ဢူးဢွင်ႇမိၼ်း တင်းၸုမ်းၸၢဝ်းၶိူဝ်း UNFC တေႁူပ်ႉဢုပ်ႇဢူဝ်းၵၼ် ၼႂ်းၵဵင်းမႆႇ။ ႁူဝ်သိူဝ် SNLD ဝႃႈ ဢမ်ႇလႆႈသၢၼ်ၶတ်း ၸွမ်းၼင်ႇဢၼ်ပဵၼ်ၶၢဝ်ႇလိုဝ်း၊ ယွၼ်ႉပိူဝ်ႈၶတ်းၸႂ်ၵေႃႇသၢင်ႈလွင်ႈယုမ်ႇယမ်ၵၼ်။
ဝၼ်းထိ 20/02/13 တေမီးၵၢၼ်ႁူပ်ႉထူပ်းၵၼ်ဝူင်ႈၵၢင် ဢူးဢွင်ႇမိၼ်း [ၵႅမ်ႁူဝ်ပဝ်ႈ(မၢႆ 2) ၶွမ်ႊမတီႊၶိုင်ပွင် လွင်ႈငမ်းယဵၼ် ၸိုင်ႈမိူင်းႁူမ်ႈတုမ် (UPWC)]  တင်း ႁူမ်ႈတုမ်ၾႄႊၻရိူဝ်ႊၵူႈၸၢဝ်းၶိူဝ်း (UNFC) ၼႂ်းၵဵင်းမႆႇ။ ၵူၺ်းၵႃႈ ၵဵဝ်ႇၵပ်းလွင်ႈၼႆႉ မီးၶၢဝ်ႇလိုဝ်းဝႃႈ ငဝ်ႈငုၼ်းၻီႊမွၵ်းၶရေႊသီႊၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) သၢၼ်ၶတ်း၊ ၵွပ်ႈဝႃႈ UNFC ဢမ်ႇတၢင်တူဝ်ၸၢဝ်းၶိူဝ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SNLD ၸၢႆးလဵၵ်ႉ လၢတ်ႈဝႃႈ- လွင်ႈသၢၼ်ၶတ်းၼႆႉ ဢမ်ႇၸႂ်ႈၵၢင်ၸႂ် SNLD ၊ ႁဝ်းၶႃႈဢမ်ႇ မီးပေႃႇလသီႇ၊ ယွၼ်ႉဝႃႈ ဢၼ်ႁဝ်းၶႃႈၶိုင်ပွင် ႁဵတ်းသၢင်ႈယူႇၼႆႉ ပဵၼ်ၵၢၼ်ၵေႃႇသၢင်ႈလွင်ႈယုမ်ႇယမ်ပိူဝ်ႈတႃႇဝၢၼ်ႈမိူင်းႁဝ်း။ ၸိူင်ႉႁိုဝ်ၵေႃႈလီ ဢၼ်ႁဝ်းဢွၼ်ႁူဝ်ႁဵတ်းသၢင်ႈယူႇၼႆႉ လိုၼ်းသုတ်း ပေႃးထိုင်ၸၼ်ႉ ၸိုင်ႈမိူင်းႁူမ်ႈတုမ် တိုၼ်းတေ လႆႈၶဝ်ႈပႃးၵူႈၾၢႆႇၾၢႆႇ၊ ၵူႈၸၢဝ်းၶိူဝ်း ပႃးၸဵမ် UNFC ၊ ၼွၵ်ႈမိူင်းၵေႃႈလီ ၼႂ်းမိူင်းၵေႃႈလီ ႁဝ်းတိုၼ်းတေလႆႈၵႂႃႇၸွမ်းၵၼ်၊ ၵွပ်ႈၼႆ ဢၼ်ဢူးဢွင်ႇမိၼ်းတင်း UNFC ႁူပ်ႉထူပ်းၵၼ်ၼႆႉ ဢမ်ႇမီးလွင်ႈသၢၼ်ၶတ်းသင်- ဝႃႈၼႆ။