ၶၢဝ်းတၢင်းယဵမ်ႈမိူင်းၶၢင် ၶွင်ၽွင်းတႅၼ်းၵူၼ်းမိူင်း ၵုၼ်ႁဵင် တင်းႁူဝ်ပဝ်ႈသၽႃးၼၼ်ႉ ၸုမ်းၵၢၼ်မိူင်းၶၢင် တၢင်ႇလၢတ်ႈလွင်ႈ လိၵ်ႈႁူမ်ႈမၢႆပၢင်လူင်၊ ၶႂ်ႈၵေႃႇတင်ႈ ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇလႄႈ ႁႂ်ႈၵေႃႇတင်ႈပၼ် ၶိုၼ်းတပ်ႉၸၢဝ်းၶိူဝ်း ၶၢင် ၶျၢင်း တႆး။

မိူဝ်ႈဝၼ်းထိ 09/02/13 ၼၢင်းဝႃႇၼု ၽွင်းတႅၼ်းသၽႃးၵူၼ်းမိူင်း ၵုၼ်ႁဵင် (ၸိုင်ႈတႆးပွတ်းၸၢၼ်း) တင်း ႁူဝ်ပဝ်ႈသၽႃး (တူႇရသူၺ်ႇမၢၼ်း) ဢိၵ်ႇၸုမ်းၸိူဝ်းၽွင်းတႅၼ်း ၵူၼ်းမွၵ်ႈ 40 ၵေႃႉ ၵႂႃႇဢႅဝ်ႇယဵမ်ႈမိူင်းၶၢင်၊ ပိူဝ်ႈတႃႇယင်ႇၵၢင်ၸႂ်ၵူၼ်း မိူင်းလႄႈ ပိူဝ်ႈတႃႇလွင်ႈငမ်းယဵၼ်၊ ၵႂႃႇထိုင်ဝဵင်း ပူႇတႃႇဢူဝ်ႇ၊ မိတ်ႉၵျီးၼႃး၊ မိူင်းယၢင်း (မူဝ်းၺိၼ်း) ၸိူဝ်းၼႆႉ။

တီႈဝဵင်းပူႇတႃႇဢူဝ်ႇၼၼ်ႉ ၵူၼ်းမိူင်းတၢင်ႇလၢတ်ႈတုၵ်းယွၼ်း ႁႂ်ႈၸွႆႈၵႄႈလိတ်ႈပၼ်ႁႃလွင်ႈၶဝ်ႈသၢၼ်ၵႃႈ၊ လွင်ႈသဵၼ်ႈ တႃႈသၢႆတၢင်းယၢပ်ႇ လူတ်ႉၵႃးၵႂႃႇမႃးယၢပ်ႇ။ ႁႂ်ႈသၢႆၵၢၼ်ဝိၼ် ဝိၼ်ပၼ်ၼမ် ဢိတ်းၼိုင်ႈ။ တီႈမိတ်ႉၵျီးၼႃးၸုမ်းၵၢၼ် မိူင်းၶၢင် တၢင်ႇလၢတ်ႈလွင်ႈငမ်းယဵၼ်၊ လွင်ႈလိၵ်ႈႁူမ်ႈမၢႆပၢင်လူင်၊ လွင်ႈၶၢင်ယိူင်းဢၢၼ်းၵေႃႇတင်ႈၸိုင်ႈမိူင်းႁူမ်ႈတုမ် ၸိုၼ်ႈၸၢင်ႇ၊ လွင်ႈၶႂ်ႈႁႂ်ႈမီးတပ်ႉသိုၵ်းၸိုင်ႈမိူင်းႁူမ်ႈတုမ်၊ မိူၼ်ၼင်ႇတပ်ႉ တႆး/ တပ်ႉၶျၢင်း/ တပ်ႉၶၢင်ၸိူဝ်းၼႆႉ ႁႂ်ႈၵေႃႇ တင်ႈပၼ်ၶိုၼ်း။ ၼွၵ်ႈသေၼၼ်ႉ ယင်းတုၵ်းယွၼ်း သုၼ်ႇလႆႈ ၽွင်းငမ်းတူဝ်ၵဝ်ႇ၊ သုၼ်ႇလႆႈပွင်မၢႆမီႈၸိူဝ်းၼႆႉ- ၼၢင်းဝႃႇၼု လၢတ်ႈၼႄၼင်ႇၼႆ။

တၢင်းမိူင်းယၢင်း (မူဝ်းၺိၼ်း) ဢၼ်ပဵၼ်ပိုၼ်ႉတီႈပီႈၼွင်ႉတႆးလႅင်၊ တႆးသႃ၊ တႆးၶမ်းတီႈယူႇသဝ်းၼမ်ၼၼ်ႉ ပီႈၼွင်ႉတႆး မိူင်းၶၢင်တၢင်ႇလၢတ်ႈတုၵ်းယွၼ်းဝႃႈ ၶႂ်ႈႁႂ်ႈၶတ်းၸႂ်လွင်ႈငမ်းယဵၼ်ဝႆးဝႆး၊ ၵွပ်ႈဝႃႈဢၼ်ပဵၼ်သိုၵ်းသိူဝ် ၼႂ်းမိူင်းၶၢင်ၼႆႉ ပီႈၼွင်ႉတႆးၺႃးၽေးသိုၵ်းတင်း သွင်ၾၢႆႇ (မၢၼ်ႈတင်းၶၢင်ၼင်ႇၵၼ်)၊ ဢၼ်ၺႃးၸၢၵ်ႇ တိၺွပ်းႁၢပ်ႇၶျေႃး၊ လူလၢႆၸိူဝ်းၼႆႉ ၵမ်ႈၼမ်ပဵၼ်ပီႈၼွင်ႉတႆး- ၼႆယူႇ။

ၵဵဝ်ႇၵပ်းလွင်ႈၼႆႉ ၼႂ်းထႃၼၽွင်းတႅၼ်းၵေႃႉၼိုင်ႈသေ ၼၢင်းဝႃႇၼု သင်ႇလၢတ်ႈဝႃႈ- လွင်ႈဢၼ်ၵူၼ်းမိူင်းတၢင်ႇလၢတ်ႈ မႃးၸိူဝ်းၼႆႉ ႁဝ်းၶႃႈၵေႃႈၸႂ်ဢမ်ႇလီၸွမ်း၊ ႁဝ်းၶႃႈတေၶတ်းၸႂ်ၵႄႈလိတ်ႈပၼ်ႁႃၵႂႃႇ။ မိူဝ်ႈလဵဝ် ထိုင်ၶၢဝ်းယၢမ်ႈလူင်ပွင်ၸိုင်ႈ မၢၼ်ႈတင်းၸၢဝ်းၶိူဝ်းထုၵ်ႇလႆႈ ဢုပ်ႇဢူဝ်းၵၼ်လွင်ႈၵၢၼ်မိူင်း၊ ပေႃးဢမ်ႇဢုပ်ႇၵၢၼ်မိူင်းၸိုင် ႁၼ်ထိုင်ႈဝႃႈ ပိူဝ်ႈတႃႇ သိုပ်ႇပဵၼ်ၸိုင်ႈမိူင်းႁူမ်ႈတုမ်ၵႂႃႇၸွမ်းၵၼ်ၼၼ်ႉ တိုၼ်းယၢပ်ႇ။ ပိူဝ်ႈတႃႇ ဢုပ်ႇၵၼ်ၵၢၼ်မိူင်း၊ လွင်ႈၸိုင်ႈမိူင်းႁူမ်ႈတုမ် ၸိုၼ်ႈၸၢင်ႇ (ၾႄႊၻရိူဝ်ႊလ်) ၼႆႉ လူင်ပွင်ၸိုင်ႈမၢၼ်ႈၵေႃႈလီ၊ ၸုမ်းၸၢဝ်းၶိူဝ်းၵေႃႈလီ၊ ထုၵ်ႇလႆႈလဵပ်ႈႁဵၼ်းႁူႉပွင်ႇၸႂ်ဝႆႉ- ဝႃႈၼႆ။