ၽူႈၵွၼ်းတပ်ႉၽႅၼ်ၵၢၼ်ပၢႆးတိုၵ်း (ပိဝ်ႇႁႃႇမူး) ပုင်ႇပႃႇၶႅမ် ၸီႉသင်ႇသိုၵ်းဝႃႉ ၼႃႈလိၼ်သိုၵ်း 171 ၸွမ်းလႅၼ် လိၼ်ထႆး ၸိုင်ႈတႆးပွတ်းဢွၵ်ႇၶူင်း၊ သူင်ႇပၼ်သၢႆမၢႆတပ်ႉ။ ၾၢႆႇၼိုင်ႈၵေႃႈ တင်ႈလၢၼ်ႇတီႈ တိၼ်လွႆသၢမ်သုမ် ႁဵတ်းႁႂ်ႈဝႃႉ ၵႂႃႇမႃးယၢပ်ႇ။

ၵူၼ်းၸမ်ၸႂ်ၽူႈၵွၼ်းတပ်ႉဝႃႉၵေႃႉၼိုင်ႈလၢတ်ႈဝႃႈ- ပူၼ်ႉမႃးမိူဝ်ႈဝၼ်းၽတ်း တီႈ 27/06/13 ၼၼ်ႉ ၽူႈၵွၼ်းတပ်ႉ ပိဝ်ႇႁႃႇပုင်ႇပႃႇၶႅမ် ၸႄႈဝဵင်းမိူင်းတူၼ်၊ ႁွင်ႉဢဝ်ၽူႈတႅၼ်းဝႃႉ (တပ်ႉသိုၵ်းမိူင်းဝႃႉၽွမ်ႉႁူမ်ႈ WUSA ၼႃႈလိၼ်သိုၵ်း 171) သေလၢတ်ႈဝႃႈ- ႁႂ်ႈၵဵပ်းသဵၼ်ႈမၢႆတပ်ႉပၢင်သဝ်းဝႃႉၸိူဝ်းမီးၸွမ်းလႅၼ် လိၼ်ထႆး၊ ၼႂ်းပိုၼ်ႉတီႈ ဢၼ်ပိဝ်ႇႁႃႇမူးပုင်ႇပႃႇၶႅမ် ၵုမ်းၵမ်ၼၼ်ႉ မႃးသူင်ႇပၼ်သၢႆမၢႆတပ်ႉ။ ၵူၺ်းၵႃႈ ၾၢႆႇသိုၵ်းဝႃႉတႄႉ ဢမ်ႇတုမ်ႉတွပ်ႇသင်ၶိုၼ်း၊ လႅပ်ႈတေဢမ်ႇမီးၽႅၼ်ၵၢၼ်တႃႇ တေၵဵပ်းသဵၼ်ႈမၢႆ ပၼ်သိုၵ်းမၢၼ်ႈ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းတပ်ႉၵွင်တပ်ႉသိုၵ်းၸိုင်ႈတႆး (RCSS/SSA) ၸဝ်ႈၼိုင်ႈၵေႃႈလၢတ်ႈဝႃႈ- သိုၵ်းမၢၼ်ႈႁႅင်း သိုၵ်းလူတ်ႉၵႃး 20 လမ်းပၢႆ လုၵ်ႉတၢင်းပွတ်းတူၵ်းၶူင်းၶၢမ်ႈမႃးတၢင်းတႃႈသၢင်း၊ ထႅမ်ႁႅင်းသိုၵ်း မႃးတၢင်းၼႃႈလိၼ်ဝႃႉ ၵုမ်းၵမ် ပွတ်းလႅၼ်လိၼ်ထႆး။

“မိူဝ်ႈလဵဝ် သိုၵ်းတႆး RCSS/SSA သမ်ႉၵိုတ်းယိုဝ်းၵၼ်တင်းသိုၵ်းမၢၼ်ႈ၊ ႁဵတ်းလွင်ႈငမ်းယဵၼ်ၵၼ်၊ လွင်ႈၵပ်း သိုပ်ႇတိတ်းတေႃႇ ႁဝ်းၵေႃႈလီမႃး၊ ႁူဝ်ပဝ်ႈလူင်ၵေႃႈတိုၵ်ႉၵႂႃႇၼေႇပျီႇတေႃႇပွၵ်ႈမႃးၵူၺ်း။ ၵူၺ်းၵႃႈ ၾၢႆႇႁဝ်း လီၵၼ်ၶိုၼ်ႈမႃးၵေႃႈ ပေႃးတူၺ်းၾၢႆႇ ဝႃႉသမ်ႉလႅပ်ႈႁၢႆႉၵႂႃႇတိၵ်းတိၵ်း၊ လွင်ႈၵပ်းသိုပ်ႇၶဝ်ႈဢွၵ်ႇၵၼ်ၵေႃႈ လႅပ်ႈၶဵင်ႈၶႅင်မႃးတိၵ်းတိၵ်း။ ၾၢႆႇၼိုင်ႈၵေႃႈ ၼင်ႇႁိုဝ်ႁဝ်း ပေႃးတေႁႅၼ်းသိုၵ်းလေႃႇတိုၵ်းဝႃႉၼၼ်ႉ သိုၵ်းမၢၼ်ႈၸၢင်ႈတိုၵ်းသူၼ်း၊ ၵူၺ်းၵႃႈ ႁဝ်းတႄႉ ၼင်ႇႁိုဝ်ၸၢဝ်းၶိူဝ်းၼႂ်းမိူင်းတႆးတေ ဢမ်ႇလႆႈႁၢင်ႈသိုၵ်း လေႃႇတိုၵ်းၵၼ် မိူၼ်ၼင်ႇၵူႈပွၵ်ႈၼၼ်ႉ တိုၼ်းတေ ၾၢင်ႉၵႅမ်းဝႆႉသတိယႂ်ႇလူင်- ဝႃႈၼႆ။

ၽူႈၵွၼ်းတပ်ႉၵွင် RCSS/SSA သိုပ်ႇထတ်းသၢင်ဝႃႈ- မိူဝ်ႈလဵဝ်ၼႆႉ လႅပ်ႈသိုၵ်းမၢၼ်ႈတေပႆႇပိုတ်ႇသိုၵ်း တိုၵ်းဝႃႉ၊ ၵူၺ်းၵႃႈ လွင်ႈသိုၵ်းမၢၼ်ႈထႅမ်ႁႅင်းသိုၵ်းၼႆႉႁဵတ်းႁႂ်ႈသိုၵ်းဝႃႉယူႇယၢပ်ႇ၊ ၵႂႃႇမႃးႁႃၵိၼ်ယၢပ်ႇ၊ ႁဵတ်းႁႂ်ႈဢမ်ႇၸၢင်ႈႁဵတ်းၵၢၼ်မၢၵ်ႈမီး ၸိူဝ်းၼႆႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ပေႃႈမႄႈၵူၼ်းမိူင်းၸိူဝ်းၸမ်ၸႂ်သွင်ၾၢႆႇ (သိုၵ်းဝႃႉတင်းသိုၵ်းမၢၼ်ႈ) လၢတ်ႈဝႃႈ-မိူဝ်ႈလဵဝ် သိုၵ်းမၢၼ်ႈၵႂႃႇတင်ႈ လၢၼ်ႇ (ၵဵတ်ႉ) တီႈသဵၼ်ႈတၢင်းမိူင်းတူၼ်-မိူင်းသၢတ်ႇၶွႆႈၵၼ် ဢၼ်ၶိုၼ်ႈၸူးလွႆ သၢမ်သုမ် ၵႂႃႇၸူးတၢင်း တႃႈၶီႈလဵၵ်း။ ယွၼ်ႉသိုၵ်းမၢၼ်ႈတင်ႈလၢၼ်ႇသေ သိုၵ်းဝႃႉပႃးၵွင်ႈၵႂႃႇမႃးဢမ်ႇလႆႈ။ ၾၢႆႇၼိုင်ႈၵေႃႈ သိုၵ်းမၢၼ်ႈၸႂ်ႉသိုၵ်းဝႃႉထွၼ်တပ်ႉ မိူၼ်ၼင်ႇတီႈမွၵ်ႇၸီႇလီႇ၊ မီးလွႆၵွင်းမူးမႂ်ႇ တင်းလွႆၵွင်း မူးၵဝ်ႇ။ တီႈလွႆၵွင်းမူးမႂ်ႇၼၼ်ႉ ပဵၼ်တပ်ႉဝႃႉပၵ်းယူႇ၊ လွႆၵွင်းမူးၵဝ်ႇ ၼၼ်ႉ သိုၵ်းမၢၼ်ႈမႃးပၵ်းယူႇ။ တီႈလွႆၵွင်းမူးမႂ်ႇၼႆႉ သိုၵ်းမၢၼ်ႈၵေႃႈၸႂ်ႉသိုၵ်းဝႃႉထွၼ်ပၼ်။ ပေႃးတူၺ်းပွတ်းတွၼ်ႈၼၼ်ႉ သိုၵ်းမၢၼ်ႈ တင်းသိုၵ်းဝႃႉ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ။ ၾၢႆႇၼိုင်ႈၵေႃႈ ယွၼ်ႉသိုၵ်း မၢၼ်ႈမႃးတင်ႈလၢၼ်ႇဝႆႉတီႈ တၢင်းတေၶိုၼ်ႈလွႆသၢမ်သုမ်သေ ၵူတ်ႇထတ်းလူတ်ႉၵႃးဝႃႉႁၢဝ်ႈႁႅင်း၊  ႁဵတ်းႁႂ်ႈသိုၵ်းဝႃႉ ပွတ်းတႂ်ႈတင်းပွတ်း ၼိူဝ်ၵႂႃႇမႃး/တိတ်း တေႃႇၵၼ်ယၢပ်ႇ၊ သိုၵ်းဝႃႉပႃးၵွင်ႈၵႂႃႇမႃးဢမ်ႇလႆႈ၊ သိုၵ်းဝႃႉယူႇယၢပ်ႇဝႆႉယူႇ- ဝႃႈၼႆ။

ၼႃႈလိၼ်ဝႃႉၵုမ်းၵမ် ၼႃႈလိၼ်သိုၵ်း 171 ပွတ်းလႅၼ်လိၼ်ထႆး ၸိုင်ႈတႆးပွတ်းဢွၵ်ႇၶူင်းၼႆႉ သိုၵ်းဝႃႉ ၸိူဝ်းပၵ်းယူႇဝႆႉ မီးတပ်ႉ ၸုမ်း 772 ၊ 775 ၊ 778 ၊ 518 ၊ 248 ၸိူဝ်းၼႆႉ၊ ၼိုင်ႈတပ်ႉၸုမ်းမီး ႁႅင်းသိုၵ်း ဢမ်ႇယွမ်းမွၵ်ႈ 1,500 ။ ပေႃးပႃးႁႅင်းပီႇတုၸိတ်ႉ ၸိူဝ်းၼႆႉ သိုၵ်းဝႃႉမီးႁႅင်းဢမ်ႇယွမ်းမွၵ်ႈ 15,000 ၾၢႆႇသိုၵ်းမၢၼ်ႈလၢမ်းၶၢတ်ႈဝႆႉၼင်ႇၼႆ။