တေမီးၵၢၼ်ၸတ်းပၢင် ၵႃရဝလမ်ႁူဝ် ၽူႈယႂ်ႇၵူၼ်းလူင် ၸိူဝ်းယၢမ်ႈႁဵတ်းၵၢၼ်မိူင်း/ တူင်ႇဝူင်းၵူၼ်း တီႈတႃႈၵုင်ႈ၊ ပိူဝ်ႈတႃႇႁႂ်ႈၵူၼ်းၼုမ်ႇမီးႁႅင်းၸႂ်သိုပ်ႇပုတ်ႈႁဵတ်းၵၢၼ်။

ပေႃးထိုင်မႃးဝၼ်းတီႈ 22/07/13 ၸုမ်းၵူၼ်းၼုမ်ႇႁုၼ်ႈသႅၼ်းပၢၼ်မႂ်ႇၸၢဝ်းၶိူဝ်း ဢၼ်ၼၢႆႇၵျေႃႇဝိၼ်းဢွၼ်ႁူဝ် တေၸတ်း ပၢင်ၵႃရဝလမ်ႁူဝ် (ၵၼ်ႇတေႃး) ၽူႈဢွၼ်ႁူဝ်ၵၢၼ်မိူင်း/ၵၢၼ်တူင်ႇဝူင်းၵူၼ်း တီႈဝတ်ႉပိတၵၢတ်ႈမိၼ်းၵုၼ်း၊ ၼိူဝ်သဵၼ်ႈတၢင်းပျေႇ ၸႄႈဝဵင်းတႃႈၵူင်ႇ ဝဵင်းတႃႈၵုင်ႈ။

ၽူႈယႂ်ႇၵူၼ်းလူင်ၸၢဝ်းၶိူဝ်းၸိူဝ်းလႆႈႁပ်ႉမွၵ်ႇဝႆႉ ပိူဝ်ႈတႃႇလမ်ႁူဝ်တင်းမူတ်းမီး 35 ၵေႃႉ။ ၼႂ်းၼၼ်ႉမီး ၶၢင် 2 ၵေႃႉ၊ ယၢင်းလႅင် 1 ၊ ယၢင်းၽိူၵ်ႇ 3 ၊ ၶျၢင်း 4 ၊ မွၼ်း 2 ၊ ရၶႅင်ႇ 2 ၊ တႆး 2 ၊ ပဢူဝ်း 3 ၊ ထၼု 1 ၊ တဢၢင်း 1 ၊ မၢၼ်ႈ 4 ၸိူဝ်းၼႆႉ။

ၼႂ်းၽူႈယႂ်ႇၵူၼ်းလူင်ၸိူဝ်းၼႆႉ ဢၼ်တူင်ႇဝူင်းၵူၼ်းႁူႉၸၵ်းၼမ်ၼၼ်ႉ ယၢင်းလႅင် ဢႃႇၽီႇတွင်း၊ ယၢင်းၽိူၵ်ႇ ပီႊတိူဝ်ႊၵျယိၼ်ႇ၊ မၼ်းတိၼ်ႇသူၺ်ႇ။ ၶျၢင်း ပူႇၵျိၼ်ႉသျႅၼ်းထင်။ မွၼ်း ၼၢႆႇငူၺ်ႇတဵင်း (ဢႃႇယု 80 ပၢႆ)။ ရၶႅင်ႇ ဢူးတႃႇပၢၼ်း။ တႆး ၸဝ်ႈသိူဝ်ထႅၼ်ႈလႄႈ ၶူးလူင်ၸၢႆးဢွင်ႇထုၼ်း။ ပဢူဝ်း ၽျႃးၶုၼ်ၸဵင်ႇသူၺ်ႇ၊ ဢွင်ႇၶမ်းထီႇ။ မၢၼ်ႈ တၶိၼ်ႇတဵင်းမွင်ႇ၊ တၵူင်ႇတႃႇယႃႇ၊ ဢူးတိၼ်ႇဢူး (NLD) ၊ ဢူးဝိၼ်းတိၼ်ႇ (NLD) ၸိူဝ်းၼႆႉ။

ယိူင်းဢၢၼ်းဢၼ်လႆႈၸတ်းပၢင်လမ်ႁူဝ်ၼႆႉ ပိူဝ်ႈတႃႇႁႂ်ႈၵူၼ်းၼုမ်ႇၵူႈၸၢဝ်းၶိူဝ်း လႆႈႁၼ်ၽူႈ ယႂ်ႇၵူၼ်းလူင် ၸိူဝ်းႁဵတ်း ၵၢၼ်မိူင်း/ ၵၢၼ်တူင်ႇဝူင်းၵူၼ်းၸိူဝ်းၼႆႉသေမီးႁႅင်းၸႂ်၊ မီးၵၢၼ်ႁူမ်ႈမိုဝ်းၵၼ်ႁဵတ်းသၢင်ႈၵၢၼ်ငၢၼ်းၵႂႃႇမိူဝ်းၼႃႈ- ၼႆယဝ်ႉ။

ၽႂ်သေဢမ်ႇဝႃႈ သင်ၶႂ်ႈႁူမ်ႈႁွမ်းတၢၼ်း ဝတ်ႉထုၶူဝ်းၶွင်ၸိုင် ၵပ်းသိုပ်ႇတိတ်းတေႃႇလႆႈတီႈမၢႆၾူၼ်ႊ 0973150182  ၼႆယဝ်ႉ။