ႁူဝ်သိူဝ်ၸတ်းပၢင်ၵုမ် ၸၼ်ႉၸေႈဝဵင်း၊ ဢုပ်ႇၵၼ်ပိူင်လူင် 3 လွင်ႈ။ ပႃးၸဵမ်တႅပ်းတတ်း လွင်ႈတေၶဝ်ႈလိူၵ်ႈ တင်ႈ ဢမ်ႇၶဝ်ႈ၊ လွင်ႈပႃႊတီႊတႆးတေႁူမ်ႈၵၼ် ဢမ်ႇႁူမ်ႈ။

ဝၼ်းတီႈ 24/03/14 (မိူဝ်ႈဝႃး) ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) တင်ႈတႄႇ ၸတ်းပၢင်ၵုမ်လူင် 6 လိူၼ်ၶွပ်ႈ၊ ပၢင်ၵုမ်ၸၼ်ႉၸေႈဝဵင်း တီႈၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။ ပၢင်ၵုမ်ၼႆႉ မီးတူဝ်တႅၼ်းမႃးၶဝ်ႈႁူမ်ႈၼိုင်ႈၸေႈဝဵင်း 3 ၵေႃႉ၊ ပဵၼ်တူဝ်တႅၼ်းၸိူဝ်းဝႃႈလႆႈၶႆႈၸၢင်ႈ၊ ၸိူဝ်ႈၸၢင်ႈဢုပ်ႇဢူဝ်းတႅပ်းတတ်း။ တင်းမူတ်းမီးၵူၼ်းၶဝ်ႈႁူမ်ႈ 100 ပၢႆ။

ပၢင်ၵုမ်ပႃႊတီႊႁူဝ်သိူဝ်ၼႆႉ လႆႈၸတ်းထိုင်ဝၼ်းတီႈ 26/03/2014 ၊ ၶၢဝ်းတၢင်း 3 ဝၼ်း။ ဢုပ်ႇဢူဝ်း လွင်ႈတေမႄးၶွတ်ႇၽွတ်ႈ လိူၵ်ႈတင်ႈၶိုၼ်းၶွမ်ႊမတီႊငဝ်ႈငုၼ်း (CEC) တႃႈၵုင်ႈ။ တေဢုပ်ႇဢူဝ်းတႅပ်းတတ်း လွင်ႈတေၶဝ်ႈပၢင်လိူၵ်ႈတင်ႈ ဢမ်ႇၶဝ်ႈလိူၵ်ႈ ၼႂ်းပီ 2015 တေထိုင်ၼႆႉ လိူဝ်ၼၼ်ႉယင်းလႆႈဢုပ်ႇဢူဝ်းပႃး လွင်ႈပႃႊတီႊတႆး တေႁူမ်ႈၵၼ် ဢမ်ႇႁူမ်ႈၵၼ်၊ တေႁဵတ်းႁိုဝ် ဝၢင်းၽႅၼ် ပိူဝ်ႈတႃႇႁူမ်ႈၵၼ်ၸိူဝ်းၼႆႉ။

ၼႂ်းပၢင်ၵုမ်ဝၼ်းတီႈ 26/03/14 ဝၼ်းလိုၼ်းသုတ်းၼႆႉ လႆႈႁူႉဝႃႈတေဢွၵ်ႇၶေႃႈပိုၼ်ၽၢဝ်ႇ (Statement) လႄႈတေ မီးလွင်ႈလၢၵ်ႇ လၢႆး - ၼႆယဝ်ႉ။