ၽူႈလူင်ႉလႅၼ်ႇလၢႆၵေႃႉဝႃႈ သိုၵ်းမၢၼ်ႈတိုၼ်းမီးၽႅၼ်ၵၢၼ် သိုၵ်းပိူင်တၢႆ ၽဵဝ်ႈၸုမ်းၸၢဝ်းၶိူဝ်း။ ဝၢႆးယိုဝ်းၶၢင်ယဝ်ႉ မိူဝ်ႈလဵဝ် မၢၼ်ႈတိုၵ်ႉၽဵဝ်ႈၶႂၢၵ်ႇၼၢမ်ႁိမ်းႁွမ်း ပိူဝ်ႈတႃႇႁၢင်ႈ ၵၢၼ်သိုၵ်းတေႃႇဝႃႉ။

လၢႆၾၢႆႇလၢႆၵေႃႉ ၸိူဝ်းလူင်ႉလႅၼ်ႇၵၢၼ်မိူင်းၵၢၼ်သိုၵ်းမိူင်းမၢၼ်ႈလၢတ်ႈဝႃႈ- 1.တပ်ႉသိုၵ်းမၢၼ်ႈတိုၼ်းမီးၽႅၼ်ၵၢၼ်သိုၵ်း ပိူင်တၢႆဝႆႉဝႃႈ ၵၢၼ်ၵႂၢတ်ႇၽဵဝ်ႈၼႃႈလိၼ် လႄႈ ၵၢၼ်ႁူမ်ႇငမ်းၵုမ်းၵမ်ၼႃႈလိၼ်ၼႆႉ တီႈလိၼ်ၵူႈလွၵ်းၼိဝ်ႉတူဝ်ႈပတ်းပိုၼ်ႉ ၸိုင်ႈမိူင်းႁူမ်ႈတုမ်ၼႆႉ တေလႆႈႁဵတ်းၵႂႃႇတိၵ်းတိၵ်း။ 2.မိူဝ်ႈပီၵၢႆ (2012) တပ်ႉသိုၵ်း မၢၼ်ႈဢွၵ်ႇၶေႃႈၸိသင်ႇမႂ်ႇဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ်ၼႆႉ ၼွၵ်ႈၼိူဝ်သေ ပၢင်သဝ်းဢၼ်မီးဝႆႉ ၵဝ်ႇၵဝ်ႇၼၼ်ႉ တိုၼ်းတေဢမ်ႇလႆႈပၼ်မီးပၢင် သဝ်းတပ်ႉမႂ်ႇထႅင်ႈ၊ မီးတီႈလႂ်တေလႆႈ ၸတ်းၵၢၼ်တီႈၼၼ်ႈ။ 3.တတ်းၶၢတ်ႇပႅတ်ႈသဵၼ်ႈတၢင်းတိတ်းတေႃႇ/ၵပ်းသိုပ်ႇၵၼ် ဝူင်ႈၵၢင်ဝၢၼ်ႈႁႆးတင်း ပၢင်သၢင်း (ဝႃႉ)။ 4.မိူဝ်ႈလဵဝ် သိုၵ်းမၢၼ်ႈႁၢင်ႈႁႅၼ်းဝႆႉၽႅၼ်ၵၢၼ်သိုၵ်း ပိူဝ်ႈတႃႇႁၢင်ႈသိုၵ်းတေႃႇဝႃႉ- ၼႆယဝ်ႉ။

ၽူႈလဵပ်ႈႁဵၼ်းၵမ်ႈၽွင်ႈထတ်းသၢင်ဝႃႈ- ၵဵဝ်ႇၵပ်းၶေႃႈထိ 2 ၼၼ်ႉ မိူဝ်ႈပီၵၢႆ တပ်ႉသိုၵ်းၸိုင်ႈတႆး RCSS/SSA ႁဵတ်းတပ်ႉ ပၢင်သဝ်းတီႈတူင်ႇလၢဝ်း မိူင်းၵိုင်၊ သိုၵ်းမၢၼ်ႈၵေႃႈၶိုၼ်ႈယိုဝ်းတႄႉ။ မိူဝ်ႈလဵဝ်လိူဝ်သေပၢင်သဝ်း ၸုမ်းလွႆတႆးလႅင်း RCSS/SSA ၸွမ်းလႅၼ်လိၼ် (ထႆး-တႆး) ဢၼ်မီးယူႇ 5 တီႈ တိုၼ်းဢမ်ႇၶႂ်ႈပၼ်မီးတီႈလႂ် ထႅင်ႈ၊ မီးတီႈလႂ်ၵေႃႈ တိုၼ်းတေ ယိုဝ်း။ မိူၼ်ၼၼ်ၵူၺ်း တပ်ႉသိုၵ်းၸိုင်ႈတႆး SSPP/SSA ၵေႃႈ လိူဝ်တေတီႈငဝ်ႈငုၼ်းဝၢၼ်ႈႁႆး သိုၵ်းမၢၼ်ႈဢမ်ႇၶႂ်ႈႁႂ်ႈမီးတပ်ႉ ပၢင်သဝ်းတီႈလႂ်ထႅင်ႈ၊ ပေႃးမီးၵေႃႈတေယိုဝ်း။   မိူဝ်ႈလဵဝ် ဢၼ်သိုၵ်းမၢၼ်ႈတင်းသိုၵ်းတႆး SSPP/SSA ပဵၼ်ပၼ်ႁႃတိုၵ်းယိုဝ်း ၵၼ် ပွတ်းႁွင်ႇၼၼ်ႉ ယွၼ်ႉသိုၵ်းမၢၼ်ႈ ၶႂ်ႈၽဵဝ်ႈယိုတ်းဝႆႉၼႃႈလိၼ်ႁိမ်းႁွမ်းၼႃႈလိၼ်ဝႃႉတင်းသဵင်ႈ- ဝႃႈၼႆ။