ၵူၼ်းမိူင်းမၢၼ်ႈ ဢၼ်ပဵၼ်ၸၢဝ်းပုတ်ႉထၵမ်ႈၼမ် သၢၼ်ၶတ်းလွင်ႈပပ်ႉၽိုၼ်ၶၢဝ်ႇ ထၢႆႊမ် (Time) ဢဝ်ႁၢင်ႈမုၼ် ၸဝ်ႈဢွၵ်ႇၼႃႈသိူဝ်ႈပပ်ႉ၊ သႄႉသွမ်းဝႃႈ ပဵၼ်ၽူႈၵေႃႇၵၢၼ်ႁၢႆႉ။

ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ပိုၼ်ၽၢဝ်ႇဝႃႈ လွင်ႈၼႆႉ ဢမ်ႇသၢင်ႇထုၵ်ႇ၊ မၼ်းၸၢင်ႈႁဵတ်းႁႂ်ႈၵူၼ်းလုမ်ႈၾႃႉႁၼ်ၽိတ်းၼိူဝ်မိူင်းမၢၼ်ႈ ဢၼ်မီးၸၢဝ်းပုတ်ႉထယူႇတင်းၼမ်။ ပႃႊတီႊႁူဝ်သိူဝ် ၸုၵ်းမၼ်ႈၼိူဝ်လွၵ်းၸုၵ်း ဢၼ်ဝႃႈၵူႈၸၢဝ်းၶိူဝ်းႁႂ်ႈလႆႈယူႇသဝ်း ၸွမ်းၵၼ်ၵတ်းၵတ်းယဵၼ်ယဵၼ်၊ သႃသၼႃ တင်း သဵင်ႈ ႁႂ်ႈမီးလွင်ႈႁၵ်ႉပႅင်းၵၼ်ၼၼ်ႉသေ သၢၼ်ၶတ်း သႄႉသွမ်းလွင်ႈၼႆႉတႄႉတႄႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 01/06/13 ပပ်ႉၽိုၼ်ၶၢဝ်ႇထၢႆႊမ် (Time) ၼွၵ်ႈမိူင်း၊ ၼမ်းဢဝ်ႁၢင်ႈသင်ၶ ၸဝ်ႈဝိရတူႇ (မၼ်းတလေး) သႂ်ႇဝႆႉၼႃႈသိူဝ်ႈပပ်ႉၽိုၼ်ၶၢဝ်ႇ၊ လၢတ်ႈဝႃႈ ၾၢင်ႁၢင်ႈၼႃႈတႃၶွင် ၽူႈၵေႃႇၵၢၼ်ႁၢႆႉပုတ်ႉထ (The Face of Buddhist Terror) ။ လွင်ႈၼႆႉ ၵွပ်ႈၸဝ်ႈဝိရတူႇ ပဵၼ်ၽူႈ တိုၵ်းသူၼ်းႁႂ်ႈၸၢဝ်းပုတ်ႉထတင်းလၢႆ ငိူင်ႉဝႄႈ ၵၢၼ်ၶဝ်ႈႁၢၼ်ႉသိုဝ်ႉၶူဝ်းၶွင်မူႇသလိမ်ႇ၊ ႁႂ်ႈၶဵၼ်ႇတႅမ်ႈဢွၵ်ႇမၢႆမီႈ ႁၢမ်ႈၼၢင်းယိင်းၸၢဝ်းပုတ်ႉထ တႄႇၼႃႈႁိူၼ်းၵိုၵ်း ၵူၼ်းၼပ်ႉထိုဝ်တၢင်ႇသႃသၼႃ- ၸိူဝ်းၼႆႉ။

လွင်ႈၼႆႉ ႁဵတ်းႁႂ်ႈၵူၼ်းမိူင်းမၢၼ်ႈတင်းၼမ် ဢမ်ႇႁၢၼ်ႉၸႂ်တႄႉတႄႉ။ ၼႂ်းဝူင်းသင်ၶၵေႃႈ သႄႉသွမ်းဝႃႈ ပပ်ႉၽိုၼ် ၶၢဝ်ႇထၢႆႊမ်ၼႆႉ ႁဵတ်းႁႂ်ႈသႃသၼႃပုတ်ႉထၸိုဝ်ႈလုၼဝ်ႈ၊ လွင်ႈထၢင်ႇလဵၵ်ႉသႂၢင်းၽႅပ်ႉၼိူဝ် ၸဝ်ႈဝိရတူႇၼႆႉ မိူၼ်ၵၼ်တင်း ထၢင်ႇလဵၵ်ႉၼိူဝ်သႃသၼႃပုတ်ႉထ ဝႃႈ - ဢၼ်ၸဝ်ႈဝိရတူႇႁဵတ်းၵႂႃႇၼႆႉ ပဵၼ်ၵၢၼ်ၵႅတ်ႇၶႄႁႄႉၵင်ႈပုတ်ႉထသႃသၼႃ လႄႈၸိူဝ်ႉၸၢတ်ႈဝၢၼ်ႈမိူင်း၊ လွင်ႈၼႆႉ တုၵ်းယွၼ်းႁႂ်ႈပပ်ႉၽိုၼ်ၶၢဝ်ႇထၢႆႊမ်ယွမ်းႁပ်ႉၽိတ်း- ၼႆယဝ်ႉ။