ပႃႊတီႊႁူဝ်သိူဝ် ၸတ်းပၢင်ၵုမ်လူင်တီႈဝဵင်းၼမ်ႉၶမ်း၊ တွတ်ႈၶႅပ်းယင်ႇၵၢင်ၸႂ်ၵၼ်ၼၼ်ႉ ၵမ်ႈၼမ်ပႆႇလႆႈၸႂ် လွင်ႈပႃႊတီႊတႆးသွင်ဢၼ်ႁူမ်ႈႁွမ်းၵၼ် လႄႈပႆႇၶႂ်ႈၶဝ်ႈ ၵၢၼ်လိူၵ်ႈတင်ႈပီ 2015 ။

ပူၼ်ႉမႃးမိူဝ်ႈဝၼ်းတီႈ (14/03/14) ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) လႆႈၸတ်းႁဵတ်းပၢင်ၵုမ် လူင်ၸေႈဝဵင်းၼမ်ႉၶမ်း၊ တီႈႁွင်ႈႁပ်ႉၶႅၵ်ႇ ၸေႈဝဵင်း၊ ဢၼ်တေႃႇၼႃႈလုမ်းႁူဝ်သိူဝ် ဝဵင်းၼမ်ႉၶမ်း၊ ၵူၼ်းၶဝ်ႈႁူမ်ႈမီး 275 ၵေႃႉ။ ပိူင်လူင်မၼ်း ပၢင်ၵုမ်လႆႈဢုပ်ႇၵုမ်ၵၼ်ၵဵဝ်ႇၵပ်းလွင်ႈ ပိူဝ်ႈတႃႇပႃႊတီႊတႆး 2 ပႃႊတီႊႁူမ်ႈႁွမ်းၵၼ်၊ ပေႃးထိုင်ၵၢၼ်လိူၵ်ႈတင်ႈပီ 2015 မႃး ၸွင်ႇပႃႊတီႊႁူဝ်သိူဝ် ထုၵ်ႇလီၶဝ်ႈလိူၵ်ႈတင်ႈ ဢမ်ႇၶဝ်ႈၸိူဝ်းၼႆႉ ဢုပ်ႇၵၼ်ၵႂႃႇၵႂၢင်ႈၵႂၢင်ႈၶႂၢင်ၶႂၢင်။

ၽူႈၼမ်းၼႂ်းပႃႊတီႊႁူဝ်သိူဝ်ဝဵင်းၼမ်ႉၶမ်း ၸၢႆးမွၵ်ႇသႂ် လၢတ်ႈဝႃႈ- ႁႂ်ႈၵူၼ်းမႃးၶဝ်ႈႁူမ်ႈပၢင်ၵုမ်ၶဝ် တွတ်ႈၶႅပ်းၵၢင်ၸႂ်ပၼ် ၼိုင်ႈၵေႃႉလႂ် 2 ၶႅပ်း။ တီႈၼိုင်ႈပဵၼ်ၵၢၼ်ယင်ႇၵၢင်ၸႂ်ၶေႃႈ (A) ၊ 1.ပႃႊတီႊႁူဝ်သိူဝ် လႄႈပႃႊတီႊ သိူဝ်ၽိူၵ်ႇၼႆႉ ပဵၼ်ၸုမ်းလဵဝ် ဢၼ်လဵဝ်ၵၼ်။ 2.ပဵၼ်သွင်ၸုမ်းသေ ႁူမ်ႈႁဵတ်းၵၢၼ်ၸိူဝ်ႉ ၸၢတ်ႈၸွမ်းၵၼ်။ ပဵၼ်သွင်ၸုမ်းသေယူႇၽႂ်ယူႇမၼ်း၊ ပႃႊတီႊၵေႃႈ ဢမ်ႇႁူမ်ႈၵၼ်၊ ၵၢၼ်ငၢၼ်းၵေႃႈဢမ်ႇ ႁူမ်ႈၵၼ်။ ၵွပ်ႈသင် ၸိူဝ်းၼႆႉ။ ၶေႃႈယင်ႇၵၢင်ႇတီႈသွင် (B) ။ ပၢင်လိူၵ်ႈတင်ႈပီ 2015 ၼၼ်ႉ ပႃႊတီႊႁူဝ်သိူဝ် (SNLD) 1.ထုၵ်ႇလီၶဝ်ႈႁူမ်ႈၸွမ်း၊ 2.ဢမ်ႇထုၵ်ႇလီၶဝ်ႈႁူမ်ႈ ၸိူဝ်းၼႆႉ- ဝႃႈၼႆ။

ၵႅမ်ၽူႈၼမ်းၼႂ်း ၸၢႆးသၢႆၾႃႉ၊ ပႃႊတီႊႁူဝ်သိူဝ်ဝဵင်းၼမ်ႉၶမ်း ၵေႃႉႁပ်ႉပုၼ်ႈၽွၼ်းဢၢၼ်ႇၶႅပ်းၵၢင်ၸႂ် လၢတ်ႈဝႃႈ- ႁဝ်းၶႃႈမႃးၼပ်ႉ ၶႅပ်းၵၢင်ၸႂ်ၼႆႉ ၶေႃႈထၢမ်တီႈၼိုင်ႈ (A) ၼၼ်ႉ တႃႇတေႁူမ်ႈၵၼ်ပဵၼ်ပႃႊတီႊ လဵဝ်ၵၼ်ၼၼ်ႉ ၵူၼ်းတွတ်ႈၶႅပ်းမီး 20 ၶႅပ်း၊ ပႃႊတီႊဢမ်ႇႁူမ်ႈၵၼ်၊ ၵူၺ်းၵႃႈႁူမ်ႈၵၢၼ်ငၢၼ်းၵၼ်ၼၼ်ႉ မီး 252 ၶႅပ်း။ ပႃႊတီႊၵေႃႈ ဢမ်ႇႁူမ်ႈ ၵၢၼ်ငၢၼ်းၵေႃႈဢမ်ႇႁူမ်ႈၼၼ်ႉ မီးၶႅပ်းၵၢင်ၸႂ် 3 ၶႅပ်း။ ၶႅပ်းၵၢင်ၸႂ်ယူႇ ၵၢင် ဢမ်ႇလိူၵ်ႈဢၼ်လႂ်မီး 1 ၶႅပ်း။ ၶေႃႈထၢမ် (B) ပၢင်လိူၵ်ႈတင်ႈပီ 2015 မႃး ၸွင်ႇတေၶဝ်ႈႁူမ်ႈ ဢမ်ႇၶဝ်ႈႁူမ်ႈၼၼ်ႉ ၵူၼ်းတွတ်ႈၶႅပ်းၵၢင်ၸႂ်ဝႃႈ ထုၵ်ႇလီၶဝ်ႈႁူမ်ႈ မီး 31 ၶႅပ်း၊  ဢမ်ႇထုၵ်ႇလီၶဝ်ႈႁူမ်ႈမီး 241 ၶႅပ်း၊ ဢၼ်ယူႇၵၢင် မီး 3 ၶႅပ်း- ဝႃႈၼႆ။

ဝၢႆးသေ ယင်ႇၵၢင်ၸႂ်ၽူႈၶဝ်ႈႁူမ်ႈပၢင်ၵုမ်ယဝ်ႉ မီးၵၢၼ်လိူၵ်ႈထႅင်ႈတူဝ်တႅၼ်းပႃႊတီႊႁူဝ်သိူဝ် 3 ၵေႃႉ၊ ပိူဝ်ႈတႃႇၵႂႃႇၶဝ်ႈႁူမ်ႈပၢင်ၵုမ် လူင် ဢၼ်တေၸတ်းႁဵတ်းတီႈဝဵင်းတူၼ်ႈတီး။

ယိူင်းဢၢၼ်းဢၼ်လႆႈၸတ်းႁဵတ်းပၢင်ၵုမ်ၼႆႉ ပိူဝ်ႈတႃႇႁႂ်ႈလုမ်းငဝ်ႈငုၼ်းႁူဝ်သိူဝ်ႁူႉဝႃႈ ႁဝ်းႁဵတ်းၸွမ်း ၶေႃႈၸီႉသင်ႇငဝ်ႈငုၼ်း ယူႇၼႆၵေႃႈၸႂ်ႈ။ သမ်ႉၶႂ်ႈႁႂ်ႈတၢင်ႇတီႈတၢင်ႇၸေႈဝဵင်း ဢၼ်ပႆႇလႆႈၸတ်းႁဵတ်းပၢင် ၵုမ်လူင် ၸေႈဝဵင်းၽႂ်မၼ်းၼၼ်ႉ ႁႂ်ႈမီးၸႂ်ၶွႆသေ ႁႂ်ႈၶတ်းၸႂ်ၸတ်းႁဵတ်းၵၼ်ၵႂႃႇ။ ၶႂ်ႈႁႂ်ႈလုမ်းငဝ်ႈငုၼ်းတင်း ၵူၼ်းဝၢၼ်ႈၵူၼ်းမိူင်းႁူႉၵၢင်ၸႂ် ၽူႈၶဝ်ႈပႃႊတီႊႁူဝ်သိူဝ် (SNLD) ဝဵင်းၼမ်ႉၶမ်း- ၸၢႆးလိူၼ်မျၢတ်ႈ ႁူဝ်ပဝ်ႈပႃႊတီႊႁူဝ်သိူဝ် ဝဵင်းၼမ်ႉၶမ်း လၢတ်ႈၼင်ႇၼႆ။