ဢူးတဵင်းၸေႃႇ ၵႅမ်တီႈ 2 UPWC ၵႂႃႇပၢင်သၢင်း ႁူပ်ႉထူပ်း ၸုမ်းဝႃႉ၊ ဝၢႆးသေႁူပ်ႉၸုမ်းမိူင်းလႃး။ ၾၢႆႇၼိုင်ႈၵေႃႈ ဝႃႉႁၢင်ႈႁႅၼ်းတူဝ်ႈတၼ်းဝႆႉ ပိူဝ်ႈတႃႇလူင်းလၢႆးမိုဝ်းၵိုတ်း ယိုဝ်းပတ်းပိုၼ်ႉၸိုင်ႈမိူင်း။

သိုဝ်ႇၶၢဝ်ႇ MOI ၶွင်လူင်ပွင်ၸိုင်ႈမၢၼ်ႈ ဝၼ်းတီႈ 20/03/14 (မိူဝ်ႈၼႆႉ) လၢတ်ႈဝႃႈ- ပိူဝ်ႈတႃႇဢုပ်ႇၵုမ် ၵၢၼ်ၵိုတ်းယိုဝ်းပတ်းပိုၼ်ႉ တင်းၸိုင်ႈမိူင်းၼၼ်ႉ ၸုမ်းဝႃႉတေႁူပ်ႉတင်းၸုမ်းလူင်ပွင်ၸိုင်ႈ၊ ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ဢူးတဵင်းၸေႃႇ ၵႅမ်တီႈ 2 UPWC ။ ဢူးတဵင်းၸေႃႇ ၼႆႉမိူဝ်ႈဝႃး (19/03/14) လႆႈႁူပ်ႉထူပ်း ၵၼ်တင်းၸုမ်းမိူင်းလႃး (NDAA) ၊  မိူဝ်ႈၼႆႉ တေႁူပ်ႉၵၼ်တင်း ၸုမ်းဝႃႉ တီႈပၢင်သၢင်း- ၼႆယဝ်ႉ။

လွင်ႈတေႁူပ်ႉၵၼ်ၼႆႉ ပိူဝ်ႈတႃႇဢုပ်ႇဢူဝ်းၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်းၼႆသေတႃႉ ႁူဝ်ၶေႃႈတေ ဢုပ်ႇၵၼ် တႄႉတႄႉၼၼ်ႉ ၾၢႆႇလႂ်ၵေႃႈပႆႇပိုတ်ႇလၢတ်ႈၼႄၽႂ်။ ၵူၺ်းၵႃႈ ဝၢႆးလင်ၵိုတ်းယိုဝ်းပတ်းပိုၼ်ႉ တင်းၸိုင်ႈမိူင်းယဝ်ႉ ပေႃးထိုင်ၶၵ်ႉတွၼ်ႈဢုပ်ႇဢူဝ်း ၵၢၼ်မိူင်းမႃး  ဝႃႉတေဢုပ်ႇလွင်ႈတုၵ်းယွၼ်းမိူင်းဝႃႉ- ၼႆယဝ်ႉ။

ၸုမ်းဝႃႉယၢမ်ႈလၢတ်ႈဝႆႉဝႃႈ ပေႃးပဵၼ်ပၢင်ႁူပ်ႉထူပ်းဢုပ်ႇဢူဝ်းဝူင်ႈၵၢင် ၶွမ်ႊမတီႊၵပ်းသၢၼ်ၵၢၼ်ၵိုတ်းယိုဝ်း ပတ်းပိုၼ်ႉတင်း ၸိုင်ႈမိူင်း (NCCT) တင်း လူင်ပွင်ၸိုင်ႈၵူၺ်း ဝႃႉတေဢမ်ႇၶဝ်ႈပႃး။ ၵူၺ်းၵႃႈ ပေႃးဝႃႈတေ လူင်းလၢႆးမိုဝ်းၵိုတ်းယိုဝ်းပတ်းပိုၼ်ႉ ၸိုင်ႈမိူင်းၼႆတႄႉ ႁၢင်ႈႁႅင်းတူဝ်ႈတၼ်းဝႆႉ ပိူဝ်ႈတႃႇၶဝ်ႈပႃးလူင်းလၢႆး မိုဝ်းယဝ်ႉ။ လွင်ႈၼႆႉ ၸုမ်းဝႃႉ ယၢမ်ႈလၢတ်ႈတီႈလူင်ပွင်ၸိုင်ႈ ၸဵမ်မိူဝ်ႈၵႂႃႇတီႈၼေႇပျီႇတေႃႇ ၵဵဝ်ႇၵပ်းလွင်ႈၵဵပ်း သဵၼ်ႈသၢႆမၢႆႁူဝ်ၵူၼ်းၼၼ်ႉ-ၼႆယဝ်ႉ။

ပိူဝ်ႈတႃႇၵိုတ်းယိုဝ်းပတ်းပိုၼ်ႉတင်းၸိုင်ႈမိူင်းၼၼ်ႉ ၸုမ်း NCCT တင်းလူင်ပွင်ၸိုင်ႈ၊ ၸုမ်း UPWC လႆႈႁူပ်ႉထူပ်းဢုပ်ႇဢူဝ်းၵၼ် ပူၼ်ႉမႃးမိူဝ်ႈဝၼ်းတီႈ 09-10/03/2014 ။ သွင်ၾၢႆႇလႆႈၸႂ် တူၵ်းလူင်းၵၼ်ဝႃႈ လွင်ႈတေလူင်းလၢႆးမိုဝ်းၵိုတ်းယိုဝ်းပတ်းပိုၼ်ႉ ၸိုင်ႈမိူင်းၼႆႉ  တေပဵၼ်ၼႂ်းႁူဝ်လိူၼ်ဢေႊပရိူဝ်ႊလ် (2014) ဝူင်ႈတီႈၼိုင်ႈ။ သိုဝ်ႇၶၢဝ်ႇၵဵင်းတုင် ႁၢႆးငၢၼ်းၼင်ႇၼႆ။