ႁူဝ်ပဝ်ႈ RCSS ၸဝ်ႈယွတ်ႈသိုၵ်း တွပ်ႇၵႄႈဝႃႈ ဢမ်ႇလႆႈၶဝ်ႈ သုၵ်ႉယုင်ႈဢူၼ်ၵဝ်းၸွမ်း ၵၢၼ်မိူင်းမိူင်းထႆး၊ ၸွမ်းၼင်ႇ ဢၼ်ၶၢဝ်ႇထႆးႁၢႆးငၢၼ်းၵၢဝ်ႇႁႃၵႂႃႇဝႃႈမၼ်းၸဝ်ႈ ပဵၼ်ၽူႈၵမ်ႉထႅမ်ၸုမ်းသိူဝ်ႈလႅင်။

ၵဵဝ်ႇၵပ်းလွင်ႈၼႆႉ ၸွမ်သိုၵ်းယွတ်ႈသိုၵ်း ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး (RCSS) လၢတ်ႈတီႈၸုမ်းၶၢဝ်ႇ ၽူႈတွႆႇႁွၵ်ႈ ဝႃႈ- ႁဝ်းဢမ်ႇလႆႈၶဝ်ႈၸိမ်သုၵ်ႉယုင်ႈဢူၼ်ၵဝ်းၸွမ်းၵၢၼ်မိူင်းမိူင်းထႆး၊ ႁဝ်းဢမ်ႇလႆႈယူႇၾၢႆႇလႂ်။ ႁဝ်းၶႃႈမီးလွင်ႈသုၵ်ႉယုင်ႈၼႂ်းမိူင်းႁဝ်း ပေႃးၼမ်လိူဝ်ႁႅင်းယဝ်ႉ- ဝႃႈၼႆ။

ၽူႈၸမ်ၸႂ်ၸဝ်ႈယွတ်ႈသိုၵ်းၵေႃႉၼိုင်ႈလၢတ်ႈဝႃႈ- ၸဝ်ႈယွတ်ႈသိုၵ်း မီးဢူၺ်းၵေႃႉတင်းသွင်ၾၢႆႇ။ ယွၼ်ႉၼၼ်လႄႈ ႁဝ်းၶႃႈတိုၵ်း သူၼ်းႁႂ်ႈၶဝ်ၶဝ်ႈႁႃဢုပ်ႇၵၼ် မိူၼ်ၼင်ႇႁဝ်းတိုၵ်ႉဢုပ်ႇၵၼ် လွင်ႈၸိုင်ႈမိူင်းႁူမ်ႈတုမ်မၢၼ်ႈ- ဝႃႈၼႆ။

ၸဝ်ႈၼႃႈတီႈၾၢႆႇႁူမ်ႇလူမ်ႈထႆး ၵေႃႉၼိုင်ႈၵေႃႈလၢတ်ႈဝႃႈ- ပေႃးၸဝ်ႈယွတ်ႈသိုၵ်းတေယူႇၾၢႆႇလႂ် ၾၢႆႇၼိုင်ႈၸိုင် မၼ်းတေပဵၼ်ၵူၼ်း ယွင်ႇၵူၺ်း၊ ယွၼ်ႉပိူဝ်ႈဝႃႈတပ်ႉသိုၵ်းၸိုင်ႈတႆး (SSA) ၼႆႉ ယူႇလွတ်ႈလႆႈ လူၺ်ႈ သိုၵ်းထႆးၸွမ်း လႅၼ်လိၼ်။ ပွၵ်ႈၼႆႉ ဢမ်ႇၸႂ်ႈပွၵ်ႈ ဢွၼ်တၢင်းသုတ်း ဢၼ်ၸဝ်ႈယွတ်ႈသိုၵ်း ထုၵ်ႇၵၢဝ်ႇႁႃ ၸီႉၼႄးဝႃႈ ၶဝ်ႈယုင်ႈ ၸွမ်းၵၢၼ်မိူင်းမိူင်းထႆး။ ၸဵမ်မိူဝ်ႈ 8 ပီပူၼ်ႉမႃး ပၢၼ်ထၵ်းသိၼ်ၼၼ်ႉ ၵေႃႈ ထုၵ်ႇၵၢဝ်ႇႁႃမႃးၼင်ႇၼႆ။