ၵူၼ်းမိူင်းတႆးပွတ်းႁွင်ႇ ဢမ်ႇယွမ်းၶၢႆပၼ်တီႈလိၼ် တီႈၼႃးဢၼ်ၶွမ်ႊပၼီႊထုင်ႉမၢဝ်း တုၵ်းယွၼ်းသိုဝ်ႉ ၼိုင်ႈဢေႊၶိူဝ်ႊ ၼပ်ႉႁူဝ်ပၢၵ်ႇသႅၼ်၊ တွပ်ႇဝႃႈ ပၼ်ၵႃႈႁိုဝ်ၵေႃႈဢမ်ႇၶၢႆလႆႈ။

ၶွမ်ႊပၼီႊထုင်ႉမၢဝ်း ယွၼ်းသိုဝ်ႉတီႈလိၼ် တီႈၸဝ်ႈႁႆႈၸဝ်ႈၼႃး/ၵူၼ်းမိူင်း ၼႂ်းပွၵ်ႉၸွၼ်ၸေႃႇ၊ ဝဵင်းမူႇၸႄႈ၊ ၸိုင်ႈတႆးပွတ်းႁွင်ႇ၊ တၢင်းၵႂၢင်ႈ 156 ဢေႊၶိူဝ်ႊ၊ ပိူဝ်ႈတႃႇႁဵတ်းႁိူၼ်း/ မူႇဝၢၼ်ႈၸတ်းသၼ်။ 1 ဢေႊၶိူဝ်ႊတေပၼ် 300 သႅၼ် (30 လၢၼ်ႉၵျၢတ်ႈ)- ၼႆယဝ်ႉ။

တီႈလိၼ်ဢွင်ႈတီႈဢၼ်ၶွမ်ႊပၼီႊထုင်ႉမၢဝ်း တုၵ်းယွၼ်းသိုဝ်ႉၼႆႉ ပဵၼ်တီႈၼႃး ၼႂ်းပွၵ်ႉၸွၼ်ၸေႃႇ။ ၵူၺ်းၵႃႈ ၸဝ်ႈၼႃးၶဝ်ဝႃႈ ပၼ်သႅၼ်မၼ်းပဵၼ်ႁဵင်ၵေႃႈဢမ်ႇၶၢႆလႆႈ။ ၵွပ်ႈဝႃႈပဵၼ်တီႈလိၼ်တီႈၼႃး ဢၼ်လႆႈ ပိုင်ႈဢိင်ႁႃၵိၼ် လဵင်ႉတွင်ႉမႃးၸဵမ်မိူဝ်ႈပၢၼ် ပူႇပၢၼ်မွၼ်ႇ- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 09/03/2014 ၼၼ်ႉ ၽွင်းလူင်ၾၢႆႇၾႆးၾႃႉ ၸႄႈမိူင်းတႆး ဢူးထုၼ်းယိၼ်ႇ မႃးတီႈမူႇၸႄႈသေ မီးၵၢၼ်ႁူပ်ႉထူပ်းဢုပ်ႇဢူဝ်းၵၼ် တင်းၸဝ်ႈၼႃႈတီႈလၢႆလၢႆႁွင်ႈၵၢၼ်။ ဢုပ်ႇၵၼ်လွင်ႈသင် ဢမ်ႇလႆႈႁူႉသေတႃႉ ၵူၼ်းမိူင်းပွတ်းမူႇၸႄႈလၢမ်းဝႃႈ ဢၼ်ဢူးထုၼ်းယိၼ်ႇမႃးၼၼ်ႉ မီး 2 လွင်ႈ- 1.မႃးတူၺ်းၶူင်းၵၢၼ်ၾႆးၾႃႉ တီႈ ၼမ်ႉပေႃႈ။ 2.တႃႇႁဵတ်းႁိူၼ်းတိူၵ်ႈ/ မူႇဝၢၼ်ႈၸတ်းသၼ်- ဝႃႈၼႆ။

ၶွမ်ႊပၼီႊထုင်ႉမၢဝ်းၼႆႉ  ဢူးၸၢႆးမွင်ႇၸဵင်ႇ ပဵၼ်ႁူဝ်ပဝ်ႈ၊ ဢူးဝိၼ်းမွင်ႇ ပဵၼ်ၽူႈၵမ်ၵပ်း - ၼႆယဝ်ႉ။