ဝၼ်းၸိူဝ်ႉၸၢတ်ႈၸိုင်ႈတႆး ဢၼ်ပႃႊတီႊသိူဝ်ၽိူၵ်ႇ (SNDP) ဢွၼ်ႁူဝ်သေၸတ်းတီႈၼေႇပျီႇတေႃႇ မီးၵူၼ်းၶဝ်ႈႁူမ်ႈၼပ်ႉႁူဝ်ပၢၵ်ႇ။ ႁူဝ်ပဝ်ႈ 2 သၽႃး တင်းဢွင်ႇသၢၼ်းၸုၵျီႇၵေႃႈၶဝ်ႈႁူမ်ႈ။

ပၢင်ၶုပ်းထူပ်းဢဝ်မုၼ် ဝၼ်းၸိူဝ်ႉၸၢတ်ႈၸိုင်ႈတႆး (Shan National Day) ၶွပ်ႈၶူပ်ႇ 66 ပီ၊ ဝၼ်းထိ 07/02/13 ဢၼ်ၽွင်း တႅၼ်းပႃႊတီႊသိူဝ်ၽိူၵ်ႇ (SNDP) ၸိူဝ်းႁွတ်ႈၽႅဝ်ၼေႇပျီႇတေႃႇ (ၽွင်းပၢင် ၵုမ်သၽႃး) ဢွၼ်ႁူဝ်သေၸတ်းတီႈၼေႇပျီႇတေႃႇ ၼႆႉ ဢိင်ၼိူဝ်ႁွင်ႉမွၵ်ႇသေ မီးၽွင်းတႅၼ်း မိူင်းတႆး၊ မိူင်းၶၢင်၊ တိူင်းၸႄႈၵႅင်ႇ (ၸၵၢႆး)မိူင်းမၢၼ်ႈ။ ၼၢင်းဢွင်ႇသၢၼ်းၸုၵျီႇ၊ ႁူဝ်ပဝ်ႈသၽႃး ၸႄႈမိူင်းလႄႈ သၽႃးၸိူဝ်ႉၶိူဝ်း တူႇရသူၺ်ႇမၢၼ်း တင်း ဢူးၶိၼ်ႇမွင်ႇမိၼ်ႉၸိူဝ်းၼႆႉၶဝ်ႈႁူမ်ႈ၊ တင်းမူတ်းမီး ၵူၼ်းၶဝ်ႈႁူမ်ႈမွၵ်ႈ 200 - ၼႆယဝ်ႉ။

တီႈပၢင်ၶုၵ်းထူပ်းၼႆႉ ႁူဝ်ပဝ်ႈပႃႊတီႊသိူဝ်ၽိူၵ်ႇ ၸၢႆးဢၢႆႈပဝ်း လၢတ်ႈလွင်ႈပိုၼ်းဝၼ်းၸိူဝ်ႉၸၢတ်ႈ တႆး၊ လွင်ႈပိူဝ်ႈတႃႇႁူမ်ႈမိုဝ်း ၵၼ်ၵေႃႇသၢင်ႈၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇၵႂႃႇမိူဝ်းၼႃႈ၊ ပိူဝ်ႈတႃႇ လွင်ႈငမ်းယဵၼ် တေမၼ်ႈၵိုမ်းၵႂႃႇၼႃႈၶၢဝ်းႁိုင်။ မၼ်းၸဝ်ႈ လၢတ်ႈပႃးဝႃႈ ၵၢင်ၸႂ်ၵူၼ်းမိူင်း ၶႂ်ႈႁႂ်ႈပဵၼ်ၸိုင်ႈမိူင်း ႁူမ်ႈတုမ်ဢၼ်ၸိုၼ်ႈၸၢင်ႇ၊ ၶႂ်ႈမီးသုၼ်ႇလႆႈၽဵင်ႇပဵင်းၵၼ်၊ သုၼ်ႇလႆႈ တႅပ်းတတ်းတူဝ်ၵဝ်ႇႁင်းၶေႃ ၸိူဝ်းၼႆႉ။ ၼင်ႇႁိုဝ်တေပဵၼ်မႃးၼၼ်ႉ တိုၵ်းသူၼ်းႁႂ်ႈၶတ်းၸႂ်ႁဵတ်း သၢင်ႈၵႂႃႇ- ၼႆယဝ်ႉ။

ပၢင်ၶုၵ်းထူပ်းၼႆႉ ၸတ်းတီႈႁၢၼ်ႉၶဝ်ႈၽၵ်းမၢဝ်းၶမ်းၼုမ်ႇ 3 ဢၼ်မႃးပိုတ်ႇမႂ်ႇတီႈၼေႇပျီႇတေႃႇ၊ ႁွင်ႉမွၵ်ႇဝႆႉပႃႊတီႊလႂ် 3 ၵေႃႉ၊ မိူဝ်ႈတႄႇမၼ်း ဢၢၼ်းၸတ်းပၢင်ၵိၼ်ၶဝ်ႈႁူမ်ႈမူႇၵၼ်ၵူၺ်း၊ ၵူၺ်းၵႃႈ ၽိူဝ်ႇထိုင် ၶၢဝ်းယၢမ်းမၼ်းမႃး ၵူၼ်းသမ်ႉမႃးၼမ်ဝႆႉလႄႈ ပဵၼ်ပၢင်ၶုၵ်းထူပ်းဢၼ်ၵႂၢင်ႈၶႂၢင်ၵႂႃႇ။ ၽွင်းတႅၼ်းပႃႇတီႇ သိူဝ်ၽိူၵ်ႇ သၽႃးၵူၼ်းမိူင်း ၸၢႆးႁၵ်ႉ လၢတ်ႈၼင်ႇၼႆ။

ၼႂ်းတိုဝ်ႉတၢင်း ဝၼ်းၸိူဝ်ႉၸၢတ်ႈၸိုင်ႈတႆးၼႆႉ ၽွင်းတႅၼ်းသိူဝ်ၽိူၵ်ႇ သင်ႇလၢတ်ႈပႃးဝႃႈ- ၵူႈပွၵ်ႈၵူႈ ၽဝ်ႇပူၼ်ႉမႃး ပိူဝ်ႈတႃႇ ဝၼ်းၶိူဝ်းတႆးႁဝ်းၶႃႈၼႆႉ ၵွပ်ႈမီးၵၢၼ်ႁၢမ်ႈမႃးသေ ဢမ်ႇလႆႈၸတ်းႁဵတ်း လွတ်ႈလႅဝ်း။ မိူဝ်ႈလဵဝ် ၸၢဝ်းၶိူဝ်းတင်းလၢႆမီးသုၼ်ႇ လႆႈသုၼ်ႇပဵၼ်မႃး၊ ၵၢင်ၸႂ်ၸၢဝ်းၶိူဝ်းမီးၸိူင်ႉႁိုဝ် ၵေႃႈ လႆႈလၢတ်ႈဢွၵ်ႇတႅၵ်ႇလႅင်း ယဝ်ႉလႄႈ ပဵၼ်ၼမ်ႉတွၼ်းၽွၼ်းလီႁဝ်းၶႃႈ။ မိူဝ်းၼႃႈမႃးၵေႃႈ တႃႇၸိူဝ်ႉၸၢတ်ႈႁဝ်းလႄႈသင်၊ ပိူဝ်ႈတႃႇပဵၼ်မႃးၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇလႄႈသင်၊ ပဵၼ်ၵၢၼ်သိူဝ်ႇ ဝႆႉပိုၼ်ႉထၢၼ်မၼ်းဢွၼ်တၢင်းယဝ်ႉ- ဝႃႈၼႆ။