ၸုမ်းၵျပၼ်ႊၸွႆႈထႅမ်ပၼ်ၶဝ်ႈသၢၼ်ၼပ်ႉႁူဝ်ႁဵင်ထူင် တီႈၸုမ်းတႆးဝၢၼ်ႈႁႆး၊ ၽူႈယႂ်ႇၵူၼ်းလူင်ၼႂ်း SSPP လူင်းလၢႆး မိုဝ်းႁပ်ႉဢဝ်ယဝ်ႉၵေႃႈ ယွၼ်ႉၼႂ်းပိုၼ်ႉတီႈ တိုၵ်ႉမီးပၢင်တိုၵ်းၵၼ်ယူႇလႄႈ ပႆႇၸၢင်ႈတေႃႉသူင်ႇ ထိုင်ၼႂ်းမိုဝ်း SSPP ။

ပူၼ်ႉမႃးမိူဝ်ႈဝၼ်းတီႈ 24/06/13 (မိူဝ်ႈသိုၼ်း) ယၢမ်းဝၢႆးဝၼ်း ၸုမ်းၵျပၼ်ႊ (Nippon Foundation) မွပ်ႈၸႆႈပၼ် ၶဝ်ႈသၢၼ် တီႈပႃႊတီႊမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) တီႈလုမ်းၾၢႆႇပူၵ်းပွင်ၸၢဝ်းၶိူဝ်းၸိူဝ်းယူႇသဝ်း ၸွမ်းလႅၼ်လိၼ် (ၼတလ) ဝဵင်းလႃႈသဵဝ်ႈ 2,000 ထူင်။ လွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉ တင်းၽူႈၼင်ႈလုမ်းတီႈလႃႈသဵဝ်ႈ ပဵၼ်ၵေႃႉၵႂႃႇလူင်းလၢႆးမိုဝ်း - ၼႆယဝ်ႉ။

မိူဝ်ႈလဵဝ် ၶဝ်ႈသၢၼ်တင်းမူတ်းသွင်ႁဵင်ထူင် မီးယူႇတီႈလုမ်း ၼတလ ။ ၵွပ်ႈဝႃႈ ၶၵ်ႉတွၼ်ႈၵၢၼ်ၸွႆႈထႅမ် ၶဝ်ႈသၢၼ် ပွၵ်ႈၵမ်းၼႆႉ လတ်းၽၢၼ်ႇသုၼ်ၵၢင်လွင်ႈငမ်းယဵၼ်မၢၼ်ႈ (MPC) သေ မႃးတီႈၸုမ်းၼတလ ၊ ၸုမ်းၼတလၵေႃႈ ၵႂႃႇႁပ်ႉဢဝ်ငိုၼ်းတီႈၸုမ်းၵျပၼ်ႊသေ သိုဝ်ႉၶဝ်ႈသၢၼ်မႃးဝႆႉတီႈလုမ်းၼတလ - ၼႆယဝ်ႉ။

ၵူၺ်းၵႃႈ ဢိင်ၼိူဝ်သိုၵ်းမၢၼ်ႈတင်းသိုၵ်းတႆး SSPP/SSA တိုၵ်ႉပဵၼ်ပၢင်တိုၵ်းၵၼ်ၼႂ်းပိုၼ်ႉတီႈသေ ၼႂ်း 2-3 ဝၼ်းၼႆႉ ပၢင်တိုၵ်းႁၢဝ်ႈႁႅင်းဝႆႉလႄႈၶဝ်ႈသၢၼ် 2,000 ထူင်ၼႆႉ ယင်းပႆႇၸၢင်ႈသူင်ႇပၼ်ထိုင်ဝၢၼ်ႈႁႆး၊ ၵႂႃႇလူင်းလၢႆးမိုဝ်း ဝႆႉၵူၺ်း။ လွင်ႈၼႆႉ ၸုမ်းၼတလ တေႁပ်ႉဢဝ်ပုၼ်ႈၽွၼ်းပိူဝ်ႈတႃႇသူင်ႇပၼ် ထိုင်ငဝ်ႈငုၼ်းဝၢၼ်ႈႁႆး၊ ပေႃးဝႃႈငဝ်းလၢႆးလီ ယဝ်ႉၵေႃႈ တေဢဝ်လူတ်ႉၵႃးတေႃႉတၢင်ႇသူင်ႇပၼ်- ၽူႈၶၢၼ်ပၢၵ်ႇ SSPP ၸဝ်ႈႁၢၼ်ၸၢႆးလႃႉ လၢတ်ႈၼႄၼင်ႇၼႆ။

ၸူးၸႂ်ႁဝ်းၶႃႈတႄႉ ဢမ်ႇၶႂ်ႈႁႂ်ႈမႃးၸွႆႈထႅမ်ပၼ်လူၺ်ႈလတ်းၽၢၼ်ႇ ၸဝ်ႈၼႃႈတီႈမၢၼ်ႈ၊ ၶႂ်ႈႁႂ်ႈမႃးၸွႆႈပၼ်တူဝ်ငိုၼ်း ၵမ်းသိုဝ်ႈသေသိုဝ်ႉဢဝ်ႁင်းၵူၺ်း၊ ၵွပ်ႈဝႃႈတႆးႁဝ်းဢမ်ႇပေႃးမေႃၵိၼ်ၶဝ်ႈမၢၼ်ႈ။ ၾၢႆႇၼိုင်ႈၵေႃႈ ပေႃးဝႃႈသိုဝ်ႉၶိုၼ်း ၶဝ်ႈဢၼ်တႆးၽုၵ်ႇ၊ ၵူၼ်းမိူင်းတႆးႁဝ်းၵေႃႈတေလႆႈၵၢၼ်လႆႈငၢၼ်းထႅင်ႈ၊ မီးငိုၼ်းၶဝ်ႈ ယွၼ်ႉလႆႈၶၢႆၶဝ်ႈၸိူဝ်းၼႆႉ- ၽူႈၶၢၼ်ပၢၵ်ႇ SSPP/SSA လၢတ်ႈၼႄတၢင်းႁၼ်ထိုင်ၼင်ႇၼႆ။

ၸုမ်းၵျပၼ်ႊ (Nippon Foundation) ၼႆႉ ႁူဝ်ပဝ်ႈပဵၼ် ယူဝ်ႁေႊဢိ သႃသႃႊၶႃႊဝႃႊ၊ မၼ်းၸဝ်ႈပဵၼ်ပႃး ၽွင်းၶဵဝ် ၶိုၵ်ႉတွၼ်း ပိူဝ်ႈတႃႇၵမ်ႉၸွႆႈၵၢၼ်ၵေႃႇသၢင်ႈလွင်ႈၶိုၼ်းလီၵၼ် ၼႂ်းၸိူဝ်ႉၸၢတ်ႈၼႂ်းမိူင်းမၢၼ်ႈ။ ဢိင်ၼိူဝ်တၢင်း လူင်ပွင်ၸိုင်ႈၵျပၼ်ႊၵမ်ႉထႅမ်သေ လႆႈငိၼ်းဝႃႈ မီးငိုၼ်းပိူဝ်ႈတႃႇၸွႆႈထႅမ်တၢင်းပိူင်ၵူၼ်း တီႈၵူၼ်းမိူင်းၼႂ်းပိုၼ်ႉတီႈ ဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းယိပ်းၵုမ်း တႃႇငိုၼ်းၻေႃႊလိူဝ်ႊ 3 လၢၼ်ႉ။ ပူၼ်ႉမႃးမိူဝ်ႈလိူၼ်မၢတ်ႊၶျ် (2013) ၼႆႉၵေႃႈ လႆႈၸွႆႈပၼ်ၶဝ်ႈသၢၼ် တီႈ RCSS တႃႇ 6,000 ထူင်- ၼႆယဝ်ႉ။