သိုၵ်းမၢၼ်ႈပူၼ်ႉပႅၼ်ၶဝ်ႈၵႂႃႇတူင်ႉၼိုင် ၼႂ်းပိုၼ်ႉတီႈ တပ်ႉတႆး SSPP/SSA ၵုမ်းၵမ် ပွတ်းၼမ်ႉလဝ်း
ၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ၊ ယဵပ်ႇၺႃး မၢၵ်ႇတႅၵ်ႇတိူဝ်ႉတၢႆဝၢတ်ႇသေ သွင်ၾၢႆႇမီးလွင်ႈၶဵင်ႈၶႅင် သိုၵ်းတေႃႇၵၼ်မႃး။

ၵဵဝ်ႇၵပ်းလွင်ႈၼႆႉ သိုၵ်းမၢၼ်ႈတပ်ႉၶလယ 33 ပွင်ႇၶၢဝ်ႇၸူးတီႈတပ်ႉသိုၵ်းၸိုင်ႈတႆး SSPP/SSA တပ်ႉၵွင် 192 ဢၼ်ပၵ်း တီႈလွႆလၢင်းဝႃႈ တေၵႂႃႇတူင်ႉၼိုင်ၼႂ်းပိုၼ်ႉတီႈၶွင် SSPP/SSA ပွတ်းတွၼ်ႈၼၼ်ႉ၊ ၵူၺ်းၵႃႈ ၾၢႆႇတပ်ႉသိုၵ်းတႆး ဢမ်ႇပၼ် ဢၼုၺၢတ်ႈ။ ဝၼ်းထိ 09/02/13  ငႃးသိုၵ်းမၢၼ်ႈတပ်ႉၶလယ 33 ႁႅင်းသိုၵ်း 60 ပၢႆ ပူၼ်ႉပႅၼ်ၽိုတ်ႉၶဝ်ႈၵႂႃႇတူင်ႉၼိုင် ပွတ်းတွၼ်ႈၼၼ်ႉသေ ၵႂႃႇယဵပ်ႇၺႃးမၢၵ်ႇဢၼ်သိုၵ်းတႆးႁၢင်ႈၵၢင်ဝႆႉ တၢႆ ဝၢတ်ႇတင်းမူတ်း 4 ၵေႃႉ။ ယွၼ်ႉလွင်ႈၼႆႉသေ တေႃႇထိုင်မိူဝ်ႈလဵဝ် ယင်းတိုၵ်ႉမီးလွင်ႈပႆႇႁၢၼ်ႉၸႂ် ၼိူဝ်ၵၼ်- ၽူႈမီးၸၼ်ႉၼႂ်းတပ်ႉသိုၵ်းၸိုင်ႈတႆး SSPP/SSA ၵေႃႉၼိုင်ႈ လၢတ်ႈၼင်ႇၼႆ။

ၽူႈၵဵဝ်ႇၶွင်ႈၵေႃႉၼိုင်ႈလၢတ်ႈဝႃႈ- သိုၵ်းမၢၼ်ႈၵႂႃႇၽႃႇၺႃးမၢၵ်ႇဢၼ်သိုၵ်းတႆးၵၢင်ဝႆႉပိူဝ်ႈတႃႇႁူမ်ႇလူမ်ႈသေ တၢႆ 4 ၵေႃႉ။ ၵူၺ်းၵႃႈ ၸဝ်ႈႁၢၼ်ၸၢႆးလႃႉ ၽူႈၶၢၼ်ပၢၵ်ႇ SSPP/SSA လၢတ်ႈဝႃႈ- ဢၼ်ၾၢႆႇႁဝ်း ဢမ်ႇဢၼုၺၢတ်ႈပၼ်သေ သိုၵ်းမၢၼ်ႈ ပူၼ်ႉပႅၼ်ၶဝ်ႈမႃးၼႂ်းၼႃႈလိၼ်ႁဝ်းၼၼ်ႉမႅၼ်ႈယူႇ၊ ၵူၺ်းၵႃႈ ႁဝ်းဢမ်ႇလႆႈပဵၼ်ပၢင်တိုၵ်းၵၼ်၊ လွင်ႈသိုၵ်းမၢၼ်ႈမီးၵၢၼ် တၢႆဝၢတ်ႇ ယွၼ်ႉယဵပ်ႇၺႃးမၢၵ်ႇၼၼ်ႉ ယူႇတီႈသုၼ်ႇတူဝ်တႄႉပႆႇယိုၼ်ယၼ်လႆႈ။ ၵူၺ်းၵႃႈ ပွတ်းတွၼ်ႈၼၼ်ႉတႄႉမီး လွင်ႈၶဵင်ႈၶႅင်သိုၵ်းၵၼ် ၽွင်ႈယူႇ- ဝႃႈၼႆ။

ၾၢႆႇဢွၵ်ႇတၢင်းၵႃးတၢင်ႉယၢၼ်း-မိူင်းသူႈ၊ ၾၢႆႇတူၵ်းၼမ်ႉၶူင်း (ၼႂ်းပိုၼ်ႉတီႈၸႄႈဝဵင်းမိူင်းသူႈ တင်းတၢင်ႉယၢၼ်း) ဢၼ်ပဵၼ်ၼႃႈလိၼ်တပ်ႉသိုၵ်းၸိုင်ႈတႆးၵုမ်းၵမ်ၸိူဝ်းၼႆႉ သိုၵ်းမၢၼ်ႈယၢမ်ႈၸိသင်ႇဝႃႈ ႁႂ်ႈထွၼ်ၵႂႃႇၾၢႆႇတူၵ်းတၢင်းၵႃး၊ ယွၼ်ႉၼၼ် မိူဝ်ႈၽွင်းၵၢင်ပီ 2012 သွင်ၾၢႆႇလႆႈပဵၼ်ပၢင်တိုၵ်းၵၼ်မႃး လၢႆလၢႆပွၵ်ႈ။