သိုၵ်းမၢၼ်ႈထႅမ်ႁႅင်းသိုၵ်းၼႃႈလိၼ် သိုၵ်းတႆး SSPP/SSA
သိုၵ်းမၢၼ်ႈတူင်ႉၼိုင်ထႅမ်ႁႅင်းသိုၵ်း ပွတ်းတွၼ်ႈၼႃႈလိၼ်
ဢၼ်မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် တင်းသိုၵ်းတႆး SSPP/SSA ၊
ၸၢင်ႈပဵၼ်ယွၼ်ႉဢမ်ႇႁၢၼ်ႉၸႂ် ဢၼ်ယဵပ်ႇၺႃးမၢၵ်ႇတၢႆ မိူဝ်ႈပူၼ်ႉမႃး
ဢမ်ႇႁိုင်ၼႆႉ။

ၵဵဝ်ႇၵပ်းလွင်ႈၼႆႉ ၵူၼ်းမိူင်းသူႈလၢတ်ႈဝႃႈ- ပူၼ်ႉမႃးမိူဝ်ႈၶမ်ႈဝၼ်းထိ 17/02/13 (မိူဝ်ႈသိုၼ်း) တင်းၵၢင်ၼႂ် ဝၼ်းထိ 18/02/13 (မိူဝ်ႈဝႃး) လူတ်ႉၵႃးသိုၵ်းမၢၼ်ႈ မွၵ်ႈ 40 လမ်း လုၵ်ႉတၢင်းၵေးသီး-မိူင်းၼွင် လတ်းၼႂ်းၸႄႈဝဵင်းမိူင်းသူႈ၊ မႃးၵိုတ်းလိုဝ်ႈတီႈမိူင်းသူႈသေ သိုပ်ႇၶိုၼ်ႈၵႂႃႇထႅမ်ႁႅင်းသိုၵ်း ပွတ်းတွၼ်ႈၼႃႈလိၼ် ဢၼ်တေႃႇၼႃႈ ၼႃႈလိၼ်တပ်ႉသိုၵ်း ၸိုင်ႈတႆး SSPP/SSA ဝၢၼ်ႈႁႆးၵုမ်းၵမ်- ဝႃႈၼႆ။
ၵူၺ်းၵႃႈ ၵူၼ်းမိူင်းၼွင် ၵေႃႉၼိုင်ႈလၢတ်ႈဝႃႈ- လူတ်ႉၵႃးသိုၵ်းမၢၼ်ႈၼႆႉ ဢမ်ႇၵွမ်ႉၵႃႈလတ်းၽၢၼ်ႇ ၸႄႈဝဵင်းမိူင်းသူႈၵူၺ်း။ တီႈမိူင်းၼွင်ၵေႃႈ ႁၼ်လူတ်ႉၵႃးသိုၵ်းမၢၼ်ႈ မွၵ်ႈ 15 လမ်း၊ ၼိုင်ႈလမ်းလႂ် တၢင်ႇၵူၼ်းမွၵ်ႈ 20-25 ၵေႃႉ မႃးၵိုတ်းတီႈ မိူင်းၼွင်။ ၵႃးသိုၵ်းမၢၼ်ႈၸိူဝ်းၼႆႉ ပေႃးဢွၵ်ႇမိူင်းၼွင်ယဝ်ႉၵေႃႈ ၶဝ်ၵိုတ်းၵႃးသေဢဝ်ၵူၼ်းပႆၶိုၼ်ႈၵႂႃႇ၊ ဢမ်ႇဢဝ်လူတ်ႉၵႃး ၶိုၼ်ႈၵႂႃႇ။ ဢၼ်လႆႈႁၼ်တႄႉ ၼႂ်းၼၼ်ႉ ပႃးတပ်ႉၶလယ 525 ၊ ၵမ်ႈၽွင်ႈယင်းဝႃႈ ပႃးတပ်ႉၸုမ်းလူင် (တပ်ႉမ) 2 တပ်ႉ။ ၵမ်ႈၽွင်းတိုၼ်း လတ်းၵႂႃႇတၢင်းမိူင်းဢွတ်ႇၵမ်းလဵဝ်၊ ၸိူဝ်းၼႆႉပဵၼ်လွင်ႈလၢၵ်ႇလၢႆး၊ မၢင်ၽဝ်ႇၵေႃႈ တေၵႂႃႇယိုဝ်းၶိုၼ်း SSPP/SSA တၢင်းပွတ်းၼမ်ႉလဝ်းႁိုဝ်- ဝႃႈၼႆ။
ၵပ်းၵၢႆႇလွင်ႈၼႆႉ ၽူႈလဵပ်ႈႁဵၼ်းၸဝ်ႈၼိုင်ႈထတ်းသၢင်ဝႃႈ- ဢၼ်ဝႃႈပႃးတပ်ႉၸုမ်းလူင်ၼၼ်ႉ လႅပ်ႈတေဢမ်ႇၸႂ်ႈ၊ ၵူၺ်းၵႃႈ ပေႃးပဵၼ်တပ်ႉၸုမ်းလူင်တႄႉၵေႃႈ ပဵၼ်လွင်ႈသိုၵ်းမၢၼ်ႈႁၢင်ႈသိုၵ်းတေႃႇ သိုၵ်းတႆး SSPP/SSA - ဝႃႈၼႆ။
ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉ လၢတ်ႈဝႃႈ- လွင်ႈၼႆႉ ငဝ်ႈငုၼ်းၵေႃႈႁပ်ႉႁူႉယူႇ၊ တပ်ႉသိုၵ်းမၢၼ်ႈတေ ႁဵတ်းသင် တေၶိုင်သင်ၼၼ်ႉၵေႃႈ ပၵ်းတႃတူၺ်းၸွမ်းယူႇ။
ၵူၼ်းၸိူဝ်းႁူႉႁၼ်ၸွမ်းလွင်ႈၼႆႉၵေႃႉၼိုင်ႈလၢတ်ႈဝႃႈ- သိုၵ်းမၢၼ်ႈလုၵ်ႉတၢင်းမိူင်းသူႈ ၵႂႃႇတၢင်းမိူင်းဢွတ်ႇ၊ လုၵ်ႉတၢင်းမိူင်း ဢွတ်ႇသေ လတ်းၵႂႃႇတၢင်းလႅၼ်ၶႅၼ်ႈမိူင်းသူႈ-တၢင်ႉယၢၼ်း၊ ယွၼ်ႉပိူဝ်ႈပူၼ်ႉမႃးမိူဝ်ႈ ဝၼ်းထိ 09/02/13 သိုၵ်းမၢၼ်ႈ တပ်ႉၶလယ 33 (မိူင်းၵၢဝ်-တၢင်ႉယၢၼ်း) ယွၼ်းၵႂႃႇတူင်ႉၼိုင်ပွတ်းလွႆလၢၼ်း-ၼမ်ႉလဝ်း ၼႃႈလိၼ်ၵုမ်းၵမ်ၶွင်သိုၵ်းတႆး SSPP/SSA ၊ ၵူၺ်းၵႃႈသိုၵ်းတႆးဢမ်ႇပၼ်ဢၼုၺၢတ်ႈ၊ သိုၵ်းမၢၼ်ႈသမ်ႉပူၼ်ႉပႅၼ်ၶဝ်ႈၵႂႃႇသေၵႂႃႇယဵပ်ႇၺႃးမၢၵ်ႇဢၼ်သိုၵ်း တႆးႁၢင်ႈၵၢင်ဝႆႉ။ လွင်ႈၼႆႉ ၵူၼ်းဝၢၼ်ႈဝႃႈ လႅပ်ႈပဵၼ်မၢၵ်ႇမႅင်းၶိူဝ်း၊ လႅပ်ႈတၢႆဢမ်ႇယွမ်းမွၵ်ႈ 4 ၵေႃႉ၊ သိုၵ်းမၢၼ်ႈဢမ်ႇႁၢၼ်ႉ ၸႂ်လွင်ႈၼႆႉသေ ၸၢင်ႈၵႂႃႇတွပ်ႇတႅၼ်းၶိုၼ်း SSPP/SSA ၵေႃႈပဵၼ်လႆႈ၊ ၾၢႆႇၼိုင်ႈၵေႃႈ ယွၼ်ႉပိူဝ်ႈသိုၵ်းမၢၼ်ႈတင်းသိုၵ်းတႆး ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉတၢင်းပွတ်းတွၼ်ႈၼၼ်ႉ- ဝႃႈၼႆ။
ၵူၼ်းမိူင်းသူႈ ၵေႃႉၼိုင်ႈလၢတ်ႈဝႃႈ- ယွၼ်ႉပိူဝ်ႈၽူႈၵွၼ်းငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ) 2 မိူင်းၼွင်ၵႂႃႇမီးယူႇ ဝႆႉတီႈတပ်ႉၶလယ 149 မိူင်းသူႈလႄႈ မၢင်ၽဝ်ႇသိုၵ်းႁူမ်ႇလူမ်ႈမၼ်းၵႂႃႇဢဝ်ႁူမ်ႇလူမ်ႈမၼ်းႁိုဝ်၊ မၢင်ၽဝ်ႇၵေႃႈသိုၵ်းမၢၼ်ႈ မီးၵၢၼ်လႅၵ်ႈလၢႆႈၶၢႆႉပုတ်ႈတပ်ႉၵၼ်ႁိုဝ်- ဝႃႈၼႆ။
ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၼႂ်း ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၵေႃႉၼိုင်ႈလၢတ်ႈဝႃႈ- လွင်ႈၼႆႉ ၸၵၶ 2 မိူင်းၼွင် တင်း ၸၵၶ 17 (မိူင်းပၼ်ႇ) လႅၵ်ႈလၢႆႈၶၢႆႉတီႈယူႇ ၵၼ်ၵူၺ်း၊ ၵူၺ်းၵႃႈ ၵူႈၾၢႆႇၵေႃႈဢမ်ႇ လူမ်လၢမ်မဝ်မၢင်၊ ပၵ်းတႃပႂ်ႉတူၺ်းၸွမ်းယူႇ- ဝႃႈၼႆ။
Tags: News, War
