ဝၢႆးသိုၵ်းမၢၼ်ႈၶိုၼ်ႈလေႃႇတိုၵ်းသိုၵ်းတႆး တီႈတိၼ်လွႆၵူၵ်း ယဝ်ႉ သိုပ်ႇပဵၼ်ပၢင်တိုၵ်းၵၼ်ထႅင်ႈ တီႈဝၢၼ်ႈဝၢပ်ႈ ပွတ်းၵေးသီး။

ဝၼ်းတီႈ 22/06/13 တပ်ႉသိုၵ်းၸိုင်ႈတႆး (SSPP/SSA) တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ်တီႈ ဝၢၼ်ႈဝၢပ်ႈ ဢိူင်ႇဝၢၼ်ႈဝၢပ်ႈ ၸႄႈဝဵင်းၵေးသီး၊ ၾၢႆႇဢွၵ်ႇတၢင်းၵႃးၵေးသီး-မိူင်းယႆ၊ ၸိုင်ႈတႆးပွတ်းႁွင်ႇ။ လွင်ႈလုသုမ်း တင်းသွင်ၾၢႆႇ ဢမ်ႇလႆႈႁူႉၸွမ်း။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ ၵွပ်ႈသိုၵ်းမၢၼ်ႈၵႆႉၵႆႉၵႂႃႇႁႃယိုဝ်းသိုၵ်းတႆးတိၵ်းတိၵ်းလႄႈ ပွၵ်ႈၼႆႉ သိုၵ်းတႆး လႅပ်ႈပဵၼ်ၾၢႆႇၵႂႃႇႁႃယိုဝ်းသိုၵ်းမၢၼ်ႈဢွၼ်တၢင်း၊ ၾၢႆႇမၢၼ်ႈလႅပ်ႈလုသုမ်းၼမ်ဝႆႉ- ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 20/06/13 တင်ႈတႄႇပွတ်းၼႂ်ထိုင်ဝၢႆးဝၼ်း၊ သိုၵ်းမၢၼ်ႈတပ်ႉၶမယ 506 ဢၼ်ပၵ်းတီႈ ဝၢၼ်ႈၼွင်ၵႃး ဢဝ်ဢဵၼ်ႁႅင်းသိုၵ်းမွၵ်ႈ 30 ၶိုၼ်ႈလေႃႇတိုၵ်းသိုၵ်းတႆး (SSPP/SSA) တီႈတိၼ်လွႆၵူၵ်း (တပ်ႉဢၼ် သိုၵ်းတႆးပၵ်းယူႇမႃးၸဵမ်မိူဝ်ႈၼႂ်းပီ 2011) ႁိမ်းၼႃးၶီႈလိင်း၊ ၼႂ်းဢိူင်ႇဝၢၼ်ႈၽုၺ်း၊ ၸႄႈဝဵင်းၵေးသီး၊ ၸဵင်ႇႁွင်ႇ ဝၼ်းတူၵ်း ၵေးသီး ယၢၼ် 7 လၵ်း။ ၾၢႆႇသိုၵ်း မၢၼ်ႈထွၼ်ၶိုၼ်းသေတႃႉ သိုၵ်းမၢၼ်ႈတပ်ႉၵွင် 131 (ၵေးသီး) ၵႂႃႇထႅမ်ႁႅင်းသိုၵ်းထႅင်ႈ မွၵ်ႈ 100 ပၢႆ- ၼႆယဝ်ႉ။

ၾၢႆႇၼိုင်ႈ ႁူင်းပွႆႇသဵင် RFA ၾၢႆႇမၢၼ်ႈဢွၵ်ႇၶၢဝ်ႇဝႃႈ တပ်ႉသိုၵ်းမၢၼ်ႈသင်ႇႁႂ်ႈသိုၵ်းတႆး (SSPP/SSA) ထွၼ်တပ်ႉ တီႈတႃႈသၢမ်ပူး။ (တႃႈသၢမ်ပူးၼႆႉ ယူႇၼႂ်းဢိူင်ႇႁၢႆးပႃ ၸႄႈဝဵင်းမိူင်းသူႈ၊ ပဵၼ်ပိုၼ်ႉတီႈ ၼႃႈလိၼ်ဢၼ် SSA ၵုမ်းယိပ်း မႃးတင်ႈတႄႇၵိုတ်းသိုၵ်းပီ 1989 ၊ ၸဵင်ႇၸၢၼ်းဝၼ်းဢွၵ်ႇဝၢၼ်ႈႁႆး ယၢၼ်ငဝ်ႈငုၼ်းၶွင် SSPP/SSA 10 လၵ်း။)

ပႃႊတီႊမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ၼႆႉ ဢုပ်ႇဢူဝ်းၵၼ်တင်းလူင်ပွင်ၸိုင်ႈ မၢၼ်ႈ ၸၼ်ႉၸိုင်ႈမိူင်းႁူမ်ႈတုမ်သေ တင်ႈတႄႇၵိုတ်းယိုဝ်းၵၼ်တင်းတပ်ႉသိုၵ်းမၢၼ်ႈမႃး မိူဝ်ႈဝၼ်းထိ 28/01/12 ၊ မိူဝ်ႈလဵဝ် လႆႈမႃး ၶၢဝ်းတၢင်းပီပၢႆယဝ်ႉၵေႃႈ ၵႆႉပဵၼ်ပၢင်တိုၵ်းၵၼ်တင်း သိုၵ်းမၢၼ်ႈမႃးတႃႇသေႇ။

လိုၼ်းသုတ်း ႁူပ်ႉဢုပ်ႇၵၼ်ထႅင်ႈတီႈတၢင်ႉယၢၼ်း မိူဝ်ႈဝၼ်းတီႈ 11/05/13 သေ တူၵ်းလူင်းၵၼ် ၵဵဝ်ႇထႅင်ႈ 4 ၶေႃႈ- (1)ပိူဝ်ႈတႃႇႁဵတ်းၸွမ်းၶေႃႈတူၵ်းလူင်း ၸွမ်းၼင်ႇလႆႈလူင်းလၢႆးမိုဝ်းၵၼ်ဝႆႉ ၸၼ်ႉၸႄႈမိူင်းလႄႈၸၼ်ႉ ၸိုင်ႈမိူင်းႁူမ်ႈ တုမ်ၼၵ်းၼၵ်းၼႃၼႃ။ (2)ပိူဝ်ႈတႃႇဢဝ်လွင်ႈငမ်း ယဵၼ်သေ ၵႄႈလိတ်ႈပၼ်ႁႃ ဢၼ်လုၵ်ႉတီႈတင်းသွင်ၾၢႆႇ ၸတ်းသိုၵ်း/တူင်ႉၼိုင်သိုၵ်းၼၼ်ႉသေ ပဵၼ်မႃး။ (3)ႁႂ်ႈလႆႈငိူင်ႉဝႄႈလွင်ႈႁႃ တၢင်းၽိတ်းပူဝ်ႉသႂ်ႇႁူဝ်ၵူၼ်းမိူင်း၊ ပဵၼ်ႁၢပ်ႇၼၵ်းလူင်တေႃႇ ၵူၼ်းမိူင်း လူၺ်ႈလွၵ်းလၢႆးဢမ်ႇထုၵ်ႇမႅၼ်ႈ ၸွမ်းမၢႆမီႈ။ (4)ပေႃးဝႃႈမီးမႃးပၼ်ႁႃ ဢၼ်ႁဵတ်းႁႂ်ႈ သွင်ၾၢႆႇ မီးၶေႃႈထၢင်ႇထိူမ်ၵၼ်ၼႆၸိုင် ႁႂ်ႈလႆႈႁူပ်ႉထူပ်းၵၼ် ဝႆးဝႆးသေၵႄႈလိတ်ႈလူၺ်ႈလၢႆးသိုဝ်ႈ သႂ်- ၸိူဝ်းၼႆႉ။