ဢိင်ၼိူဝ်မီးၵၢၼ်ၶႃႈႁႅမ်ၵၼ် တီႈပွၵ်ႉတႂ်ႈ ဝဵင်းၼမ်ႉၶမ်း ပူၼ်ႉမႃးမိူဝ်ႈဝၼ်းထိ 06/02/13 သေ ၸၢႆး ဢၢႆႈပဝ်း ႁူဝ်ပဝ်ႈပႃႊတီႊသိူဝ်ၽိူၵ်ႇ တုၵ်းယွၼ်းႁႂ်ႈၸဝ်ႈၼႃႈတီႈမၢၼ်ႈ ၼမ်ႉၶမ်း ၸတ်းၵၢၼ်ပၼ် ႁႂ်ႈမီးလွင်ႈၽဵင်ႇပဵင်း ပဵၼ်ထမ်း။

“ႁူဝ်ပဝ်ႈႁဝ်း ၸၢႆးဢၢႆႈပဝ်း သိုပ်ႇၾူၼ်ႊၸူးတီႈလုမ်းၸႄႈတွၼ်ႈ၊ တုၵ်းယွၼ်းဝႃႈ ႁႂ်ႈထတ်းသၢင်ပၼ် လွင်ႈၶႃႈႁႅမ်ၵၼ်တၢႆၼၼ်ႉ ႁႂ်ႈမီးလွင်ႈပဵၼ်ထမ်း/တြႃးၽဵင်ႇပဵင်း။ ႁဝ်းၶႃႈပႃႊတီႊသိူဝ်ၽိူၵ်ႇတႄႉ လွင်ႈၶဝ် တေၶႂ်ႈဢဝ်လိူင်ႈၶိုၼ်ႈလုမ်း (ၸွႆးတြႃး) ႁဵတ်းၶၻီး(ဢမု) ႁိုဝ်  ဢမ်ႇႁဵတ်းၼၼ်ႉ လႆႈပၼ်တၢင်းၶႆႈၸႂ် တီႈၾၢႆႇပေႃႈမႄႈၵူၼ်းတၢႆၼၼ်ႉယဝ်ႉ၊ ဢဝ်ၸႂ်ၶဝ်ဝႃႈမူတ်းမူတ်း၊ ႁဝ်းဢမ်ႇလႆႈ တိုၵ်းသူၼ်းသင်။ ဢၼ်ႁဝ်းၶႃႈ လႆႈၼႄႉၼမ်းပၼ်တႄႉ ဢၼ်ႁႅမ်ႈၵၼ်တၢႆၼႆႉ ပဵၼ်ၵၢၼ်ၶႃႈႁႅမ်လူၺ်ႈတင်ႈၸႂ်ၶႃႈႁႅမ်ၵႃႈဢမ်ႇ တၢႆဢမ်ႇၸူး ၼၼ်ႉယဝ်ႉ”- လုၵ်ႈၸုမ်းပႃႊတီႊသိူဝ်ၽိူၵ်ႇ တီႈၼမ်ႉၶမ်းၵေႃႉၼိုင်ႈလၢတ်ႈၼင်ႇၼႆ။

ၵူၼ်းဝဵင်းၼမ်ႉၶမ်းၶဝ် ဢွၼ်ၵၼ်မႆႈၸႂ်ဝႃႈ- လွင်ႈၶႃႈႁႅမ်ၵၼ်ပွၵ်ႈၵမ်းၼႆႉ ၵူဝ်မၼ်းယဵၼ်းပဵၼ်လွင်ႈ သုၵ်ႉယုင်ႈ မိူၼ်ၼင်ႇတီႈ မိူင်းရၶႅင်ႇ။ သင်ၸိူဝ်ႉဝႃႈၸဝ်ႈၼႃႈတီႈၶဝ် ဢမ်ႇၸတ်းၵၢၼ်ပၼ်ႁႂ်ႈၽဵင်ႇပဵင်း/ ပဵၼ်ထမ်းတႄႉ ၵူၼ်းၼုမ်ႇၶဝ်ၵေႃႈၶပ်းၶိုင်ဝႆႉ တေၼႄၵၢင်ၸႂ်သၢၼ်ၶတ်း တုၵ်းယွၼ်းၵႂႃႇ- ၵူၼ်းၼုမ်ႇဝဵင်း ၼမ်ႉၶမ်း  ၵေႃႉၼိုင်ႈ လၢတ်ႈၼႄၼင်ႇၼႆ။

ၵေႃႉဢၼ်မႃးၶႃႈႁႅမ်ၼႆႉ ၸိုဝ်ႈဝႃႈ ယႄးဢွင်ႇထူၺ်း၊ မီးၸိုဝ်ႈၶႄႇဝႃႈ လီႇၾၼ်။ ပဵၼ်လုၵ်ႈၸၢႆးလုင်းထုၼ်းမိၼ်ႉ- ပႃႈမႄႇၸဵင်ႇ၊ ၸဝ်ႈၶွင်ၼမ်ႉၵိၼ်ၶွမ်ႊပၼီႊငူၺ်ႇၼၵႃး၊ ပဵၼ်လၢၼ်ၸၢႆး ဢူးၵျေႃႇမျိၼ်ႉ ၸိုဝ်ႈၶႄႇ လီႇယူင်ႇၶျႅင် (ႁူဝ်ၼႃႈပီႇတုၸိတ်ႉပၢၼ်းသေး ၵေႃႉပဵၼ်ၽွင်းတႅၼ်းၸႄႈမိူင်း)။  ၵေႃႉဢၼ်တၢႆ ၸိုဝ်ႈၸၢႆးဢၢႆႈလိူၼ်၊ ပေႃႈၸိုဝ်ႈၸၢႆးသၢမ်၊ မႄႈၸိုဝ်ႈၼၢင်းထေး။ ၸၢႆးသၢမ် ၵေႃႉပဵၼ်ပေႃႈၸၢႆးဢၢႆႈလိူၼ်ၼႆႉ  ပဵၼ်လၢၼ်ၸၢႆး ႁူဝ်ၼႃႈပႃႊတီႊသိူဝ်ၽိူၵ်ႇ ၸၢႆးဢၢႆႈပဝ်း၊ ၽွင်းတႅၼ်းသၽႃးၸႄႈမိူင်းမိူင်းတႆး၊ ၽွင်းလူင်ႁွင်ႈၵၢၼ် ၾၢႆႇမိူင်ႁႄႈ- ၵူၼ်းၼမ်ႉၶမ်းသိုပ်ႇလၢတ်ႈၼင်ႇၼႆ။

“မိူဝ်ႈၶဝ်တႄႇမီးပၼ်ႁႃၵၼ်၊ ၽိတ်းၽႅၵ်ႇၵၼ်တႄႉ ပဵၼ်တီႈပိူၼ်ႈဝႆႉလူတ်ႉၶိူင်ႈ တီႈႁိမ်းပိူၼ်ႈၸတ်းပၢင်ပွႆး ဝၼ်းမိူင်းတႆး။ မိူဝ်ႈၼၼ်ႉ ၵွပ်ႈမီးၵူၼ်းဢဝ်ႁူမ်ႇလူမ်ႈလႄႈ ဢမ်ႇပဵၼ်ပၼ်ႁႃၵၼ်ႁႅင်းယႂ်ႇ၊ ၵွပ်ႈမီးၵူၼ်း ဢဝ်ႁူမ်ႇလူမ်ႈမႃးၶႄ။ ဝၢႆးၼၼ်ႉမႃးၵေႃႈ မႃးၶႃႈႁႅမ်ၵၼ်တၢႆတီႈပွၵ်ႉတႂ်ႈ၊ ၵွပ်ႈဝႃႈၶမ်ႈၼၼ်ႉ တီႈပွၵ်ႉတႂ်ႈ ဢမ်ႇဝႆႉ ႁူမ်ႇလူမ်ႈ- ၽူႈၵွၼ်းပွၵ်ႉၵေႃႉၼိုင်ႈလၢတ်ႈၼႄ။

ၽူႈၵွၼ်းပွၵ်ႉသိုပ်ႇလၢတ်ႈဝႃႈ- ဢွၼ်ၼႃႈၼႆႉ မီးပၢင်ၵုမ်လႄႈလၢတ်ႈဝႆႉၼႂ်းပၢင်ၵုမ်ဝႃႈ- ၼႂ်းၶၢဝ်းတၢင်းၸတ်း ပၢင်ပွႆး ဝၼ်းမိူင်းတႆး ဝၼ်းထိ 5-6-7/02/13 ၼၼ်ႉ တေလႆႈဝႆႉႁူမ်ႇလူမ်ႈၵူႈပွၵ်ႉ၊ ၵူၼ်းၼႂ်းပွၵ်ႉၽႂ်ပွၵ်ႉမၼ်း တေလႆႈၸတ်းၵၼ်သေၵုမ်းၶိုၼ်း။ ပၢင်ၵုမ်ၼၼ်ႉ ၽူႈၵွၼ်းပွၵ်ႉတႂ်ႈၵေႃႈမႃးၶဝ်ႈႁူမ်ႈၸွမ်းယူႇ၊ ၵူၺ်းၵႃႈ ၽိူဝ်ႇထိုင်မိူဝ်ႈဝၼ်းထိ 6 ဢၼ်မီးၵၢၼ်ၶႃႈႁႅမ်ၵၼ်တၢႆၼၼ်ႉ ဢမ်ႇႁၼ်မီးၵူၼ်းဢဝ်ႁူမ်ႇလူမ်ႈသင်- ဝႃႈၼႆ။

ၵဵဝ်ႇၵပ်းလွင်ႈၼႆႉ ထိုင်မႃးမိူဝ်ႈဝၼ်းထိ 10 ၵၢင်ၶမ်ႈ၊ ၸဝ်ႈၼႃႈတီႈပလိၵ်ႈတီႈႁူင်းပလိၵ်ႈၼမ်ႉၶမ်း ႁွင်ႉဢဝ်ၵူၼ်းဢၼ်ႁူႉႁၼ် ၸွမ်းၼႂ်းပၢင်ၶႃႈႁႅမ်ၵၼ်ၼၼ်ႉ ၵႂႃႇတွင်ႈထၢမ်တီႈႁူင်းပလိၵ်ႈ။ မၼ်းၵေႃႈ လၢတ်ႈၼႄ လွင်ႈဝႃႈၼႂ်းပၢင်ၶႃႈႁႅမ်ၼၼ်ႉ ပႃးၽႂ်လၢႆလၢႆ လႄႈၽႂ်ပဵၼ်ၵူၼ်းၶႃႈႁႅမ်။

မိူဝ်ႈတႄႇၵိူတ်ႇလိူင်ႈသေ ပလိၵ်ႈၶဝ်တိၺွပ်းလႆႈ ၵူၼ်းၵေႃႉဢၼ်ပႃးၼႂ်းၸုမ်းၵူၼ်းၶႃႈႁႅမ်ၵေႃႉၼိုင်ႈသေ တွင်ႈထၢမ်တူၺ်းၼၼ်ႉ မိူဝ်ႈတႄႇမၼ်း မၼ်းၸၢႆးဢမ်ႇႁပ်ႉဝႃႈလႆႈဢဝ်မိတ်ႈတႅင်း၊ လႆႈဢဝ်သၢႆဢႅဝ်သေ ၽတ်ႉ/ပေႃႉၵူၺ်း။ မိူဝ်ႈၼၼ်ႉမေႃယႃၶဝ်မႃး ၵူတ်ႇထတ်းသေတႅမ်ႈမၢႆၵႂႃႇဝႃႈ ပဵၼ်ၵၢၼ်ဢဝ်သၢႆဢႅဝ်ၽတ်ႉ ပေႃႉၵူၺ်း။ ၵူၺ်းၵႃႈ ၵွပ်ႈၸွမ်းလင်တူဝ်တၢႆလႄႈသင်၊ ၸွမ်းမိုဝ်း ၸွမ်းၼႃႈၵေႃႈမီးႁွႆးမိတ်ႈတႅင်းဝႆႉလႄႈ ဢၼ်မေႃယႃၶဝ်တႅမ်ႈမၢႆၵႂႃႇၼၼ်ႉ ဢဝ်သၢႆဢႅဝ်ၽတ်ႉၼႆၵူၺ်းလႄႈ မိူဝ်ႈဝၼ်းထိ 11 ၼႆႉ တေမီးၵၢၼ်ၵႂႃႇ ၶုတ်းဢဝ်ၶၢပ်ႈတူဝ်တၢႆမၼ်းၶိုၼ်းမႃးသေ မေႃယႃၶဝ်တေမႃးတႅမ်ႈမၢႆထႅင်ႈၵမ်းၼိုင်ႈ- ၼႆယူႇ။

မိူဝ်ႈဝႃး (11/02/13)ၼႆႉ ပိူဝ်ႈတႃႇၵႂႃႇၶုတ်းတူဝ်တၢႆၽူႈတၢႆမႃးၶိုၼ်းၼၼ်ႉ ၵူၼ်းၼုမ်ႇပွၵ်ႉတႂ်ႈမွၵ်ႈ 30 ပၢႆ ၵႂႃႇမီးယူႇတီႈႁိူၼ်း ၵူၼ်းတၢႆဝႆႉ။ ၽွင်းၼၼ်ႉ ပလိၵ်ႈၾၢႆႇႁူမ်ႇလူမ်ႈ 2 ၵေႃႉ တီႈၼမ်ႉၶမ်း မႃးလၢတ်ႈၼႄ ၵူၼ်းဝၢၼ်ႈဝႃႈ ပိူဝ်ႈတႃႇၵႂႃႇၶုတ်းတူဝ်တၢႆ မၼ်းၶိုၼ်းမႃးၼႆႉၸႂ်ႈယဝ်ႉ၊ ၵူၺ်းၵႃႈ ပေႃးဝႃႈဢမ်ႇမီး ၽူႈႁူႉႁၼ်ၸွမ်း (သၢၵ်ႈသေႇ) ၊ ဢမ်ႇမီးၵူၼ်းတင်းၼမ်၊ ႁဝ်းၵႂႃႇၶုတ်း ႁင်းၵူၺ်းႁဝ်းသေဢဝ်မႃးၸိုင် ၾၢႆႇႁဝ်းထုၵ်ႇမႅၼ်ႈယူႇၵေႃႈ ၵူဝ်မၼ်းပဵၼ်ၾၢႆႇၽိတ်း။ ၵွပ်ႈၼၼ် မိူဝ်ႈၽုၵ်ႈႁဝ်းၸင်ႇၵွႆႈၵႂႃႇၶုတ်း ၸွမ်းၵၼ်- ဝႃႈၼႆ။

မိူဝ်ႈဝႃးၼႆႉ တီႈပႃႇႁဵဝ်ႈၼၼ်ႉ ပဵၼ်ၾၢႆႇသိုၵ်းၶဝ်ၵႂႃႇဢဝ်ႁူမ်ႇလူမ်ႈဝႆႉ။ ၵူၼ်းဝၢၼ်ႈၵမ်ႈၼမ်မႆႈၸႂ်ဝႃႈ ၵူဝ်ၾၢႆႇၸုမ်းပီႇတုၸိတ်ႉ ပၢၼ်းသေးၶဝ်ၵႂႃႇ ဢဝ်တူဝ်တၢႆၶၢႆႉတီႈ/ႁိုဝ်ႁၢႆလၢႆပႅတ်ႈ။ တီႈႁူင်းပလိၵ်ႈၼမ်ႉၶမ်းၵေႃႈ လႆႈႁၼ် ပီႇတုၸိတ်ႉပၢၼ်းသေးၶဝ် ၶဝ်ႈဢွၵ်ႇၵႂႃႇမႃးယူႇတင်းဝၼ်း၊ ပေႃးမိူၼ်ၼင်ႇပွႆးၵိုၼ်းဢိုၵ်ႉဢိုၵ်ႉ- ပီႈၼွင်ႉၽူႈတၢႆ ၵေႃႉၼိုင်ႈလၢတ်ႈၼင်ႇၼႆ။

ၵူၼ်းၼုမ်ႇပွၵ်ႉတႂ်ႈၵေႃႉၼိုင်ႈၵေႃႈလၢတ်ႈဝႃႈ- ႁဝ်းၶႃႈတႄႉ ၶႂ်ႈႁႂ်ႈၶၻီး (ဢမု)ဢၼ်ၼႆႉ မီးလွင်ႈတဵင်ႉထမ်းသေ ယဝ်ႉတူဝ်ႈၵႂႃႇ လီငၢမ်း၊ ပဵၼ်ၵူၼ်းမီးငိုၼ်းသေဢဝ်ငိုၼ်းယဵတ်ႈမွၼ် ယဝ်ႉၵႂႃႇမိူၼ်ၼင်ႇပၢၼ်ၸဝ်ႈဢႃႇၼႃႇ သိုၵ်းၸိူဝ်းၼၼ်ႉ ဢမ်ႇၶႂ်ႈႁႂ်ႈမၼ်း ပဵၼ်- ဝႃႈၼႆ။

ၵူၼ်းၸိူဝ်းၶႃႈႁႅမ်တၢႆတင်းမူတ်း မီး 4 ၵေႃႉ၊ ၼႂ်း 4 ၵေႃႉၼၼ်ႉ ပလိၵ်ႈၶဝ်တိလႆႈၵေႃႉလဵဝ်၊ ၸိူဝ်းၵိုတ်းလိူဝ် 3 ၵေႃႉၼၼ်ႉ ပၢႆႈၶဝ်ႈ ၼႂ်းမိူင်းၶႄႇယဝ်ႉ၊ ၼင်ႇႁိုဝ်တေတိၺွပ်းလႆႈၵူၼ်းၸိူဝ်းပၢႆႈၼၼ်ႉ ၾၢႆႇပလိၵ်ႈမၢၼ်ႈ ယွၼ်းတၢင်းၸွႆႈထႅမ်ၵႂႃႇတီႈၸဝ်ႈၼႃႈတီႈ မိူင်းၶႄႇၶဝ်၊ ႁႂ်ႈႁူမ်ႈမိုဝ်းၵၼ် လမ်းတိၺွပ်းယူႇ- ၸဝ်ႈၼႃႈတီႈ ပလိၵ်ႈ မၢၼ်ႈၶဝ်လၢတ်ႈၼင်ႇၼႆ။