လူတ်ႉၵႃးတၢင်ႇႁိၼ်ႁႄႈမိူင်းၶႄႇ၊ လုၵ်ႉမိူင်းၶႄႇမႃးတၢင်ႇ ႁိၼ်ႁႄႈမိူင်းတႆး ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ၊ တေႃႉသူင်ႇၶဝ်ႈမိူင်းၶႄႇၵူႈဝၼ်း ၼိုင်ႈဝၼ်းမီးဢမ်ႇယွမ်း 50 လမ်း။

လူတ်ႉၵႃးၼိုင်ႈလမ်းၼႆႉ တၢင်ႇလႆႈႁိၼ်ႁႄႈ 24-26 တၼ်ႊ၊ လတ်းၼႂ်းဝဵင်းၼမ်ႉၶမ်း မိူၼ်ၼင်ႇၼွင်မႃႉ၊ ၵွင်းဝဵင်း၊ မၢၼ်ႈၼွင်၊ ၵုင်းသႃႇၸိူဝ်းၼႆႉသေ ၶၢမ်ႈတႃႈၼမ်ႉမၢဝ်းယဝ်ႉ သူင်ႇၶဝ်ႈမိူင်းၶႄႇ- ၸၢႆးမွင်ႇ ၵူၼ်းၸမ်ၸႂ်ၸဝ်ႈၶွင်တႃႈႁိူဝ်းလၢတ်ႈ။

ၸၢႆးမွင်ႇလၢတ်ႈဝႃႈ- ယွၼ်ႉပိူဝ်ႈလူတ်ႉၵႃးတၢင်ႇႁိၼ်ႁႄႈၸိူဝ်းၼႆႉသေ ၼႂ်းဝၢၼ်ႈၼႂ်းဢိူင်ႇႁဝ်းၶႃႈၼႆႉ သဵၼ်ႈတၢင်းလူင် ၵိဝ်ႇလဵၵ်ႉၵိဝ်ႇဢွၼ်ႇၸိူဝ်းၼႆႉ လုၵွႆမူတ်း။ ပေႃးထိုင်မႃးၶၢဝ်းၾူၼ် သဵၼ်ႈတၢင်းတေ ယိင်ႈၶႅၼ်းလုၵွႆသေ တၢင်းတေဢုင်၊ တေယၢပ်ႇလိူဝ်ၼႆႉထႅင်ႈ။ မိူဝ်ႈၾူၼ်ပႆႇတူၵ်းၼႆႉသမ်ႉ မီးၶီႇၾုၼ်ႇလူင် ပဵၼ်ၵဵၼ်ပဵၼ်ၵဵၼ် ၶဝ်ႈၼႂ်းႁိူၼ်း။ လွင်ႈၼႆႉ ႁဵတ်းႁႂ်ႈတုမ်ႉတိူဝ်းပၢႆးယူႇလီၵူၼ်းဝၢၼ်ႈၵူၼ်းမိူင်း- ဝႃႈၼႆ။

ၼႂ်းၸႄႈဝဵင်းၼမ်ႉၶမ်းၼႆႉ ဢွင်ႈတီႈဢၼ်ဢွၵ်ႇႁိၼ်ႁႄႈ မီးလၢႆလၢႆတီႈ၊ ၸဵင်ႇၸၢၼ်းဝၼ်းဢွၵ်ႇဝဵင်းၼမ်ႉၶမ်း မိူၼ်ၼင်ႇတီႈ ဝၢၼ်ႈပၢင်ၶႃး၊ မၢၼ်ႇပျႃႉတွင်ႇ။ ၸဵင်ႇၸၢၼ်းဝၼ်းတူၵ်းဝဵင်းၼမ်ႉၶမ်း မိူၼ်ၼင်ႇတီႈပၢင်မၢဝ်း၊ ပၢၼ်းသေး၊ ႁူၺ်ႈဢူဝ်ႉလႄႈ ပၢင်သဝ်း 13 လၵ်း ၸိူဝ်းၼႆႉ။

ၶွမ်ႊပၼီႊ ဢၼ်ၶုတ်းႁိၼ်ႁႄႈယူႇၸိူဝ်းၼႆႉ ပဵၼ်ၶွမ်ႊပၼီႊမျၢၼ်ႇမႃႉမျႃးဢူး၊ ငူၺ်ႇၵပႃႇၵျေႃႇ၊ ၸဵင်ႇပတေႇတႃႇ၊ ပၢၼ်းတဵတ်ႉၸႃႇ၊ ၸွမ်ငိုၼ်းၶမ်း လႄႈ GSM ။ ၶွမ်ႊပၼီႊ ပၢၼ်းတဵတ်ႉၸႃႇ (မွၵ်ႇသၸ်ႉၸႃႇ) ဢၼ်ၶုတ်းႁႄႈယူႇၼႆႉ ၸဝ်ႈၶွင်မၼ်းပဵၼ်ပၢၼ်းသေးၵျေႃႇမျိၼ်ႉ ဢၼ်ပဵၼ်ၽွင်း တႅၼ်းသၽႃး ၶွင်ပႃႊတီႊသၢင်ႇသီႈ။ ၸဝ်ႈၶွင်ၶွမ်ႊပၼီႊ တီႈပၢင်သဝ်း 13 လၵ်း သမ်ႉပဵၼ်ၽူႈၼမ်း ၸုမ်းပျီႇတုၸိတ်ႉ တဢၢင်း (ပလွင်ႈ)မၢႆႇဢွင်ႇထုၼ်း။ ၸဝ်ႈၶွင်ၶွမ်ႊပၼီႊၸိူဝ်းၼႆႉ ပဵၼ်ၵူၼ်းယႂ်ႇၵူၼ်းလူင် လၢႆလၢႆ- ၸၢႆးၸွမ်ၶမ်း ၵေႃႉတူင်ႉၼိုင် ၵၢၼ်ႁၵ်ႉသႃပႂ်ႉပႃးသိင်ႇဝႅတ်ႉလွမ်ႉ ၸႄႈဝဵင်းၼမ်ႉၶမ်းလၢတ်ႈ။

ၼင်ႇႁိုဝ် တေမီးၵၢၼ်ၵိုတ်းယိုတ်း လွင်ႈၶူင်းၵၢၼ်ၶုတ်းႁိၼ်ႁႄႈ၊ တေႃႉတၢင်ႇႁႄႈၸိူဝ်းၼႆႉ ပႃႊတီႊႁူဝ်သိူဝ် တင်းပႃႊတီႊသိူဝ်ၽိူၵ်ႇ ၸႄႈဝဵင်းၼမ်ႉၶမ်းၵေႃႈ ၵႆႉႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇ ၵိုတ်းယိုတ်းလွင်ႈၶုတ်း ႁိၼ်ႁႄႈ/ လွင်ႈယႃႉလုလႅဝ်သိင်ႇဝႅတ်ႉလွမ်ႉယူႇ။ ၵူၺ်းၵႃႈ တေႃႇထိုင်မိူဝ်ႈလဵဝ်ၵေႃႈ ပႆႇႁၼ်ၸဝ်ႈၼႃႈတီႈၶဝ် ဢဝ်လိူင်ႈတီႈၶွမ်ႊပၼီႊၶဝ်။

ၶွမ်ႊပၼီႊၸိူဝ်းၼႆႉၵေႃႈတိုၵ်ႉသိုပ်ႇၶုတ်းႁႄႈယူႇတိၵ်းတိၵ်း၊ ႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်း တူၵ်းတၢင်းယၢပ်ႇၽိုတ်ႇ- ၼႆယဝ်ႉ။