ဝၢႆးဢွၵ်ႇၶၢဝ်းတၢင်း ႁူပ်ႉၸွမ်ၸိုင်ႈတဵင်းၸဵင်ႇ မႃးထိုင် တႃႈၶီႈလဵၵ်းယဝ်ႉ ႁူဝ်ပဝ်ႈ RCSS သပ်းၸႅင်ႈ ၼႄၵၢၼ်မိူင်း တီႈပေႃႈမႄႈၵူၼ်းမိူင်းပွတ်းႁွင်ႈလိုၵ်ႉ/သၼ်သၢႆးတႆး ၸႄႈဝဵင်းတႃႈၶီႈလဵၵ်း လွင်ႈလွၵ်းပိူင်ၸိုင်ႈမိူင်းႁူမ်ႈတုမ် ၸိုၼ်ႈၸၢင်ႇ။

ဝၼ်းတီႈ 23/06/13 ၸုမ်းၸိူဝ်းၶွင်ႊသီႊဢဝ်ၶိုၼ်းၸိုင်ႈတႆး (RCSS) ဢၼ်ၸဝ်ႈယွတ်ႈသိုၵ်းဢွၼ် ႁူဝ် ၶၢဝ်းတၢင်းႁွတ်ႈထိုင် ဝဵင်းတႃႈၶီႈလဵၵ်းသေ ၵႂႃႇႁူပ်ႉထူပ်းၵူၼ်းမိူင်းတီႈသၼ်သၢႆးတႆး ၸႄႈဝဵင်း တႃႈၶီႈလဵၵ်း။ မီးၵူၼ်းမိူင်း ပွတ်းဢွၵ်ႇၶူင်း မိူၼ်ၼင်ႇ မိူင်းသၢတ်ႇ/ တႃႈၶီႈလဵၵ်း/ ၵဵင်းတုင်ၸိူဝ်းၼႆႉ ၶဝ်ႈႁူမ်ႈထွမ်ႇငိၼ်းမွၵ်ႈ 400-500 ၵေႃႉ။ ၸဝ်ႈယွတ်ႈသိုၵ်း မွၵ်ႇလၢတ်ႈ သပ်းလႅင်းၼႄၵူၼ်းမိူင်း ၵဵဝ်ႇၵပ်းလွင်ႈၶၢဝ်းတၢင်း ႁူပ်ႉထူပ်းဢုပ်ႇဢူဝ်း ၸွမ်ၸိုင်ႈ တဵင်းၸဵင်ႇ၊ ပႃႊတီႊၵၢၼ်မိူင်း၊ ၸုမ်းတူင်ႇ ဝူင်းၵူၼ်းၸိူဝ်းၼႆႉ- ၵူၼ်းတႃႈၶီႈလဵၵ်းၵေႃႉၼိုင်ႈလၢတ်ႈၼႄၼင်ႇၼႆ။

ၵူၼ်းမိူင်းၵမ်ႈၼမ်တွင်ႈထၢမ် RCSS ဝႃႈ ပေႃးႁဵတ်းပၢင်ၵုမ်လူင်ပွၵ်ႈ 2 ႁဝ်းတေလႆႈၽွၼ်းလီသင်။ ၵဵဝ်ႇၵပ်းလွင်ႈၼႆႉ ၸဝ်ႈယွတ်ႈသိုၵ်းတုမ်ႉတွပ်ႇဝႃႈ- ဢၼ်ႁဝ်းႁၢင်ႈႁႅၼ်း၊ ႁႃတိုဝ်ႉတၢင်းသေဢုပ်ႇ ၵုမ်ၵၼ်ယူႇၸိူဝ်းၼႆႉ ၼင်ႇႁိုဝ်ႁဝ်းတေဢမ်ႇ ပဵၼ်ၾၢႆႇသုမ်းၸိူင်ႉၼင်ႇၵူႈပွၵ်ႈ။ မိူင်းတႆးၼႆႉ ႁႂ်ႈၵူၼ်းမိူင်းတႆးလႆႈၽွင်းငမ်းၶိုၼ်း၊ ႁႂ်ႈမိူၼ်ၸိုင်ႈမိူင်းဢမႄႊရီႊၵႃႊ၊ ၸိုင်ႈမိူင်းဢိင်းၵလဵတ်ႈၸိူဝ်းၼႆႉ။ ဢမ်ႇဝႃႈၾၢႆႇပလိၵ်ႈ/သိုၵ်း၊ ၾၢႆႇၽွင်းငမ်းၸိူဝ်းၼႆႉ ႁႂ်ႈပဵၼ်ၵူၼ်းမိူင်းတႆး- ဝႃႈၼႆ။

မီးၵူၼ်းမိူင်းတုၵ်းယွၼ်းဝႃႈ- ၼႂ်းမိူင်းတႆးၼႆႉ ၶႂ်ႈႁႂ်ႈမီးပၼ်ႁူင်းပွႆႇႁၢင်ႈသဵင် (ထီႊဝီႊ) တႆး 1 ၶျွင်ႉ ပိူဝ်ႈတႃႇ ႁၵ်ႉသႃ မႅတ်ႇပႅင်းၽႃသႃၵႂၢမ်းလၢတ်ႈ လိၵ်ႈလၢႆးပၢႆၵမ်တႆး၊ ၵွပ်ႈဝႃႈဝၼ်းမိူဝ်ႈၼႆႉ တႆးႁဝ်း ဢုပ်ႇလၢတ်ႈၽႃသႃတၢင်ႇၶိူဝ်း ၼမ်လိူဝ် ၽႃသႃၵႂၢမ်းတႆး။  လွင်ႈၼႆႉ ၸဝ်ႈယွတ်ႈသိုၵ်းလၢတ်ႈဝႃႈ ႁႂ်ႈႁဝ်းၸွႆႈၵၼ်ႁၵ်ႉသႃ ၊ တင်ႈတႄႇဢဝ်ၼႂ်းႁိူၼ်းၼႂ်းယေးၵႂႃႇ လွင်ႈလၢတ်ႈလွင်ႈၸႃၸိူဝ်းၼႆႉ ပေႃႈမႄႈထုၵ်ႇလႆႈသင်ႇသွၼ်ၼႄႉၼမ်းလုၵ်ႈလၢင်းဢွၼ်တၢင်း။ လွင်ႈလိၵ်ႈလၢႆးတႆးၼၼ်ႉ တၢင်းႁူင်းႁဵၼ်းလွႆတႆးလႅင်းၵေႃႈမီးထိုင်ၸၼ်ႉ 9-10 ။ ၸွမ်းၼင်ႇ RCSS လႆႈႁူပ်ႉဢုပ်ႇမႃးမိူၼ်ၼင်ႇ ပီႈၸၢႆးၾႃႈ၊ ၶူးလူင်ၸၢႆးဢွင်ႇထုၼ်း၊ ၻွၵ်းတိူဝ်ႊၸၢႆးသၢင်ႇဢၢႆႈၸိူဝ်းၼႆႉ လႆႈၸႂ်ၵၼ်ဝႆႉဝႃႈ တေမူၼ်ႉမႄးပူၵ်းပွင်ႁႂ်ႈလိၵ်ႈတႆးမီးၸၼ်ႉ မၼ်းၵႂႃႇ- ၼႆယဝ်ႉ။

ဢွၼ်ၼႃႈတေမႃးတီႈသၼ်သၢႆးၼႆႉ ၸုမ်းၸိူဝ်း RCSS လႆႈၵႂႃႇထူပ်းၵူၼ်းမိူင်း တီႈႁွင်ႈလိုၵ်ႉဢွၼ် တၢင်း။ တီႈႁွင်ႈလိုၵ်ႉ ၼၼ်ႉ ၸဝ်ႈယွတ်ႈသိုၵ်း ယင်းသပ်းၸႅင်ႈၼႄဝႃႈ- ဢၼ်ႁဝ်းၵႂႃႇဢုပ်ႇဢူဝ်း ၵၢၼ်မိူင်းမႃးၼႆႉ မိူၼ်တင်းႁဝ်းယၢင်ႈၶိုၼ်ႈ ၶူဝ်လႆၸဵတ်းသိၵ်ႈ၊ မိူဝ်ႈလဵဝ်ၼႆႉ ႁဝ်းတိုၵ်ႉႁႃယၢင်ႈၶိုၼ်ႈ ၶူဝ်လႆသိၵ်ႈလဵဝ်ၵူၺ်း၊ တႃႇတေႁႂ်ႈယၢင်ႈၶိုၼ်ႈထိုင် ၸဵတ်းသိၵ်ႈၼၼ်ႉ မၼ်းပႆႇငၢႆႈ။ တေလႆႈပိုင်ႈဢိင် ပေႃႈမႄႈၵူၼ်းမိူင်း၊ ပႃႊတီႊ ၵၢၼ်မိူင်းလႄႈၵူႈၾၢႆႇၾၢႆႇ- ဝႃႈၼႆ။

လႆႈငိၼ်းဝႃႈဝၢႆးဝၼ်းမွၵ်ႈယၢမ်း 3 မူင်းၶိုင်ႈ ၸုမ်းၸိူဝ်း RCSS ၶၢမ်ႈလႅၼ်လိၼ်တႆး-ထႆး၊ ပွၵ်ႈၶိုၼ်း တၢင်းလွႆတႆးလႅင်း-ၼႆယဝ်ႉ။