ပႃႊတီႊႁူဝ်သိူဝ် ၸတ်းပၢင်ၵုမ်တီႈဝဵင်းတူၼ်ႈတီး ပိုၼ်ၽၢဝ်ႇ 9 ၶေႃႈ၊ ၵဵဝ်ႇလွင်ႈၵေႃႇသၢင်ႈငမ်းယဵၼ်၊ ၸိုင်ႈမိူင်းႁူမ်ႈတုမ် ၸိုၼ်ႈၸၢင်ႇ၊ လွင်ႈပႃႊတီႊၶတ်းၸႂ်ႁဵတ်းသၢင်ႈၼႃႈၵၢၼ် တႃငၢၼ်း လႄႈလၢႆလၢႆလွင်ႈ။

ပၢင်ၵုမ်လူင် 6 လိူၼ်ၶွပ်ႈ ၸၼ်ႉၸႄႈဝဵင်း၊  ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ဢၼ်ၸတ်း တီႈဝဵင်းတူၼ်ႈတီး 3 ဝၼ်း၊ တင်ႈတႄႇဝၼ်းတီႈ 24-26/03/14 ၼၼ်ႉ ဝၼ်းလိုၼ်းသုတ်း ဢွၵ်ႇလိၵ်ႈပိုၼ်ၽၢဝ်ႇ တင်းမူတ်း 9 ၶေႃႈ။ ပၢင်ၵုမ်ၼႆႉ ၸတ်းတီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး၊ မီးတူဝ်တႅၼ်းၸိူဝ်းၸၢင်ႈဢုပ်ႇဢူဝ်းတႅပ်းတတ်း ၶိုၼ်ႈႁွတ်ႈၶဝ်ႈႁူမ်ႈၼိုင်ႈ ၸႄႈဝဵင်း 3 ၵေႃႉ၊ တင်းမူတ်းမီးၵူၼ်းၶဝ်ႈႁူမ်ႈ 150 ၵေႃႉပၢႆ- ၼႆယဝ်ႉ။

(1)ပိူဝ်ႈတႃႇဝၢၼ်ႈမိူင်း တေမီးၵၢၼ်ပူၵ်းပွင်ၶိုၼ်ႈယႂ်ႇၵႂႃႇမိူဝ်းၼႃႈၼၼ်ႉ တေလႆႈမီးလွင်ႈငမ်းယဵၼ် ဢၼ်မၼ်ႈ ၵိုမ်းၸိုၼ်ႈၸၢင်ႇ။ မိူၼ်ၼၼ်ၼင်ႇၵဝ်ႇ ဢိင်ၼိူဝ်လွၵ်းပိူင်ၻီႊမွၵ်းၶရေႊသီႊ ဢၼ်ဢဝ်ၵၢင်ၸႂ်ၵူၼ်းမိူင်း တင်းၼမ်ဝႃႈသေ ၼင်ႇႁိုဝ်တေမီးမႃး ပိူင်ငဝ်ႈပိုင်းမိူင်း ဢၼ်မီးလွင်ႈၽဵင်ႇပဵင်း ပဵၼ်ထမ်းၵေႃႈ လမ်ႇလွင်ႈ ၼင်ႇၵဝ်ႇ။ ၵွပ်ႈၼၼ် ၵၢၼ်သွင်ပိူင်ၼႆႉ တေလႆႈၶိုင်ပွင်ႁဵတ်း သၢင်ႈၵႂႃႇၼင်ႇၵၼ်ၼၼ်ႉ ယူႇတီႈငဝ်ႈငုၼ်း ၻီႊမွၵ်းၶရေႊသီႊၸိူဝ်ႉၶိူဝ်းတႆးသေ တေၶတ်းၸႂ်ႁဵတ်းသၢင်ႈၵႂႃႇ။

(2)ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး (SNLD) ၼႆႉ ၼင်ႇႁိုဝ်ၸိုင်ႈမိူင်းႁူမ်ႈတုမ်မၢၼ်ႈ ပေႃးတေပဵၼ် မႃးၸိုင်ႈမိူင်းႁူမ်ႈတုမ် ၾႅတ်ႊၻရႄႊလ်ၸိုၼ်ႈၸၢင်ႇၼၼ်ႉ ဢိင်ၼိူဝ်ငဝ်းလၢႆးၵၢၼ်မိူင်းတုၵ်းယွၼ်းသေ မီးၵၢင်ၸႂ်တေၶဝ်ႈလိူၵ်ႈတင်ႈၵႂႃႇ။

3.ၵၢၼ်ၵေႃႇသၢင်ႈလွင်ႈငမ်းယဵၼ်ၼႂ်းမိူင်း ဢၼ်ၶိုင်ပွင်ႁဵတ်းသၢင်ႈယူႇၼၼ်ႉ ယူႇတီႈ SNLD တေသၢၼ်မိုဝ်းၵၼ်တင်း ပႃႊတီႊဢူၺ်းလီသေ ၶတ်းသၢင်ႈႁၢင်ႈပွင်ၵႂႃႇၸွမ်း။

(4)ပိူဝ်ႈတႃႇၵူၼ်းတူၵ်းၶွၵ်ႈ ယွၼ်ႉၵၢၼ်မိူင်း ၸိူဝ်းတိုၵ်ႉမီးယူႇၼႂ်းၶွၵ်ႈႁၢၼ်ႉတေႃႇယၢမ်းလဵဝ် ပေႃးတေပူၼ်ႉဢွၵ်ႇၶွၵ်ႈၼၼ်ႉၵေႃႈ တေသၢၼ်မိုဝ်းၵၼ်သေ ႁဵတ်းသၢင်ႈၵႂႃႇ။

(5)ဢိင်ၼိူဝ်ၸိုင်ႈမိူင်းႁူမ်ႈတုမ်မၢၼ်ႈ ႁပ်ႉၵူၼ်းၼွၵ်ႈမိူင်း/ၼႂ်းမိူင်းလူင်းတိုၼ်း ၼႂ်းမိူင်း။ ၶူင်းၵၢၼ်လူင် ပွင်ၸိုင်ႈၵေႃႈ ႁဵတ်းသၢင်ႈၵၢၼ်ငၢၼ်းယူႇၸိူဝ်းၼၼ်ႉ သင်ဝႃႈတေလူင်းတိုၼ်းၸိုင် ႁႂ်ႈမီးလွင်ႈဝူၼ်ႉၶွပ်ႈ ထိုင်ၽေးၶဵၼ် ဢၼ်ၸၢင်ႈတုမ်ႉတိူဝ်ႉ ၶူဝ်းၶွင်လႄႈသၢႆၸႂ် ၵူၼ်းဝၢၼ်ႈၵူၼ်းမိူင်း။

(6)ဢၼ်လူင်ပွင်ၸိုင်ႈပဵၼ်ၵဝ်ႉငဝ်ႈသေ ႁဵတ်းသၢင်ႈၶူင်းၵၢၼ်ယူႇယၢမ်းလဵဝ်ၸိူဝ်းၼႆႉ ဢိင်ၼိူဝ်ဢမ်ႇမီးၵၢၼ် သပ်းလႅင်းၼႄ တႅၵ်ႇလႅင်းသေ ၽွၼ်းလီၽွၼ်းႁၢႆႉဢၼ်ၸၢင်ႈၵိူတ်ႇၶိုၼ်ႈမႃး မီးၸိူင်ႉႁိုဝ်ၼၼ်ႉ ၵူၼ်းဝၢၼ်ႈ ၵူၼ်းမိူင်းဢမ်ႇလႆႈႁူႉၶိုတ်းတၼ်း။ ၵူၼ်းဝၢၼ်ႈၵူၼ်းမိူင်းဢွၼ်ၵၼ်သၢၼ်ၶတ်းဝႆႉယူႇၵေႃႈ ၼိူဝ်ၵေးၼမ်ႉၶူင်း လူင်ၼႆႉ တိုၵ်ႉၶိုင်ႁဵတ်းသၢင်ႈၾၢႆလူင်ယူႇ 6 ဢၼ်။ ၵွပ်ႈၼၼ် ၶူင်းၵၢၼ်ၸိူဝ်းၼႆႉ ၸၢင်ႈပဵၼ်ၽေးတုမ်ႉတိူဝ်ႉ ၶူဝ်းၶွင်လႄႈသၢႆၸႂ်ၵူၼ်းဝၢၼ်ႈၵူၼ်းမိူင်းၸိူဝ်းယူႇႁိမ်းသၢပ်ႇ ထုင်ႉၼမ်ႉၶူင်း၊ မိူၼ်ၼင်ႇတုမ်ႉတိူဝ်ႉဢၼႃႇ ၵၢတ်ႈၵူၼ်းမိူင်း၊ လွင်ႈယူႇသဝ်းၵိၼ်သၢင်ႈၵူၼ်းမိူင်း ပႃးၸဵမ်ၶူဝ်းၶွင် မေႃႇတိုင်း/ႁႄႈ၊ ၶူဝ်းၶွင်ဢၼ်ၵိုၵ်းသၢႆ ၼမ်ႉၶူင်းမႃး ပႃးၸဵမ်တူဝ်သတ်းတတ်းမႅင်း ဢၼ်ပိုင်ႈဢိင်မႄႈၼမ်ႉၶူင်း။

ၾၢႆႇၼိုင်ႈၵေႃႈ ၾႆးၾႃႉဢၼ်တေ ႁဵတ်းဢွၵ်ႇမႃးတီႈႁူင်းၸၢၵ်ႈၼမ်ႉၶူင်းၸိူဝ်းၼႆႉၵေႃႈ ၵူၼ်းဝၢၼ်ႈၵူၼ်းမိူင်း သမ်ႉဢမ်ႇလႆႈ ၸၢမ်ႇပူၺ်ႈသေ ဢဝ်သူင်ႇၶၢႆပၼ်မိူင်းႁိမ်းႁွမ်း။ ၵွပ်ႈၼၼ် ႁဝ်းၶႃႈၸင်ႇလႆႈသၢၼ်ၶတ်း ၶူင်းၵၢၼ်ၵေႃႇသၢင်ႈၾၢႆၸိူဝ်းၼႆႉ။

(7)ယွၼ်ႉပိူဝ်ႈၵၢၼ်ၶုတ်းႁႄႈၶုတ်းၶမ်းၼႂ်းၸိုင်ႈတႆး မၢင်ပိုၼ်ႉတီႈသေ  ပဵၼ်ၽေးလူင်တေႃႇၵူၼ်းဝၢၼ်ႈ လႄႈတူဝ်သတ်း ဢၼ်ယူႇသဝ်းႁိမ်းႁွမ်းၸိူဝ်းၼႆႉ ႁႂ်ႈမီးၵၢၼ်ႁႄႉၵင်ႈပၼ်။  ဢၼ်ၶုတ်းႁႄႈၶုတ်းၶမ်းသေ ၵူၼ်းဝၢၼ်ႈၵူၼ်းမိူင်းလႆႈသုမ်းၵႂႃႇ တီႈလိၼ်တီႈႁႆႈတီႈၼႃးၸိူဝ်းၼႆႉၵေႃႈ ၼင်ႇႁိုဝ်တေလႆႈၶိုၼ်းၼၼ်ႉ ႁႂ်ႈႁပ်ႉပုၼ်ႈၽွၼ်းသေၵႄႈလိတ်ႈပၼ်။ ၵွပ်ႈၼၼ် ၸင်ႇလႆႈတုၵ်းၽွင်းတႅၼ်းမိူင်းတႆး လႄႈလူင်ပွင်ၸိုင်ႈ မိူင်းတႆး ႁႂ်ႈၵႄႈလိတ်ႈပၼ်ယႂ်ႇယႂ်ႇၼမ်ၼမ်။

(8)ၼႂ်းမိူင်းတႆးပွတ်းႁွင်ႇ ၸႄႈတွၼ်ႈလႃႈသဵဝ်ႈ/မူႇၸႄႈ ၸိူဝ်းၼႆႉ ၶွမ်ႊပၼီႊသုၼ်ႇတူဝ်ၶဝ် ႁဵတ်းသၢင်ႈႁူင်းၸၢၵ်ႈမၼ်းၸိူဝ်ႉၾႆး ၼႆသေ ၶိုင်ယိုမ်ၸႂ်ႉတီႈလိၼ် တီႈၸဝ်ႈၼႃႈတီႈၼႂ်းပိုၼ်ႉတီႈ တၢင်းၵႂၢင်ႈဢေႊၶိူဝ်ႊမၼ်း 6 သႅၼ်။ လွင်ႈၼႆႉႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်းလႆႈလုသုမ်းတီႈသူၼ်တီႈၼႃး ဢၼ်ပူႇမွၼ်ႇၼၢႆးယႃႈ ႁဵတ်းမႃးပၢၼ်သိုပ်ႇပၢၼ် ၸိူဝ်းၼၼ်ႉ။

ၵွပ်ႈမီးလွင်ႈလုယႂ်ႇသုမ်းၼမ်လႄႈ လွင်ႈၼႆႉၵေႃႈ ႁဝ်းၶႃႈၸင်ႇလႆႈသၢၼ်ၶတ်း။

(9)ပိူဝ်ႈတႃႇႁူမ်ႈႁွမ်းပႃႊတီႊ ၻီႊမွၵ်းၶရႅတ်ႊတိၵ်ႊပႃႊတီႊၸၢဝ်းၶိူဝ်းတႆး (ပႃႊတီႊသိူဝ်ၽိူၵ်ႇ) SNDP ၼၼ်ႉၵေႃႈ ယူႇတီႈပႃႊတီႊႁူဝ်သိူဝ် (SNLD) တေႁႃလွၵ်းလၢႆး ၶတ်းသၢင်ႈႁၢင်ႈပွင်ၵႂႃႇ။