႃး ၵူၼ်းၼႂ်းပိုၼ်ႉတီႈဢမ်ႇၶဝ်ႈၸႂ်။ ၵူၺ်းၵႃႈ ၽိူဝ်ႇလူတ်ႉၵႃးၶဝ်မႃးပိၼ်ႈယဝ်ႉ မိူဝ်ႈဝၼ်းတီႈ 25 ၼႆႉ ၸင်ႇလႆႈႁူႉဝႃႈ ၵွပ်ႈၶဝ်ဢၢၼ်းလၵ်ႉတၢင်ႇမႆႉပႃး- ၸၢႆးယီႈ ၸဝ်ႈၵႃးတီႈဝဵင်းၼမ်ႉၶမ်း လၢတ်ႈၼင်ႇၼႆ။

တီႈၼႂ်းပၢင်ၵုမ် ၾၢႆႇၽွင်းငမ်းၸႄႈမိူင်း ဢၼ်ၸတ်းမိူဝ်ႈပူၼ်ႉမႃးဢမ်ႇပေႃးႁိုင်ၼႆႉ မီးၶေႃႈတႅပ်းတတ်းဢွၵ်ႇ မႃးဝႃႈ လူတ်ႉၵႃး တၢင်ႇႁိၼ်ႁႄႈၸိူဝ်းၼႆႉ ၼင်ႇႁိုဝ်ႁိၼ်ႁႄႈတေဢမ်ႇၽူင်ႉပိဝ်လူင်းၼႂ်းၵၢင်ဝဵင်းၵၢင်တၢင်း၊ ၼင်ႇႁိုဝ်တေဢမ်ႇပဵၼ်ၽေးတေႃႇ ၵူၼ်းဝၢၼ်ႈၼၼ်ႉ တေလႆႈဢဝ်ၽႃႈယၢင်သုမ်ႇလီလီ။ ၵွပ်ႈၼႆ လူတ်ႉၵႃးတၢင်ႇႁိၼ်ႁႄႈတၢင်းမိူင်းၶႄႇၸိူဝ်းၼႆႉၵေႃႈ ဢဝ်တိုဝ်ႉတၢင်းၼႆႉသေ လၵ်ႉတၢင်ႇမႆႉဢွၵ်ႇ။ လွင်ႈၼႆႉ ပဵၼ်ၵၢၼ်ၽိတ်းမၢႆမီႈၼႆ ၸုမ်းၵွၼ်းၸႄႈဝဵင်းၼမ်ႉၶမ်းၵေႃႈလၢတ်ႈ။

ၵဵဝ်ႇၵပ်းတၢင်းၽိတ်းလွင်ႈ လၵ်ႉတေႃႉတၢင်ႇမႆႉဢွၵ်ႇၼႆႉ ၸွမ်းၼင်ႇမၢႆမီႈမီးဝႆႉသေ လူင်ပွင်ၸိုင်ႈၽူႈမီး ဢႃႇၼႃႇၶဝ် တေပၼ်တူတ်ႈ တၢမ်ႇၸိူင်ႉႁိုဝ်ၼၼ်ႉ  ၵူၼ်းဝၢၼ်ႈၵူၼ်းမိူင်းၵေႃႈ ပႃးၸႂ်ပႃးၶေႃးသေပႂ်ႉ ထွမ်ႇတူၺ်းယူႇ- ၼႆယဝ်ႉ။