ၸၢဝ်းတႆး ၸဝ်ႈၶွင်တီႈလိၼ်ၵေႃႉၼိုင်ႈ တင်းသိုၵ်းမၢၼ်ႈ 2 ၵေႃႉ ထုၵ်ႇၵူၼ်းဢမ်ႇႁူႉၸၵ်းၸုမ်း ယိုဝ်းတၢႆတီႈ တႃႈၶီႈလဵၵ်း။ တင်းၼမ်ထၢင်ႇထိူမ်ဝႃႈပဵၼ်ၼမ်ႉမိုဝ်း ၸဝ်ႈၶွင်ၶွမ်ႊပၼီႊႁူင်ပင်း ၵေႃႉပၢႆႈမူၵ်းဝႆႉ ။

ဢွၼ်ၼႃႈၼႆႉ ၸဝ်ႈၶွင်ၶွမ်ႊပၼီႊႁူင်ပင်းတီႈတႃႈၶီႈလဵၵ်း၊ ၸိုဝ်ႈဝႃႈၶျီႇၵူဝ်ႇၼိုင်ႇ ၵႂႃႇတုၵ်းသိုဝ်ႉတီႈ လိၼ်ၸၢႆးၵႅဝ်ႈ တီႈဝဵင်းတႃႈၶီႈလဵၵ်း။ ဢိင်ၼိူဝ်ၸၢႆးၵႅဝ်ႈဝႃႈဢမ်ႇၶၢႆၼႆသေ ဝၢႆးမႃးမီးၵၢၼ်ဢဝ်ႁႅင်း သိုၵ်းၵႂႃႇလွၵ်ႇငိုတ်ႈ။ ၸၢႆးၵႅဝ်ႈ ဢမ်ႇႁၢၼ်ႉၸႂ်သေ ၵႂႃႇတၢင်ႇလၢတ်ႈၸဝ်ႈၼႃႈတီႈၾၢႆႇၽွင်းငမ်းမၢၼ်ႈ။ ၽွင်းသိုၵ်းမၢၼ်ႈ 2 ၵေႃႉ မႃးဢႅဝ်ႇတီႈႁိူၼ်း ၸၢႆးၵႅဝ်ႈၼၼ်ႉ မီးၸုမ်းၵူၼ်းႁၢႆႉ (တင်းၼမ်ယုမ်ႇယမ်ဝႃႈ ပဵၼ်သိုၵ်းဝႃႉ) ၵႂႃႇယိုဝ်းတၢႆပႅတ်ႈ ၸၢႆးၵႅဝ်ႈ တင်းသိုၵ်းမၢၼ်ႈ 2 ၵေႃႉ တီႈႁိူၼ်း တၢႆထင်တီႈ၊ တင်းမူတ်းတၢႆ 3 ၵေႃႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈဝႃႈ- တႃႈၶီႈလဵၵ်းၼႆႉ ပဵၼ်ၼႃႈလိၼ်ၵႃႉၶၢႆ၊ ပေႃးမေႃယူႇမေႃၵိၼ် မေႃၵႃႉမေႃၶၢႆ ၵူၼ်းႁၵ်ႉၵူၼ်းပႅင်းၼမ်ၵေႃႈၸဵဝ်းမၢၵ်ႈမီးလီပဵၼ်ဝႆး။ ပေႃးဝႃႈမီး လွင်ႈၶတ်းၵၼ်ဢိတ်းၼိုင်ႈၵေႃႈ ပိူၼ်ႈမႃး ႁႅမ်ႁဝ်းတၢႆလႆႈငၢႆႈၵူႈၶၢဝ်းယၢမ်း။ ၸၢႆးၵႅဝ်ႈၼႆႉ ပိူၼ်ႈမႃး တုၵ်းသိုဝ်ႉတီႈလိၼ်သေ ပေႃးဝႃႈဢမ်ႇၶၢႆၵေႃႈ ဢဝ်ႁႅင်းသိုၵ်းမႃး လွၵ်ႇငိုတ်ႈ။ ယွၼ်ႉမၼ်းဢမ်ႇၶႂ်ႈၶၢႆ လႄႈၵႂႃႇတၢင်ႇလၢတ်ႈမၢၼ်ႈၵေႃႈ ထုၵ်ႇၵူၼ်းႁၢႆႉမႃးယိုဝ်းတၢႆ။ ၵွပ်ႈသိုၵ်းမၢၼ်ႈတၢႆ ၸွမ်းလႄႈ ၾၢႆႇသိုၵ်းမၢၼ်ႈၵေႃႈ သူင်ႇႁႅင်းသိုၵ်းၵႂႃႇဝႅတ်ႉလွမ်ႉဝႆႉႁိူၼ်း ၸဝ်ႈၶွင်ၶွမ်ႊပၼီႊႁူင်ပင်း ၸိုဝ်ႈဝႃႈ ၶျီႊၵူဝ်ႊၼိုင်ႊ၊ တူဝ်မၼ်းတႄႉမိူဝ်ႈလဵဝ် ပၢႆႈပႅတ်ႈယဝ်ႉ- ဝႃႈၼႆ။

ၶျီႇၵူဝ်ႇၼိုင်ႇၼႆႉ ၵမ်ႈၽွင်ႈဝႃႈပၢႆႈၵႂႃႇယူႇတၢင်းၼႃႈလိၼ်ဝႃႉၵုမ်းၵမ်ပွတ်းၸၢၼ်း ၼႂ်းၼႃႈလိၼ်သိုၵ်း 171 ။ ၵမ်ႈၽွင်ႈ သမ်ႉဝႃႈ ပၢႆႈပွၵ်ႈမိူဝ်းၵႂႃႇတၢင်းပၢင်သၢင်း။ လွင်ႈတၢင်း ဢမ်ႇပၢႆႈၵႂႃႇပွတ်းလႅၼ်လိၼ် မိူင်းထႆး ၼႂ်းၼႃႈလိၼ် 171 ၼၼ်ႉ ၵွပ်ႈဝႃႈ ၶျီႇၵူဝ်ႇၼိုင်ႇ မီးၼႂ်းၸုမ်းဝႃႉဢၼ်ၸိုဝ်ႈလုၼဝ်ႈယွၼ်ႉ ယႃႈမဝ်းၵမ်သေ ပႃးသၢႆမၢႆလမ်ဢၼ်ထႆး တင်းဢမႄႊရိ ၵႃႊၶႂ်ႈလႆႈတူဝ်- ဝႃႈၼႆ။