ၵူၼ်းဝၢၼ်ႈမွၵ်ႇငႃးၸၢင်ႉ ထုၵ်ႇသိုၵ်းမၢၼ်ႈတိၺွပ်းပေႃႉထုပ်ႉ
ၵူၼ်းဝၢၼ်ႈမွၵ်ႇငႃးၸၢင်ႉ ပွတ်းၵျွၵ်ႉမႄး၊ ထုၵ်ႇသိုၵ်းမၢၼ်ႈ ၸီႉၼႄးဝႃႈ
ၸွႆႈထႅမ်သိုၵ်းတႆး၊ ဢဝ်မၢၵ်ႇလူင်ၵႂႃႇ ယိုဝ်းသႂ်ႇ ၼႂ်းဝၢၼ်ႈ၊
တိၺွပ်းပေႃႉထုပ်ႉၵူၼ်းဝၢၼ်ႈ။ ၵူၼ်းလူင်ဝၢၼ်ႈၵေႃႈ ၺႃးပေႃႉထုပ်ႉ ၶင်ၶွၵ်ႈ။

ၵူၼ်းဝၢၼ်ႈမွၵ်ႇငႃးၸၢင်ႉ ၸိူဝ်းၺႃးပေႃႉထုပ်ႉ
ပူၼ်ႉမႃးမိူဝ်ႈဝၼ်းတီႈ 21/03/2014 သိုၵ်းမၢၼ်ႈတပ်ႉ ၶမယ 77 တင်း 503 ၊ ဢဵၼ်ႁႅင်း 200 ပၢႆ ဢၼ်ဢွၵ်ႇငႃးသိုၵ်း ၵႂႃႇတူင်ႉၼိုင်ပွတ်းဝၢၼ်ႈမွၵ်ႇငႃးၸၢင်ႉ ဢိူင်ႇလွႆၵူင် ၸေႈဝဵင်းၵျွၵ်းမႄး၊ ဢဝ်ၶိူင်ႈၵွင်ႈလူင် ယိုဝ်းသႂ်ႇဝၢၼ်ႈမွၵ်ႇငႃးၸၢင်ႉ 3 လုၵ်ႈ။ လုၵ်ႈၼိုင်ႈ တိူဝ်ႉၺႃးႁိူၼ်း ၸၢႆးမၢတ်ႈ+ၼၢင်းၼေႃႇ၊ ထႅင်ႈသွင်လုၵ်ႈ တူၵ်းတႅၵ်ႇတီႈႁူဝ်ဝၢၼ်ႈတင်းႁၢင်ဝၢၼ်ႈ။ ဝၢႆးယိုဝ်းမၢၵ်ႇ လူင်သႂ်ႇယဝ်ႉ သၢႆသိုၵ်းမၢၼ်ႈသွင်သၢႆၼၼ်ႉၵေႃႈ လေႃႈၶဝ်ႈၵႂႃႇၼႂ်းဝၢၼ်ႈသေ တိၺွပ်း ပေႃႉထုပ်ႉၵူၼ်းဝၢၼ်ႈ တင်းပူႇၵၢင်ႉ။
ၵူၼ်းဝၢၼ်ႈၸိူဝ်းထုၵ်ႇတိၺွပ်းပေႃႉထုပ်ႉၼၼ်ႉ 1.ၸၢႆးဢၢႆႈမၢၼ်ႈ (မေးၼၢင်းၸိုဝ်ႈၼၢင်းဢေးၵွႆႇ)၊ ထုၵ်ႇပေႃႉထုပ်ႉ တီႈၵၢင်း၊ ၵႅမ်ႈ၊ သူၼ်ႈၵွင်ႈသွင်ႉသႂ်ႇၵွင်ႇၵေႃႈ ပေႃးဢမ်ႇလုၵ်ႉလႆႈ။ 2.ပႃႈၼၢႆးထူၺ်း ထုၵ်ႇပေႃႉထုပ်ႉတီႈၶေႃး၊ ႁဵတ်းႁႂ်ႈၶေႃးၶတ်း ဢမ်ႇလုၵ်ႉလႆႈ။ 3.ၸၢႆးၵျေႃႇၸိင်ႇ (မေးၼၢင်းၸိုဝ်ႈၼၢင်းဢွၼ်ႇ၊ ထုၵ်ႇပေႃႉထုပ်ႉလိူဝ်ႁႅင်းႄလႈ ၶႅၼ် ဢမ်ႇပေႃးဢမ်ႇတူင်ႉၼိုင််လႆႈ။ 4.ၸၢႆးၶႅင်ႇ (လုၵ်ႈၸၢႆးလုင်းၸၢႆးၵွႆႇ)၊ ထုၵ်ႇပေႃႉထုပ်ႉတီႈႁူဝ်တႃ၊ ႁဵတ်းႁႂ်ႈတႃၵႂ်ႈတႃပူမ် ဝႆႉ။ 5.ၸၢႆးထေး (ပေႃႈၸိုဝ်ႈၸၢႆးဢူး၊ မႄႈၸိုဝ်ႈလႃႉဢူး)၊ ထုၵ်ႇပေႃႉထုပ်ႉ ၸွတ်ႇတင်းတူဝ် ဢမ်ႇလုၵ်ႉလႆႈ- ၼႆယဝ်ႉ။
တူဝ်ပူႇၵၢင်ႉဝၢၼ်ႈမွၵ်ႇငႃးၸၢင်ႉ ၸၢႆးသၢင်ႇၸၢမ်ႇ ၵေႃႈထုၵ်ႇတိၺွပ်း၊ ၵွပ်ႈဝႃႈ သိုၵ်းမၢၼ်ႈသွၵ်ႈတဝ် တိၺွပ်းလႆႈၸၢၵ်ႈလၢတ်ႈ တီႈႁိူၼ်းမၼ်း။ ဝၢႆးၼၼ်ႉၵေႃႈ တိၺွပ်းဢဝ်ၵႂႃႇထတ်းထၢမ်/ပေႃႉထုပ်ႉ တီႈႁိူၼ်းၸၢႆးဢွင်ႇမူဝ်း ႁူဝ်ၼႃႈပျီႇတုၸိတ်ႉမိူင်းတၢင်ႈ။ ထိုင်မႃးဝၼ်းတီႈ 23/03/2014 ဢဝ်တူဝ်ၶိုၼ်းသူင်ႇ ပၼ်တီႈလုမ်းပလိၵ်ႈ ဝဵင်းၵျွၵ်ႉမႄး။ ပီႈၼွင်ႉတၢင်းႁိူၼ်း ၵႂႃႇသူႇယဵမ်ႈၸႂ်း ၵေႃႈဢမ်ႇပၼ်ထူပ်း၊ ၸဝ်ႈၼႃႈတီႈၶဝ်ဝႃႈ ႁဝ်းတိုၵ်ႉထတ်းထၢမ်ယူႇ- ဝႃႈၼႆ။
ၵဵဝ်ႇၵပ်းလွင်ႈၼႆႉ ႁူဝ်ပဝ်ႈပႃႊတီႊသိူဝ်ၽိူၵ်ႇ ဝဵင်းၵျွၵ်ႉမႄး ၸၢႆးၶမ်းၵျေႃႇ လၢတ်ႈဝႃႈ- ၸၢၵ်ႈလၢတ်ႈ (Walky-talky) ၼၼ်ႉ ပဵၼ်ဢၼ်သိုၵ်းတႆးမႃးၾၢၵ်ႇဝႆႉ၊ သိုၵ်းမၢၼ်ႈတိလႆႈသေ ၸိၼႄးဝႃႈမၼ်းပဵၼ်သၢႆၵူၼ်းထိူၼ်ႇ ၼႆႄလႈ ပေႃႉႁႅမ်၊ လွင်ႈၼႆႉ တေၶတ်းၸႂ်ဢုပ်ႇပၼ်ယူႇ။ လႆႈငိၼ်းဝႃႈ ၸၢႆးသၢင်ႇၸၢမ်ႇ ႁွတ်ႈမႃးတီႈၼႂ်း ၶွၵ်ႈၵျွၵ်ႉမႄး ၼႆၵေႃႈလီယဝ်ႉ၊ ၵူဝ်ထုၵ်ႇပေႃႉတၢႆ ၸွမ်းတၢင်းၼၼ်ႉၵူၺ်း။ ပေႃးႁွတ်ႈမႃးတီႈၵျွၵ်ႉမႄး ယဝ်ႉႄတႉ တေၶတ်းၸႂ်ၸွႆႈထႅမ်ပၼ် ၼင်ႇႁိုဝ် တေပူၼ်ႉဢွၵ်ႇ- ဝႃႈၼႆ။
ဝၢၼ်ႈမွၵ်ႇငႃးၸၢင်ႉ ဢိူင်ႇလွႆၵူင်ၼႆႉ ယၢၼ်ၸဵင်ႇႁွင်ႇဝၼ်းတူၵ်းဝဵင်းၵျွၵ်ႉမႄး မွၵ်ႈ 20 လၵ်း။ သိုၵ်းမၢၼ်ႈ တပ်ႉၸုမ်းလူင် (တပ်ႉမ) 77 ၼႆႉ ထႅမ်ႁႅင်းသိုၵ်းၶဝ်ႈမႃး ပွတ်းတွၼ်ႈၼၼ်ႉထႅင်ႈ ဢဵၼ်ႁႅင်းသိုၵ်းမီးဢမ်ႇယွမ်းႁႃႈပၢၵ်ႇပၢႆ။
ၵပ်းၵၢႆႇလွင်ႈၼႆႉ ထိုင်မႃးဝၼ်းတီႈ 24/03/2014 ယၢမ်းၵၢင်ၼႂ်၊ သိုၵ်းမၢၼ်ႈၶဝ်ၵႂႃႇ သွၵ်ႈတဝ်တီႈႁၢၼ်ႉၶၢႆ ၶဝ်ႈၽၵ်း ၸၢႆးဢွင်ႇလႅင်း တီႈၼမ်ႉလိၼ်းပူင်း။ ႁၼ်ၺႃးဝႂ်ၶွၼ်ႇ ဢၼ်ၸုမ်းၵိုတ်းယိုဝ်းၸုမ်းၼိုင်ႈထုၵ်ႈ ပၼ်ဝႆႉ တီႈၵူၼ်းၵႃႉမႆႉၶဝ် ၼႂ်းပိုၼ်ႉတီႈၸေႈ ဝဵင်းၵျွၵ်ႉမႄး။ ၼႆႉၵေႃႈ ၸဝ်ႈႁၢၼ်ႉၶဝ်ႈၽၵ်း ၺႃးထတ်းထၢမ်ပေႃႉထုပ်ႉထႅင်ႈ။
ဝႂ်ၶွၼ်ႇမႆႉၼႆႉ ၵွပ်ႈဝႃႈၼႂ်းၶၢဝ်းတၢင်း 3-4 ဝၼ်းၼႆႉ ဢၼ်ပဵၼ်ၸွမ်ၽွင်းလူင်မိူင်းတႆး တေဢွၵ်ႇတၢင်းမႃး ပွတ်းတွၼ်ႈၼႆႉလႄႈ ၵၢၼ်မႆႉလႆႈၵိုတ်းဝႆႉၸူဝ်ႈၶၢဝ်း၊ ၵူၼ်းၵႃႉမႆႉၶဝ် ၸင်ႇဢဝ်ဝႂ်ၶွၼ်ႇမႆႉၵႂႃႇၾၢၵ်ႇဝႆႉတီႈ ႁၢၼ်ႉၶဝ်ႈၽၵ်း ၸၢႆးဢွင်ႇလႅင်း။
Tags: Human Right, News
