သိုၵ်းမၢၼ်ႈယိုဝ်းၽိတ်းၵၼ်တီႈဝၢၼ်ႈဝၢပ်ႈ ၸႄႈဝဵင်းၵေးသီးၼၼ်ႉ မၢၵ်ႇၵွင်ႈလူင်တူၵ်းသႂ်ႇ ႁိူၼ်းၵူၼ်းဝၢၼ်ႈတင်း ဝတ်ႉမုၼ်ၸဝ်ႈ၊ သိုၵ်းတႆး ထွၼ်ဢွၵ်ႇယဝ်ႉၵေႃႈ တေႃႇထိုင်မိူဝ်ႈလဵဝ် သိုၵ်းမၢၼ်ႈ ဢဝ်ဝတ်ႉမုၼ်ၸဝ်ႈ ႁဵတ်းတပ်ႉဝႆႉ။

ၽူႈၶၢၼ်ပၢၵ်ႇ တပ်ႉသိုၵ်းၸိုင်ႈတႆး (SSPP/SSA) ၸဝ်ႈႁၢၼ်ၸၢႆးလႃႉ လၢတ်ႈဝႃႈ- သိုၵ်းမၢၼ်ႈယိုဝ်း ၽိတ်းၵၼ် ပွၵ်ႈၼႆႉ လႆႈငိၼ်းဝႃႈတၢႆၼမ်ဝႆႉ၊ ၵူၼ်းဝၢတ်ႇၸဵပ်းသိုၵ်းမၢၼ်ႈ ဢဝ်ၵႂႃႇယူတ်းယႃထိုင် ႁူင်းယႃဝဵင်းလႃႈသဵဝ်ႈ။ ၾၢႆႇၵူၼ်းဝၢၼ်ႈ ၵေႃႈ ၺႃးမၢၵ်ႇလူင်တူၵ်းသႂ်ႇႁိူၼ်းလုၵွႆၵမ်ႈၽွင်ႈ၊ ဝတ်ႉမုၼ် ၸဝ်ႈၵေႃႈလုၵွႆ၊ မုၼ်ၸဝ်ႈ-ၸဝ်ႈသၢင်ႇၶဝ်ပၢႆႈမူတ်း။ တီႈတႄႉမၼ်း ဢွၼ်ၼႃႈၼႆႉ ႁဝ်းတူၵ်းလူင်း ၵၼ်ဝႆႉဝႃႈ သိုၵ်းတႆးၵေႃႈတေဢမ်ႇယူႇၼႂ်းဝၢၼ်ႈ၊ သိုၵ်းမၢၼ်ႈၵေႃႈ တေဢမ်ႇလႆႈယူႇၼႂ်းဝၢၼ်ႈၼႆ လႄႈ သိုၵ်းတႆးၸင်ႇထွၼ်ပၼ်။ ၽိူဝ်ႇသိုၵ်းတႆး ထွၼ်ပၼ်ယဝ်ႉ သိုၵ်းမၢၼ်ႈသမ်ႉ ၶဝ်ႈပုတ်ႈယူႇ ၼႂ်းဝၢၼ်ႈ၊ လိူဝ်သေဢမ်ႇထွၼ်ယဝ်ႉယင်းယွၼ်းႁႅင်းသိုၵ်းမႃးထႅမ်ထႅင်ႈသေ ထိုင်ပေႃးယိုဝ်းၽိတ်း ၵၼ်။ မိူဝ်ႈလဵဝ်ၼႆႉ သိုၵ်းမၢၼ်ႈတိုၵ်ႉ ပုတ်ႈယူႇၼႂ်းဝၢၼ်ႈသေ ဢဝ်ဝတ်ႉမုၼ်ၸဝ်ႈ ႁဵတ်းတပ်ႉၶဝ်ဝႆႉ ယူႇ- ဝႃႈၼႆ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 25/06/13 သိုၵ်းမၢၼ်ႈတပ်ႉၶမယ 525 ပႃႈတႂ်ႈတိူင်းသိုၵ်း ဝၼ်းဢွၵ်ႇၵၢင် (ၶူဝ်လမ်) တင်းသိုၵ်းမၢၼ်ႈပႃႈတႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) ယိုဝ်းၽိတ်းၵၼ်/ ပဵၼ်ပၢင်တိုၵ်းၵၼ် တီႈဝၢၼ်ႈဝၢပ်ႈ ဢိူင်ႇဝၢၼ်ႈဝၢပ်ႈ ၸႄႈဝဵင်းၵေးသီး၊ တင်ႈတႄႇၵၢင်ၼႂ်ၸဝ်ႉထိုင်ပွတ်းၼႂ်မွၵ်ႈ 9 မူင်း။

ၵဵဝ်ႇၵပ်းလွင်ႈသွင်ၾၢႆႇယိုဝ်းၽိတ်းၵၼ်ၼႆႉ ဝၼ်းတီႈ 24/06/13  ပွတ်းၼႂ် 10 မူင်း၊ သိုၵ်းမၢၼ်ႈတပ်ႉ ၶမယ 525 ဢၼ်ငဝ်ႈတပ်ႉပၵ်းတီႈလၢင်းၶိူဝ်း ယိုဝ်းၵွင်ႈလူင်သႂ်ႇၼႂ်းဝၢၼ်ႈဝၢပ်ႈ ဢၼ်သိုၵ်းတႆး (SSPP/SSA) ယူႇသဝ်းဝႆႉသေ ဝႅတ်ႉလွမ်ႉဝၢၼ်ႈဝၢပ်ႈဝႆႉ။ ထိုင်မႃးဝၢႆးဝၼ်း ယၢမ်း 1 မူင်း သိုၵ်းမၢၼ်ႈ ၽိုတ်ႉၶဝ်ႈယူႇၼႂ်းဝၢၼ်ႈဝၢပ်ႈ။ သိုၵ်းတႆးၵေႃႈ သူင်ႇႁႅင်းသိုၵ်းမႃးဝႅတ်ႉဝႆႉသိုၵ်းမၢၼ်ႈ တီႈဝၢၼ်ႈဝၢပ်ႈ၊ သိုၵ်းမၢၼ်ႈထႅင်ႈတပ်ႉၼိုင်ႈ (တပ်ႉၵွင် 569) ၵေႃႈမႃးဝႅတ်ႉသိုၵ်းတႆး ထႅင်ႈၸၼ်ႉၼိုင်ႈ၊ ဝႅတ်ႉလွမ်ႉ ၵၼ်ပဵၼ်လၢႆၸၼ်ႉသေ ပဵၼ်ပၢင်တိုၵ်းၵၼ်။

ၽွင်းပဵၼ်ပၢင်တိုၵ်းၵၼ်ၼၼ်ႉ  ယွၼ်ႉသိုၵ်းမၢၼ်ႈတပ်ႉၵွင် 525 ယွၼ်းႁႅင်းသိုၵ်းထႅမ်ဝႆႉလႄႈ သိုၵ်းမၢၼ်ႈလႃႈသဵဝ်ႈ-တၢင်ႉယၢၼ်း-မိူင်းယႆ ပႃႈတႂ်ႈတိူင်းသိုၵ်းယမၶ ၶွၼ်ႈႁႅင်းၵၼ်တႃႇလူတ်ႉၵႃးမွၵ်ႈ 10 လမ်း မႃးထႅမ်ႁႅင်းသိုၵ်း။ ဝၢႆးသိုၵ်း တႆးထွၼ်ဢွၵ်ႇဝၢၼ်ႈ သိုၵ်းမၢၼ်ႈၵေႃႈပုတ်ႈယူႇၼႂ်းဝၢၼ်ႈ။ သိုၵ်းတႆးတင်း သိုၵ်းမၢၼ်ႈယၢမ်ႈတူၵ်းလူင်းၵၼ်ဝႃႈ ၽႂ်တေဢမ်ႇလႆႈယူႇၼႂ်းဝၢၼ်ႈၼႆသေ သိုၵ်းတႆးထွၼ်ပၼ်။ ၾၢႆႇသိုၵ်းမၢၼ်ႈမႃးထႅမ်ႁႅင်းသိုၵ်း ဝႅတ်ႉလွမ်ႉတင်ႈတႄႇ ၵၢင်ၼႂ်ယၢမ်း 4 မူင်းလႄႈပဵၼ်ပၢင်တိုၵ်းၵၼ်တေႃႇထိုင်ယၢမ်း 9 မူင်း-ၼႆယဝ်ႉ။