ၵၢၼ်ၵဵပ်းသဵၼ်ႈမၢႆႁူဝ်ၵူၼ်း တီႈဝဵင်းပၢင်လူင်ၼၼ်ႉ ၶွမ်ႊမတီႊၵဵပ်းသဵၼ်ႈမၢႆႁူဝ်ၵူၼ်းမိူင်းတႆး ႁွင်ႉဝွၵ်ႇဢဝ်ပီႈၼွင်ႉ ဝၢၼ်ႈၼွၵ်ႈၼႃးပၢင်ႇ/ သၢပ်ႇဝဵင်း မႃးမွၵ်ႇလၢတ်ႈသပ်းလႅင်း။

လွင်ႈၵဵပ်းသဵၼ်ႈမၢႆႁူဝ်ၵူၼ်းၼႆႉ ၽူႈၵွၼ်းလုမ်းၾၢႆႇႁဵတ်းဝႂ်ၵပ်းတူဝ် (လဝၵ) ဢူးတိၼ်ႇထုၼ်း လၢတ်ႈဝႃႈ- တီႈၼႂ်းဝဵင်း ပၢင်လူင် မိူၼ်ၼင်ႇပွၵ်ႉ 2 ၊ ပွၵ်ႉ 3 ၊ ပွၵ်ႉ 4 ၸိူဝ်းၼႆႉ ႁဵတ်းမႃးလၢႆၵမ်းယဝ်ႉ။ ၵမ်းၼႆႉသမ်ႉ ႁွင်ႉဝွၵ်ႇဢဝ် ပီႈၼွင်ႉဝၢၼ်ႈၼွၵ်ႈ တၢင်းပၢင်မူင်ႈၶဝ်၊ ႁၢႆးၼၢင်းၶဝ်ၸိူဝ်းၼႆႉ မႃးဝွၵ်ႇလၢတ်ႈသပ်းလႅင်းၼႄ။ ဢၼ်ၵိုတ်းတၢင်ႇဝၢၼ်ႈၸိူဝ်းၼၼ်ႉၵေႃႈ တေသိုပ်ႇသပ်းလႅင်းၼႄၵႂႃႇထႅင်ႈ- ဝႃႈၼႆ။

ပိူဝ်ႈတႃႇၵဵပ်းသဵၼ်ႈမၢႆႁူဝ်ၵူၼ်း ၼႂ်းၸႄႈဝဵင်းပၢင်လူင်ၼႆႉ မီးၵၢၼ်ၸႅၵ်ႇဝႆႉပိုၼ်ႉတီႈၼႃႈလိၼ်ပဵၼ်လွၵ်း ပဵၼ်လွၵ်း တင်းမူတ်းမီး 99 လွၵ်း။ ဢၼ်တေၵဵပ်းသဵၼ်ႈမၢႆႁူဝ်ၵူၼ်းၼႆႉ ႁၢင်ႈႁႅၼ်းဝႆႉၶူးသွၼ် 99 ၵေႃႉ၊ ၼိုင်ႈၵေႃႉ ၵဵပ်းၼိုင်ႈလွၵ်း။ သမ်ႉႁၢင်ႈႁႅၼ်းဝႆႉထႅင်ႈၶူးသွၼ်တႃႇ 23 ၵေႃႉ တႃႇတေၵူတ်ႇထတ်းတူၺ်း သဵၼ်ႈမၢႆႁူဝ်ၵူၼ်းထႅင်ႈ။ ၶူးသွၼ်တင်း မူတ်းၸိူဝ်းၼႆႉ တေမီးပၢင်သွၼ် တင်ႈတႄႇဝၼ်းတီႈ 17/03/14 တေႃႇထိုင်ဝၼ်းတီႈ 21/03/14 (ၶၢဝ်းတၢင်း 5 ဝၼ်း)- ၼႆယဝ်ႉ။

ပိူဝ်ႈတႃႇၵဵပ်းသဵၼ်ႈမၢႆႁူဝ်ၵူၼ်းၼႆႉ ဢူးတိၼ်ႇထုၼ်း တုၵ်းယွၼ်းပႃးဝႃႈ- ႁႂ်ႈၵူၼ်းဝၢၼ်ႈၵူၼ်းမိူင်းၶဝ် မႃးလၢတ်ႈထုၵ်ႇ ထုၵ်ႇမႅၼ်ႈမႅၼ်ႈ၊ ယႃႇပေၵူဝ်- ၼႆယူႇ။

ၵဵဝ်ႇၵပ်းလွင်ႈၵဵပ်းသဵၼ်ႈမၢႆႁူဝ်ၵူၼ်းၼႆႉ မီးၵၢၼ်ဢွၵ်ႇပၵ်းပိူင်ဝႆႉ။ ၵၢၼ်ၵဵပ်းသဵၼ်ႈမၢႆႁူဝ်ၵူၼ်းမိူင်းတႆးၼႆႉ ပွၵ်းၵမ်း လိုၼ်းသုတ်း ၵဵပ်းပူၼ်ႉမႃးမိူဝ်ႈပီ 1983 ၊ မိူဝ်ႈလဵဝ် လႆႈမႃးၶၢဝ်းတၢင်း 30 ပီပၢႆယဝ်ႉ။