ပူၼ်ႉမႃးယၢမ်းၵၢင်ၶိုၼ်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 66 ပီၼၼ်ႉ ၼၢင်းယိင်းဝၢၼ်ႈၼွင် ယုမ်း ဢိူင်ႇမိူင်းၼိမ် ၸႄႈဝဵင်းၵေးသီး၊ ၺႃးသိုၵ်းမၢၼ်ႈ ၶိုၼ်ႈႁိူၼ်း ၶိုင်ၸူၼ်လႄႈတဵၵ်းၵၼ်ႉၸၼ်။

ဝၼ်းထိ 07/02/13 ယၢမ်းၵၢင်ၶိုၼ်းလိုၵ်း သိုၵ်းမၢၼ်ႈၶလယ 131 သိုၵ်းႁၢၼ်မွင်ႇဢူး ပႃးမိတ်ႈသေ ၵႂႃႇတီႈ ဝၢၼ်ႈၼွင်ယုမ်း ဢိူင်ႇမိူင်းၼိမ် ၸႄႈဝဵင်းၵေးသီး၊ ဢၼ်ယၢၼ်ၾၢႆႇၸၢၼ်းဝဵင်းၵေးသီး 1 လၵ်း။ ၶိုၼ်ႈၵႂႃႇၼိူဝ်ႁိူၼ်းၵူၼ်းဝၢၼ်ႈသေ တွႆႇၽၵ်း တူ ၸႂ်ႉၸဝ်ႈႁိူၼ်းပိုတ်ႇၽၵ်းတူ၊ ပေႃးၸဝ်ႈ ႁိူၼ်းပိုတ်ႇၽၵ်း တူပၼ်ၵေႃႈ ဢဝ်မိတ်ႈၸမ်ႈၶေႃးၸဝ်ႈႁိူၼ်း (ၼၢင်းယိင်းၵေႃႉ ၼိုင်ႈ) သေ တဵၵ်းယွၼ်းငိုၼ်း 70,000 (7 မိုၼ်ႇ) ပျႃး။ ၽွင်းၼၼ်ႉ လုၵ်ႈဢွၼ်ႇၼၢင်းၼၼ်ႉသမ်ႉႁႆႈလႄႈ ဢဝ်မိတ်ႈၸမ်ႈ ၶေႃးၼၢင်းၼၼ်ႉသေ တဵၵ်းၸႂ်ႉၵႂႃႇတူၺ်း လုၵ်ႈဢွၼ်ႇၼႂ်းလုၵ်းၼွၼ်း၊ ပေႃးထိုင်ၼႂ်းလုၵ်းၼွၼ်းၵေႃႈ ၵၼ်ႉၸၼ်တင်ႈတႄႇ ၵၢင်ၶိုၼ်း 12 မူင်းၶိုင်ႈ တေႃႇထိုင်ၵၢင်ၼႂ် 2 မူင်း၊ ႁၢၼ်ႉတေႃႇသိုၵ်းမၢၼ်ႈမွင်ႇဢူးၼွၼ်းလပ်းၵႂႃႇ- ၸၢႆးလႃႉ ၵူၼ်းမိူင်းၼွင် ၵႂႃႇၶဝ်ႈပွႆး ၵေးသီးၵေႃႉၼိုင်ႈလၢတ်ႈ။

ၽွင်းသိုၵ်းမၢၼ်ႈမွင်ႇဢူး တိုၵ်ႉၼွၼ်းလပ်းယူႇၼၼ်ႉ ၼၢင်းယိင်းၵေႃႉၺႃးၵၼ်ႉၸၼ်ၵေႃႈ ဢွၵ်ႇႁိူၼ်းၵႂႃႇႁွင်ႉၵူၼ်းဝၢၼ်ႈ မႃးဝႅတ်ႉတိၺွပ်း၊ ပလိၵ်ႈမၢၼ်ႈၵေႃႉၼၼ်ႉသေ တိၺွပ်းၵႂႃႇ ၽွင်းၵၢင်ၼႂ်ယၢမ်း 3 မူင်းၶိုင်ႈ။ ၼၢင်းယိင်းၵေႃႉၺႃးၵၼ်ႉၸၼ် ဢမ်ႇၶႂ်ႈဢွၵ်ႇၸိုဝ်ႈၵေႃႉၼႆႉ ပဵၼ်မႄႈႁၢင်ႉ မီးလုၵ်ႈ 2 ၵေႃႉ၊ ၵေႃႉၼိုင်ႈဢႃႇယု 2 ၶူပ်ႇ၊ ၵေႃႉၼိုင်ႈ 6 ၶူပ်ႇ။ ၽွင်းၵိူတ်ႇလိူင်ႈၼႆႉ မႄႈမၼ်းၼၢင်းဢမ်ႇယူႇႁိူၼ်း၊ ၵႂႃႇၸွႆႈပိူၼ်ႈႁုင်တူမ်ႈ ႁဵတ်းၶဝ်ႈၽၵ်း ပၢင်ပွႆးၵူပ်ႉၵူႈသွၼ်ႉမိင်ႈ ၼႂ်းဝၢၼ်ႈ- ၵူၼ်းမိူင်းၼွင်သိုပ်ႇ လၢတ်ႈၼင်ႇၼႆ။
ၵပ်းၵၢႆႇလွင်ႈၼႆႉ မိူဝ်ႈဝၼ်းထိ 08/02/13 ၵႂႃႇဢဝ်လိူင်ႈ (ၸွႆးတြႃး)တီႈတပ်ႉပလိၵ်ႈတီႈၵေးသီး။ ၽူႈမီးၸၼ်ႉပလိၵ်ႈၵေး သီးၵေႃႉၼိုင်ႈလၢတ်ႈဝႃႈ - ၵူၼ်းဝၢၼ်ႈၶဝ်မႃးတၢင်ႇလၢတ်ႈလႄႈ ပဵၼ်ၶၻီး (ဢမု)ဝႆႉတီႈႁဝ်းၶႃႈ။ ၼၢင်းယိင်းၵေႃႉဢၼ် ၺႃးသိုၵ်းမၢၼ်ႈၵၼ်ႉၸၼ်ၼၼ်ႉၵေႃႈ ဢဝ်ၵႂႃႇၵူတ်ႇ ထတ်း တူၺ်းတီႈႁူင်းယႃယဝ်ႉ၊ လိူဝ်သေၼၼ်ႉ ၶေႃႈမုလ်းဢၼ်ၵဵဝ်ႇ ၵပ်းလွင်ႈၵၼ်ႉၸၼ်ၵေႃႈ တေသူင်ႇၵႂႃႇထတ်း တီႈဝဵင်းတႃႈၵုင်ႈ- ဝႃႈၼႆ။
တပ်ႉမၢၼ်ႈၶလယ 131 ၼႆႉ မိူဝ်ႈလဵဝ် ဢမ်ႇမီးၽူႈၵွၼ်းတပ်ႉ၊ မီးၵႅမ်ၽူႈၵွၼ်းတပ်ႉၵွင် ၸိုဝ်ႈၸဝ်ႈ ႁၢၼ်ထုၼ်းထုၼ်းၼွင်ႇ ပၵ်းပႂ်ႉၵုမ်းယိပ်းဝႆႉ။ ၼွၵ်ႈသေၼၼ်ႉ တီႈၵေးသီးၼႆႉ ယင်းမီးတပ်ႉပိဝ်ႇႁႃႇ မူးလူးၵွၼ်ႇ- ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈ ၼင်ႇၼႆ။