ပီႈၼွင်ႉတႆးဝၢၼ်ႈမႂ်ႇမွၵ်ႇၸၢမ် ဢိူင်ႇမေႈဢၢႆး ၸေႈဝဵင်းမႄႈဢၢႆး ၸေႈတွၼ်ႈၵဵင်းမႆႇ တေၸတ်းပွႆးဝၼ်း ၸဝ်ႈၶူးမေႃ ဢိၵ်ႇတင်းသမႃးၶူမ်းပၢႆးပၺ်ၺႃလႄႈ ၾိင်ႈငႄႈတႆး၊ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇႄလႈ ၸုမ်းတႆးသၢမ်ၸေႈဝဵင်း ၾၢင်၊ ၶျႆးပရႃၵၢၼ်း၊ မႄႈဢၢႆး ႁူမ်ႈၸတ်းပၢင်ဢုပ်ႇၵုမ်လွင်ႈ ၽႃသႃလိၵ်ႈလၢႆး ၵႂၢမ်းလၢတ်ႈတႆး။

ဝၼ်းတီႈ 14/02/2014 ၼႆႉ ၽရႃႉၸၼ်တႃ ၸၼ်ထသႃရူဝ်ႊ ၸဝ်ႈၽူႈၵွၼ်းဝတ်ႉဝၢၼ်ႈမႂ်ႇမွၵ်ႇၸၢမ် ပဵၼ်ၵဝ်ႉငဝ်ႈ တင်းတၵ်ႉၵႃႇသၸ်ႉထႃး ပီႈၼွင်ႉဝၢၼ်ႈမႂ်ႇမွၵ်ႇၸၢမ် ႁူမ်ႈပႃး ပီႈၼွင်ႉၵူၼ်းဝၢၼ်ႈႁိမ်းႁွမ်း တေဢွၼ်ၵၼ်ထွမ်ႇလိၵ်ႈ ၾင်းထမ်း၊ တၢင်ႇၸွင်ႈၶမ်းပၢႆယွတ်ႈၸိၵ်းထၢတ်ႈၸေးၻီး(ၵွင်းမူး)ႁူမ်ႈတင်းၵႃရဝ တူၼ်ၸဝ်ႈၶူးမေႃ လႄႈယၢတ်ႇၼမ်ႉ ႁဵတ်းၵုသူလ် ၼႃးမုၼ်သေ ၵၢင်ၶမ်ႈ မီးပွႆးဢုၼ်ႇငၢၼ်းလဝ်ႇမူၼ်ႈ တူၼ်ႈၸႂ် တၢင်းၵႃႈတၢင်းဝႅၼ်ႁွင်ႉၽဵင်းၵႂၢမ်း။

ဝၼ်းတီႈ 15/02/2014 ယၢမ်း 9.00 မူင်းၵၢင်ၼႂ် တႄႇပၢင်ဢုပ်ႇၵုမ်လွင်ႈ ၽႃသႃ လိၵ်ႈလၢႆး ၵႂၢမ်းလၢတ်ႈတႆး၊ ၽွင်းယၢမ်း ၵၢင်ၶမ်ႈၵေႃႈ သိုပ်ႇပၢင်လဝ်ႇမူၼ်ႈတူၼ်ႈၸႂ် တၢင်းၵႃႈဝႅၼ်၊ ႁွင်ႉၽဵင်းၵႂၢမ်းပၢၼ်ၵဝ်ႇပၢၼ်မႂ်ႇ။

ယွၼ်ႉၼၼ် ၽရႃႉၸၼ်တႃ ၸၼ်ထသႃရူဝ်ႊ ၸဝ်ႈၵွၼ်းဝတ်ႉဝၢၼ်ႈမႂ်ႇမွွၵ်ႇၸၢမ် ဢိၵ်ႇၵေႃၵမ်ၵၢၼ် ၸတ်းၶိုင်ပွႆးၵမ်းၼႆႉ ယင်းလႆႈဝွၵ်ႇၸိူၼ်းထိုင်ပီႈၼွင်ႉတီႈၵႆတီႈၸမ် ၸဵမ်ပီႈၼွင်ႉတႆး မိူင်းၵွၵ်ႇ၊ ၵဵင်းမႆႇ၊ မႄႈသွတ်ႇ၊ မႄႈသႆၢ၊ မႄႈၾႃႉလူင်၊ ထိူတ်ႉထႆး၊ မႄႈဢၢႆး၊ မိူင်းၾၢင်၊ ၶျႆးပရႃၵၢၼ်း ႁူမ်ႈတင်း လၢႆတီႈလၢႆတၢင်း ၶဝ်ႈႁူမ်ႈ။

ဝၢၼ်ႈမႂ်ႇမွၵ်ႇၸၢမ်ၼႆႉ ဢိင်လူၺ်ႈ ပီႈၼွင်ႉတႆး ၽူႈယႂ်ႇၵူၼ်းလူင်ၸိူဝ်းႁဵတ်းၵၢၼ်ၸိူဝ်ႉၸၢတ်ႈၶဝ်ၸဝ်ႈ လႆႈဢၼုၺၢတ်ႈ ပိုင်ႈသေႃႉတႂ်ႈမုၼ်ငမ်းဢွင်ႈဢူၵ်းၽူၺ်းႁူမ်ႈယဵၼ်ၵုၼ်းမုၼ် ၼႂ်းၽႅၼ်ႇလိၼ်ႁေႃၶမ်း ၸဝ်ႈၸိုင်ႈထႆး ႄလႈႁူမ်ႈၵၼ် ၵေႃႇတင်ႈဝၢၼ်ႈ ႁဵၵ်ႈၸိုဝ်ႈဝႃႈ ဝၢၼ်ႈမႂ်ႇမွၵ်ႇၸၢမ်သေ ယူႇထင်ပၵ်းသဝ်းၾင် ႁူၵ်ႈၾင်ႁေႇ ၸိူဝ်ႉငိူၼ်ႈသၢႆၶိူဝ်းမႃး တီႈႁိမ်းလႅၼ်ပွတ်းႁွင်ႇ ၸိုင်ႈထႆး - ပွတ်းၸၢၼ်းမိူင်းတႆး ပူၼ်ႉမႃး မွၵ်ႈႁႃႈသိပ်းပီၼၼ်ႉ ၼင်ႇႁိုဝ်ဢဵၼ်းဢၢၼ်း ငိူၼ်ႈပိုၼ်းၸိူဝ်ႉသၢႆလိူတ်ႈတႆး တေဢမ်ႇမူၺ်ႉမွတ်ႇႁၢႆၼႆလႄႈ မိူဝ်ႈထိုင်မႃးၼႂ်းလိူၼ် ၾႅပ်ႉပိဝ်ႊရီႊၵေႃႈ လုင်းၶုၼ်မႁႃႇ ၸင်ႇလႆႈဢွၼ်ႁူဝ်ဢၢၼ်းၸတ်းႁဵတ်းဝၼ်း ၸိူဝ်ႉၸၢတ်ႈၸိုင်ႈတႆး။

ၵူၺ်းၵႃႈ ၸိူင်ႉႁိုဝ်ၵေႃႈလီ သမ်ႉပဵၼ်ၼႂ်းလႅၼ်လိၼ်ထႆးလႄႈ ၸဝ်ႈၼႃႈတီႈၾၢႆႇၽွင်းငမ်းဝၢၼ်ႈမိူင်းၶဝ်ဝႃႈ ပေႃးပဵၼ် ဝၼ်းၸၢတ်ႈတႆးၼႆ မၼ်းတေဢမ်ႇသၢင်ႇထုၵ်ႇ၊ ၾၢႆႇၼိုင်ႈ တၢင်းထႆးၵေႃႈလႆႈတူၺ်းၼႃႈၵၼ်တင်း လူင်ပွင်ၸိုင်ႈသိုၵ်း မၢၼ်ႈ (ၽွင်းၼၼ်ႉ)၊ ၵွပ်ႈၼႆ ႁႂ်ႈမၼ်းသၢင်ႈထုၵ်ႇၼႆလႄႈ ႁူမ်ႈဝႃႈ ဢမ်ႇၸႂ်ႈၼႂ်းလုၵ်ႈ လိူၼ်သိပ်းသွင်ၵေႃႈ ၵူၼ်းလူင်တႆးၶဝ်ၸဝ်ႈ လႆႈဝၵ်ႉဢဝ်တိုဝ်ႉတၢင်း ဝၼ်းလိူၼ်သၢမ်မူၼ်း ဢၼ်ပဵၼ်ၼႂ်း လုၵ်ႈလိူၼ်ၾႅပ်ႉပိဝ်ႊရီႊၼၼ်ႉ  ႁဵၵ်ႈၸိုဝ်ႈဝႃႈ ဝၼ်းၶူးမေႃတႆး ၼႆသေ ၵေႃႇတင်ႈ ႁဵတ်းပွႆးဝၼ်းၶူးမေႃတႆး မႃးၵူႈပီ တေႃႇႁၢၼ်ႉၼႆႉ။

ဝၢႆးသေပီႈၼွင်ႉတႆး လႆႈၶဝ်ႈမႃးပၵ်းၾင်ႁူၵ်ႈၾင်ႁေႇယူႇသဝ်းၵိၼ်သၢင်ႈတီႈဝၢၼ်ႈမႂ်ႇမွၵ်ႇၸၢမ် တႂ်ႈႁူမ်ႈငဝ်းပႃရမီ ၸဝ်ႈမုၼ်ယႂ်ႇၶုၼ်ႁေႃၶမ်းၸိုင်ႈထႆးၼႆႉ ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၽူမိၽူလ်းဢၻုလ်ယၻဵတ်ႇလႄႈ ၾႃႉၼၢင်း ၸဝ်ႈႁေႃၶမ်း ဢိၵ်ႇတင်းၶိူဝ်းၸဝ်ႈႁေႃၶမ်းထႆးလၢႆၸဝ်ႈ လႆႈမႃးဢႅဝ်ႇယဵမ်ႈၸႂ်းတူၺ်းလွမ် လွင်ႈ သုၶ် လီ ၸႃႉ ၵၢၼ်ယူႇၵိၼ်သဝ်း တင်းတႄႇပီ သႃသၼႃ 2522 - 2527 (ၶရိသ်ႉတ် 1969 – 1973) ထတ်းၵၼ် 5 ပီလုမ်းလုမ်း။

လိူဝ်ၼၼ်ႉ ယင်းမီးမဵတ်ႉတႃ ၵရုၼႃး သင်ႇၸဝ်ႈၼႃႈတီႈၾၢႆႇၽွင်းငမ်းၼႂ်းပိုၼ်ႇတီႈ လူလွမ်တူၺ်းထိုင် လွင်ႈတုၵ်ႇသုၶ် လီၸႃႉလႄႈႁႂ်ႈမီးၼမ်ႉမီၾႆးၾႃႉၸႂ်ႉၼႂ်းဝၢၼ်ႈမႂ်ႇမွၵ်ႇၸၢမ်။