ၸၢႆးယီႈသႃႇ ၵေႃႉမေႃၸွႆႈထႅမ်ၵၢၼ်ၼႂ်းဝၢၼ်ႈၼႂ်းၶူင်ႇ ထုၵ်ႇၵူၼ်းဢမ်ႇႁူႉၸၵ်းၸုမ်း ႁွင်ႉၵႂႃႇယၢမ်းၵၢင်ၶိုၼ်းသေ ႁၢႆလၢႆၵႂႃႇ။ ၵူၼ်းဝၢၼ်ႈၵႂႃႇသွၵ်ႈႁၼ်ၶၢပ်ႈတူဝ် ၺႃးယိုဝ်းတၢႆ။

ပူၼ်ႉမႃးမိူဝ်ႈဝၼ်းတီႈ 16/03/14 ၵၢင်ၶမ်ႈယၢမ်း 9 မူင်း၊ မီးၵူၼ်း 5 ၵေႃႉ မႃးႁွင်ႉဢဝ်ၸၢႆးယီႈသႃႇ ဢႃႇယု 45 ပီ၊  တီႈႁိူၼ်းမၼ်းပွၵ်ႉၵွင်းၼွင် ဝဵင်းမူႇၸႄႈ၊ မႃးႁွင်ႉဢဝ်ၵႂႃႇသေႁၢႆလၢႆၵႂႃႇ။ ၽိူဝ်ႇထိုင်မႃးဝၼ်းတီႈ 19/03/14 ဝၢႆးဝၼ်းယၢမ်း 4 မူင်းၶိုင်ႈ၊ ပေႃႈမႄႈပီႈၼွင်ႉၸိူဝ်ႉၶိူဝ်းၵူၼ်းၼႂ်းဝၢၼ်ႈ ၵႂႃႇႁၼ်ၶၢပ်ႈတူဝ်မၼ်းၸၢႆး ၾၢႆႇၸဵင်ႇႁွင်ႇ ဝၼ်းဢွၵ်ႇ ဝၢၼ်ႈႁူဝ်ၼွင် ၼိုင်ႈလၵ်းပၢႆ- ၼႆယဝ်ႉ။

ၸၢႆးယီႈသႃႇၼႆႉ ပဵၼ်လုၵ်ႈၶိင်းသွႆႈငိုၼ်း၊ ႁဵတ်းၵၢၼ်လွႆသၢႆး တီႈဝၢၼ်ႈႁူဝ်ၼွင်၊ ၼႂ်းဢိူင်ႇတူင်ႈၶၢၼ်၊ ၸႄႈဝဵင်းမူႇၸႄႈ။ မီးလုၵ်ႈလၢင်း 2 ၵေႃႉ၊ ယိင်းၵေႃႉၼိုင်ႈ ၸၢႆးၵေႃႉၼိုင်ႈ။

မိူဝ်ႈၵႂႃႇႁၼ်တူဝ်တၢႆမၼ်းၸၢႆး ဝၼ်းတီႈ 19/03/14 ၼၼ်ႉ ႁၼ်ႁွႆးမၢၵ်ႇၵွင်ႈတီႈႁူဝ်မၼ်းလုၵ်ႈၼိုင်ႈ၊ တီႈၶႅၼ်မၼ်းလုၵ်ႈၼိုင်ႈ။ လွင်ႈတၢင်းလႆႈၶႃႈႁႅမ်ၵၼ်ၼႆႉ ၵူၼ်းဝၢၼ်ႈၶဝ်ဝႃႈ မီးလိူင်ႈသင်ၵၼ်ၵေႃႈဢမ်ႇႁူႉ။ လႆႈပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ ၽဝ်ၵႂႃႇမိူဝ်ႈဝႃး ဝၼ်းတီႈ 20/03/14 ဝၢႆးဝၼ်းယၢမ်း 1 မူင်း- ၼႆယဝ်ႉ။

ပဵၼ်ၽႂ်မႃးႁွင်ႉဢဝ်ၵႂႃႇၶႃႈႁႅမ်မၼ်းတၢႆၵေႃႈဢမ်ႇႁူႉ။ မီးၵူၼ်း 5 ၵေႃႉ၊ လၢတ်ႈၵႂၢမ်းသမ်ႉလၢတ်ႈၵႂၢမ်းတႆးယူႇ၊ ၵူၺ်းၵႃႈ ပဵၼ်ၽႂ် ၸုမ်းလႂ်တႄႉဢမ်ႇႁူႉ။ ၸၢႆးယီႈသႃႇၼႆႉ မၼ်းဢမ်ႇၸႂ်ႈၵူၼ်းဢၼ် ပၢၵ်ႇၸႃႉသဵင်ၸၢင်၊ ဢမ်ႇၸႂ်ႈၵူၼ်းၵႆႉၵႂႃႇမေႃၽိတ်းၽႅၵ်ႇပိူၼ်ႈ၊ မၼ်းပဵၼ်ၵူၼ်းမေႃၸွႆႈထႅမ်ၼႂ်းမူႇၼႂ်းဝၢၼ်ႈၵေႃႉၼိုင်ႈ- ၵူၼ်းဝၢၼ်ႈ ၶဝ်လၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ပေႃႈမႄႈၵူၼ်းတၢင်းႁိူၼ်းမၼ်းၸၢႆးၵေႃႈဝႃႈ- ဢမ်ႇၶႂ်ႈဢဝ်လိူင်ႈဢဝ်လၢဝ်း၊ ဢမ်ႇၶႂ်ႈၵႂႃႇတၢင်ႇလၢတ်ႈတီႈလုမ်း တီႈၸႆး၊ ဢမ်ႇၶႂ်ႈတၢင်ႇလၢတ်ႈပႃႊတီႊတီႈလႂ်၊ ၶႂ်ႈပွႆႇမၼ်းယဝ်ႉၵႂႃႇ။ ၵွပ်ႈဢမ်ႇႁူႉဝႃႈ ဢၼ်မႃးႁွင်ႉဢဝ်ၵႂႃႇၼၼ်ႉ ပဵၼ်ၽႂ် ပဵၼ်ၸုမ်းလႂ် - ဝႃႈၼႆ။