ပူၼ်ႉမႃးမိူဝ်ႈဝၼ်းတီႈ 11/06/13 ဢိင်ၼိူဝ်လႆႈႁူပ်ႉထူပ်းဢုပ်ႇဢူဝ်းၵၼ်သေ ၽူႈမီးၼႃႈတီႈပုၼ်ႈ ၽွၼ်း ၼႂ်းၸုမ်း ၽဵဝ်ႈမူၺ်ႉယႃႈမဝ်းၵမ် CCDAC (Central Committee for Drug Abuse Control) ၸၼ်ႉသုင်ၵေႃႉၼိုင်ႈ ဢၼ်ဢမ်ႇ ၶႂ်ႈဢွၵ်ႇၸိုဝ်ႈလၢတ်ႈဝႃႈ- မိူဝ်ႈဝၼ်းတီႈ 29/05/2013 ပူၼ်ႉမႃး ယူႇတီႈႁွင်ႈၵၢၼ်ၽွင်းလူင်ၾၢႆႇႁူမ်ႇလူမ်ႈၵူၼ်းမိူင်း မိူင်းၶႄႇ ပိုၼ်ၽၢဝ်ႇဝႃႈ- တင်ႈတႄႇႁဝ်း 4 ၸိုင်ႈမိူင်း ႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ် ဝၼ်းတီႈ 19/04/2012 မႃးၼႆႉ တိၺွပ်း လႆႈၵူၼ်း ၵႃႉယႃႈ 1,100 ပၢႆ၊ တိလႆႈယႃႈမဝ်းၵမ် 2.97 တၼ်ႊ။ ၵွပ်ႈၼၼ် မိူဝ်ႈလဵဝ် ၸွမ်းထုင်ႉသၢပ်ႇမႄႈ ၼမ်ႉၶွင်ၼႆႉ ၵူၼ်းၵႃႉဢၼ်ထွႆလင်ၵေႃႈမီးမႃး၊ လွင်ႈရႃၸဝတ်ႈ (ႁုၵ်းႁၢႆႉ) ဢၼ်ၵဵဝ်ႇၶွင်ႈၸွမ်း ယႃႈမဝ်းၵမ်ၵေႃႈ ႁဝ်းၵမ်ၵုမ်းလႆႈယဝ်ႉ- ဝႃႈၼႆ။ (ၼင်ႇဢၼ်ၽိုၼ်ၶၢဝ်ႇၶႄႇသျိၼ်ႊႁႂႃ ဢွၵ်ႇၶၢဝ်ႇ)။

တီႈတႄႉမၼ်း ၵၢၼ်ၵႃႉယႃႈမဝ်းၵမ်ၼႆႉ ဝၢႆးၼေႃႇၶမ်းဢမ်ႇမီးယဝ်ႉ ၶႅၼ်းၼမ်တိူဝ်းမႃးလိူဝ်ၵဝ်ႇ။ ၵွပ်ႈဝႃႈဢၼ် 4 ၸိုင်ႈ မိူင်း (ၶႄႇ၊ မၢၼ်ႈ၊ ထႆး၊ လၢဝ်း) ႁူမ်ႈၵၼ်ၽဵဝ်ႈမူၺ်ႉယႃႈမဝ်းၵမ်ၼႆႉ ၵိူတ်ႇၶိုၼ်ႈ မႃးဝၢႆး ၸုမ်းၸၢႆးၼေႃႇၶမ်း ၶႃႈႁႅမ် လုၵ်ႈႁိူဝ်းၶႄႇ 13 ၵေႃႉ၊ ၶႄႇၸင်ႇၼမ်းၼႃႈၶိုင်ပွင်မႃးသေ တိၺွပ်းလႆႈၼေႃႇၶမ်း မိူဝ်ႈဝၼ်းတီႈ 25/04/2012 ၊ ထိုင်မႃးဝၼ်းတီႈ 01/03/13 ၵေႃႈ တတ်းသိၼ် ပူင်ပၼ်တူတ်ႈတၢမ်ႇတၢႆလူၺ်ႈ သမ်းယႃၵွင်ႉပၼ် ၼေႃႇၶမ်း။ ပေႃးႁဝ်းတူၺ်းၸိုင်  ၸၢႆးၼေႃႇၶမ်း ၼႆႉ မၼ်းပဵၼ်ၶေႃလဵၵ်ႉလဵၵ်ႉဢွၼ်ႇ ၼႂ်းၸိူၵ်ႈလဵၵ်း (ပဵၼ်ၵူၼ်းၵႃႉဢွၼ်ႇ ၼႂ်းၵူၼ်းၵႃႉလူင်) ဢၼ်ၼိုင်ႈၵူၺ်း- ဝႃႈၼႆ။

ၶေႃႈၵႂၢမ်းဢၼ်ၸဝ်ႈၼႃႈတီႈၸၼ်ႉသုင် CCDAC လၢတ်ႈၼႆႉ ၵူၼ်းၵႃႉၼႂ်းမိူင်းတႆးပွတ်းဢွၵ်ႇၵေႃႉ ၼိုင်ႈ ဢၼ်ႁူႉလွင်ႈ ၵၢၼ်ၵႃႉယႃႈမဝ်းၵမ်ၵေႃႈၵမ်ႉထႅမ်။ ဝႃႈ- ၵူႈပွၵ်ႈၽွင်းမိူဝ်ႈၼေႃႇၶမ်းမီးယူႇၼၼ်ႉ ပေႃးယႃႈလတ်းၽၢၼ်ႇ ၼႂ်းပိုၼ်ႉတီႈ ၼေႃႇၶမ်းၵုမ်းၵမ်ၵေႃႈ ၼေႃႇၶမ်းၵိၼ်ၸိၵ်းတွၵ်ႇၸွၵ်းၵမ်ႈၽွင်ႈ သေ ႁဵတ်းၵၢၼ်ယဝ်ႉၵႂႃႇ။ မိူဝ်ႈၼၼ်ႉ ဢမ်ႇလီပိူဝ်ႈတႃႇ ၵူၼ်းၵႃႉယႃႈၸိူဝ်းမီးၼႅင်ႈၵၢၼ် (ၶိူဝ်းၶၢႆႇ)ၶဝ်၊ ပဵၼ်လွင်ႈၵိတ်ႇၶႂၢင်ၶဝ်။ ပေႃးၼေႃႇၶမ်းဢမ်ႇမီးယဝ်ႉ ၶဝ်ထၢင်ႇႁၢင်ႈ လွတ်ႈလႅဝ်းမႃးလိူဝ်ၵဝ်ႇ၊ ၼေႃႇၶမ်းဢမ်ႇမီးယဝ်ႉ ပဵၼ်လွင်ႈလီလူင်တႃႇၶဝ်တႄႉတႄႉ။ ထႅင်ႈၾၢႆႇၼိုင်ႈ မိူဝ်ႈၼေႃႇၶမ်း မီးယူႇၼၼ်ႉ သမ်ႉလီတႃႇၵူၼ်းၵႃႉၸိူဝ်းဢမ်ႇမီးၼႅင်ႈၵၢၼ်(ၶိူဝ်းၶၢႆႇ)ႁင်းၶဝ်၊ ၵွပ်ႈဝႃႈ ၼေႃႇၶမ်းၶပ်း ၶိုင်ပၼ်သေ ပဵၼ်ၵၢၼ်ၵႂႃႇ။ ၵွပ်ႈၼၼ် ပေႃးၼေႃႇၶမ်းၺႃးတိၵေႃႈ ၸိူဝ်းၶဝ်ၵႃႈလႆႈထွႆလင်- ဝႃႈၼႆ။

ၸဝ်ႈၼႃႈတီႈၸၼ်ႉသုင်ၼႂ်း CCDAC ယင်းလၢတ်ႈဝႃႈ- ဢၼ်ၾၢႆႇၶႄႇဝႃႈ 4 ၸိုင်ႈမိူင်းႁူမ်ႈမိုဝ်းၵၼ် သေ ႁူမ်ႈၵၼ် ၽဵဝ်ႈမူၺ်ႉယႃႈမဝ်းၵမ်ၼႆၼၼ်ႉ  ႁူမ်ႈမိုဝ်းၵၼ်တႄႉၸႂ်ႈယဝ်ႉ၊ ၵူၺ်းၵႃႈ ႁူမ်ႈမိုဝ်းၵၼ် ၽဵဝ်ႈမူၺ်ႉၼႆၼၼ်ႉ ဢမ်ႇၸႂ်ႈ။ ၵဵဝ်ႇၵပ်းလွင်ႈၼႆႉ ထႆးတင်းမၢၼ်ႈဝႃႈမိူၼ်ၵၼ်။ မိူဝ်ႈဝၼ်းတီႈ 19/04/2012 ၶဝ်ပိုတ်ႇလုမ်းႁူမ်ႈၵၼ်တီႈ သိပ်းသွင် ပၼ်းၼႃး (မိူင်းၶႄႇ) ၼၼ်ႉ ပဵၼ်ၵၢၼ်လႅၵ်ႈ လၢႆႈၶေႃႈမုလ်းၶၢဝ်ႇသၢၼ်ၵၼ်ၵူၺ်း။ ဢမ်ႇၸႂ်ႈႁူမ်ႈၵၼ်ၵႂၢတ်ႇလၢင်ႉ ၸွမ်းထုင်ႉမႄႈၼမ်ႉၶွင်- ၼႆယဝ်ႉ။

ၽိုၼ်ၶၢဝ်ႇၼွၵ်ႈမိူင်း Asia Sentinel, 30/05/13 ၵေႃႈတႅမ်ႈဝႃႈ- မိူဝ်ႈလဵဝ်မီးၽူႈထတ်းသၢင်လၢႆၵေႃႉ ဢွၼ်ၵၼ် ထတ်းသၢင်ဝႃႈ ဢၼ်ၶႄႇၶိုင်ပွင်ႁဵတ်းယူႇမိူဝ်ႈလဵဝ် မၼ်းပဵၼ်ပိူဝ်ႈတႃႇလွင်ႈႁူမ်ႈမိုဝ်း ၵၼ်ၽဵဝ်ႈမူၺ်ႉ ယႃႈမဝ်းၵမ်ႁႃႉ၊ ပိူဝ်ႈတႃႇမႃးမီးလွၵ်းတွၼ်ႈယႂ်ႇၼႂ်းထုင်ႉမႄႈၼမ်ႉၶွင်ႁႃႉ၊  မီးယိူင်း ဢၢၼ်းၽဵဝ်ႈယႃႈမဝ်းၵမ်ႁႃႉ၊ ဢမ်ႇၼၼ် ပိူဝ်ႈတႃႇ မႃးၵႅတ်ႇၵင်ႈၸွမ်းပၢႆးတိုၵ်းၶႄႇ တီႈပွတ်းၸၢၼ်း မိူင်းၶႄႇႁႃႉ၊ မီးၵႂၢမ်းထၢမ်ယူႇၼင်ႇၼၼ်- ဝႃႈၼႆ။

လွင်ႈလိူၼ်ႈၶၢႆႉပီၽဵဝ်ႈမူၺ်ႉယႃႈမဝ်းၵမ်ၼၼ်ႉ ပူၼ်ႉမႃးမိူဝ်ႈဝၼ်းတီႈ 05/10/2012 ၸွမ်သိုၵ်းၵူဝ်ႇ ၵူဝ်ႇ၊ ၽွင်းလူင်ၾၢႆႇ ၼႂ်းမိူင်း ဢၼ်ၾၢႆႇတပ်ႉသိုၵ်းတႅင်ႇတင်ႈဝႆႉ၊ သမ်ႉပဵၼ်ႁူဝ်ပဝ်ႈၾၢႆႇၽဵဝ်ႈမူၺ်ႉ ယႃႈမဝ်းၵမ် (CCDAC) ပိုၼ်ၽၢဝ်ႇလိူၼ်ႈ ၶၢႆႉၽႅၼ်ၵၢၼ်လူင် ၽဵဝ်ႈမူၺ်ႉယႃႈမဝ်းၵမ် 15 ပီ (1999-2014) ၵႂႃႇတၢင်းၼႃႈထႅင်ႈ 5 ပီ၊ တေႃႇထိုင်ပီ 2019 ။ မိူဝ်ႈပၢင် ပိုၼ်ၽၢဝ်ႇၼၼ်ႉ ၸိူဝ်းၶဝ်ႈႁူမ်ႈထွမ်ႇငိၼ်း မီးၸုမ်းၾၢႆႇၽဵဝ်ႈမူၺ်ႉယႃႈမဝ်းၵမ်လႄႈရႃၸဝတ်ႈ (UNODC), DEA ၊ ၸုမ်းထႆး ONCB ၊ ဢွတ်ႊသတြေႊလီႊယိူဝ်ႊ (AFP-Australian Federal Police) ၸိူဝ်းၼႆႉ။

လွင်ႈတၢင်းၸွမ်သိုၵ်းၵူဝ်ႇၵူဝ်ႇလႆႈပိုၼ်ၽၢဝ်ႇ
ၸဝ်ႈၼႃႈတီႈယႂ်ႇ CCDAC သပ်းလႅင်းၼႄဝႃႈ- ပေႃးထိုင်မႃးလိူၼ်မၢတ်ႊၶျ် ပီ 2014 ၽႅၼ်ၵၢၼ် 15 ပီသုတ်းသဵင်ႈ။ ပေႃးၽႅၼ်ၵၢၼ်သုတ်းသဵင်ႈယဝ်ႉ ယႃႈမဝ်းၵမ်သမ်ႉတိုၵ်ႉမီးယူႇ ပိူၼ်ႈတေဝႃႈႁိုဝ်၊ ၵွပ်ႈၼၼ် ၵႃႈလႆႈႁႃတၢင်းၵႄႈတူဝ် ဝႆႉ။ ပိူင်လူင်မၼ်း ဢၼ်ၽႅၼ်ၵၢၼ်လူင်ၽဵဝ်ႈယႃႈမဝ်းၵမ်ဢမ်ႇ ပဵၼ်ၵၢၼ်ၼႆႉ ယွၼ်ႉဢမ်ႇမီးငိုၼ်းၵွင်ၵၢင် ပိူဝ်ႈတႃႇ ႁဵတ်းၵၢၼ်- ၼႆယဝ်ႉ။ (ၸုမ်း CCDAC မီးၵၢၼ်လူင် 2 ပိူင် 1.ၽဵဝ်ႈမူၺ်ႉယႃႈမဝ်းၵမ်။ 2.ပူၵ်းပွင် ၶူင်းၵၢၼ်ပုတ်ႈတႅၼ်း တူၼ်ႈၾိၼ်ႇ)။

မီးတႃႇပီၼိုင်ႈ ႁဝ်းၵႂႃႇၽဵဝ်ႈယႃႈတီႈပၢင်လွင်း၊ ပေႃးၽဵဝ်ႈယဝ်ႉၵေႃႈ ဝၢႆးမႃးၵူၼ်းမိူင်းဢမ်ႇမီးၶဝ်ႈၵိၼ်၊ ႁဝ်းလႆႈၵႂႃႇႁႃ ယွၼ်းႁပ်ႉတၢင်းၸွႆႈ ၶဝ်ႈသၢၼ် မႃးလဵင်ႉၶဝ်ၶိုၼ်း- ၸဝ်ႈၼႃႈတီႈယႂ်ႇ CCDAC လၢတ်ႈပႃးၼင်ႇၼႆ။

လွင်ႈၼႆႉ ၶူပ်းငၢမ်ႇမႅၼ်ႈၵၼ်တင်းၵႂၢမ်း Jason Eligh ဢၼ်ပဵၼ်ၽူႈၸတ်းၵၢၼ် UNODC မိူင်းမၢၼ်ႈ၊ လၢတ်ႈတီႈ ပၢင်သပ်းလႅင်းၸႅင်ႈၶၢဝ်ႇ ဢၼ်ၸတ်းပူၼ်ႉမႃးမိူဝ်ႈဝၼ်းတီႈ 13/06/12 တီႈလုမ်း UNODC ၼႂ်းဝဵင်းတႃႈၵုင်ႈ ဝႃႈ- ၵူၼ်းမိူင်းၽုၵ်ႇယႃႈၼႆႉ ၶဝ်ဢမ်ႇၸႂ်ႈၵူၼ်းႁုၵ်းႁၢႆႉ (ၵူၼ်းမိူၵ်ႈ ၵူၼ်းလိူင်း) ယွၼ်ႉၵွပ်ႈၶဝ်ဢမ်ႇမီးၶဝ်ႈၵိၼ်။

ၶေႃႈလႆႈၸႂ်တႃႈၶီႈလဵၵ်းဢမ်ႇပဵၼ်ၵၢၼ်
ဢၼ် 3 ၾၢႆႇ (UNODC ၊ လူင်ပွင်ၸိုင်ႈမၢၼ်ႈ၊ RCSS) လႆႈလူင်းလၢႆးမိုဝ်းၵၼ်မႃးတီႈတႃႈၶီႈလဵၵ်း၊ ဝၼ်းတီႈ 28/10/2012 သေ ဢမ်ႇပဵၼ်ႁဵတ်းၵၢၼ်ၼၼ်ႉၵေႃႈ  ပိူင်လူင်မၼ်းယူႇတီႈငိုၼ်းၵွင်ၵၢင်။ ႁဝ်းမၼ်ႈၸႂ်ဝႃႈ လွင်ႈတႃႇတေႁူမ်ႈမိုဝ်းၵၼ် ႁဵတ်းၶူင်းၵၢၼ်ၼမ်းႁွင်ႈ တီႈမိူင်းပၼ်ႇလႄႈမိူင်းၼၢႆး ၸွမ်းၼင်ႇဢၼ်လႆႈတူၵ်းလူင်းၵၼ်ဝႆႉၼၼ်ႉ ပေႃးဝၢႆးၾူၼ်/ ၶၢဝ်းႁိုဝ်ႉယဝ်ႉ တေမီးငိုၼ်းၵွင်ၵၢင် ပဵင်းပေႃး ပိူဝ်ႈတႃႇႁဵတ်းသၢင်ႈ ၼႃႈၵၢၼ်တႃငၢၼ်းယူႇ- Jason Eligh လၢတ်ႈၼင်ႇၼႆ။

ၸဝ်ႈၼႃႈတီႈ CCDAC ထႅင်ႈၵေႃႉၼိုင်ႈၵေႃႈလၢတ်ႈဝႃႈ- ဢမ်ႇပူၼ်ႉၼႂ်း 5 လိူၼ်တၢင်းၼႃႈၼႆႉ ႁဝ်းတေလူင်းမိုဝ်းႁဵတ်းလႆႈ ယဝ်ႉ- ဝႃႈၼႆ။

လွင်ႈၵူၼ်းမိူင်းၶဝ်ႈပႃးၼႂ်းၵၢၼ်ၽဵဝ်ႈမူၺ်ႉယႃႈ
ဢိင်ၼိူဝ်လူင်ပွင်ၸိုင်ႈ ဢွၵ်ႇၶေႃႈၸိသင်ႇ မၢႆ 17/2011 တင်ႈၶွမ်ႊမတီႊၽဵဝ်ႈမူၺ်ႉယႃႈမဝ်းၵမ် ၸၼ်ႉၸႄႈမိူင်း၊ ၸၼ်ႉၸႄႈတွၼ်ႈ၊ ၸၼ်ႉၸႄႈဝဵင်း၊ ၸၼ်ႉပွၵ်ႉ/ဢိူင်ႇၸိူဝ်းသေ ဝၢႆးမႃးၼႂ်းၵူၼ်း မိူင်းၵေႃႈ မီးၵၢၼ်ႁူမ်ႈမိုဝ်းၵၼ် ၽဵဝ်ႈမူၺ်ႉယႃႈမဝ်းၵမ်မႃး။ မိူၼ်ၼင်ႇ တင်ႈတႄႇၼႂ်းပီ 2012 မႃးၼႆႉ ၵူၼ်းၼုမ်ႇတၢင်းမိူင်းပေႃႈ၊ ၵိင်ႇၸႄႈဝဵင်း ပၢင်ႇသၢႆး ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇလႄႈသင်။ ၵူၼ်းၼုမ်ႇထုင်ႉမိူင်းယဵၼ် 4 ဢိူင်ႇ ၸႄႈဝဵင်းၼမ်ႉတူႈ လႄႈသင်။ ၵူၼ်းၼုမ်ႇမိူင်းဝီး ၸႄႈဝဵင်းၼမ်ႉ ၶမ်းလႄႈသင်။ ၵူၼ်းၼုမ်ႇဝၢၼ်ႈၼွင်လႅင် ၸႄႈဝဵင်းတၢင်ႉယၢၼ်းၸိူဝ်းၼႆႉ ႁူမ်ႈၵၼ်ၵေႃႇတင်ႈ ၸုမ်းၽဵဝ်ႈမူၺ်ႉယႃႈမဝ်းၵမ် မႃးၽဵဝ်ႈလႆႈယႃႈမဝ်းၵမ်။

ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈယႂ်ႇ CCDAC ဝႃႈ ၼႂ်းၼႃႈလိၼ်ဢၼ်ၵၢၼ်ၽွင်းငမ်းႁဝ်းယိုၼ်းထိုင် ၼၼ်ႉ မၼ်းၵေႃႈ ပဵၼ်ၵၢၼ်ယူႇ။ ၵူၺ်းၵႃႈ တီႈၼႃႈလိၼ်ဢၼ်ၵၢၼ်ၽွင်းငမ်းႁဝ်းဢမ်ႇယိုၼ်းထိုင် ၼၼ်ႉ ဢမ်ႇပေႃးပဵၼ်ၵၢၼ်။ ဢၼ်ဝႃႈ ပေႃးတေၵႄႈလိတ်ႈပၼ်ႁႃၵၢၼ်မိူင်း တေလႆႈၵႄႈလိတ်ႈ ၼ်ႁႃယႃႈမဝ်းၵမ် ဢွၼ်တၢင်းၼၼ်ႉ ႁဝ်းဢမ်ႇထဵင်၊ ၵူၺ်းၵႃႈ ပိူဝ်ႈတႃႇၵႄႈလိတ်ႈပၼ်ႁႃယႃႈမဝ်း ၵမ်ၼၼ်ႉ လွင်ႈၽွင်းငမ်း ထုၵ်ႇလႆႈယိုၼ်းထိုင်တီႈၵူႈတီႈၵူႈလႅၼ် ၼႂ်းၸိုင်ႈမိူင်းႁူမ်ႈတုမ်။ မိူၼ်ၼင်ႇတီႈဝႃႉၼႆႉ ပဵၼ်ပၼ်ႁႃဝႆႉ၊ ႁဝ်းတေသူင်ႇၵႂႃႇႁွင်ႈၵၢၼ်ၾၢႆႇၽွင်းငမ်းၵူႈလွင်ႈလွင်ႈ၊ ၾၢႆႇပလိၵ်ႈ ဢမ်ႇပႃးၵွင်ႈၸိူဝ်းၼႆႉၵေႃႈ ဝႃႉဢမ်ႇႁပ်ႉ။

ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၸၼ်ႉသုင် တီႈၼေႇပျီႇတေႃႇၵမ်ႈၽွင်ႈၵေႃႈလၢတ်ႈဝႃႈ- မိူဝ်ႈလဵဝ် ပေႃႊလသီႊ လူင်ပွင်ၸိုင်ႈဢမ်ႇၸႂ်ႈတႃႇတိုၵ်းဝႃႉ၊ တႃႇလွမ်ႉဝႃႉဝႆႉၵူၺ်း။

ၾၢႆႇၼိုင်ႈ ၾၢႆႇတပ်ႉသိုၵ်းၵေႃႈ တိုၵ်ႉပဵၼ်ပၼ်ႁႃၼႂ်းၵၢၼ်ၵႄႈလိတ်ႈယႃႈမဝ်းၵမ်။ ၼႂ်းလူင်ပွင်ၸိုင်ႈ ၵေႃႈ ၵဵဝ်ႇၵပ်းလွင်ႈ ၽႅၼ်ၵၢၼ်ၽဵဝ်ႈယႃႈမဝ်းၵမ်ၼၼ်ႉ ပႆႇမီးလွင်ႈၽွမ်ႉသဵင်ပဵင်းပၢၵ်ႇၵၼ်။ ၸုမ်းၽဵဝ်ႈယႃႈ CCDAC ၵမ်ႈၼမ်ပဵၼ်ၾၢႆႇပလိၵ်ႈ၊ ၾၢႆႇပလိၵ်ႈဢမ်ႇၶႂ်ႈႁႂ်ႈၾၢႆႇသိုၵ်းယုင်ႈယၢင်ႈၸွမ်း ၵၢၼ်ၽဵဝ်ႈမူၺ်ႉယႃႈမဝ်းၵမ်။ ဢၼ်ၾၢႆႇသိုၵ်းသမ်ႉ ၶဝ်ႈမႃးမီးလွၵ်းတွၼ်ႈၸွမ်း/ ပဵၼ်ၽူႈတႅပ်းတတ်း ၸွမ်းၼၼ်ႉ ၾၢႆႇပလိၵ်ႈၵေႃႈဢမ်ႇပေႃးႁၢၼ်ႉၸႂ်။ ႁဝ်းၵေႃႈႁူႉယူႇဝႃႈ ၸုမ်းပီႇတုၸိတ်ႉၶဝ် ၵဵဝ်ႇၶွင်ႈၸွမ်းယႃႈမဝ်းၵမ်၊ ၵူၺ်းၵႃႈၵွပ်ႈၾၢႆႇသိုၵ်း ဢမ်ႇၽွမ်ႉလႄႈ ႁဝ်းဢမ်ႇၸၢင်ႈႁဵတ်းၸိူင်ႉႁိုဝ်။

လွင်ႈၼႆႉ တၢင်းၸဝ်ႈၼႃႈတီႈယႂ်ႇ CCDAC ၵႄႈလိတ်ႈဝႃႈ- “ၵဝ်ၶႃႈၵေႃႈလႆႈငိၼ်းယူႇဝႃႈ ပီႇတုၸိတ်ႉ လၢႆလၢႆၸုမ်း ၵဵဝ်ႇၶွင်ႈ ၸွမ်းယႃႈမဝ်းၵမ်။ ယုမ်ႇယမ်ဝႃႈဢၼ်ပၼ်ႁႅင်းၶဝ်ၵႃႉယႃႈလႄႈသင်၊ ၼင်ႇႁိုဝ် ၸိူဝ်းၶဝ် တေယူႇၾၢႆႇလူင်ပွင်ၸိုင်ႈသေ တိုၵ်းတေႃးၾၢႆႇသၢၼ်ၶတ်းလႄႈသင် ၸိူဝ်းၼႆႉဢမ်ႇၸႂ်ႈ ပေႃႊလသီႊၶွင်လူင်ပွင်ၸိုင်ႈ။ ၵူၺ်းၵႃႈ ဢၼ်ႁဝ်းၶႂ်ႈ လႆႈၼၼ်ႉ ပဵၼ်လၵ်းထၢၼ်/သၢၵ်ႈသေႇ၊ ပေႃးသူၸဝ်ႈမီးလၵ်းထၢၼ်ၵေႃႈႁႂ်ႈသူင်ႇမႃးပၼ်တီႈၵဝ်ၶႃႈ”- ၸဝ်ႈၼႃႈတီႈၸၼ်ႉသုင် တီႈၼေႇပျီႇတေႃႇသင်ႇလၢတ်ႈဝႆႉ ၼင်ႇၼႆ။