ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈဝဵင်းၼမ်ႉၶမ်း၊ ဢၼ်ႁူဝ်သိူဝ် တင်းသိူဝ်ၽိူၵ်ႇ ဢွၼ်ႁူဝ်ၵူၼ်းဝၢၼ်ႈ ၵူၼ်းမိူင်း ၸတ်း ဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်း 7 ၶေႃႈ၊ ပႃးႁႂ်ႈတင်ႈၸိုဝ်ႈ ဝၢၼ်ႈ/ ဢိူင်ႇ/ ဝဵင်း ပဵၼ်ၸိုဝ်ႈတႆး။

ဝၼ်းတီႈ 07/02/14 ဢၼ်ပဵၼ် ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 67 ပီၼႆႉ တီႈဝဵင်းၼမ်ႉၶမ်း၊ ပႃႊတီႊႁူဝ်သိူဝ် (SNLD) တင်း ပႃႊတီႊသိူဝ်ၽိူၵ်ႇ ႁူမ်ႈၵၼ်ဢွၼ်ႁူဝ်ၼမ်းၼႃႈ ၵူၼ်းဝၢၼ်ႈၵူၼ်းမိူင်း ၸတ်းႁဵတ်းတီႈဝတ်ႉ/ၵျွင်းလူင် ၵၢင်ဝဵင်းၼမ်ႉၶမ်း။ ၸတ်းတင်ႈတႄႇဝၼ်းတီႈ 6-7/02/14 ၶၢဝ်းတၢင်းသွင်ဝၼ်း။ တီႈပၢင်ၵႅဝ်ႈဝၼ်းတီႈ 7 ၼၼ်ႉ ၶွမ်ႊမတီႊပွင်ပဵၼ်ပၢင်ပွႆး ဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်း 7 ၶေႃႈ။

ၽူႈၵွၼ်းၸႄႈဝဵင်းၼမ်ႉၶမ်း ဢူးၸေႃႇမိၼ်း ဢၢၼ်ႇလူၼႄလိၵ်ႈ ဢၼ်ၸွမ်ၸိုင်ႈ သူင်ႇမႃးတႃႇ ဝၼ်းၸိူဝ်ႉၸၢတ်ႈၸိုင်ႈတႆး။ ၽူႈၵွၼ်းၸႄႈဝဵင်းၵေႃႉၼိုင်ႈ လူဢၢၼ်ႇၼႄလိၵ်ႈဢၼ်ၸွမ်ၽွင်းလူင်မိူင်းတႆး သူင်ႇမႃးတႃႇဝၼ်းၸိူဝ်ႉၸၢတ်ႈၸိုင်ႈတႆး။ ၼွၵ်ႈသေၼၼ်ႉ ၽွင်းတႅၼ်းပႃႊတီႊသိူဝ်ၽိူၵ်ႇ ၸၢႆးတိၼ်ႇဢူး ၵေႃႈမႃးပိုတ်ႇလၢတ်ႈၶေႃႈၵႂၢမ်း။ ၽူႈမီးပုၼ်ႈၽွၼ်းၶဝ်ၵေႃႈ လူဢၢၼ်ႇၼႄလိၵ်ႈၶေႃႈပိုၼ်ၽၢဝ်ႇ 7 ၶေႃႈၵႂႃႇ။

ၶေႃႈတုၵ်းယွၼ်း 7 ၶေႃႈၼၼ်ႉ- 1.လိူၼ်ၾႅပ်ႊၿိဝ်ႊရီႊ ဝၼ်းတီႈ 7 ၼႆႉ ပဵၼ်ဝၼ်းၸိူဝ်ႉၸၢတ်ႈၸိုင်ႈတႆးလႄႈ ႁႂ်ႈပဵၼ် ဝၼ်းၵိုတ်းလိုဝ်ႈၵၢၼ်လုမ်း။ 2.မူႇၸုမ်းၵူႈၸုမ်း ႁႂ်ႈႁူမ်ႈၵၼ်ၶဝ်ႈပႃးၼႂ်းၶၵ်ႉၵၢၼ်ငမ်းယဵၼ်သေ တိုၵ်းသူၼ်း ႁႂ်ႈလႆႈလွင်ႈ ငမ်းယဵၼ်ထႃဝရ/မၼ်ႈၵိုမ်း။ 3.ၸိုဝ်ႈသဵင်ပွၵ်ႉယွမ်ႇ/ ဝၢၼ်ႈ/ ဢိူင်ႇ/ ဝဵင်း/ ၸႄႈတွၼ်ႈ ၸိူဝ်းၼႆႉ ႁႂ်ႈပဵၼ်ၸိုဝ်ႈသဵင်တႆး ပဵၼ်ၾၢင်ႁၢင်ႈမိူင်းတႆး။ ဝၢၼ်ႈ ဢိူင်ႇ ဝဵင်း ဢၼ်တေတင်ႈမႂ်ႇ ထႅင်ႈ ႁႂ်ႈပဵၼ်ၸိုဝ်ႈတႆး။ ဝၢၼ်ႈ ဢိူင်ႇ ဝဵင်း ဢၼ်တင်ႈၸိုဝ်ႈဝႆႉ ၵဝ်ႇၵဝ်ႇၸိူဝ်းၼၼ်ႉၵေႃႈ ႁႂ်ႈမႄးၵႄႈပဵၼ် ၸိုဝ်ႈသဵင် မိူင်းတႆး။ 4.လိၵ်ႈလၢႆးပၢႆၵမ်ၸၢဝ်းၶိူဝ်းၼႆႉ ႁႂ်ႈလႆႈပူင်သွၼ် ၼႂ်းၶၢဝ်းသွၼ် လိၵ်ႈလၢႆးၼႂ်းႁူင်းႁဵၼ်း။ 5.ဢၼ်ၸႅၵ်ႇၸိူဝ်ႉၶိူဝ်းၵူၼ်းၼႂ်းမိူင်းတႆးပဵၼ်လၢႆမူႇလၢႆၸုမ်း သေ ၵဵပ်းသဵၼ်ႈမၢႆႁူဝ်ၵူၼ်းၸိူဝ်းၼႆႉ ဢမ်ႇႁပ်ႉ လႆႈ။ 6.သၢၼ်ၶတ်းၶူင်းၵၢၼ် ဢၼ်မႃးယႃႉလူႉလႅဝ်သၽႃဝႁိမ်းႁွမ်း ၼႂ်းပိုၼ်ႉတီႈမိူင်းတႆး။ 7.ယႃႈမဝ်းၵမ်ၼႆႉ ပဵၼ်ၽေးၶဵၼ်တေႃႇတူင်ႇဝူင်းၵူၼ်း၊ တေႃႇၵူၼ်းဝၢၼ်ႈၵူၼ်းမိူင်းလႄႈ လွင်ႈၽုၵ်ႇသွမ်ႈၵေႃႈလီ၊ လွင်ႈႁဵတ်း ဢွၵ်ႇၸိူဝ်းၼႆႉ ၵေႃႈလီ ႁဝ်းၶႃႈသၢၼ်ၶတ်း- ၼႆယဝ်ႉ။

ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈဝဵင်းၼမ်ႉၶမ်းၼႆႉ မေႃၵႂၢမ်းၸိုဝ်ႈယႂ်ႇ ၸၢႆးသႅင်ၸွမ်ၾႃႉ၊ ၸၢႆးသႅင်ၸွမ်မၢဝ်းၵေႃႈ မႃးႁွင်ႉ ၵႂၢမ်းမူၼ်ႈၸႂ်ပၼ်။ မီးၵူၼ်းၶဝ်ႈႁူမ်ႈၼိုင်ႈၶမ်ႈလႂ် ဢမ်ႇယွမ်းမွၵ်ႈ 5,000 ၵေႃႉ။